Mutindu ya Kusadila Banani Kesala Luzolo ya Yehowa Bubu Yai?
Kamukanda ya Mpa Sambu na Kunata Balongoki ya Biblia na Organizasio
1. Inki kele balukanu tatu ya kamukanda Luzolo ya Yehowa?
1 Keti nge me yantikaka kusadila kamukanda ya mpa Banani Kesala Luzolo ya Yehowa Bubu Yai? Lukanu na yo kele (1) kusadisa balongoki ya Biblia na kuyikana ti beto, (2) kusadisa bo na kuzaba bisalu na beto, mpi (3) kumonisa bo mutindu Organizasio na beto ke twadisamaka. Konso lutiti ya kamukanda Luzolo ya Yehowa kele na dilongi mosi mpamba mpi beto lenda tadila dilongi yango kukonda mpasi na minuta tanu to kumi na nima ya kulonguka Biblia ti muntu.
2. Tendula mutindu bo me yidika kamukanda yai mpi mambu yina kele na kati.
2 Mutindu Bo Me Yidika Mambu na Kati: Mutindu beto me mona yo, kamukanda yai kele na bitini tatu; konso kitini ke tubila mambu mingi ya organizasio ya Yehowa. Bantu-diambu ya malongi yonso 28 kele bangiufula, mpi tubantu-diambu ya kele na bisono ya ndombe mingi yina ke landa ke pesa bamvutu na bangiufula yina. Bo me tula bafoto ya me katuka na bansi kuluta 50 sambu na kumonisa nde kisalu na beto ke salamaka na ntoto ya mvimba. Malongi mingi kele ti balupangu, “Sosa Kuzaba Mambu Mingi;” yo kele ti bangindu yina nge lenda sadisa longoki na nge na kulanda.
3. Inki mutindu beto lenda sadila kamukanda Luzolo ya Yehowa?
3 Mutindu Nge Lenda Sadila Yo: Sambu na kuyantika, benda dikebi na ngiufula yina kele ntu-diambu ya dilongi. Na nima, ntangu beno ke tanga dilongi, benda dikebi na tubantu-diambu ya bisono ya ndombe. Na nsuka, beno tadila bangiufula ya mvutukila yina kele na nsi ya lutiti. Beno lenda tanga dilongi ya mvimba to kutanga mpi kutadila yo ndambu-ndambu. Sadila luswasukusu sambu na kupona baverse yina beno ta tanga. Kuvila ve na kutadila bifwanisu mpi balupangu “Sosa Kuzaba Mambu Mingi.” Mbala mingi, yo ke lombaka kulonguka malongi na ndonga. Kansi, nge lenda tadila dilongi ya nkaka yina ke wakana ti diambu mosi ya beno fwete tadila kukonda kusukinina. Mu mbandu, kana lukutakanu mosi ya nene ke kwisa, beno lenda kwenda na dilongi 11.
4. Sambu na nki nge kele na kiese ya kuvanda ti kamukanda yai ya mpa?
4 Ntangu beto ke longuka Biblia ti muntu, beto ke sadisaka yandi na kuzaba Tata na beto ya zulu. Kansi, beto fwete longa yandi mpi na kuzaba organizasio ya Yehowa. (Bing. 6:20) Kamukanda yai ya mpa ke sadisaka beto na kusala yo. Yo ke pesa beto kiese kibeni!