Keti Nge Ta Sadila Dibaku Yai?
Lusungiminu ya Ke Kwisa Ta Sadisa Beto na Kumonisa Ntonda
1. Inki dibaku ya sipesiali beto ta vanda ti yo na nsungi ya Lusungiminu?
1 Lusungiminu yina ta salama na Aprili 14, ta pesa beto dibaku mosi ya sipesiali ya kuyedisa mpi ya kumonisa ntonda na mambote ya Yehowa. Disolo yina kele na Luka 17:11-18 ke monisa mutindu Yehowa ti Yezu ke tadilaka ntonda. Diambu ya mawa kele nde, muntu mosi mpamba na kati ya bantu kumi ya maladi ya lepre yina Yezu belulaka, sadilaka dibaku yina sambu na kumonisa ntonda. Na bilumbu ke kwisa, na nsadisa ya nkudulu, maladi yonso ta mana mpi yo ta sala nde beto baka luzingu ya mvula na mvula! Ntembe kele ve nde, beto ta tonda Yehowa konso kilumbu sambu na balusakumunu yina. Kansi, nki mutindu beto lenda monisa ntonda na beto na bamposo yina ke kwisa?
2. Inki mutindu beto lenda yedisa ntonda na beto sambu na nkudulu?
2 Yedisa Ntonda: Mawi ya kumonisa ntonda ke katukaka na mabanza. Sambu na kusadisa beto na kuyedisa ntonda na beto sambu na nkudulu, beto lenda baka manaka ya lutangu ya sipesiali ya Biblia sambu na Lusungiminu na bisika mingi, mu mbandu na appendice B12 ya Mbalula ya Nsi-Ntoto ya Mpa ya Kingelesi yina bo me tomisa, na kalandrie, mpi na kamukanda Beto Fimpa Masonuku Konso Kilumbu. Sambu na nki ve kutadila yo na dibuta? Kusala mutindu yina ta yedisa ntonda na beto sambu na nkudulu. Yo ta vanda ti bupusi ya mbote na bikalulu na beto.—2 Bak. 5:14, 15; 1 Yoa. 4:11.
3. Inki mitindu beto lenda monisa ntonda na nsungi ya Lusungiminu?
3 Monisa Ntonda: Ntonda ke monanaka na bisalu. (Bakol. 3:15) Muntu ya lepre yina monisaka ntonda, salaka bikesa sambu na kumona Yezu mpi kutonda yandi. Ntembe kele ve nde, yandi zabisaka mpi bantu ya nkaka na kikesa yonso mutindu bo belulaka yandi. (Luka 6:45) Keti ntonda na beto sambu na nkudulu ta pusa beto na kusamuna na kikesa yonso na kampanye ya kubingisa bantu na Lusungiminu? Kisalu ya kimupasudi-nzila nsadisi to kusala mingi na kisalu ya kusamuna na nsungi ya Lusungiminu, kele mutindu ya nkaka ya mbote ya kumonisa ntonda. Na nkokila ya Lusungiminu, ntonda ta pusa beto na kuyamba banzenza mpi kupesa bamvutu na bangiufula na bo.
4. Inki mutindu beto lenda sadila dibaku yai ya Lusungiminu kukonda kuwa mpasi na ntima?
4 Keti Lusungiminu yai ta vanda ya nsuka sambu na beto? (1 Bak. 11:26) Beto me zaba ve. Kansi beto me zaba nde kana yo me luta, beto me lutisa dibaku mosi ya mbote kibeni ya kumonisa ntonda. Keti nge ta sadila dibaku yai? Bika nde bangogo ya munoko na beto ya ke monisa ntonda mpi kuyindulula ya ntima na beto kupesa Yehowa kiese, Muntu ya me pesaka beto dikabu ya nkudulu.—Nk. 19:15.