Tula Ntima na Mpeve ya Nzambi Kana Luzingu na Nge Mesoba

“Nge fweti tula ngolo na kumonika muntu ya mbote na meso ya Nzambi.”​—2 TIMOTEO 2:15.

1. Inki bansoba kevandaka mpasi sambu na kimpeve na beto?

INZA yai ke na kusoba ntangu yonso. Beto kemona mutindu mayele ya siansi ti ya teknolozi keyela na mutindu mosi ya kuyituka mpi mutindu bikalulu ya mbote ya bantu kebeba nswalu mpenza. Mutindu beto monaka yo na disolo ya ntete, Bakristu fwete nwana ti mpeve ya inza yina kewakanaka ve ti ya Nzambi. Kansi, mutindu inza kesobaka, beto mpi kesobaka na mambu mingi. Na ntwala ya kukuma bambuta, beto kevandaka ntete baleke. Beto lenda vanda na kimvwama to kuvidisa yo, na mavimpi ya mbote to ya mbi, mpi beto lenda zinga ti bantu ya beto kezolaka to kuvidisa bo. Mbala mingi, beto kevandaka ve na kiyeka na zulu ya bansoba mingi ya mutindu yina, mpi yo lenda basisila beto mambu ya mpa mpi ya mpasi yina lenda vanda na bupusi na kimpeve na beto.

2. Inki mutindu luzingu ya Davidi kusobaka?

² Luzingu ya bantu mingi ve kesobaka bonso ya Davidi, mwana ya Yese. Davidi kuzabanaka mingi ve ntangu yandi vandaka ngungudi ya mameme, kansi na mbala mosi yandi kumaka muntu ya nene mpi ya lukumu ya insi na bo. Na nima yandi kumaka kubumbana sambu ntotila mosi ya kimpala kumaka kuzomba yandi bonso mbisi. Na nima, Davidi kumaka ntotila mosi ya kuvandaka kununga bamvita. Yandi kangaka ntima na bampasi yina kukuminaka yandi sambu na disumu na yandi ya nene. Yandi nyokwamaka mpi dibuta na yandi kukabwanaka. Yandi kumaka mvwama, yandi nunaka, mpi yandi waka bampasi ya kimununu. Kansi, ata luzingu na yandi kusobaka na mitindu mingi, Davidi kutulaka ntima na Yehowa ti na mpeve na Yandi luzingu na yandi ya mvimba. Yandi salaka yonso sambu na kuvanda “muntu ya mbote na meso ya Nzambi,” mpi Nzambi kusakumunaka yandi. (2 Timoteo 2:15) Ata luzingu na beto kele ve bonso ya Davidi, beto lenda baka dilongi na mutindu yandi vandaka kuyidika makambu ya yandi kutanaka ti yo na luzingu na yandi. Mbandu na yandi lenda sadisa beto na kubakisa mutindu ya beto lenda landa na kubaka lusadisu na mpeve ya Nzambi na ntangu luzingu na beto kesoba.

Kudikulumusa ya Davidi Kele Mbandu Mosi ya Mbote

3, 4. Inki mutindu Davidi yina kuvandaka ngungudi kukumaka muntu mosi ya nene ya insi na yandi?

³ Ntangu yandi vandaka leke, Davidi kuvandaka ve muntu ya lukumu na dibuta na bo. Tata ya Davidi kuvandaka ti bana nana, kansi ntangu profete Samuele kwendaka na Betelemi, yandi songaka profete bana nsambwadi. Davidi mwana na bo ya nsuka, kuvandaka na nseke na kutala mameme. Kansi, Yehowa kuponaka Davidi nde yandi muntu takuma ntotila ya Izraele. Bo bingisaka Davidi yina kuvandaka na bilanga. Na nima, disolo ya Biblia ketuba nde: ‘Samuele bakaka mafuta ya olive, yandi tulaka yo na zulu ya ntu ya Davidi na meso ya bampangi na yandi. Na mbala mosi Mpeve ya Mfumu Nzambi simbaka Davidi yantika kilumbu yina.’ (1 Samuele 16:12, 13) Na luzingu na yandi ya mvimba, Davidi kutulaka ntima na mpeve yina.

⁴ Ntama mingi ve, mwana bakala yai ya kuvandaka ngungudi kumaka muntu ya nene ya insi na yandi. Bo bingisaka yandi na kusadila ntotila mpi na kubudila yandi miziki. Yandi fwaka Goliati, muntu ya nene, ya nda, mpi ya makasi, ya kuzaba kunwana bitumba, yina basoda ya ngolo ya Izraele vandaka kutita. Ntangu bo tulaka yandi na kutwadisa basoda na bitumba, Davidi kubedisaka bantu ya Filistia. Bantu kuzolaka Davidi. Bo yimbilaka yandi bankunga ya lukumu. Na nima, mosi na bansadi ya Ntotila Saule kumonisaka nde, toko Davidi vandaka kuzaba “kubula miziki” kaka ve, kansi yandi vandaka dyaka ‘muntu ya kikesa, soda ya ngolo; ya kuzaba kutuba mbote, mpi ya kitoko.’​—1 Samuele 16:18; 17:23, 24, 45-51; 18:5-7.

5. Inki lendaka kukumisa Davidi lulendo, mpi nki mutindu beto kezaba nde yandi kukumaka ve lulendo?

⁵ Davidi kukumaka mwana-bakala ya lukumu, ya kitoko, ya kuzabaka kutuba mbote, kubula miziki, soda ya ngolo, yina Nzambi kundimaka. Yo kemonana nde yandi vandaka na mambu yonso ya mbote. Mayele yai yonso lendaka kumisa yandi lulendo, kansi, ata mosi ve na kati na yo kukumisaka yandi lulendo. Tala mvutu ya Davidi kupesaka ntotila Saule, yina kulombaka yandi na kukwela mwana na yandi ya nkento. Na kudikulumusa ya kyeleka, Davidi kutubaka nde: “Mono nani, dikanda na mono banani, fami ya tata na mono kele banani na kati ya bantu ya Israele, yo yina mono fweti kuma bukilo ya ntotila?” (1 Samuele 18:18) Ntangu muntu mosi ya mayele kupesaka komantere na verse yai, yandi sonikaka nde: “Davidi zolaka kutuba nde, yo vanda kimuntu na yandi, fami na yandi, to bankaka na yandi lendaka kutula ngindu ve na kusosa lukumu ya kukuma bokilo ya ntotila.”

6. Sambu na nki beto fwete kuna kikalulu ya kudikulumusa?

⁶ Davidi vandaka kudikulumusa sambu yandi zabaka nde Yehowa kele nene mpi yandi meluta mpenza bantu ya kukonda kukuka na mambu yonso. Davidi kuyitukaka na kumona nde Nzambi ketulaka nkutu dikebi na muntu. (Nkunga 144:3) Davidi kuzabaka mpi nde ata yandi mekuma muntu ya nene, yandi kumaka mutindu yina sambu Yehowa kudikulumusaka, kuditulaka na kisika na yandi sambu na kusadisa yandi, kutanina yandi, mpi kusungimina yandi. (Nkunga 18:36, NW) Yai kele dilongi mosi ya mbote sambu na beto! Mayele na beto, mambu yonso ya beto lenda sala, mpi mikumba na beto fwete kumisa beto ve lulendo ata nki mutindu. Ntumwa Polo kusonikaka nde: “Keti Nzambi me pesaka nge ve yina yonso ya nge ke na yo? Ebuna, kana yo kele mpidina, nki mutindu nge lenda kudisonga bonso nde yina ya nge me bakaka yo kele makabu ve?” (1 Korinto 4:7) Sambu na kuvanda na mpeve santu ya Nzambi mpi yandi kundima beto, beto fwete kuna kikalulu ya kudikulumusa mpi kuvanda na yo ntangu yonso.​—Yakobo 4:6.

“Beno Vutula Mbi na Mbi Ve Ata Fyoti”

7. Inki dibaku ya kufwa ntotila Saule Davidi kukutanaka na yo?

⁷ Ata lukumu ya Davidi kukumaka na yo kukumisaka yandi lulendo ve, yo pusaka Ntotila Saule, yina kuvandaka dyaka ve ti mpeve ya Nzambi, na kuwila yandi kimpala. Ata Davidi kusalaka ka yandi mbi ve, yandi kumaka kutina sambu na kutanina luzingu na yandi mpi yandi kumaka kuzinga na ntoto ya zelo na zelo. Kilumbu mosi, ntangu Ntotila Saule vandaka kaka kulanda yandi, Ntotila kwendaka kukota na kati ya dibulu ya matadi, kukonda kuzaba nde Davidi ti banduku na yandi vandaka ya kubumbana kuna. Banduku ya Davidi kulongisilaka yandi na kufwa Saule na okazio yina sambu bo monaka nde Nzambi muntu mekangula nzila yina. Yindula nde nge kemona bo na mpimpa na kati ya ditadi ntangu bo kezabisa Davidi na nsi-nsi nde: “Yai kilumbu ya Mfumu Nzambi tubilaka nge nde yandi ta pesa mbeni na nge na maboko na nge, nge sala yandi konso kima ya nge zola.”​—1 Samuele 24:2-6.

8. Sambu na nki Davidi kubuyaka na kuvutula mbela?

⁸ Davidi kubuyaka na kusala Saule mbi. Sambu yandi vandaka na lukwikilu mpi yandi kangaka ntima, yandi bikilaka Yehowa mambu yonso. Ntangu ntotila kubasikaka na kati ya dibulu ya matadi, Davidi kubingaka yandi nde: “Mfumu Nzambi kuvanda zuzi na beto. Yandi kupesa nge ndola sambu na mbi ya nge me sala mono, kansi mono mono ta sala nge kima ve.” (1 Samuele 24:13) Ata yandi zabaka nde Saule kusalaka yandi mbi, Davidi kuvutulaka ve mbela; yandi tubilaka mpi ve Saule mambu ya mbi. Mbala mingi, Davidi kubuyaka na kuvutula mbela. Kansi, yandi kutulaka ntima nde Yehowa tayidika makambu.​—1 Samuele 25:32-34; 26:10, 11.

9. Sambu na nki beto fwete vutula ve mbi na mbi kana bo kemenga beto to kenyokula beto?

⁹ Bonso Davidi, nge lenda kutana ti mambu ya mpasi. Mbala yankaka banduku na nge ya nzo-nkanda, ya kisalu, bantu ya fami na nge, to bantu yankaka ya kendimaka ve malongi na nge lenda menga nge to kumonisa nge mpasi. Kuvutula mbi na mbi ve. Vingilaka nde Yehowa kusala, lombaka mpeve na yandi sambu yo sadisa nge. Yo lenda sala nde bantu yango yina kele Bakristu ve kuyituka na kumona kikalulu na nge ya mbote mpi bo kuma Bakristu. (1 Piere 3:1) Ata konso nki dyambu yina mekumina nge, tula ntima nde Yehowa kemona makambu na nge mpi yandi tasadisa nge na ntangu ya yandi mosi tamona mbote. Ntumwa Polo kusonikaka nde: “Banduku na mono, beno vutula mbi na mbi ve ata fioti. Kansi bika Nzambi kuwila bantu yina ke salaka mbi makasi. Sambu Mfumu Nzambi ke tuba na Mukanda na yandi nde: ‘Mono muntu ta vutula bo ndola ti kumonisa bo mpasi sambu na mbi ya bo salaka mono.’”​—Roma 12:19.

‘Beno Wa Disipline na Mono’

10. Inki mutindu Davidi kubwaka na disumu, mpi nki mutindu yandi salaka sambu na kufika disumu na yandi?

¹⁰ Bamvula kulutaka. Davidi kukumaka ntotila ya lukumu yina bantu vandaka kuzola. Luzingu na yandi ya kwikama mpenza, mpi bankunga na yandi ya kitoko ya yandi sonikaka sambu na kukembila Yehowa, lendaka kunata muntu na kuyindula nde Davidi kuvandaka muntu mosi yina lendaka kusala ve disumu mosi ya nene ata nki mutindu. Kansi, yandi sumukaka. Kilumbu mosi, ntotila vandaka kutala nkento mosi ya kitoko yina vandaka kuyobila. Yandi sosaka kuzaba nkento yango. Ntangu bo songaka yandi nde nkento yina vandaka kuyobila zina na yandi Batsheba, mpi nde bakala na yandi Uria kukwendaka na bitumba, Davidi kutindaka bantu na kubinga nkento yango, mpi yandi vukisaka nitu ti yandi. Na nima, yandi monaka nde nkento yango kukumaka na divumu. Yo zolaka kuvanda nsoni mpenza ntangu dyambu yina zolaka kuzabana! Nsiku ya Moize vandaka kutuba nde, kana muntu kusala bizumba bo fwete fwa yandi. Ntotila kuyindulaka mpenza nde disumu yina lendaka kuzabana ve. Yandi tindika ndinga na basoda nde Uria kuvutuka na Yeruzalemi. Davidi kutulaka kivuvu nde Uria talala ti Batsheba, kansi Uria kusalaka yo ve. Nsoni kusalaka nde Davidi kuvutula Uria na bitumba ti mukanda mosi ya yandi sonikilaka Yoabi, mfumu ya basoda. Na mukanda yina Davidi kutubaka nde na ntangu ya bo tanwanaka bitumba, bo tula Uria na kisika mosi yina tasala nde bo fwa yandi. Yoabi kulemfukaka, mpi Uria kufwaka. Ntangu Batsheba kudilaka bakala na yandi imene, Davidi kubakaka yandi mpi yandi kumaka nkento na yandi.​—2 Samuele 11:1-27.

11. Sambu na nki Natani kwendaka kusolula ti Davidi, mpi nki mvutu Davidi kupesaka?

¹¹ Davidi kulungisaka mayele na yandi ya mbi, ata yo fwete vanda nde yandi zabaka nde Yehowa kumonaka mambu yonso ya yandi salaka. (Baebreo 4:13) Na nima ya bangonda, bo butuka mwana. Na nima, Nzambi kutindaka profete Natani sambu na kusolula ti Davidi. Profete kutelaka ntotila disolo ya mvwama mosi yina kuvandaka ti mameme mingi, kansi mvwama yango kwendaka kufwa dimeme mosi kaka ya nsukami kuvandaka na yo mpi ya yandi vandaka kuzola mingi. Davidi kumonaka nde muntu yina kusalaka dyambu ya mbi kibeni, kansi yandi zabaka ve nde disolo yango vandaka kutadila yandi. Davidi kubedisaka mvwama yina nswala-nswalu. Ti makasi yonso, yandi tubilaka Natani nde: “Muntu yina fweti fwa!”​—2 Samuele 12:1-6.

12. Inki ndola Yehowa kuzengilaka Davidi?

¹² Profete kusongaka yandi nde: “Muntu yina si nge!” Davidi kudizengilaka nkanu. Ntembe kele ve nde makasi ya Davidi kupesaka yandi nswalu nsoni ti mawa mingi. Davidi kutubaka dyaka ve ata kima mosi, yandi vandaka kuwidikila Natani ketubila yandi ndola ya Yehowa tapesa yandi, nde yandi tatina yo ve. Natani kupesaka yandi ve kikesa, yandi bondilaka yandi mpi ve. Davidi kuvwezaka Ndinga ya Yehowa ntangu yandi salaka mambi. Keti yandi sadilaka ve mbele ya bambeni sambu na kufwa Uria? Mbele zolaka kukatuka ve na nzo ya Davidi. Keti yandi bakaka ve nkento ya Uria na kinsweki? Dyambu ya mutindu mosi zolaka kukumina yandi, na kinsweki ve kansi na meso ya bantu.​—2 Samuele 12:7-12.

13. Inki Davidi kusalaka ntangu Yehowa kupesaka yandi disipline?

¹³ Kima ya mbote ya beto lenda tuba sambu na Davidi kele nde, yandi buyaka ve mbi na yandi. Yandi wilaka mpi ve profete Natani makasi. Yandi pesaka ve foti na bantu yankaka, to kunungisa mbi na yandi. Ntangu bo songaka yandi masumu na yandi, Davidi kundimaka mukumba na yandi, nde: “Mono me sala masumu na meso ya Mfumu Nzambi.” (2 Samuele 12:13) Nkunga 51 kemonisa nde Davidi kuwaka mawa sambu na mambi na yandi mpi yandi balulaka mpenza ntima. Yandi bondilaka Yehowa nde: “Kula mono ve na luse ya nge, ye katula ve Mpeve ya nge ya nlongo tuka mono.” Yandi vandaka kukwikila nde, na mawa na yandi, Yehowa talosa ve ‘ntima yina mepasuka mpi kele na ntantu’ sambu na disumu. (Nkunga 51:11, 17, luwawanu yampa) Davidi kulandaka na kutula ntima na mpeve ya Nzambi. Ata Yehowa kutaninaka ve Davidi na malanda ya mbi ya disumu na yandi, yandi lolulaka yandi.

14. Inki beto fwete sala kana Yehowa mepesa beto disipline?

¹⁴ Beto yonso kele bantu ya kukonda kukuka, mpi beto yonso kesumukaka. (Roma 3:23) Bantangu yankaka, beto lenda sala masumu ya ngolo bonso Davidi. Kaka mutindu tata ya zola kepesaka bana na yandi disipline, Yehowa mpi kesungikaka bayina kesosaka kusadila yandi. Kansi, ata disipline kepesaka mambote, beto kendimaka yo ve kukonda mpasi. Na kutuba ya mbote, bantangu yankaka, yo kepesaka “mawa.” (Baebreo 12:6, 11) Kansi, kana ‘beto kewa disipline’ beto lenda wakana dyaka ti Yehowa. (Bingana 8:33) Sambu na kulanda kubaka balusakumunu ya mpeve ya Yehowa, beto fwete ndima nde bo sungika beto, mpi kusala na mpila nde Nzambi kundima beto.

Kutula Ve Kivuvu na Kimvwama ya Kezingaka Mingi Ve

15. (a) Inki mutindu bantu yankaka kesadilaka bimvwama na bo? (b) Inki mutindu Davidi zolaka kusadila kimvwama na yandi?

¹⁵ Ata kima mosi ve kemonisa nde Davidi kuvandaka ntete mvwama to dibuta na yandi kuvandaka ya bamvwama. Kansi, ntangu yandi kumaka ntotila, Davidi kukumaka ti kimvwama mingi. Mutindu nge kezaba yo, bantu mingi kebumbaka kimvwama na bo, bayina kevandaka na nzala ya mbongo kesosaka kaka nde bo kuma na yo mingi, to bo kesadilaka yo na bwimi yonso. Bankaka kesadilaka kimvwama na bo sambu na kudikumisa. (Matayo 6:2) Davidi kusadilaka kimvwama na yandi na mutindu yankaka. Yandi sosaka kupesa Yehowa lukumu. Davidi kusongaka Natani mpusa na yandi ya kutungila Yehowa tempelo, sambu na kutula sanduku ya kuwakana yina kuvandaka na ntangu yina na Yeruzalemi, “na nzo ya ntenta.” Yehowa kuwaka kyese na kuwa bangindu yina Davidi kuvandaka na yo kansi, na nzila ya Natani, Yehowa kuzabisaka yandi nde Salomo, mwana ya Davidi, muntu tatunga tempelo yango.​—2 Samuele 7:1, 2, 12, 13.

16. Inki Davidi kuyidikaka sambu na kutungila tempelo?

¹⁶ Davidi kuvukisaka bima yina ya bo kanaka kusadila kisalu yina ya nene ya kutunga. Davidi kutubilaka Salomo nde: “Mono me sala ngolo, mono me zwa bakilo milio tatu (3 000 000 kg) ya wolo, kuluta bakilo milio makumi tatu (30 000 000 kg) ya arza ti bibende mingi-mingi ya bronze. Mono me yidika yankaka.” Na kimvwama yina yandi mosi kuvandaka na yo, yandi pesaka batalanta 3 000 ya wolo mpi batalanta 7 000 ya arza.a (1 Bansangu 22:14; 29:3, 4) Davidi kukabaka ve sambu na kudisonga na meso ya bantu kansi yandi salaka yo sambu na kumonisa lukwikilu na yandi na Yehowa Nzambi mpi kumonisa kukangama na yandi na Nzambi. Sambu yandi vandaka kuzaba Nto ya kimvwama na yandi, yandi tubilaka Yehowa nde: “Bima yonso ya beto me bakaka yo me katukaka na nge, ebuna bima ya beto me pesa beto me baka yo na nge.” (1 Bansangu 29:14) Ntima ya kukaba ya Davidi kutindaka yandi na kusala yonso sambu na kumatisa lusambu ya bunkete.

17. Inki mutindu ndongisila yina kele na 1 Timoteo 6:17-19 ketadila bamvwama ti bansukami?

¹⁷ Bonso yandi, bika beto sadila bima na beto ya kinsuni sambu na kusala mambu ya mbote. Na kisika ya kusosa bima mingi ya kinsuni na luzingu, yo meluta mpenza mbote beto sosa nde Nzambi kundima beto: kusala mutindu yina kele nzila ya mayele ya kyeleka mpi ya kyese. Polo kusonikaka nde: “Songa bantu yina ke na kimvwama ya nsi-ntoto yai nde bo lenda vanda na lulendo ve; tubila bo nde bo lenda tula ntima na bo ve na kimvwama ya nsi-ntoto yai sambu kimvwama yina ke zingaka mingi ve, kansi bo tula ntima na bo na Nzambi, yina ke pesaka beto bima yonso ya kuluta mingi sambu beto mona kiese na yo. Tubila bo na kusala mambu mingi ya mbote ti na kuvanda bantu ya mbote yina ke kabaka bima na bo na bantu ya nkaka. Mpidina bo ta bumba kimvwama ya mbote ti ya ngolo sambu na bilumbu ke kwisa na ntwala, ebuna bo ta baka moyo ya kieleka.” (1 Timoteo 6:17-19) Ata beto kele na bima nki kiteso, bika beto tula ntima na mpeve ya Nzambi mpi beto landa na kuzinga na mutindu mosi yina tasala nde beto vanda bamvwama “na meso ya Nzambi.” (Luka 12:21) Ata kima mosi ve meluta kundimama na Tata na beto ya zulu mpi ya zola.

Monika Muntu ya Mbote na Meso ya Nzambi

18. Na nki mutindu Davidi kubikilaka Bakristu mbandu mosi ya mbote?

¹⁸ Na luzingu na yandi ya mvimba, Davidi kusosaka nde Yehowa kundima yandi. Na nkunga mosi, yandi dilaka nde: “Wila mono mawa pardo, wila mono mawa, sambu mono ke kwisa kubumbana na nge.” (Nkunga 57:2) Ntima ya yandi tulaka na Yehowa kuvandaka ve ya mpamba. Davidi ‘kumaka mununu mpenza.’ (1 Bansangu 23:1) Ata Davidi kusalaka masumu ya nene, Biblia ketubaka nde yandi vandaka mbangi ya Nzambi yina kumonisaka lukwikilu ya ngolo bonso bambangi yankaka mingi ya Nzambi.​—Baebreo 11:32.

19. Inki mutindu beto lenda sala sambu na kumonika bantu ya mbote na meso ya Nzambi?

¹⁹ Na ntangu ya nge kekutana ti bampasi na luzingu, yibukaka nde kaka mutindu Yehowa kusadisaka Davidi, kupesaka yandi kikesa mpi kusungikaka yandi, Yandi lenda sala mutindu mosi sambu na nge. Bonso Davidi, ntumwa Polo kukutanaka ti mambu mingi ya mpasi na luzingu na yandi. Kansi yandi mpi kubikalaka kaka ya kwikama mpi yandi tulaka ntima na mpeve santu ya Nzambi. Yandi sonikaka nde: “Mono me lunga kusala mambu yonso na ngolo yina ya [yandi] ke pesaka mono.” (Filipi 4:12, 13) Kana beto ketula ntima na Yehowa, yandi tasadisa beto na kununga. Yandi kezolaka nde beto nunga. Kana beto kewila yandi mpi beto kekwenda penepene ti yandi, yandi tapesa beto ngolo ya kusala luzolo na yandi. Mpi kana beto kelanda na kutula ntima na mpeve ya Nzambi, beto takuka kumonika ‘bantu ya mbote na meso ya Nzambi’ banda bubu yai tii kuna mvula na mvula.​—2 Timoteo 2:15.

[Noti na nsi ya lutiti]

Inki Mvutu Nge Tapesa?

• Inki mutindu beto lenda sala sambu na kukonda kuvanda lulendo?

• Sambu na nki beto fwete vutula ve mbela?

• Inki mutindu beto fwete tadilaka disipline?

• Sambu na nki beto fwete tula ntima na Nzambi kansi na kimvwama ve?

[Kifwanisu ya kele na lutiti 28]

Davidi kutulaka ntima na mpeve ya Nzambi mpi Nzambi kundimaka yandi. Keti nge mpi kesalaka mpidina?

[Kifwanisu ya kele na lutiti 30]

“Bima yonso ya beto me bakaka yo me katukaka na nge, ebuna bima ya beto me pesa beto me baka yo na nge”