Keti Nge Ke Yilama Sambu na Lusungiminu?

Na Nisani 13 ya mvu 33 ya T.B., Yezu zabaka nde yandi bikalaka ti nkokila mosi ya kulutisa ti balongoki na yandi na ntwala nde bo fwa yandi. Yo lombaka nde yandi sala Paki ya nsuka ti bo mpi na nima yandi yantikisa nkinsi ya mpa disongidila Madia ya Nkokila ya Mfumu. Sambu na kusala nkinsi yai ya mfunu, yo lombaka nde bo yilama mbote. Yo yina, yandi tindaka Piere ti Yoane sambu na kuyidika mambu. (Luka 22:7-13) Konso mvula yantika ntangu yina, yo ke lombaka nde Bakristu kuyilama sambu na kusala Lusungiminu. (Luka 22:19) Inki mambu ya mfunu beto fwete sala sambu na kuyidika Lusungiminu yina ta salama na Aprili 3?

Mutindu Bankuluntu Fwete Yilama:

Beno baka bangidika sambu na kusala Lusungiminu na Nzo ya Kimfumu to na kisika ya nkaka ya mbote. Nzo ya Kimfumu to kisika yango fwete vanda ti bisika ya mbote ya kuvanda, ti nsemo mpi na kisika yina mupepe ke luta. Beno baka bangidika ya kutula bunkete na kisika yango na ntwala.
Beno pona mutubi ya me fwana, ntwadisi ya me fwana mpi bampangi-babakala ya me fwana yina ta sala kisambu sambu na mampa ti vinu.
Kana mabundu mingi ta sala Lusungiminu na kisika mosi, beno yidika ntangu ya balukutakanu na beno mpi beno baka bangidika sambu na ntangu ya beno ta kota, na ntangu ya beno ta basika mpi sambu na parkingi.
Beno pona bampangi yina ta yamba bantu mpi bampangi yina ta lutisa mampa ti vinu.
Beno baka bangidika sambu mampa, vinu, malonga, makopa ya tala-tala, mesa mpi lele ya mesa ya beno ta sadila kuvanda ya mbote.

Mutindu Bansamuni Fwete Yilama:

Baka bangidika sambu na kusamuna mingi na nsungi ya kukabula ba-emvitasio ya Lusungiminu.
Sala listi ya balongoki ya Biblia, bampangi ya kinsuni, banduku ya nzo-nkanda, banduku ya kisalu, mpi bantu ya nkaka yina nge ta bingisa na Lusungiminu.
Tanga baverse ya bo me pesa sambu na Lusungiminu mpi yindulula yo.
Kwisa na ntwala na kilumbu ya Lusungiminu sambu na kuyamba banzenza.