Mpangi ya Mpa na Nto-Kimvuka

Na Kitatu na suka, na Septembri 5, 2012, bo pesaka luzayisu na dibuta ya Betele ya États-Unis mpi ya Canada nde bo me yika mpangi mosi ya mpa na Nto-Kimvuka ya Bambangi ya Yehowa. Banda na Septembri 1, 2012, Mpangi Mark Sanderson yantikaka kusala na Nto-Kimvuka.

Mpangi Sanderson yelaka na mbanza San Diego, na Californie na États-Unis; bibuti na yandi vandaka Bakristu mpi yandi bakaka mbotika na Februari 9, 1975. Yandi yantikaka kusala bonso mupasudi-nzila na mbanza Saskatchewan, na Canada na Septembri 1, 1983. Na Desembri 1990, yandi bakaka diplome na Nzo-Nkanda ya nsambwadi Yina Ke longaka Mutindu ya Kusala Kisalu (yina bo ke bingaka bubu yai Nzo-Nkanda ya Biblia Sambu na Bampangi-Babakala Yina Me Kwelaka Ve). Mpangi Sanderson bakaka mukumba ya kusala bonso mupasudi-nzila ya nene na kisanga ya Terre-Neuve, na Canada na Aprili 1991. Na nima ya kusala bonso muyingi ya nkengi ya nziunga, bo bingisaka yandi na kusala na Betele ya Canada na Februari 1997. Na Novembri 2 000, bo tindaka yandi na Betele ya États-Unis, kisika yandi vandaka kusala na Departema ya Ke Talaka Mambu ya Kuwakana ti Minganga mpi na nima na Departema ya Ke Talaka Kisalu ya Bilanga.

Na Septembri 2008, Mpangi Sanderson kotaka Nzo-Nkanda Sambu na Bampangi ya Komite ya Filiale mpi na nima, yandi kumaka kusala na Komite ya Filiale ya insi Philippines. Na Septembri 2010, yandi vutukaka na Betele ya États-Unis, kisika yandi salaka bonso nsadisi na Komite ya Kisalu ya Nto-Kimvuka.