Beto Yedisa Mayele na Beto na Kisalu ya Kusamuna—Vanda ti Kikalulu ya Kubikila Bantu Bazulunalu Mbala na Mbala

Mfunu na Yo: Bantu mingi ya ke zolaka kutanga bazulunalu na beto ke sepelaka ve kulonguka Biblia ti beto. Ziku, bo ke sepelaka ti mabundu na bo to bo ke monaka nde bo kele ve ti ntangu ya kulonguka. Ntangu bo ke tanga bazulunalu na beto mbala na mbala, bo lenda kuma ti nzala ya ngolo ya Ndinga ya Nzambi. (1 Pie. 2:2) Disolo mosi buna lenda simba ntima na bo to mambu ya luzingu na bo lenda soba. Yo yina, kuvutukila bo mbala na mbala sambu na ntangu fioti ta sadisa bo na kuyikana ti beto mpi yo ta sadisa beto na kuzaba mambu ya bo ke zolaka mpi mambu ya ke yangisaka bo. Nsuka-nsuka, bo lenda ndima kulonguka Biblia.

Mutindu ya Kusala Yo:

Konso ngonda, bumba ntangu ya kunatila bantu banimero ya mpa ya Nzozulu ya Nkengi mpi Réveillez-vous ! Nge lenda vutukila bo bantangu ya nkaka na ngonda sambu na kuyedisa mpusa na bo ya kutanga disolo mosi na bazulunalu ya nge bikilaka bo to kupesa bo mikanda ya beto ke kabula na ngonda yina. Sonika mikanda ya nge ke bikila bo.—Tala Kisalu na Beto ya Kimfumu ya Yanuari 2014, lut. 3.
Kudibongisa konso ntangu ya nge ke vutukila bo. Na kisika ya kubikila bawi bazulunalu mpamba, solula ti bo mpi ta kinduku ti bo sambu na kuyedisa mpusa na bo.
Zaba ntangu yina nge lenda yantika kulonguka ti bo. Kana muntu mosi ya nge ke bikilaka bazulunalu mbala na mbala kuyula nge mambu yina Biblia ke tubaka sambu diambu mosi, natila yandi mukanda mosi ya beto ke longukaka ti bantu ya ke pesa mvutu na ngiufula na yandi mpi beno tadila yo. Na ntwala ya kukatuka, yula yandi ngiufula mosi ya ke wakana ti mambu ya beno me tadila mpi beno ta tadila ngiufula yango na mbala ya nima. Kana nge ke sadila Biblia to mukanda mosi ya beto ke longukaka ti bantu sambu na kusolula ti yandi mbala na mbala mpi na bunkufi, pana nge ke na kulonguka Biblia ti yandi. Keti nge pesaka muwi kamukanda Nsangu ya Mbote mpi longukaka ti yandi na bunkufi? Keti nge songaka yandi video Sambu na Nki Beto Fwete Longuka Biblia? mpi Inki Mutindu Kulonguka ya Biblia Ke Salamaka? (Comment se passe un cours biblique?) Ata muntu yango ke buyaka kulonguka banda ntama, mambu ya luzingu na yandi lenda soba. Keti nge lenda vutukila yandi diaka?

Sadila Yo Ngonda ya Mvimba:

Sala listi ya bantu yina nge lenda bikila bazulunalu mbala na mbala. Bikila bo bazulunalu ya mpa mpi zabisa bo nde nge ta natila bo bazulunalu ya ngonda yina ke kwisa.