Mutindu ya Kuyidika Diskure ya Bantu Yonso

KONSO mposo, mabundu mingi ya Bambangi ya Yehowa kebongisaka diskure mosi ya bantu yonso yina ketubilaka disolo mosi ya Biblia. Kana nge kele nkuluntu to nsadi ya kisalu, keti nge kemonisaka nde nge kele mutubi mpi longi ya mbote ya lenda tuba na ntwala ya bantu yonso? Kana yo ke buna, bo lenda lomba nge na kusala diskure ya bantu yonso. Nzo-Nkanda ya Kisalu ya Teokrasi mesadisaka bampangi ya babakala mingi mpenza na kukuka kusala mukumba yai. Kana bo mepesa nge diskure ya bantu yonso, na nki nge fwete yantika?

Longuka Pula ya Diskure

Na ntwala nge yantika na kusosa mambu yankaka, tanga pula ya diskure mpi yindulula mambu yina yo ketuba tii kuna ya nge tabakisa yo. Kanga ntu ya disolo na nge na ntu sambu yo yina ntu-dyambu ya diskure na nge. Inki nge talonga bantu yina tawidikila nge? Lukanu na nge kele inki?

Yikana ti bantu-dyambu ya nene. Longuka bangindu yina ya mfunu. Inki mutindu konso ngindu yango kewakana ti ntu-dyambu? Na nsi ya konso ngindu ya mfunu kele ti bangindu yankaka ya melanda. Bangindu yina kesimba bangindu yai yankaka kele na nsi na yo. Tala mutindu konso kitini ya diskure kewakana ti yina kele na ntwala, mutindu yo kenata na yina melanda, na kusalaka mutindu yina yo kesadisa na kulungisa lukanu ya diskure. Kana nge mebakisa ntu-dyambu mpi lukanu ya diskure, mpi mutindu bangindu ya mfunu kesadisa na kulungisa lukanu yina, nge lenda yantika ntangu yai na kuyidika malongi na nge.

Na luyantiku, yo lenda vanda mbote nde nge baka diskure na nge bonso badiskure ya fyoti iya to tanu, konso diskure ti ngindu mosi ya mfunu. Bongisa bangindu yango mosi-mosi.

Pula yina bo mepesa nge kele kisadilu yina tasadisa nge na kubongisa diskure na nge. Nge lenda sadila yo ve bonso banoti ya nge tasadila sambu na kusala diskure na nge. Yo kele bonso eskeleti ya kelomba nde nge fwete tula yo misuni, nge pesa yo ntima mpi mpema ya luzingu.

Mutindu ya Kusadila Masonuku

Malongi ya Yezu Kristu ti ya balongoki na yandi vandaka kukatuka na Masonuku. (Luka 4:16-21; 24:27; Bis. 17:2, 3) Malongi na nge mpi lenda katuka na kisika yina mosi. Mambu ya nge ketuba na diskure na nge fwete katuka na Masonuku. Olie ya kusuka kaka na kutendula mpi kusadila bansa yina kele na pula yina bo pesaka nge, sosa kubakisa mutindu Masonuku kesimba bansa yango, ebuna sadila mambu yina Masonuku ketuba sambu na kulonga.

Ntangu nge kebongisa diskure na nge, tanga baverse yonso yina bo mesonika ve bangogo na yo na diskure. Sosa kubakisa mbote mambu ya bo ketubila na verse yango. Baverse yankaka kesadisaka kaka na kubakisa mbote mambu yina kulutaka na ntangu ya ntama. Nge tatanga ve to kupesa bangindu ya baverse yonso na ntangu nge kesala diskure na nge. Pona baverse ya kuluta mbote sambu na bawi na nge. Kana nge tula dikebi na baverse yina kele na pula yina bo pesaka nge, ziku nge tavanda ve ti mfunu ya kuyika baverse yankaka ya Masonuku.

Kima tasala nde diskure na nge kuvanda mbote kele ve ntalu ya baverse yina nge tasadila, kansi valere ya malongi. Na ntwala ya kutanga baverse, monisa sambu na nki nge kesadila yo. Baka ntangu ya kumonisa mutindu ya kusadila yo. Na nima ya kutanga verse mosi, bika Biblia na nge ya kukangula na kisika yina ntangu nge ketendula verse yango. Bantu yina kelanda nge tasala mpi mutindu mosi. Inki mutindu nge lenda tedimisa mpusa ya bantu yina kewidikila nge mpi kusadisa bo na kubaka mambote mingi ya kekatuka na Ndinga ya Nzambi? (Neh. 8:8, 12) Nge lenda sala yo kana nge ketendula, nge kepesa bambandu, mpi nge kemonisa mutindu ya kusadila yo.

Kutendula. Kana nge kekudibongisa sambu na kutendula verse mosi ya mfunu, kudiyula mutindu yai: ‘Inki yo kezola kutuba? Sambu na nki mu kesadila yo na diskure na mono? Bantu yina tawidikila mono takudiyula nki sambu na verse yai?’ Nge lenda longuka kapu ya mvimba, mambu yina yo ketubila, mambu yina kusalamaka mpi yina kunataka na kusonika yo, kisika yina mambu yango kulutaka, ngolo ya bangogo, ngindu yina nsoniki kuvandaka na yo. Yo kelomba nde nge sosa-sosa mambu. Nge tazwa mambu mingi ya mfunu na mikanda yina “mpika ya kwikama mpi ya mayele” mebasisaka. (Mat. 24:45-47, NW) Kusosa ve kutendula mambu yonso ya verse yango ketuba, kansi tendula sambu na nki nge lombaka bantu yina kelanda nge na kutanga yo na kuwakana ti dyambu yina nge ketubila.

Bambandu. Lukanu ya bambandu kele kunata bantu yina kewidikila nge na kubakisa mbotembote to kusadisa bo na kuyibuka ngindu to nsiku ya nge mekatuka kutubila. Bambandu kesadisaka bantu na kubakisa mambu ya nge metubila bo mpi kuwakanisa yo ti kima mosi ya bo mezabaka dezia. Yezu kusalaka mutindu yai ntangu yandi salaka Disolo na yandi ya mezabanaka mingi na zulu ya Ngumba. “Bandeke,” “bintuntu yina kele na nseke,” ‘kielo ya fioti,’ ‘nzo na zulu ya matadi,’ mpi bambandu yankaka mingi ya mutindu yai kuyikaka ngolo na malongi na yandi, kukumisaka yo pwelele, mpi kusalaka nde bantu kuvila yo ve.—Mat., bak. 5–7.

Mutindu ya kusadila. Kutendula verse mpi kupesa bambandu tapesa bantu nzayilu, kansi kima kebutaka mbuma kele kusadila nzayilu yina. Ya kyeleka, mukumba ya kusadila nsangu ya Biblia kele na ntu ya bantu yina kewidikila nge, kansi nge lenda sadisa bo na kubakisa mambu ya bo fwete sala. Kana nge mona nde bantu yina kewidikila nge kebakisa verse ya nge ketadila mpi kemona kuwakana na yo ti ngindu ya nge ketubila, baka ntangu ya kumonisa bo mambu yina yo lenda nata na lukwikilu mpi na bikalulu. Monisa mambote ya kulosa bangindu to bikalulu ya mbi yina kewakana ve ti kyeleka ya nge ketubila.

Ntangu nge keyindula na kutendula mutindu ya kusadila baverse, kuvila ve nde bantu yina kewidikila nge mekatuka na bisika mingi ya kuswaswana mpi bo kekutanaka ti mambu mingi ya mpila na mpila. Na kati na bo, bankaka lenda vanda bantu ya mpa, baleke, bambuta, mpi bayina kenwana ti mambu mingi ya bo kekutana na yo. Sala na mpila nde diskure na nge kutubila mambu ya kyeleka ya bantu kekutanaka na yo na luzingu. Kupesa ve bandongisila yina tamonisa neti nde nge keyindula bantu fyoti mpamba na kati ya bawi na nge.

Badesizio Yina Mutubi Fwete Baka

Badesizio yankaka ya metala diskure na nge bo mebakilaka nge yo dezia. Bo memonisa nge dezia pwelele bangindu ya mfunu, mpi kiteso ya ntangu ya nge fwete sala na kutubila konso ntu-dyambu ya mfunu. Nge muntu fwete baka badesizio yankaka. Nge lenda pona na kulutisa ntangu mingi to fyoti na bangindu yankaka ya fyoti. Kuyindula ve nde nge fwete lutisa ntangu kiteso mosi na bangindu ya fyoti yonso. Yo lenda nata nge na kusala malongi ntinu-ntinu mpi kufulusa ba-ntu ya bantu yina kelanda nge na mambu mingi kuluta. Inki mutindu nge lenda pona bangindu yina nge lenda lutisila ntangu mingi ti yina nge lenda tubila kaka na bunkufi? Kudiyula mutindu yai: ‘Inki bangindu tasadisa munu na kubasisa dibanza ya mfunu ya diskure? Inki bangindu tapesa bantu yina kelanda mono mambote ya kuluta mingi? Keti kukatula verse mosi mpi ngindu yina yo ketubila tafyotuna banzikisa yina bo kepesa?’

Sala ngolo na kukotisa ve mambu ya nge mosi keyindula to bangindu na nge mosi. Ata Mwana ya Nzambi, Yezu Kristu, vandaka kutuba ve ‘mambu ya kukatukaka na yandi mosi.’ (Yoa. 14:10) Kuvila ve nde kikuma ya bantu kekwisilaka na balukutakanu ya Bambangi ya Yehowa kele ya kuwa mambu yina Biblia ketuba. Kana bo mebakaka nge bonso mutubi ya mbote, yo kele sambu nge kesalaka ngolo na kubenda ve dikebi ya bantu na kimuntu na nge mosi kansi na Ndinga ya Nzambi. Yo yina bantu kesepilaka ti badiskure na nge.—Filp. 1:10, 11.

Mutindu nge mesadila pula yina kuvandaka bonso eskeleti sambu na kuyidika bantendula ya kitoko ya Masonuku yina kele bonso kufulusa eskeleti na misuni, ntangu yai nge lenda yantika kuvutukila diskure na nge mbala mingi. Yo kele mbote na kusala yo na ndinga ya ngolo. Kima ya mfunu kele kuzikisa nde nge mebakisa mbote bangindu yonso. Nge fwete sala ngolo na mpila nde nge tula ntima na nge yonso na diskure na nge, tubaka ti kundimisa, mpi longa kyeleka ti kikesa yonso. Na ntwala ya kusala diskure na nge, kudiyula nde: ‘Inki lukanu mu kezola kulungisa? Keti bangindu ya mfunu kele pwelele? Keti Masonuku kele kisadilu ya ntete na diskure na mono? Keti konso ngindu ya nene kenata na yina kelanda? Keti diskure yango kenata bantu na kumonisa ntonda na Yehowa mpi sambu na mambu yina yandi mepesaka beto? Keti bangogo ya nsuka kewakana ti ntu-dyambu, yo kesonga bawi mambu yina bo fwete sala, mpi kepusa bo na kusadila mambu yango?’ Kana nge lenda pesa mvutu nde ee na bangyufula yai yonso, tuba nde nge kele ya kuyilama na ‘kubenda bantu na kuzaba mambu,’ sambu na mambote ya dibundu mpi sambu na kupesa Yehowa lukumu!—Bing. 15:2.

KANA MUNTU YANKAKA TABALULA DISKURE NA NGE

Sambu bantu ketubaka bandinga mingi na insi mosi, mitubi yina kesalaka badiskure na ntwala ya bantu mingi lenda sadila bantu yankaka sambu na kubalula badiskure na bo. Kana nge tasadila muntu yankaka sambu na kubalula diskure na nge, bangindu yai kelanda tasadisa nge ti muntu yina tabalula diskure na nge.

Kima tabongisa to tabebisa diskure na nge kele kisalu ya muntu yina tabalula diskure na nge tasala. Ata muntu yina meyikanaka na kubalula badiskure tasala kisalu ya mbote kana nge sadisa yandi na kudibongisa.
Mbala mingi, nge fwete fyotuna diskure na nge mutindu yai: kabula yo na bitini tatu mpi kukatula kitini mosi sambu na kubikila muntu yina tabalula yo ntangu. (Katula kaka ndinga ya bidimbu, sambu bo lenda balula yo mbala mosi ntangu mutubi ketuba.)
Na ntwala ya kusala diskure, beno tadila pula yonso ya diskure na nge na bunda na yo mpi lukanu na yo ti muntu yina tabalula yo. Kana diskure na nge kele diskure maniskri na lukutakanu ya diskrike, muntu yina tabalula yo fwete tanga kopi ya diskure yina na ntwala.
Beno tadila baverse yina nge tatanga ti muntu yina tabalula diskure na nge. Beno zikisa kana Biblia ya ndinga yina yandi tasadila kele ti bangindu ya kiteso mosi ti Biblia na nge. Songa muntu yina tabalula bimvuka ya bangogo yina kele na baverse yina ya nge tanyata to ya nge tatendula.
Beno baka desizio kana beno tatanga baverse na bandinga yonso zole to kaka na ndinga mosi. Kutanga yo na ndinga yina bawi kebakisa lenda lunga.
Kutuba nswalu-nswalu badati, bantalu, mpi baverse lenda pesa muntu yina kebalula diskure na nge mpasi. Pemaka, mpi yo tavanda mbote mingi na kusadila bantalu yina kesuka ti nkatu.
Beno tadila konso mbandu, kingana, mpi bangogo ya mpasi yina nge kekana kusadila. Zikisa kana muntu yina tabalula diskure na nge kebakisa yo mpi nde yandi lenda balula bangogo yina na ndinga yina bawi kebakisa.
Ntangu nge ketuba, sadilaka bansa ya nkufi. Pesaka ngindu ya mvimba na ntwala ya kubikila muntu yina kebalula diskure ntangu ya kutuba. (Yandi kebalula bangindu, kansi bangogo mpenza ve.) Sambu kubalula kulandana mbote, kingaka tii kuna muntu yina kebalula diskure na nge kumanisa na ntwala nde nge landa na kutuba.
Muntu yina kebalula diskure na nge ketula ntima nde nge tatubaka na ndinga ya ngolo ya kufwana mpi nde nge tatubaka bangogo pwelele.