Tula Ntima na Nge na Yehowa

“Mfumu, ntima na mono kele na nge; katuka ntangu mono vandaka leki tii bubu yai, mono ke tulaka nge ntima.”​—NKUNGA 71:5.

1. Inki ntembe Davidi, toko yina vandaka ngungudi, kukutanaka na yo?

BAKALA yango kuvandaka nda kiteso ya bametre tatu. Mpila ya kuyituka kele ve kana basoda yonso ya Izraele vandaka kuwa boma na kunwanisa yandi! Na nsungi ya bamposo mingi, konso suka mpi konso nkokila, Goliati, mbinga ya Filistia vandaka kufinga basoda ya Izraele, mpi yandi vandaka kulomba bo na kutinda bakala mosi ya ngolo yina lenda nwana ti yandi. Nsukansuka, toko mosi ya bakala, muntu kundimaka na kumanisa ntembe yina kansi soda ve. Davidi, toko yina vandaka ngungudi ya mameme, vandaka kumonana bonso kima mosi ya mpamba na ntwala ya mbeni na yandi. Ya kyeleka, binwaninu ya Goliati kulutaka yina Davidi kuvandaka na yo! Ata mpidina, toko yai kunwanisaka mbinga yina mpi kukumaka kidimbu ya kikesa ya ntangu yonso.​—1 Samuele 17:1-51.

2, 3. (a) Inki kusadisaka Davidi na kunwana ti Goliati kukonda boma? (b) Inki bitambi zole beto tatadila sambu na kutula ntima na beto na Yehowa?

² Inki kima kupesaka Davidi kikesa ya mutindu yai? Tala mwa bangogo yina Davidi kusonikaka na bamvula ya nsuka ya luzingu na yandi: “Mfumu, ntima na mono kele na nge; katuka ntangu mono vandaka leki tii bubu yai, mono ke tulaka nge ntima.” (Nkunga 71:5) Ya kyeleka, ntangu yandi vandaka toko, Davidi kutulaka ntima na yandi yonso na Yehowa. Ntangu yandi kwendaka kunwanisa Goliati, Davidi kusongaka yandi nde: “Nge ke kwisa na mono ti mbele, ti dikonga ya nene ti ya fioti, kansi mono, mono ke kwisa na zina ya [Yehowa, NW], Nzambi ya basoda ya Israele, ya nge me finga.” (1 Samuele 17:45) Ata Goliati kutulaka ntima na ngolo na yandi ya mingi mpi na binwaninu na yandi, Davidi kutulaka ntima na yandi na Yehowa. Sambu Mfumu ya Inza ya Mvimba vandaka na lweka mosi ti yandi, Davidi kuvandaka ve na kikuma ya kuwa muntu ya mpamba boma, ata muntu yango kuvandaka nda mpi ti binwaninu mingi.

³ Ntangu nge ketanga disolo ya Davidi, keti nge kezola nde ntima ya nge ketulaka na Yehowa kuvanda mpi ngolo mingi? Ziku, mingi na kati na beto kezolaka yo. Yo yina, bika beto tadila bitambi zole yina beto lenda sala sambu na kutula ntima na beto na Yehowa. Ntete, beto fwete bakisa mbote kima ya kekangisaka bantu nzila na kutula ve ntima ya ngolo ya mutindu yina. Ya zole, beto fwete zaba mpenza mambu yina kutula ntima na Yehowa kelombaka.

Katula Kima ya Kesalaka nde Bantu Kutula Ve Ntima na Yehowa

4, 5. Sambu na nki bantu mingi kemonaka mpasi na kutula ntima na Nzambi?

⁴ Inki kekangisaka bantu nzila na kutula ve ntima na bo na Nzambi? Mbala mingi, bantu yankaka kezabaka ve sambu na nki mambu ya mbi kebwilaka bantu? Bo melongaka bantu mingi nde mpasi yina kebwilaka bantu kekatukaka na Nzambi. Ntangu kisumbula mosi mesalama, bamfumu ya mabundu lenda tuba nde Nzambi “mebaka” bantu yina mebwila dikambu yango sambu na kuvanda ti bo na zulu. Dyaka, bamfumu mingi ya mabundu kelongaka nde Nzambi mekanaka mambu yonso na ntwala, yika mpi bisumbula ti mambu ya mbi yina kesalamaka na inza yai. Yo tavanda mpasi na kutula ntima na Nzambi ya ntima ngolo ya mutindu yai. Satana, yina kekangisaka mabanza ya mimpani, meyilamaka na kumwanga “malongi ya bampeve ya mbi” ya mitindu yonso.​—1 Timoteo 4:1; 2 Korinto 4:4.

⁵ Satana kezolaka nde bantu kutula dyaka ve ntima na Yehowa. Mbeni yina ya Nzambi kezolaka ve nde beto zaba bikuma ya kyeleka ya bantu kemoninaka mpasi. Yo yina kana beto melonguka na Masonuku bikuma ya bantu kemoninaka mpasi, Satana kezolaka nde beto vilana malongi yina. Yo yina, yo kelomba nde beto tadilaka mbala na mbala bikuma tatu ya nene yina kesalaka nde bantu kumona mpasi. Kana beto kesala mutindu yina, beto lenda ndimisa ntima na beto nde Yehowa ve muntu kenataka bampasi ya beto kekutanaka na yo na luzingu.​—Filipi 1:9, 10.

6. Inki mutindu 1 Piere 5:8 kepesa kikuma mosi ya kesalaka nde bantu kumona mpasi?

⁶ Kikuma ya ntete ya bantu kemoninaka mpasi kele nde Satana kezolaka kufwa kwikama ya bansadi ya kwikama ya Yehowa. Yandi mekaka na kufwa kwikama ya Yobi. Satana kunungaka ve, kansi yandi meyambulaka ve. Sambu yandi kele mfumu ya inza yai, yandi kesosaka na “kudia” bansadi ya kwikama ya Yehowa. (1 Piere 5:8) Dyambu yai ketala konso muntu na kati na beto! Satana kezolaka nde beto yambula na kusadila Yehowa. Yo yina, mbala mingi yandi kebasisilaka beto mbangika. Ata mbangika yango kevandaka mpasi, beto kele na kikuma ya mbote ya kukangila ntima. Kana beto sala mutindu yina, beto tamonisa nde Satana kele muntu ya luvunu mpi beto tapesa Yehowa kyese. (Yobi 2:4; Bingana 27:11) Sambu Yehowa kepesaka beto kikesa ya kukanga ntima na ntwala ya mbangika, beto kekumaka kutula ntima mingi na yandi.​—Nkunga 9:10, 11.

7. Inki kikuma ya bampasi Galatia 6:7 kesadisa beto na kuzaba?

⁷ Kikuma ya zole ya kesalaka nde bantu kumona mpasi kele na munsiku yai: “Muntu ke katulaka bambuma yina ya yandi ke kunaka.” (Galatia 6:7) Bantangu yankaka, bantu kekunaka badesizio ya mbi ya bo kebakaka mpi yo kenataka bo na kukatula mpasi yina yo kebutaka. Bo lenda baka lukanu ya kutambusa kaminio na kilau, na nsuka yo kenataka na aksida. Bantu mingi kebakaka desizio ya kuyantika kunwa makaya, mpi yo kenatilaka bo maladi na ntima to kansere ya bapumo. Bayina keponaka na kusala mansoni lenda mona mpasi sambu na bangwisana ya dibuta yina mebeba, kudikatula luzitu, kubaka maladi yina kekatukaka na kuvukisa nitu, mpi mavumu ya kukonda kukana. Bantu lenda sosa kupesa Nzambi foti sambu na bampasi ya mutindu yai, kansi bo kemonaka mpasi yango sambu na badesizio na bo mosi ya mbi.​—Bingana 19:3.

8. Na kutadila Longi 9:11, sambu na nki bantu kemonaka mpasi?

⁸ Kikuma ya tatu ya kesalaka nde bantu kumona mpasi kele na Longi 9:11: “Mono monaka diaka kima ya nkaka na ntoto yai: Bantu yina zaba kubaka ntinu mbote na nsaka bo ke nungaka ve konso ntangu; bantu ya ngolo ke nungaka ve konso ntangu bitumba; bantu ya mayele ke zingaka luzingu ya mbote ve konso ntangu, bo ke kumaka ve konso ntangu bamvwama; bantu yina kuzaba kisalu mbote bo mpi ke bakaka kisalu ya nene ve konso ntangu. [Mambu ya kukonda kukana kebwilaka, NW] bantu yonso.” Bantangu yankaka, bantu kevandaka na kisika ya mbi na ntangu dikambu mosi ya mbi kesalamaka. Yo vanda beto kele ngolo to ve na mambu yankaka, mpasi mpi lufwa lenda kumina konso muntu na kati na beto kukonda kukana na konso ntangu. Mu mbandu, na bilumbu ya Yezu nzo mosi ya nda na mbanza Yeruzalemi kubwaka mpi yo fwaka bantu 18. Yezu kumonisaka nde Nzambi ve muntu kupesaka bantu yina ndola sambu na masumu na bo. (Luka 13:4) Ve, Yehowa kele ve na kisina ya bampasi ya mutindu yai.

9. Inki kima bantu mingi kebakisaka ve na yina metala bampasi ya bantu kemonaka?

⁹ Kuzaba mwa bikuma yina bantu kemoninaka mpasi kele mfunu. Kansi, kele na kima mosi ya bantu mingi kebakisaka ve na dyambu yai. Kima yango yo yai: Sambu na nki Yehowa Nzambi kepesaka nzila nde bantu kumona mpasi?

Sambu na Nki Yehowa Kepesaka Nzila na Bampasi?

10, 11. (a) Na kutadila Roma 8:19-22, inki kukuminaka “lugangu yonso”? (b) Inki kima kesadisa beto na kuzaba muntu yina kutulaka lugangu na nsi ya kiyeka ya kima ya mpamba?

¹⁰ Dyambu mosi yina ntumwa Polo kutubaka na mukanda yina yandi sonikilaka Bakristu ya Roma kesadisa beto na kubakisa mbote dyambu yai ya mfunu. Polo kusonikaka nde: “Sambu bima yonso ya Nzambi salaka ke vingila kaka kilumbu yina ya Nzambi ta songa bana na yandi. Sambu [lugangu mekumaka na nsi ya kiyeka ya kima ya mpamba, NW]. Yo ke salaka mpidina na luzolo na yo mosi ve, kansi na luzolo ya Nzambi. Kansi beto lenda tula [kivuvu, NW] nde kilumbu mosi Nzambi ta katula bima yina yonso na kimpika yina ke nataka lufwa, ebuna yo ta baka dipanda ya lukumu yina ya bana ya Nzambi ta baka. Beto zaba nde, tii ntangu yai bima yonso ya Nzambi salaka [“lugangu yonso,” NW] ke dila ngolo, yo ke mona mpasi.”​—Roma 8:19-22.

¹¹ Sambu na kubakisa mbote dyambu ya bo ketubila na baverse yai, beto fwete sosa ntete bamvutu na mwa bangyufula ya mfunu. Mu mbandu, Nani muntu kutulaka lugangu na nsi ya kiyeka ya kima ya mpamba? Balongi ya mabundu mingi ketubaka nde Satana, bankaka dyaka nde Adami. Kansi ata muntu mosi ve na kati na bo zole kusalaka yo. Sambu na nki ve? Sambu muntu yina kutulaka lugangu na nsi ya kiyeka ya kima ya mpamba kusalaka yo ‘sambu na kivuvu.’ Ya kyeleka, yandi kepesa kivuvu nde nsukansuka bantu ya kwikama ta ‘katuka na kimpika yina ke nataka na lufwa.’ Adami ti Satana lenda pesa ve kivuvu ya mutindu yai. Yehowa mpamba muntu lenda sala yo. Yo ke pwelele nde, yandi muntu kutulaka lugangu na nsi ya kiyeka ya kima ya mpamba.

12. Inki bangindu ya kuswaswana mebasikaka sambu na yina metala ntendula ya “lugangu yonso,” mpi nki mvutu beto lenda pesa na ngyufula yai?

¹² Kansi, “lugangu yonso” yina bo ketubila na verse yai kele inki? Bantu yankaka ketubaka nde “lugangu yonso” yina kele ntoto ya mvimba, yika mpi bambisi ti banti. Kansi, keti bambisi ti banti kele na kivuvu ya kubaka “dipanda ya lukumu yina ya bana ya Nzambi ta baka”? Ve. (2 Piere 2:12) Kana mpidina, “lugangu yonso” ketendula kaka bantu. Yai kele lugangu yina kemona mpasi sambu na disumu mpi lufwa yina kukolama yina kusalamaka na Edeni kunataka mpi yina kele mpenza na mfunu ya kivuvu.​—Roma 5:12.

13. Inki mbuma kukolama yina kusalamaka na Edeni menatilaka bantu?

¹³ Inki kima kibeni kukolama yina kusalaka na bantu? Polo kesadila bangogo tatu sambu na kutubila bambuma yina yo mebutaka. Bangogo yango kele: kima ya mpamba.a Mukanda mosi ya bantu kesadilaka mingi ketuba nde, bangogo yai ketendula “kima mosi yina mekuma dyaka ve mfunu sambu yo kesala dyaka ve mutindu yo fwete sala.” Nzambi kusalaka bantu sambu bo zinga kimakulu, mpi bo sala dibuta mosi ya kukuka yina zolaka kusala na bumosi sambu na kutomisa paladisu ya ntoto. Kansi, bo kezingaka luzingu mosi ya nkufi, ya mpasi, mpi mbala mingi yo kevandaka ya kufuluka ti mambu ya mawa. Kaka mutindu Yobi kutubaka, “muntu yonso me butuka na ntoto yai ke na luzingu mosi ya nkufi ti ya mpasi.” (Yobi 14:1) Kima ya mpamba kibeni!

14, 15. (a) Inki dyambu kemonisa nde nkanu yina Yehowa kuzengilaka bantu kuvandaka ya kufwana? (b) Sambu na nki Polo kutubaka nde lugangu kukumaka kima ya mpamba na “luzolo na yo mosi ve”?

¹⁴ Ntangu yai beto mekuma na ngyufula ya kuluta mfunu: Sambu na nki ‘Nzambi yina kesambisaka bantu yonso ya nsi-ntoto’ metulaka bantu na luzingu yai ya mpasi mpi ya mawa? (Kuyantika 18:25) Keti yandi vandaka na nswa ya kusala yo? Yibuka mambu yina bibuti na beto ya ntete kusalaka. Mutindu bo kolamaka na Nzambi, bo kotilaka Satana, yina kubasisaka ntembe ya ngolo sambu na yina metala nswa ya Yehowa ya kuyala bantu. Mambu yina bo salaka kumonisaka nde bo ndimaka mambu yina Satana kutubaka nde muntu lenda vanda na luzingu ya mbote kukonda lutwadisu ya Yehowa, mpi kuditambusa yandi mosi na nsi ya lutwadisu ya kigangwa ya kimpeve yina kukolamaka. Ntangu yandi zengilaka bankolami yina nkanu, Yehowa kupesaka bo kima yina ya bo lombaka. Yandi pesaka muntu nzila ya kuditambusa na nsi ya kiyeka ya Satana. Na ntwala ya mambu yina yonso, lukanu yankaka ya kufwana kuvandaka ve katula kaka kukumisa bantu bima ya mpamba kansi yandi zabaka nde kivuvu kuvandaka.

¹⁵ Ya kyeleka, dyambu yai kuvandaka ve ‘luzolo ya lugangu yo mosi.’ Beto kebutukaka bampika ya disumu mpi ya lufwa kukonda kupona yo. Kansi na mawa na yandi Yehowa kupesaka Adami ti Eva nzila ya kuzinga mpi kubuta bana. Ata beto bana na bo, kele bima ya mpamba sambu beto kele mpi bampika ya disumu mpi ya lufwa, beto kele ti okazio ya kusala kima yina Adami ti Eva kukukaka ve na kusala. Beto lenda wa Yehowa mpi kulonguka nde kimfumu na yandi kele ya lunungu mpi ya kukuka. Kansi luyalu ya bantu kukonda lutwadisu ya Yehowa kenataka kaka mpasi, mawa, mpi lufwa. (Yeremia 10:23; Kusonga 4:11) Dyaka, bupusi ya Satana kekumisaka luzingu mpasi mingi kuluta. Mambu ya mesalamaka na luzingu ya bantu kemonisa mpenza nde mambu yai kele kyeleka.​—Longi 8:9.

16. (a) Sambu na nki beto lenda ndima nde Yehowa kele ve na kisina ya bampasi ya beto kemonaka bubu yai na inza? (b) Inki kivuvu Yehowa mepesaka bantu ya kwikama na zola yonso?

¹⁶ Yo kele pwelele nde, Yehowa vandaka ti bikuma ya mbote ya kukumisa bantu bima ya mpamba. Kansi, keti yo ketendula nde Yehowa kele na kisina ya lufwa mpi mpasi yina kenyokulaka konso muntu na kati na beto bubu yai? Yindula fyoti, zuzi yina mezengila muntu mosi ya mbi nkanu ya mefwana mpenza. Muntu yina ya mbi lenda mona mpasi mingi sambu na nkanu yina bo zengilaka yandi, kansi, keti na masonga yonso yandi lenda tuba nde zuzi yina kele na kisina ya mpasi ya yandi kemona? Ata fyoti ve! Mutindu mosi mpi Yehowa kele ve nto ya mambu ya mbi. Yakobo 1:13 ketuba nde: “Mambu ya mbi lenda benda ti kubwisa Nzambi ve, ebuna yandi mosi lenda benda ata muntu mosi ve na kusala mbi.” Beto vila mpi ve nde, Yehowa kuzengaka nkanu yina sambu yandi zabaka nde ‘kivuvu kuvandaka.’ Yandi meyidikaka mambu na zola yonso sambu bana ya kwikama ya Adami ti Eva kumona nsuka ya lufwa mpi kubaka “dipanda ya lukumu yina ya bana ya Nzambi ta baka.” Bantu ya kwikama tanyokwama dyaka ve kimakulu sambu lugangu yonso takulumuka dyaka ve na lufwa. Mutindu Yehowa tamanisa makambu na nzila ya lunungu tanungisa kimfumu na yandi sambu na ntangu yonso.​—Yezaya 25:8.

17. Inki mutindu kuyindula bikuma yina kesalaka nde bantu kumona mpasi na inza ya bubu fwete simba mabanza na beto?

¹⁷ Mutindu beto metadila bikuma yina kesalaka nde bantu kumona mpasi, keti beto kele mpenza na kikuma ya mbote ya kutula mambu ya mbi ya kesalamaka na ntu ya Yehowa to kuyambula na kutula ntima na yandi? Kansi, kulonguka ya mutindu yai ya beto kesala kepesa beto kikuma ya kuvutukila bangogo yai ya Moize: “Mfumu Nzambi kele bonso ditadi ya nene, kisika ya beto lenda tininaka. Yandi ke salaka kaka mbote, yandi ke zengaka makambu na nzila ya mbote. Yandi ke salaka mambu yonso ya yandi ke tubaka, yandi ke taka luvunu ve, yandi kele muntu ya kieleka mpenza.” (Kulonga 32:4) Na ntangu beto keyindulula mambu yai, bika beto zikisaka mbala na mbala kana beto kebakisa yo mbote. Mpidina, na ntangu beto mekutana ti mambu ya mpasi, beto tanunga na kunwana ti bikesa yina Satana kesalaka sambu na kukuna ntembe na mabanza na beto. Kansi, inki beto tatuba sambu na kitambi ya zole yina beto tubaka na luyantiku? Inki yo kelombaka sambu na kutula ntima na Yehowa?

Ntendula ya Kutula Ntima na Yehowa

18, 19. Inki bangogo Biblia kesadila sambu na kusyamisa beto na kutula ntima na Yehowa, kansi na dyambu yina, inki bangindu ya luvunu bantu yankaka kevandaka na yo?

¹⁸ Ndinga ya Nzambi kelongisila beto nde: “Tula ntima na nge yonso na Mfumu Nzambi; kutula ntima ve na mambu ya nge mosi ke yindulaka nde nge zaba. Yindula Mfumu Nzambi na mambu yonso ya nge ke salaka, yandi ta songa nge nzila ya mbote.” (Bingana 3:5, 6) Bangogo yai ya kitoko kepesa kikesa mpenza. Ya kyeleka, ata muntu mosi ve na kati ya inza mefwana nde beto tudila yandi ntima kuluta Tata na beto ya zola ya kele na zulu. Yo ke pete na kutanga bangogo yina kele na Bingana, kansi kusadila yo kele mpasi.

¹⁹ Bantu mingi ke na bangindu ya luvunu sambu na yina metala ntendula ya kutula ntima na Yehowa. Bankaka keyindulaka nde kutula ntima yango kele kaka mawi ya mpamba, mawi ya kyese yina fwete kwisa yo mosi na ntima. Bantu yankaka keyindulaka nde kutula ntima na Nzambi ketendula nde yandi fwete katula beto na konso dyambu ya mpasi yina beto mekutana na yo, kumanisa bampasi na beto yonso, kukatula konso mumekanu yina mekumina beto mutindu beto keyindula, disongidila kukonda kusukinina! Kansi bangindu ya mutindu yai mefwana ve. Kutula ntima ketendula mambu mingi kuluta mawi ya mpamba, mpi yo kele ve bangindu ya mpamba. Sambu na bambuta, kutula ntima ketendula kubaka badesizio ya mbote mpi ya mayele.

20, 21. Inki yo kelombaka sambu na kutula ntima na Yehowa? Pesa mbandu.

²⁰ Tala dyaka mambu yina Bingana 3:5 ketuba. Yo kemonisa luswaswanu yina kele na kati ya kutula ntima na Yehowa mpi na ngangu na beto mosi, mpi yo kesonga beto nde beto lenda sala ve mambu yai zole na mbala mosi. Keti yo ketendula nde beto kele na nswa ve ya kusadila ngangu na beto? Ve, sambu Yehowa, yina kupesaka beto ngangu yango, kezolaka nde beto sadila yo sambu na kusadila yandi. (Roma 12:1) Kansi na nki beto ketulaka ntima na ntangu beto kebakaka badesizio? Kana bangindu na beto kewakana ve ti bangindu ya Yehowa, keti beto kendimaka mayele na yandi sambu yo meluta mpenza mayele na beto? (Yezaya 55:8, 9) Kutula ntima na Yehowa ketendula kubika bangindu na yandi kutambusa beto.

²¹ Beto baka mbandu: Yindula mwana mosi ya fyoti ya mevanda na kiti ya nima ya vwatire, bibuti na yandi na kiti ya ntwala. Tata na yandi muntu ketambusa. Ntangu mambu ya mpasi mebwila bo na ntangu ya nzyetolo, mu mbandu, kukonda kuzaba nzila ya mbote ya bo fwete landa to dyambu yankaka ya mpasi bonso mvula to kana nzila kele ya mbi, inki mwana ya bulemfu, yina ketulaka ntima na bibuti na yandi tasala? Keti yandi tayantika kupesa bantuma na kisika ya yandi mevanda na nima, mpi kuzabisa tata na yandi mutindu ya kutambusa? Keti yandi tatula ntembe na badesizio yina bibuti na yandi tabaka to kubuya ntangu bo meyibusa yandi na kuvanda mpi kukanga mukaba ya kiti? Ve, yandi tatula ntima na bibuti na yandi nde bo tabaka badesizio ya mbote sambu na kukatuka na mambu yina ya mpasi, ata bo kele bantu ya kukonda kukuka. Kansi Yehowa kele Tata mosi ya kukuka. Keti beto fwete tula ve ntima na yandi, mingimingi ntangu beto mekutana ti mambu ya mpasi?​—Yezaya 30:21.

22, 23. (a) Sambu na nki beto fwete tula ntima na Yehowa na ntangu beto mekutana ti mambu ya mpasi, mpi nki mutindu beto lenda sala yo? (b) Inki beto tatubila na disolo ya melanda?

²² Kansi, Bingana 3:6 ketuba nde beto fwete ‘yindula Yehowa na mambu yonso ya beto kesalaka,’ kansi na ntangu ya beto mekutana ti mambu ya mpasi kaka ve. Yo yina, badesizio ya beto kebaka konso kilumbu na luzingu fwete monisa nde beto ketulaka ntima na Yehowa. Kana mambu ya mpasi mebwila beto, beto fwete vidisa ve kivuvu, kukuma mabanza kisakasaka, to kubuya lutwadisu ya Yehowa sambu na mutindu ya mbote ya kumanisa mambu yango. Beto fwete bakaka mimekamu bonso baokazio ya kukotila kimfumu ya Yehowa, to ya kesadisa beto na kumonisa nde Satana kele muntu ya luvunu, mpi ya kuyedisa bulemfu mpi bikalulu yina Yehowa kezolaka.​—Baebreo 5:7, 8.

²³ Beto lenda monisa nde beto ketulaka ntima na Yehowa ata na ntwala ya mambu yonso ya mpasi ya beto mekutana na yo. Beto kemonisaka yo na bisambu na beto mpi na mutindu beto kesosaka lutwadisu na Ndinga ya Yehowa mpi na organizasio na yandi. Kansi, inki mutindu beto lenda monisa nde beto ketulaka ntima na Yehowa na ntangu beto kekutana ti mambu ya mpasi yina kebasikaka na inza ya bubu yai? Disolo na beto ya melanda tatubila dyambu yai.

[Noti na nsi ya lutiti]

Inki Mutindu Nge Tavutula?

• Inki mutindu Davidi kumonisaka nde yandi vandaka kutula ntima na Yehowa?

• Tanga bikuma tatu ya kesalaka nde bantu kumona mpasi bubu yai, mpi sambu na nki yo kele mfunu na kutadilaka yo mbala na mbala?

• Inki nkanu Yehowa kuzengilaka bantu, mpi sambu na nki yo vandaka ya kufwana?

• Inki yo kelombaka sambu na kutula ntima na Yehowa?

[Bifwanisu ya kele na lutiti 23]

Davidi kutulaka ntima na Yehowa