Keti Kuvanda Muntu ya Mbote Lenda Sadisa Nge na Kuvanda ti Luzingu ya Mbote na Bilumbu Ke Kwisa?

Bamvula mingi me luta, bantu mingi vandaka kuyindula nde kana muntu kele muntu ya mbote yandi ta vanda ti luzingu ya mbote na bilumbu ke kwisa. Mu mbandu, bantu ya Esti ke ndimaka mambu yai ya Confucius longi mosi ya filozofi ya bamvu ( 551-479 N.T.B.) tubaka. Yandi tubaka nde: “Mambu yina nge ke zola nde bo sadila nge ve, kusala yo mpi ve na bantu ya nkaka.”a

MAMBU YINA BANTU MINGI KE SALAKA

Tii bubu yai, bantu mingi ke ndimaka nde kana bo kele ti bikalulu ya mbote, bo ta vanda ti luzingu ya mbote na bilumbu ke kwisa. Bo ke sosaka kuvanda luzitu, kuvanda ti bikalulu ya mbote, kuzaba kisika na bo na kati ya bantu mpi kuvanda ti kansansa ya mbote. Linh yina ke zingaka na Vietnam ke tuba nde: “Ntangu yonso mono vandaka kundima nde kana mono kele masonga mono ta vanda ti luzingu ya mbote.”

Nkento yango ke pesa bantu yina kele bansukami mpi yina kele ve ti banzo madia.

Bantu ya nkaka ke sosaka kusala mambu ya mbote sambu na kuzitisa mambu yina bo ke longaka bo na mabundu na bo. Hsu-Yun yina ke zingaka na Taiwan ke tuba nde: “Bo longaka mono nde kana muntu ke sala mambu ya mbote, yandi ta vanda ti luzingu ya mbote na nima ya lufwa na yandi. Kansi kana yandi ke sala mambu ya mbi, yandi ta kwenda na bilungi ya tiya.”

MAMBU YINA BO KE KUTANAKA TI YO

Na nsuka ya kilumbu, nkento yango me kuma mawa-mawa, yandi me lemba mpi ke bondila mwana na yandi ya bakala.

Ya kieleka, kana beto ke sadila bantu ya nkaka mambu ya mbote, beto ke vandaka na kiese. Kansi na kutuba masonga, bantu yina ke sosaka kusadila bantu ya nkaka mambu ya mbote, bo ke sadilaka bo ve mambu ya mbote mutindu bo vandaka kuyindula. Shiu Ping yina ke zingaka na Hong Kong ke tuba nde: “Mambu ya mono kutanaka ti yo, sadisaka mono na kubakisa nde bantu yina ke salaka ntangu yonso mambu ya mbote, bo ke vutudilaka bo ve mambote. Mono vandaka kusosa kusadisa dibuta na mono mpi kusala mambu ya mbote. Kansi makwela na beto fwaka mpi bakala na mono bikisaka mono ti mwana na mono ya bakala.”

Bantu mingi vandaka kuyindula nde bantu yonso ya ke sambilaka ke vandaka ve bantu ya mbote. Etsuko yina ke zingaka na Japon ke tuba nde: “Mono kumaka kukwenda na dibundu mosi mpi mono kumaka kutwadisa kimvuka mosi ya baleke. Yo pesaka mono mpasi mingi na kumona nde bantu ya nkaka na dibundu yango, vandaka kusala mansoni, bo vandaka kunwanina kimfumu mpi bo vandaka kuyiba mbongo ya dibundu.”

“Mono vandaka kusosa kusadisa dibuta na mono mpi kusala mambu ya mbote. Kansi makwela na beto fwaka mpi bakala na mono bikisaka mono ti mwana na mono ya bakala.”—SHIU PING, HONG KONG

Bantu yina ke sambilaka mingi mpi ke sosaka kusala mambu ya mbote, bo ke lembaka nitu ntangu bo ke kutanaka ti mambu ya mpasi. Mambu yai kuminaka Van nkento mosi yina ke zingaka na Vietnam. Yandi ke tuba nde: “Konso kilumbu mono vandaka kunata bambuma, baflere mpi madia na maziamu ya bankaka na mono yina me fwaka. Mono vandaka kuyindula nde bo ta sakumuna mono.” Yandi ke tuba diaka nde: “Ata mono vandaka kusala mambu yai yonso ya mbote mpi mono vandaka kuzitisa mambu yina dibundu na beto vandaka kulonga bamvula mingi, bakala na mono kumaka kubela ngolo mpi na nima mwana na beto ya nkento yina vandaka kutanga na insi ya nkaka fwaka ntangu yandi vandaka mwana ya fioti.”

YO ME SUKA VE KAKA NA KUVANDA MUNTU YA MBOTE

Yo kele mbote na kuvanda muntu ya mbote. Kansi kuvanda muntu ya mbote, lenda sala ve nde muntu kuvanda ti luzingu ya mbote na bilumbu ke kwisa. Sambu na nki? Beto tala mambu yina Masonuku ya Santu ke tuba.

BANTU YONSO VE KE SALAKA MAMBU YA MBOTE

“Nsumuki mosi mpamba lenda bebisa mambu mingi ya mbote.”—LONGI 9:18.

Ata nge ke sala yonso sambu na kuvanda muntu ya mbote, bantu ya nkaka lenda sadila nge mambu ya mbi. Mu mbandu na ntangu ya kipupa mosi, nge lenda landa bansiku yina bamfumu ya luyalu me tula mpi nge lenda buya kukangama ti bantu ya nkaka. Kansi nki ta salama kana bantu ya nkaka ke zola ve kulemfuka na mambu yina bamfumu me tuba? Kukonda bulemfu na bo lenda natila bantu ya nkaka bampasi.

BANTU LENDA KUDIKUSA NA BADESIZIO YA NKAKA YINA BO KE BAKAKA

“Kele ti nzila yina ke monanaka mbote na meso ya muntu, Kansi na nsuka yo ke nataka na lufwa.”—BINGANA 14:12.

Bantu mingi me salaka mambu yina bo yindulaka nde yo vandaka mbote kansi na nima bo me bakisaka nde yo vandaka mambu ya mbi. Ata bo yindulaka nde mambu yina bo salaka vandaka mbote, tii bubu yai bo ke monaka mpasi sambu na desizio yina bo bakaka.

LUZINGU KE VANDAKA VE KAKA MUTINDU MOSI

“Beno ke zaba ve nki mutindu luzingu na beno ta vanda mbasi.”—YAKOBO 4:14.

Ata muntu ya mbote mpi ke zabaka ve kilumbu yina yandi ta fwa. Mu mbandu, na ntangu yai ya maladi yai ya COVID-19, bantu mingi yina vandaka kusala mambu ya mbote fwaka sambu bo sosaka kusadisa bantu ya nkaka. Liting yina ke zingaka na Chine, papa na yandi fwaka na aksida ya kaminio. Yandi ke tuba nde: “Mono ndimaka ve nde muntu ya mbote mutindu yina lenda fwa. Papa vandaka muntu ya ke salaka ngolo, muntu ya kudikulumusa mpi ya masonga. Kansi, kaka yandi mosi mpamba muntu fwaka na aksida ya kaminio yina.”

Keti kuvanda muntu ya mbote lenda sadisa muntu na kuvanda ti luzingu ya mbote na bilumbu ke kwisa? Sambu na kubaka mvutu na ngiufula yai, beto fwete tula ntima na mukanda yina lenda sadisa beto na kuzwa bamvutu na bangiufula ya beto ke kudiyulaka mpi yo lenda sadisa beto na kuzaba mambu yina beto lenda sala sambu na kuvanda ti luzingu ya mbote na bilumbu ke kwisa. Mukanda yango kele nki?

a Sambu na kuzaba mambu mingi yina Confucius longaka, tala kapu 7, paragrafe 31-35 ya mukanda L’humanité à la recherche de Dieu yina Bambangi ya Yehowa me basisaka mpi yina kele na internet na www.jw.org.