Dilongi Ya 8

Luzingu ya Dibuta Yina Keyangidikaka Nzambi

Kisika ya bakala kele inki na kati ya dibuta? (1)

Inki mutindu bakala fwete kutadila nkento na yandi? (2)

Inki mikumba tata kele na yau? (3)

Kisalu ya nkento kele inki na kati ya dibuta? (4)

Nzambi kelombaka inki na bibuti mpi na bana? (5)

Inki mutindu Biblia ketadilaka nkabwana mpi kufwa dikwela? (6, 7)

1. Biblia ketuba nde bakala kele mfumu ya dibuta. (1 Korinto 11:⁠3) Bakala fwete kuvanda ti nkento mosi kaka. Bau fwete kukwelana na mutindu mosi ya mbote na kuwakana ti nsiku.​—⁠1 Timoteo 3:2; Tito 3:⁠1.

2. Bakala fwete kuzola nkento na yandi mutindu yandi kekudizolaka yandi mosi. Yandi fwete kutadila yandi mutindu Yezu ketadilaka balandi na yandi. (Efezo 5:​25, 28, 29) Yandi fwete kubula ve nkento na yandi to kunyokula yandi na konso inki mutindu yina. Kansi, yandi fwete kupesa yandi lukumu mpi luzitu.​—⁠Kolosai 3:19; 1 Piere 3:⁠7.

3. Tata fwete kusala ngolo sambu na kusungimina dibuta na yandi. Yandi fwete kupesa madya, mvwatu, mpi kisika ya kulala na nkento mpi na bana na yandi. Tata fwete kulungisa mpi bansatu ya kimpeve ya dibuta na yandi. (1 Timoteo 5:⁠8) Yandi fwete kulungisa mukumba ya kusadisa dibuta na yandi na kulonguka mambu yina metala Nzambi mpi balukanu na Yandi.​—⁠Kulonga 6:​4-9; Efezo 6:⁠4.

4. Nkento fwete kuvanda nsadisi ya mbote sambu na bakala na yandi. (Kuyantika 2:18) Yandi fwete kusadisa bakala na yandi na kulonga mpi kusansa bana na bau. (Bingana 1:⁠8) Yehowa kelomba na nkento na kusungimina dibuta na yandi na zola yonso. (Bingana 31:​10, 15, 26, 27; Tito 2:​4, 5) Yandi fwete kuvanda ti luzitu ya mudindu sambu na bakala na yandi.​—⁠Efezo 5:​22, 23, 33.

5. Nzambi kelomba na bana na kulemfuka na bibuti na bau. (Efezo 6:​1-3) Yandi kezola kumona bibuti kelonga mpi kesungika bana na bau. Bibuti fwete kulutisa ntangu mingi ti bana na bau mpi kulonguka Biblia kumosi ti bau, kudibanzabanzaka sambu na bansatu na bau ya kimpeve mpi ya mabanza. (Kulonga 11:​18, 19; Bingana 22:​6, 15) Bibuti fwete ve kulola bana na bau na mutindu mosi ya mbi to ya nku.​—⁠Kolosai 3:⁠21.

6. Kana bankwelani kele ti matata na yina metala kuwakana na kati na bau, bau fwete kusala ngolo na kusadila bandongisila ya Biblia. Biblia ketuma beto na kumonisa zola mpi na kuvanda muntu yina kelolulaka nkweno. (Kolosai 3:​12-14) Ndinga ya Nzambi kesyamisa ve nkabwana bonso mwaye ya kumanisa mwa matata ya fyoti. Kansi nkento talenda kupona na kubikisa bakala na yandi kana (1) yandi kebuya na nku na kusungimina dibuta na yandi (2) yandi kele nku mingi kibeni na mutindu nde mavimpi ti luzingu na yandi kele na kigonsa, to (3) luteleminu na yandi ya kuluta kiteso kepesa yandi nzila ve ata fyoti ya kusamba Yehowa.​—⁠1 Korinto 7:​12, 13.

7. Bankwelani fwete kuvanda ya kwikama mosi na ya nkaka. Bizumba kele disumu na Nzambi mpi na nkwelani na nge. (Baebreo 13:⁠4) Na kutadila Masonuku, kikuma mosi kaka ya kufwila makwela yina kepesama nzila na kukwela dyaka, kele kuvukisa nitu na nganda ya makwela. (Matayo 19:​6-9; Roma 7:​2, 3) Yehowa keyinaka yau kana bantu mefwa makwela nkatu kikuma ya Masonuku mpi mekwela muntu ya nkaka.​—⁠Malashi 2:​14-16.

[Bifwanisu ya kele na lutiti 16, 17]

Tata ya zola kelungisaka bansatu ya kinsuni ti ya kimpeve ya dibuta na yandi

[Kifwanisu ya kele na lutiti 17]

Nzambi kezola kumona bibuti kelonga bana na bau mpi kesungika bau