Lufwa Kele Ve Nsuka ya Mambu Yonso!

Betania vandaka bwala mosi ya fioti pene-pene ya Yeruzalemi na kitamina ya bakilometre tatu. (Yoane 11:18) Diambu mosi ya mpasi salamaka kuna bamposo fioti na ntwala ya lufwa ya Yezu. Na kintulumukina, Lazare nduku ya Yezu ya ngolo, belaka mingi mpi fwaka.

Ntangu Yezu waka nsangu na mbala ya ntete, yandi songaka balongoki na yandi nde Lazare me lala mpongi mpi yandi ke kwenda kuna sambu na kutedimisa yandi. (Yoane 11:11) Kansi balongoki ya Yezu bakisaka ve mambu ya yandi tubaka, yo yina Yezu zabisaka bo pwelele nde: “Lazare me fwa.”—Yoane 11:14.

Bilumbu iya na nima ya kuzika Lazare, Yezu kumaka na Betania mpi sosaka kulembika Marta yina mpangi na yandi fwaka. Marta tubaka nde: “Kana nge vandaka awa mpangi na mono zolaka kufwa ve.” (Yoane 11:17, 21) Yezu vutudilaka yandi nde: “Mono kele lufutumuku mpi luzingu. Muntu yina ke monisa lukwikilu na mono, ata kana yandi fwa, yandi ta vutuka na luzingu.”—Yoane 11:25.

Sambu na kumonisa nde mambu yina vandaka ya kieleka, Yezu pusanaka na maziamu mpi tubaka na ndinga ya ngolo nde: “Lazare, kwisa kubasika!” (Yoane 11:43) Bantu yina vandaka pana yitukaka na kumona mvumbi me telama.

Yezu vandaka me futumuna dezia bantu zole. Na dibaku mosi, yandi futumunaka mwana-nkento mosi—mwana ya Yairusi. Na ntwala ya kufutumuna yandi, Yezu monisaka nde yandi vandaka na mpongi.—Luka 8:52.

Simba nde Yezu fwanisaka lufwa ya Lazare mpi ya mwana ya Yairusi ya nkento ti mpongi. Mbandu yai me fwana kibeni. Sambu na nki? Kana muntu me lala, yandi ke zabaka kima ve mpi yo ke pesaka dibanza ya kupema mpi ya kukonda kumona mpasi. (Longi 9:5; tala lupangu yina kele kumosi ti disolo “Lufwa Kele Bonso Mpongi ya Ngolo.”) Balongoki ya ntete ya Yezu bakisaka mbote-mbote kieleka na yina me tala nkadilu ya bafwa. Mukanda mosi (Encyclopedia of Religion and Ethics) ke tuba nde: “Sambu na balongoki ya Yezu, lufwa vandaka mpongi, mpi maziamu kisika ya kupema, . . . sambu na bantu yina fwaka ya kwikama.”a

Yo ke pesaka beto kikesa na kuzaba nde bafwa kele na mpongi na maziamu mpi bo ke monaka mpasi ve. Yo yina, kufwila muntu kele ve diswekamu mpi yo fwete pesa beto ve boma.

Ata beto ke sepelaka ti mpongi ya mbote na mpimpa, nani ke zolaka kubikala na mpongi kimakulu? Keti beto kele ti kivuvu nde bafwa yina me lala na maziamu ta vutuka na luzingu—bonso Lazare mpi mwana ya Yairusi ya nkento?

Yobi tata ya mabuta, yulaka ngiufula yai ya mfunu ntangu yandi zolaka kufwa. Yandi yulaka nde: “Kana muntu kufwa keti yandi lenda zinga diaka?”—Yobi 14:14, NW.

Ntangu Yobi yulaka Nzambi Nkwa-Ngolo Yonso, yandi mosi pesaka mvutu nde: “Nge ta binga, mpi mono ta pesa nge mvutu. Nge ta vanda ti mpusa ya ngolo ya kumona kisalu ya maboko na nge.” (Yobi 14:15, NW) Yobi ndimaka nde Yehowa vandaka ti mpusa ya ngolo na kumona kilumbu yina yandi ta futumuna nsadi na yandi ya kwikama. Keti Yobi vandaka kuvingila diambu yina lenda salama ve? Ata fioti ve.

Balufutumuku yina Yezu salaka pesaka nzikisa ya pwelele nde Nzambi pesaka yandi kiyeka ya kununga lufwa. Ya kieleka, Biblia ke tuba nde ntangu yai Yezu kele ti “bansapi ya lufwa.” (Kusonga 1:18) Yo yina, Yezu ta kangula bakielo ya maziamu, kaka mutindu yandi pesaka ntuma nde bo katula ditadi yina vandaka na maziamu ya Lazare.

Biblia ke vutukilaka lusilu ya lufutumuku mbala na mbala. Wanzio mosi ndimisaka profete Daniele nde: “Nge ta fwa kansi na kilumbu ya nsuka nge ta telama na kubaka matabisi na nge.” (Daniele 12:13) Yezu zabisaka Basaduse, bantwadisi ya Bayuda yina vandaka kundima ve lusilu ya lufutumuku nde: “Beno ke kudikusa sambu beno me zaba ve Masonuku mpi ngolo ya Nzambi.” (Matayo 22:23, 29) Ntumwa Polo tubaka nde: “Mono kele ti kivuvu na Nzambi, . . . nde bantu ya lunungu ti bantu ya kukonda lunungu ta futumuka.”—Bisalu 24:15.

Inki ntangu lufutumuku ya bantu ya lunungu ti bantu ya kukonda lunungu ta salama? Wanzio zabisaka Daniele, muntu ya lunungu nde yandi ta telama na “kilumbu ya nsuka.” Mutindu mosi Marta kwikilaka nde Lazare, mpangi na yandi ya bakala “ta futumuka na lufutumuku na kilumbu ya nsuka.”—Yoane 11:24.

Biblia ke wakanisa “kilumbu ya nsuka” ti luyalu ya Kimfumu ya Kristu. Polo sonikaka nde: “Sambu yandi [Kristu] fwete yala bonso ntotila tii kuna Nzambi ta tula bambeni yonso na nsi ya makulu na yandi. Yandi ta katula lufwa, mbeni na beto ya nsuka.” (1 Bakorinto 15:25, 26) Kikuma yai fwete pusa beto na kusamba sambu Kimfumu ya Nzambi kukwisa mpi luzolo na yandi kusalama na ntoto.b

Yobi zabaka mbote-mbote nde Nzambi kele ti luzolo ya kufutumuna bafwa. Kana kilumbu yina kulunga, Nzambi ta katula lufwa kimakulu. Mpi ata muntu mosi ve ta kudiyula diaka nde: ‘Keti lufwa kele nsuka ya mambu yonso?’