Sambu na Nki Biblia Ke Bingaka Yezu Mwana ya Nzambi?
Mvutu ya Biblia
Mbala mingi, Biblia ke bingaka Yezu “Mwana ya Nzambi.” (Yoane 1:49) Bangogo “Mwana ya Nzambi” ke monisa nde Nzambi kele Ngangi, to yandi muntu salaka bantu yonso, yo vanda Yezu. (Bankunga 36:9; Kusonga 4:11) Biblia ke tubaka ve nde Nzambi butaka mwana mutindu bantu ke butaka bana.
Biblia ke bingaka mpi bawanzio “bana ya Nzambi ya kieleka.” (Yobi 1:6) Diaka Biblia ke tubaka nde Adami muntu ya ntete vandaka “mwana ya Nzambi.” (Luka 3:38) Kansi, Biblia ke tubilaka Yezu bonso mwana ya ntete-ntete ya Nzambi sambu Yezu vandaka muntu ya ntete yina Nzambi salaka yandi mosi.
Keti Yezu zingaka na zulu na ntwala ya kubutuka na ntoto?
Ee. Yezu vandaka kigangwa ya kimpeve na ntwala nde yandi butuka muntu awa na ntoto. Yezu tubaka yandi mosi nde: “Mono katukaka na zulu.”—Yoane 6:38; 8:23.
Nzambi salaka Yezu na ntwala ya kusala bima yonso ya nkaka. Biblia ke tuba sambu na Yezu nde:
“Yandi kele . . . mwana ya ntete ya lugangu yonso.”—Bakolosai 1:15.
Yandi kele “luyantiku ya lugangu ya Nzambi.”—Kusonga 3:14.
Yezu lungisaka mbikudulu yina ke tubilaka “muntu yina kisina na yandi kele tuka bantangu ya ntama, tuka bilumbu ya ntama.”—Mika 5:2; Matayo 2:4-6.
Inki Yezu salaka na ntwala ya kukwisa na ntoto?
Yandi vandaka ti kiyeka mosi ya nene na zulu. Yezu tubilaka kiyeka yango ntangu yandi tubaka nde: “Tata, . . . pesa mono nkembo . . . yina mono vandaka na yo pene-pene na nge na ntwala nde nsi-ntoto kusalama.”—Yoane 17:5.
Yandi sadisaka Tata na yandi na kusala bima yonso ya nkaka. Yezu salaka na lweka ya Nzambi “bonso kapita ya kisalu.” (Bingana 8:30) Biblia ke tuba sambu na Yezu nde: “Na nzila na yandi, bo gangaka bima yonso ya nkaka na zulu mpi na ntoto.”—Bakolosai 1:16.
Nzambi sadilaka Yezu sambu na kusala bima yonso ya nkaka. Na kati ya bima yango, beto lenda tanga bawanzio, zulu ti ntoto mpi bima yonso ya kele na zulu mpi na ntoto. (Kusonga 5:11) Na mambu ya nkaka, Nzambi salaka kisalu ti Yezu mutindu muntu yina ke salaka bapula ya banzo ke salaka kisalu ti muntu ya ke tungaka banzo. Muntu yai ke salaka bapula ya banzo, kansi muntu yina ke tungaka banzo muntu ke sadilaka bapula yina.
Yandi vandaka Ndinga. Kana Biblia ke tubila Yezu ntangu yandi vandaka na zulu, yo ke bingaka yandi “Ndinga.” (Yoane 1:1) Ya kieleka, yo ke monisa nde Nzambi sadilaka Mwana na yandi sambu na kusonga mambu mpi bansiku na bawanzio ya nkaka.
Yo ke monana mpi nde Yezu vandaka Kinati-ndinga ya Nzambi na bantu awa na ntoto. Ziku Nzambi sadilaka Yezu, yina kele Ndinga, ntangu yandi pesaka Adami ti Eva bansiku na kilanga ya Edeni. (Kuyantika 2:16, 17) Ziku wanzio yina twadisaka bantu ya Izraele na ntoto ya zelo na zelo mpi yina yo lombaka nde bo lemfukila ndinga na yandi vandaka Yezu.—Kubasika 23:20-23.a
a Ndinga kele kaka ve wanzio mosi mpamba yina Nzambi sadilaka sambu na kusolula ti bantu. Mu mbandu, katula mwana na yandi mosi kaka ya kubutuka, Nzambi sadilaka bawanzio ya nkaka sambu na kupesa Nsiku na yandi na bantu ya Izraele na ntangu ya ntama.—Bisalu 7:53; Bagalatia 3:19; Baebreo 2:2, 3.