Beto Takabula Baemvitasio ya Lusungiminu na Ntoto ya Mvimba!
1. Bo meyidika inki kampanye ya sipesiali yina tasalama na ntoto ya mvimba na ntwala ya Lusungiminu?
1 “Beno [landa na kusala] mpidiyai sambu na kuyindula mono.” (Luka 22:19) Sambu na kulemfuka na ntuma yai ya Yezu, bansambidi ya Yehowa mpi bantu yina kesepelaka na kyeleka tavukana na Marsi 30, 2010, sambu na kusungimina lufwa ya Yezu. Beto takabula emvitasio mosi ya sipesiali na ntoto ya mvimba banda na Marsi 13 tii na Marsi 30.
2. Inki mutindu beto lenda pesa emvitasio?
2 Mutindu ya Kusala Yo: Nge lenda pesa muwi emvitasio mpidina yandi lenda mona bifwanisu yina kele na lutiti ya zulu, na nima nge lenda tuba nde: “Na nkokila ya Marsi 30, bamilio ya bantu na ntoto ya mvimba tavukana sambu na kusungimina lufwa ya Yezu. Mu mekwisa sambu na kupesa nge ti dibuta na nge emvitasio yai sambu beno kwisa na lukutakanu yango. Nge lenda kwisa mpi ti banduku na nge. Tala ntangu mpi kisika yina yo tasalama na teritware na beto.” Na kutadila mambu ya nge takutana ti yo, nge lenda pona na kutanga Luka 22:19 sambu na kumonisa ntuma yina Masonuku kepesa. Kansi kuvila ve nde, sambu beto kele ve ti ntangu mingi sambu na kusala teritware ya mvimba, yo kele mbote nde masolo na beto kuvanda ya nkufi.
3. Banani beto lenda bingisa?
3 Kana dibundu na beno kele ti teritware ya nene, bankuluntu lenda zabisa beno na kubika baemvitasio na banzo yina beno takuta ve bantu na mbala ya ntete. Kana mpila kele, beno kabula bazulunalu kumosi ti baemvitasio. Sala ngolo na kubingisa bantu yina nge kevutukilaka, balongoki na nge ya Biblia, bantu ya kisalu, bana ya nzo-nkanda, bampangi ya kinsuni, bamfinangani, mpi bantu yankaka yina nge mezaba.
4. Ntonda na beto sambu na zola ya Yehowa kumonisaka na mutindu yandi pesaka nkudulu tapusa beto na kusala inki?
4 Kudibongisa Sambu na Kusala Mingi: Nsungi ya Lusungiminu kele ntangu ya mbote sambu na kusala mingi na kisalu ya kusamuna. Keti nge lenda yidika manaka na nge sambu na kusala bonso mupasudi-nzila nsadisi? Keti nge kele ti bana to balongoki ya Biblia yina keyela mbote na kimpeve? Kana yo kele mutindu yina, solula ti bankuluntu sambu bo tala kana bantu yina ya mpa kelungisa malombo sambu na kuvukana na kampanye yai ya sipesiali bonso bansamuni ya mebakaka ntete ve mbotika. Ntonda na beto sambu na zola ya Yehowa kumonisaka na mutindu yandi pesaka nkudulu tapusa beto kaka ve na kuvanda na Lusungiminu kansi yo tapusa beto mpi na kubinga bantu mingi na kuvukana ti beto.—Yoa. 3:16.