Kudibongisa Sambu na Lusungiminu ti Kiese na Ntima

1. Nsungi ya Lusungiminu kele ntangu mosi ya mbote ya kusala inki?

¹ Lusungiminu yina ta salama na Kizole, Marsi 26 ta pesa beto dibaku ya mbote kibeni ya kusepela na mambu yina Nzambi salaka sambu na kugulusa beto. (Yez. 61:10) Kiese ta sadisa beto na kudibongisa mbote ata na ntwala ya kusala lusungiminu. Inki mutindu?

2. Inki ke pusaka beto na kudibongisa sambu na Lusungiminu?

² Kudibongisa Sambu na Lusungiminu: Kusungimina Madia ya Nkokila ya Mfumu kele diambu mosi ya mfunu kibeni kansi ya kubaka ve na zulu-zulu. Yo ke lombaka kuyidika mambu na ntwala sambu na kuvila ve mambu ya mfunu. (Bing. 21:5) Beno fwete pona ntangu mpi kisika ya me fwana. Beno fwete sosa mpi vinu ti mampa ya me fwana. Kisika yina lusungiminu ta salama fwete vanda bunkete mpi ya kuyilama. Mutubi ya beno me pona fwete kudibongisa mbote-mbote, mpi beno fwete pesa bantuma ya pwelele na bampangi yina ta yamba bantu mpi bayina ta lutisa bidimbu. Ntembe kele ve nde beto ke salaka dezia mambu yai. Ntonda sambu na nkudulu ke pusa beto na kudibongisa mbote sambu na dibaku yai ya santu.—1 Pie. 1:8, 9. 

3. Inki mutindu beto lenda yidika ntima na beto sambu na Madia ya Nkokila ya Mfumu?

³ Kuyidika Ntima: Yo ke vandaka mpi mfunu na kuyidika ntima na beto sambu na kubakisa mbote-mbote mfunu ya Lusungiminu. (Esd. 7:10, NW) Yo yina, beto fwete baka ntangu ya kutadila baverse ya sipesiali ya kutanga na nsungi ya Lusungiminu mpi kuyindulula bilumbu ya nsuka ya luzingu ya Yezu na ntoto. Kuyindulula mpeve ya kuditambika ya Yezu ta pusa beto na kulanda mbandu na yandi.—Bag. 2:20.

4. Inki mambote ya nkudulu ke pesaka nge kiese ya mingi?

⁴ Lufwa ya Yezu monisaka nde luyalu ya Yehowa kele ya mbote. Yo me katulaka beto na kimpika ya masumu mpi ya lufwa. (1 Yoa. 2:⁠2) Yo me kangudilaka beto nzila ya kuvanda na bangwisana ya ngemba ti Nzambi mpi ya kubaka luzingu ya mvula na mvula. (Bakol. 1:21, 22) Yo ke sadisaka beto mpi na kukumisa ngolo lukanu na beto ya kuzinga na kuwakana ti kudipesa na beto na Yehowa mpi kuvanda balongoki ya kwikama ya Yezu. (Mat. 16:24) Bika nde kiese na nge kukuma mingi ntangu nge ke kudibongisa sambu na kuvanda na Lusungiminu yina ke kwisa!