Beto Fwete Vanda Ntima-Nda na Kisalu na Beto ya Kusamuna
1. Inki mutindu Yehowa memonisilaka bantu ntima-nda?
1 Ntima-nda ya Nzambi kemonanaka na bangwisana na yandi ti bantu. (Kub. 34:6; Nk. 106:41-45; 2 Pie. 3:9) Mbandu mosi ya kuluta nene ya zola mpi ya ntima-nda na yandi lenda monana na kisalu ya kusamuna Kimfumu yina kesalama na ntoto ya mvimba. Bamvula kiteso ya 2 000 melutaka banda Yehowa kesalaka ngolo sambu na kusadisa bantu, kansi ata mpidina yandi kelanda na kubenda bantu ya ntima ya mbote pene-pene na yandi. (Yoa. 6:44) Inki mutindu beto lenda landa mbandu ya ntima-nda ya Yehowa na kisalu na beto ya kusamuna?
2. Inki mutindu beto lenda monisa ntima-nda ntangu beto kesamuna na teritware na beto?
2 Kisalu ya Nzo na Nzo: Beto kelandaka mbandu ya ntima-nda ya Yehowa ntangu beto kesamunaka kukonda kulemba na tiritware yina bantu memonisaka ntete ve dikebi na nsangu na beto. (Bis. 5:42) Beto kemonisaka ntima-nda ntangu bantu kebuyaka nsangu na beto, ntangu bo kesekaka mpi ketelaminaka kisalu na beto ya kusamuna. (Mar. 13:12, 13) Beto kemonisaka mpi ntima-nda ntangu beto kekwaminaka na bikesa na beto ya kulosila bankeni ya kyeleka masa ata ntangu yo kevandaka mpasi na kukuta bantu ya kesepelaka na kyeleka na banzo na bo.
3. Sambu na nki yo kelombaka kuvanda ntima-nda ntangu beto kesala bamvutukila ya mpa mpi kelonguka Biblia ti bantu?
3 Kulonguka Biblia ti Bantu: Yo kelombaka kuvanda ntima-nda sambu na kukuna mpi kuyedisa nti. Beto lenda sansa yo, kansi beto lenda kuka ve kuyedisa yo nswalu-nswalu. (Yak. 5:7) Mutindu mosi, kuyela ya kimpeve kesalamaka malembe-malembe mpi na bitambi. (Mar. 4:28) Bantu yina beto kelongukaka Biblia ti bo lenda mona nde yo kele mpasi na kuyambula balukwikilu ya luvunu ya mabundu to binkulu yina kewakanaka ve ti Masonuku. Beto fwete sosa ve kuyedisa ntinu-ntinu bantu yina kelongukaka Biblia ti beto na kupusaka bo na kingolo-ngolo na kusala bansoba. Yo kelombaka kuvanda ntima-nda sambu na kubikila mpeve ya Nzambi ntangu ya mefwana sambu yo sala kisalu na ntima ya longoki.—1 Kor. 3:6, 7.
4. Inki mutindu ntima-nda lenda sadisa beto na kuta kimbangi na mutindu ya mbote na bampangi ya dibuta na beto yina kele ve Bakristu?
4 Bampangi ya Dibuta Yina Kele Ve Bakristu: Ata beto kele ti mpusa ya ngolo nde bampangi ya dibuta na beto yina kele ve Bakristu kulonguka kyeleka, beto kemonisaka ntima-nda ntangu beto kevingilaka ntangu ya mbote ya kuzabisa bo balukwikilu na beto, mpi ntangu beto kesosaka ve kulonga bo mambu mingi kuluta. (Lo. 3:1, 7) Na ntangu beto kevingila, bikalulu na beto fwete monisa nde kyeleka mesobaka beto, mpi beto fwete vanda kaka ya kuyilama sambu na kumonisa lukwikilu na beto na mawete mpi na luzitu mingi. (1 Pie. 3:1, 15, 16) Ya kyeleka, kuvanda ntima-nda na kisalu ya kusamuna tavanda mbote mingi mpi tapesa Tata na beto ya zulu kyese.