Kusonga

13 Ebuna yo* telamaka na zelo ya nzadi-mungwa.

Mpi mono monaka mbisi mosi ya mfinda+ ke basika na nzadi-mungwa,+ yo vandaka ti bibongo kumi mpi ba-ntu nsambwadi, mpi bampu ya kimfumu kumi vandaka na zulu ya bibongo na yo, kansi na zulu ya ba-ntu na yo bazina ya ke vweza. 2 Mbisi ya mfinda yina mono monaka vandaka bonso nkoyi, kansi makulu na yo vandaka bonso makulu ya urse, mpi munoko na yo vandaka bonso munoko ya ntambu. Dragoni+ pesaka mbisi yina ya mfinda ngolo na yo, kiti na yo ya kimfumu mpi kiyeka ya nene.+

3 Mono monaka nde mosi na kati ya ba-ntu na yo vandaka kumonana bonso nde bo lwadisaka yo mputa yina zolaka kufwa yo, kansi mputa yina zolaka kufwa yo belukaka,+ mpi ntoto ya mvimba landaka mbisi yina ya mfinda ti kuyituka mingi. 4 Bo sambilaka dragoni sambu yo pesaka kiyeka na mbisi ya mfinda, mpi bo sambilaka mbisi ya mfinda ti bangogo yai: “Nani kele bonso mbisi ya mfinda, mpi nani lenda nwana ti yo?” 5 Bo pesaka yo munoko yina ke tuba mambu ya nene mpi mambu ya ke vweza, mpi bo pesaka yo kiyeka ya kusala mambu bangonda 42.+ 6 Mpi munoko na yo yantikaka kutuba mambu ya ke vweza+ Nzambi, sambu na kuvweza zina na yandi, kisika yina yandi ke zingaka, mpi bantu yina ke zingaka na zulu.+ 7 Mpi bo pesaka yo nswa ya kunwanisa basantu mpi ya kununga bo,+ mpi bo pesaka yo kiyeka na zulu ya mabuta yonso, bansi yonso, bandinga yonso, mpi makanda yonso. 8 Mpi bantu yonso yina ke zingaka na ntoto ta sambila yo. Katuka na luyantiku ya nsi-ntoto, bo me sonikaka ve ata zina mosi na kati ya bazina na bo na rulo ya luzingu+ ya Mwana-Dimeme yina bo fwaka.+

9 Kana muntu kele ti makutu, bika yandi wa.+ 10 Kana muntu fwete kwenda na kimpika, yandi ta kwenda na kimpika. Kana muntu ta fwa muntu ya nkaka na mbele ya bitumba,* bo fwete fwa yandi na mbele ya bitumba.+ Diambu yai ke lomba nde basantu+ kukanga ntima+ mpi kuvanda ti lukwikilu.+

11 Ebuna mono monaka mbisi ya nkaka ya mfinda ke basika na ntoto, mpi yo vandaka ti bibongo zole bonso ya mwana-dimeme, kansi yo yantikaka kutuba bonso dragoni.+ 12 Yo ke sadila kiyeka yonso ya mbisi ya mfinda ya ntete+ na meso na yo. Mpi yo ke sala nde ntoto mpi bantu yina ke zingaka kuna kusambila mbisi ya mfinda ya ntete, yina mputa na yo yina zolaka kufwa yo belukaka.+ 13 Mpi yo ke sala bidimbu ya nene, nkutu yo ke sala nde tiya kukatuka na zulu mpi kukulumuka na ntoto na meso ya bantu.

14 Mpi yo ke kusa bantu yina ke zingaka na ntoto, sambu na bidimbu yina bo pesaka yo nswa ya kusala na meso ya mbisi ya mfinda, na ntangu yo ke songa bantu yina ke zingaka na ntoto na kusala kifwani+ ya mbisi ya mfinda yina bo lwadisaka na mbele kansi yina vutukaka na luzingu.+ 15 Mpi bo pesaka yo nswa ya kupesa mupepe* na kifwani ya mbisi ya mfinda, sambu kifwani ya mbisi ya mfinda kutuba mpi kusala nde bo fwa bantu yonso yina ke buya kusambila kifwani ya mbisi ya mfinda.

16 Yo ke pusa bantu yonso na ngolo—bantu ya kukonda mfunu mpi bantu ya mfunu, bamvwama mpi bansukami, bantu ya kele na kimpwanza mpi bampika—sambu bo tula bantu yai kidimbu na diboko na bo ya kitata to na mbunzu na bo,+ 17 mpi sambu ata muntu mosi ve kusumba to kuteka katula kaka muntu yina kele ti kidimbu, zina+ ya mbisi ya mfinda to ntalu ya zina na yo.+ 18 Diambu yai ke lomba mayele ya kubakisa mambu mbote-mbote: Muntu yina kele ti mayele kutanga ntalu ya mbisi ya mfinda, sambu yo kele ntalu ya muntu; mpi ntalu na yo kele 666.+