Kampanye ya Sipesiali Sambu na Kubinga Bantu na Lusungiminu!
1. Banda na Marsi 21, 2009, bansamuni ya Kimfumu tasala nki na ntoto ya mvimba mpi sambu na nki?
1 Na Kiya, Aprili 9, 2009, bansadi ya Yehowa Nzambi na ntoto ya mvimba tavukana sambu na kuyindulula zola na yandi ya kuluta nene sambu na bantu. (Roma 5:6-8) Beto kevingila na kyese yonso nde bamilio ya bantu yina kesepelaka na kyeleka kuvukana ti beto ntangu beto tasungimina lufwa ya Yezu. Banda na Marsi 21, beto takabula emvitasio ya sipesiali ya Lusungiminu na ntoto ya mvimba.
2. Inki bangindu nge fwete vila ve ntangu nge kepesa emvitasio?
2 Bangindu ya Nge Fwete Vila Ve: Sadila mbote bifwanisu, bangyufula, mpi verse yina bo mevutukila ve bangogo na yo na emvitasio. Mu mbandu, nge lenda sadila kifwanisu yina kele na lutiti ya ntete ya emvitasio mpi kutuba nde: “Mu kezola kubinga nge na kusungimina ti beto lufwa ya Yezu, yina tasalama na Kiya, Aprili 9, 2009.” Na nima, tubila ntu-dyambu ya emvitasio mpi bangyufula yina melanda. Kuvila ve na kumonisa muwi nde yandi lenda binga bantu ya dibuta na yandi mpi bantu yonso yankaka yina tazola kukwisa ti yandi.
3. Inki nge lenda sala na nima ya kupesa muntu emvitasio?
3 Kana teritware ya dibundu na beno kele nene, bankuluntu lenda zabisa beno na kubika baemvitasio na banzo yina beno takuta ve bantu. Na bawikendi, beno takabula bazulunalu kumosi ti emvitasio. Baka lukanu ya kubinga bantu yina nge kevutukilaka, balongoki na nge ya Biblia, bantu ya dibuta, banduku ya nzo-nkanda, banduku ya kisalu, bamfinangani, mpi bantu yankaka yina nge mezaba. Na mvula meluta, mpangi-nkento mosi kubingaka bantu 30 ya dibuta na yandi, mpi mbala na mbala yandi vandaka kuyibusa bo mfunu ya dyambu yango. Yandi vandaka na kyese mpenza sambu bantu 25 kwisaka na Lusungiminu, mpi 4 na kati na bo kundimaka na kulonguka Biblia!
4. Inki bangidika beto fwete baka ntangu yai, mpi sambu na nki?
4 Kudibongisa Ntangu Yai: Bansamuni mingi lenda kuka kusala mingi na kisalu ya kusamuna na Marsi mpi Aprili. Kana nge kele ti bana to balongoki ya Biblia yina keyela mbote, yo lenda vanda ntangu ya mbote sambu na bo na kukuma bansamuni yina mebakaka ntete ve mbotika. Yai kele ntangu ya kuyantika kubaka bangidika sambu na kusala mingi na kampanye yai ya kubinga bantu na kusungimina zola ya kuluta nene yina Yehowa ti Yezu memonisilaka beto.—Yoa. 3:16; 15:13.