Dilongi Ya 10

Bisalu Yina Nzambi Keyinaka

Inki mutindu nge fwete kutadila mambu yina ya Nzambi ketubaka nde yau kele mbi? (1)

Inki mitindu ya kuvukisa nitu kele mbi? (2)

Inki mutindu Mukristu fwete kutadila luvunu? (3) bansaka ya mbongo? (3) muyibi? (3) mubulu? (4) lusambu ya bampeve ya mbi? (5) kulauka malafu? (6)

Inki mutindu muntu lenda kukatuka na kimpika ya bikalulu mpi bisalu ya mutindu yina? (7)

1. Bansadi ya Nzambi kezolaka mambu yina kele ya mbote. Kansi bau fwete kulonguka mpi na kuyina mambu yina kele ya mbi. (Nkunga 97:10) Yau kesongidila kubuya bisalu yina ya Nzambi keyina. Wapi mwa bisalu yango?

2. Pite: Kuvukisa nitu na kati ya bantu yina mekwelaka ntete ve, bizumba, kuvukisa nitu ti bambisi, kuvukisa nitu na kati ya bampangi, mpi kuvukisa nitu babakala ti babakala, kele yau yonso masumu ya nene na ntwala ya Nzambi. (Levi 18:6; Roma 1:​26, 27; 1 Korinto 6:​9, 10) Kana bantu zole mekwelaka ve kansi kezingaka kumosi, bau fwete kukabwana to kukwelana na kuwakana ti bansiku.​—⁠Baebreo 13:⁠4.

3. Luvunu, Bansaka ya mbongo, Muyibi: Yehowa Nzambi lenda ve kukusa. (Tito 1:⁠2) Bantu yina kezola kundimama na yandi fwete kubuya luvunu. (Bingana 6:​16-19; Kolosai 3:​9, 10) Mitindu yonso ya bansaka ya mbongo kele ya kubeba na kindila. Yau yina, Bakristu kevukanaka ve na konso inki mutindu ya nsaka ya mbongo yina, mu mbandu loterie, nsaka ya bakarti ya mbongo, mpi bingo. (Efezo 5:​3-5) Mpi Bakristu keyibaka ve. Bau kesumbaka ve bima ya muyibi na luzolo yonso to kubaka bima nkatu nswa.​—⁠Kubasika 20:15; Efezo 4:⁠28.

4. Nganzi, Mubulu: Kukonda kuyala makasi lenda kunata na bisalu ya mubulu. (Kuyantika 4:​5-8) Muntu ya mubulu lenda ve kuvanda nduku ya Nzambi. (Nkunga 11:5; Bingana 22:​24, 25) Yau kele mbote ve na kuvutula mbela to na kuvutula mambi na mambu ya mbi yina bankaka lenda kusadila beto.​—⁠Bingana 24:29; Roma 12:​17-21.

5. Malanda ya mbi ya kimpangula mpi lusambu ya bampeve ya mbi: Bantu mingi kebingaka ngolo ya bampeve ya mbi sambu na kumeka kubelula maladi. Bankaka kelosilaka bambeni na bau maladi na nzila ya bampeve ya mbi to nkutu kefwaka bau. Ngolo yina kesalaka na nsi ya bisalu yai yonso kele Satana. Yau yina, Bakristu fwete kuvukana ve ti bau ata fyoti. (Kulonga 18:​9-13) Kubikala ya kukangama na Yehowa kele lutaninu ya kuluta mbote na malanda ya mbi yina bantu ya nkaka lenda kutindila beto.​—⁠Bingana 18:⁠10.

6. Kulauka malafu: Yau kele mbi ve na kunwa mwa vinu, malafu, to binwa yonso yina kele ti kabondo na kati. (Nkunga 104:15; 1 Timoteo 5:23) Kansi malafu ya ngolongolo ti kulauka malafu kele mbi na meso ya Nzambi. (1 Korinto 5:​11-13; 1 Timoteo 3:⁠8) Kunwa malafu ya kuluta mingi lenda kubebisa mavimpi na nge mpi kupanza dibuta na nge. Yau lenda kunata nge mpi na kubwa na bampukumuna ya nkaka.​—⁠Bingana 23:​20, 21, 29-35.

7. Bantu yina kesalaka bisalu yina ya Nzambi kemonisaka nde yau kele mbi “ta vanda bantu ya kimfumu ya Nzambi ve.” (Galatia 5:​19-21) Kana nge kezolaka mpenza Nzambi mpi kezola kuyangidika yandi, nge lenda kukatuka na kimpika ya bisalu yai. (1 Yoane 5:⁠3) Longuka na kuyina mambu yina ya Nzambi kemonisa nde yau kele mbi. (Roma 12:⁠9) Sala kinduku ti bantu yina kele ti bikalulu ya kinzambi. (Bingana 13:20) Bankundi Bakristu ya kuyela lenda kumonana nto ya lusadisu. (Yakobo 5:14) Na zulu ya yonso, tula ntima na lusadisu ya Nzambi na nzila ya kisambu.​—⁠Filipi 4:​6, 7, 13.

[Bifwanisu ya kele na lutiti 20, 21]

Nzambi keyinaka kulauka malafu, muyibi, bansaka ya mbongo, ti bisalu ya mubulu