Dilongi Ya 7
Kufinama na Nzambi na Nzila ya Kisambu
Sambu na inki yau kele mfunu na kusamba ntangu yonso? (1)
Nge fwete samba nani, mpi inki mutindu? (2, 3)
Inki mambu mefwana na kusadila kisambu? (4)
Inki ntangu nge fwete kusamba? (5, 6)
Keti Nzambi kendimaka bisambu yonso? (7)
1. Kisambu kele disolo ya luzitu ti Nzambi. Nge fwete kusamba Nzambi ntangu yonso. Mutindu yina, nge lenda kudiwa ya kukangama na yandi bonso na nduku mosi ya zolwa. Yehowa kele ya kuluta nene mpi na ngolo mingi, kansi yandi kewaka bisambu na beto! Keti nge kesambaka Nzambi ntangu yonso?—Nkunga 65:2; 1 Tesalonika 5:17.
2. Kisambu kele ndambu ya lusambu na beto. Kansi, beto fwete kusamba kaka Nzambi ya kyeleka, Yehowa. Ntangu Yezu kuvandaka awa na ntoto, yandi kusambaka ntangu yonso Tata na yandi, muntu ya nkaka ve. Beto fwete kusala kiteso mosi. (Matayo 4:10; 6:9) Kansi, bisambu na beto yonso fwete kusalama na zina ya Yezu. Yau kemonisa nde beto kezitisa pozisio ya Yezu mpi nde beto ketula lukwikilu na kimenga ya nkudulu na yandi.—Yoane 14:6; 1 Yoane 2:1, 2.
3. Ntangu beto kesamba, beto fwete kutuba na Nzambi tuka na ntima na beto. Beto fwete ve kuvutukila bisambu na beto tuka yina ya beto mekangaka na ntu to kutanga yau tuka na mukanda ya bisambu. (Matayo 6:7, 8) Beto lenda kusamba na konso inki pozisio yina ya luzitu, na konso ntangu, mpi konso inki kifulu. Nzambi lenda kuwa ata bisambu ya nsi ya ntima. (1 Samuele 1:12, 13) Yau kele mbote na kuzwa kisika mosi ya pima ntama ti bantu ya nkaka sambu na kusala bisambu na beto mosi.—Marko 1:35.
4. Nge lenda kusamba sambu na inki mambu? Konso kima yina lenda kusimba kuwakana na nge ti yandi. (Filipi 4:6, 7) Kisambu ya mbandu kemonisa nde beto fwete kusamba sambu na zina ya Yehowa mpi lukanu na yandi. Beto lenda mpi kulomba nde bansatu na beto ya kinsuni kulungana; sambu masumu na beto kulolulama mpi sambu na lusadisu ya kununga mpukumuna. (Matayo 6:9-13) Bisambu na beto fwete kuvanda ve ya bwimi. Beto fwete kusamba kaka sambu na bima yina kewakana ti luzolo ya Nzambi.—1 Yoane 5:14.
5. Nge lenda kusamba konso inki ntangu yina ya ntima na nge kepusa nge na kutonda to na kukembila Nzambi. (1 Bansangu 29:10-13) Nge fwete kusamba ntangu nge mezwa bampasi mpi ntangu lukwikilu na nge kele na kumekama. (Nkunga 55:22; 120:1) Yau melunga na kusamba na ntwala ya kudya madya na nge. (Matayo 14:19) Yehowa kelomba beto na kusamba “na mabaku yonso.”—Efezo 6:18.
6. Mingimingi, beto fwete kusamba kana beto mesala disumu ya nene. Na ntangu ya mutindu yina beto fwete kulomba mawa mpi ndolula ya Yehowa. Kana beto kufunguna masumu na beto na yandi mpi kusala ngolo na kukonda kuvutukila yau, Nzambi kele “penepene na kulolula.”—Nkunga 86:5; Bingana 28:13.
7. Yehowa kewaka bisambu ya bantu ya lunungu kaka. Sambu Nzambi kuwa bisambu na nge, nge fwete kuvanda kesala bikesa yonso sambu na kuzinga na kuwakana ti bansiku na yandi. (Bingana 15:29; 28:9) Nge fwete kuvanda ya kudikulumusa na ntangu nge kesamba. (Luka 18:9-14) Nge fwete kusala na kuwakana ti mambu yina ya nge kesamba. Mpila yina, nge tamonisa nde nge kele ti lukwikilu mpi nde nge kesala mpenza yina ya nge ketuba. Kaka na kusalaka mutindu yina, Yehowa tapesa mvutu na bisambu na nge.—Baebreo 11:6.