Mbandu ya Bangogo ya Kukotila na Masolo

“Bubu yai, beto ke kabula trakiti yai na bantu yonso ya kartie na beto. [Pesa muwi trakiti Inki Mutindu Nge Ke Monaka Biblia? mpi yula yandi ngiufula yina kele na lutiti ya ntete. Monisa yandi mvutu yina Biblia ke pesa na 2 Timoteo 3:16 mpi siamisa yandi na kutanga trakiti yango.] Bantu mingi ke zabaka ve nde Biblia ke pesaka bamvutu ya mbote na bangiufula bonso yai. [Songa yandi bangiufula ya kele na luyantiku ya disolo ya ntete ya Nzozulu ya Nkengi.] Zulunalu yai ke monisa mutindu nge lenda baka bamvutu na Biblia na nge.”

“Bubu yai, beto ke tala bantu mwa ntangu fioti sambu bantu mingi ke kudiyangisa na bansoba ya ke salama na mabuta. Na bamvula me luta, bibuti vandaka kutwadisa bana na bo. Kansi na mabuta ya nkaka bubu yai, yo ke monana nde bana me kuma kutwadisa bibuti na bo. Keti nge ke yindula nde bubu yai bibuti ke longaka bana na bo na mutindu yo me lombama? [Bika muntu yango kupesa mvutu.] Biblia ke tuba nde kulonga bana kele mfunu. [Tanga Bingana 29:17.] Zulunalu yai kele ti malongi ya Biblia sambu na kulonga bana.”