KITINI YA 3
Luzingu Vandaka Nki Mutindu na Paladisu?
Yehowa pesaka Adami ti Eva bima mingi ya kitoko. Kuyantika 1:28
Yehowa salaka nkento ya ntete, Eva, mpi pesaka yandi na Adami sambu yandi vanda nkento na yandi.—Kuyantika 2:21, 22.
Yehowa gangaka bo ti mabanza mpi nitu ya kukuka, ya kukonda kifu.
Bo vandaka kuzinga na Paladisu, kilanga ya Edeni—kisika mosi ya kitoko mingi yina vandaka ti nzadi, banti ya ke butaka bambuma, mpi bambisi.
Yehowa vandaka kusolula ti bo; yandi vandaka kulonga bo. Kana bo widikilaka yandi, bo zolaka kuzinga kimakulu na Paladisu na ntoto.
Nzambi buyisaka bo na kudia mbuma ya nti mosi. Kuyantika 2:16, 17
Yehowa songaka Adami ti Eva nti mosi na kilanga mpi yandi zabisaka bo nde kana bo dia mbuma na yo, bo ta fwa.
Wanzio mosi kolamaka na Nzambi. Wanzio yina ya mbi kele Satana Diabulu.
Satana vandaka kuzola ve nde Adami ti Eva kulemfukila Yehowa. Yo yina yandi sadilaka nioka mosi sambu na kutubila Eva nde kana yandi dia mbuma ya nti yina, yandi ta fwa ve, kansi yandi ta kuma bonso Nzambi. Ya kieleka, yo vandaka luvunu.—Kuyantika 3:1-5.