‘Beno Landa na Kusala Mpidiyai Sambu na Kuyindula Mono’
Beto Tasungimina Lufwa ya Yezu na Aprili 2
1. Sambu na nki Aprili 2, 2007, kele dati ya mfunu?
1 Na Aprili 2, 2007, na ntoto ya mvimba, bamilio ya bantu tavukana sambu na kusungimina lufwa ya Yezu ya kimenga. Yezu kufwaka sambu yandi vandaka kukotila kimfumu ya Tata na yandi ya zulu, mpi yandi monisaka nde Satana Dyabulu kukusaka ntangu yandi tubaka nde bantu kesadilaka Nzambi kaka sambu na bikuma ya bwimi. (Yobi 2:1-5) Madya ya Nkokila ya Mfumu keyibusaka beto mpi nde na nzila ya lufwa na yandi bonso muntu ya kukuka mpi ya kukonda masumu, Yezu kupesaka “moyo na yandi” bonso nkudulu sambu na “kukatula bantu mingi na kimpika ya masumu.” (Mat. 20:28) Yo yina, Yezu kusongaka balongoki na yandi nde: ‘Beno landa na kusala mpidiyai sambu na kuyindula mono.’ (Luka 22:19) Keti ntonda sambu na dikabu yai ya kitoko ya mekatuka na Nzambi mepusaka nge na kuyantika kudibongisa sambu na kusungimina dyambu yai ya kemonisa zola ya kuluta nene?—Yoa. 3:16.
2. Inki mutindu beto lenda yidika ntima na beto sambu na Lusungiminu?
2 Yidika Ntima na Nge: Kana beto tadila mambu yina kusalamaka na konso kilumbu na bilumbu ya nsuka ya luzingu ya Yezu ya kimuntu, beto lenda yidika ntima na beto sambu na Lusungiminu yai. Sambu na kusadisa beto, beto lenda kuta manaka ya sipesiali ya lutangu ya Biblia na kamukanda Beto Fimpa Masonuku Konso Kilumbu—2007 mpi na Calendrier 2007. Manaka yai ya lutangu ya Biblia kewakana mpenza ti bilumbu yina mambu ya kewakana ti lufwa ya Yezu kusalamaka na kutadila kalandrie ya beto kesadilaka bubu yai. Bilumbu mpi badati ya bo ketubila na disolo ya Biblia mekatuka na kalandrie ya Bayuda, yina bo ketangaka bilumbu banda na kudinda ya ntangu ya kilumbu ya ntete tii na kudinda ya ntangu ya kilumbu yina melanda. Beto tadilaka metode yai ya kutanga bilumbu mpi beto mesala manaka ya lutangu ya Biblia sambu na Lusungiminu na kulandaka yo. Kutadila dyaka bansangu yai na lutangu ya Biblia mpi kuyindulula na kisambu zola ya nene ya Nzambi, tasadisa beto na kubaka mpenza mambote ya Lusungiminu.
3. Inki mutindu beto lenda sadisa bantu ya kesepelaka na kyeleka mpi bayina melembaka na kubaka mambote ya Lusungiminu?
3 Binga Bantu Yankaka: Ngika ya Kisalu na Beto ya Kimfumu ya Februari kutubilaka kampanye ya sipesiali ya kubinga bantu na Lusungiminu. Keti nge mebaka dezia bangidika sambu na kusamuna mingi na ntangu ya kampanye yango? Keti nge mesalaka dezia lisiti ya bantu ya nge mezaba yina nge tabinga, mpi keti nge mesolula dezia ti bo? Kudibongisa sambu nge kuma na ntwala kibeni na nkokila ya Lusungiminu na mpila nde nge yamba bantu yina nge bingaka mpi bantu ya kesepelaka na kyeleka. Nge lenda vanda kisika mosi ti bo, mpi kuzikisa nde bo kele ti Biblia mpi mukanda ya bankunga. Monisa bo na bampangi yankaka ya dibundu. Na nima ya diskure, baka ntangu ya kupesa bamvutu na bangyufula na bo. Lomba bo na kukwisa kulanda diskure ya sipesiali yina tasalama na Aprili 15. Mingimingi bankuluntu tazikisa nde bantu yina vandaka kuvukana ti dibundu kansi yina melembaka mezwa emvitasio sambu na Lusungiminu mpi diskure ya sipesiali.
4. Inki mutindu beto lenda sadisa bantu na kulanda na kuyela na kimpeve na nima ya Lusungiminu?
4 Sadisa Bantu ya mpa ti Bayina Melembaka na Kuyela: Mpangi yina tasala diskure ya Lusungiminu tatendula na bunkufi nde beto kelongukaka Biblia ya ofele ti bantu mpi yandi tasyamisa bantu ya mpa na kulanda na kulonguka mambu ya metala Yehowa. Nge lenda sadila bakomantere na yandi sambu na kulomba bantu yina nge bingaka na kulonguka mambu mingi ya metala Yehowa. Kana bo meyantika ntete ve kulonguka Biblia, kusukinina ve na kuvutukila bo na nima ya Lusungiminu mpi monisa bo mutindu beto kelongukaka Biblia ya ofele ti bantu. Sambu bo yela na kimpeve, yo kelomba mpi nde bo vukana na balukutakanu ya dibundu. (Baeb. 10:24, 25) Sambu na kulungisa mambu yai, syamisa bo na kuyantika kukwisa na balukutakanu mbala na mbala. Bankuluntu fwete baka bangidika sambu na kukwenda kutala Bakristu yonso yina melembaka na kimpeve mpi yina kukwisaka na Lusungiminu sambu na kusadisa bo na kutadila na mudindu bangindu yina bo tubilaka na diskure. Kusala mutindu yai lenda pesa bo kikesa ya kuvukana dyaka na bisalu ya dibundu.
5. Inki mambote Lusungiminu lenda natila beto?
5 Lusungiminu kepesaka beto dibaku ya kuyindula na mudindu na mambu yina Yehowa ti Yezu mesalaka sambu na beto. Kuyindulula ya mutindu yai kekumisaka zola na beto sambu na bo ngolo mpi yo kevandaka na bupusi ya mbote na bikalulu na beto. (2 Kor. 5:14, 15; 1 Yoa. 4:11) Yai kele ntangu ya kuyantika kudibongisa mpi ya kubongisa bantu ya kesepelaka na kyeleka sambu na dyambu yai ya mfunu yina ntangu yo kesalamaka, beto ‘kezabisaka bantu nsangu ya lufwa ya Mfumu.’—1 Kor. 11:26.