Keti Nge Kewaka Mpusa ya Kusala Bonso Yezu?

“Yandi monaka bantu mingi me kwisa. Yandi wilaka bo mawa, sambu bo vandaka bonso mameme yina me konda ngungudi ya kutala bo. Ebuna yandi yantikaka kulonga bo.”​—MARKO 6:34.

 1. Sambu na nki beto lenda yituka ve kana bantu kemonisa bikalulu ya mbote?

BANTU mingi memonisaka bikalulu ya mbote na nkenda yonso ya bantu. Beto lenda yituka ve. Yehowa Nzambi kevandaka mpi kemonisaka zola, bumbote, kikalulu ya kukaba, ti bikalulu yankaka ya beto kezolaka. Nzambi salaka bantu na kifwani na yandi. Yo yina, beto kebakisa sambu na nki bantu mingi kemonisaka mwa zola, bumbote, mawa, ti bikalulu yankaka ya Nzambi, nkutu yonso kevandaka na kansansa. (Kuyantika 1:26; Roma 2:14, 15) Kansi, nge lenda mona nde bantu mingi kemonisaka bikalulu yai kuluta bankaka.

 2. Inki mwa bisalu ya mbote bantu lenda sala, yina ziku kenataka bo na kuyindula nde bo kelanda mbandu ya Kristu?

² Ziku nge zaba babakala ti bankento yina kekwendaka kutala to kusadisa bantu ya maladi mbala na mbala, kemonisaka zola na bo na bantu yina kele na kifu na nitu, to kekabilaka bansukami bima. Yindula dyaka, bantu yina mawa na bo mepusaka bo na kudipesa sambu na kusala na banzo ya kingenga ya bo ketulaka bantu yina kebelaka maladi ya lepre, to na banzo yina bo kesansaka bana ya nsyona; bayina kesalaka kisalu ya luzolo ya mbote na balupitalu to na banzo yina bo ketulaka bantu yina kebelaka maladi ya kemanaka ve, to bantu yina kesalaka ngolo sambu na kusadisa bantu yina kevidisaka banzo na bo to barefizie. Mingi na kati na bo kemonaka nde kana bo kesala mpidina bo kelanda Yezu, yina kupesaka mbandu na Bakristu. Beto ketangaka na ba Evanzile nde Kristu kubelulaka bantu yina vandaka kubela mpi yandi pesaka madya na bantu yina vandaka na nzala. (Marko 1:34; 8:1-9; Luka 4:40) Zola, bumbote, ti mawa yina Yezu vandaka kumonisa kele mitindu ya kusonga “mabanza ya Kristo,” yina vandaka kusala bonso Tata na yandi ya kele na zulu.​—1 Korinto 2:16.

 3. Sambu na kuvanda ti dibanza ya bukatikati ya mambu ya mbote yina Yezu salaka, inki beto fwete tadila?

³ Kansi, keti nge kemonaka nde bubu yai bantu mingi na kati ya bayina zola ti mawa ya Yezu kesimbaka ntima na bo, kevilaka dyambu mosi ya mfunu ya mabanza ya Kristu? Beto lenda bakisa mbote dyambu yango kana beto tadila na dikebi yonso Marko kapu 6. Na kapu yina, beto ketanga nde bantu nataka bantu ya maladi na Yezu sambu yandi belula bo. Beto kelonguka mpi nde kilumbu yango, ntangu yandi monaka nde bantu yina kulandaka yandi vandaka na nzala, Yezu pesaka bo madya na kimpa. (Marko 6:35-44, 54-56) Kubelula bantu ya maladi ti kupesa madya na bantu yina vandaka na nzala vandaka mitindu mosi ya nene ya kumonisa zola mpi mawa. Kansi, keti yo vandaka mitindu ya ntete yina Yezu sadilaka sambu na kusadisa bantu yankaka? Mpi nki mutindu beto lenda landa na mutindu mosi ya kuluta mbote mbandu na yandi ya kukuka yina kumonisa zola, bumbote, ti mawa, kaka mutindu yandi landaka mbandu ya Yehowa?

Yandi zolaka kulungisa bampusa ya kimpeve

 4. Inki ntangu mambu yina ya bo ketubila na Marko 6:30-34 kusalamaka?

⁴ Yezu wilaka bantu yina vandaka penepene na yandi mawa ntetentete sambu na bampusa na bo ya kimpeve. Bampusa yina vandaka na mfunu mingi, kuluta nkutu bampusa ya kinsuni. Tala disolo yina kele na Marko 6:30-34. Dikambu ya bo ketubila na kisika yina kusalamaka na lweka ya Nzadi-mungwa ya Galilea, penepene na ntangu ya Nkinsi ya Paki na mvu 32 ya T.B. Bantumwa kuwaka makasi ti kikuma. Bo katukaka kusala nzyetolo ya nda, ntembe kele ve nde bo kwisaka na Yezu na mpusa ya ngolo ya kutela yandi mambu yina bo monaka na nzila. Kansi, kibuka mosi ya bantu kwisaka kuvukana kisika bo vandaka. Bantu vandaka mingi kibeni na mpila nde Yezu ti bantumwa na yandi kumonaka ve mpila ya kudya to kupema. Yezu zabisaka bantumwa nde: “Beto kwendeno kuvanda kisika mosi beto na beto, sambu beno kwenda kupema fioti.” (Marko 6:31) Bo kotaka na bwatu, ziku penepene ti Kapernaumi, bo kwendaka na simu ya Nzadi-mungwa ya Galilea na kisika mosi ya pima. Kansi, kibuka yango landaka ntinu na lweka ya masa mpi kumaka na kisika yina na ntwala bwatu na bo kukuma. Inki Yezu zolaka kusala? Keti yandi waka makasi sambu bo kwisaka dyaka kutula mazu na kisika yina ya kingenga? Ata fyoti ve!

 5. Inki mutindu Yezu waka na ntwala ya bibuka yina landaka yandi, mpi nki yandi salaka?

⁵ Ntangu Yezu monaka kibuka ya bantu yai, na kati na bo, bantu ya maladi, yina vandaka kukinga yandi ntima zuluzulu, yo simbaka ntima na yandi. (Matayo 14:14; Marko 6:44) Ntangu yandi tubilaka mambu yina kupusaka Yezu na kuwa mawa mpi mutindu Yandi salaka, Marko sonikaka nde: “Yandi monaka bantu mingi me kwisa. Yandi wilaka bo mawa, sambu bo vandaka bonso mameme yina me konda ngungudi ya kutala bo. Ebuna yandi yantikaka kulonga bo mambu mingi.” (Marko 6:34) Yezu monaka kibuka ya bantu mevukana mpamba ve, kansi yandi monaka mpi nde bo vandaka na mpusa ya bima ya kimpeve. Bo vandaka bonso mameme yina ketambula-tambula kukonda muntu yina tasadisa bo, kukonda ngungudi yina tanata bo na bisika kele matiti ya mubisu to yina tatanina bo. Yezu zabaka nde bamfumu ya mabundu ya ntima mbi, yina zolaka kuvanda bangungudi ya mbote, vandaka kumona mpamba bansukami, bo vandaka kuyindula mpi ve bampusa na bo ya kimpeve. (Ezekiele 34:2-4; Yoane 7:47-49) Yezu zolaka kuzinga ti bo na mutindu mosi ya kuswaswana, yandi zolaka kusala mambu mingi ya kuluta mbote sambu na bo. Yandi yantikaka kulonga bo mambu yina metala Kimfumu ya Nzambi.

6, 7. (a) Ba Evanzile kesonga nde nki kima kubakaka kisika ya ntete na mpila ya Yezu kulungisaka bampusa ya bantu? (b) Inki kima vandaka kupusa Yezu na kusamuna mpi na kulonga?

⁶ Tala mutindu disolo yankaka ya mefwanana na yai kemonisa mutindu mambu kulandanaka mpi ngindu yina fwete baka kisika ya ntete. Luka muntu kusonikaka disolo yango. Yandi vandaka munganga mpi yandi vandaka na susi mingi ya mavimpi ya bantu yankaka. “Bantu mingi . . . kwisaka kulanda yandi. Yesu yambaka bo, yandi yantikaka kuzabisa bo nsangu ya Kimfumu ya Nzambi, yandi belulaka mpi bantu yina vandaka na maladi.” (Beto bantu metengimisa bisono.) (Luka 9:11; Kolosai 4:14) Ata masolo yonso ve ya ketubila kimpa kelandaka ndonga yai, na kisika yai, nki kima disolo ya Luka yina yandi sonikaka na nsadisa ya mpeve ketubila ntete? Yo ketubila ntete nde Yezu kulongaka bantu.

⁷ Dyambu yai kewakana ti mambu yina kele na Marko 6:34. Verse yina kesonga pwelele mutindu Yezu vandaka kuwa ntetentete nzala ya kusonga mawa na yandi. Yandi longaka bantu sambu na kulungisa bampusa na bo ya kimpeve. Na luyantiku ya kisalu na yandi, Yezu tubaka nde: “Mono fweti zabisa Nsangu ya Mbote ya Kimfumu ya Nzambi na babwala ya nkaka mpi, sambu yina kele kisina ya mambu ya Nzambi tindilaka mono.” (Luka 4:43) Kansi, yo tavanda ngindu ya mbote ve kana beto yindula nde Yezu vandaka kulonga nsangu ya Kimfumu kaka sambu Nzambi lombaka yandi na kusala yo, bonso nde yandi vandaka kusala kisalu ya kusamuna kaka na kiseku. Ve, zola ti mawa yina yandi vandaka na yo sambu na bantu kele kibeni kima ya vandaka kupusa yandi na kuzabisa bo nsangu ya mbote. Kima ya kuluta mbote yina Yezu salaka, ata sambu na bantu ya maladi, bantu yina bademo vandaka kumonisa mpasi, bansukami, to bantu yina vandaka na nzala, vandaka kusadisa bo na kuzaba, na kundima, mpi na kuzola kyeleka yina ketadila Kimfumu ya Nzambi. Kyeleka yina vandaka na mfunu mingi kibeni sambu na kisalu yina Kimfumu tasala sambu na kunwanina kimfumu ya Yehowa mpi sambu na kupesa bantu balusakumunu yina tazinga kimakulu.

 8. Inki mutindu Yezu vandaka kudiwa sambu na kisalu na yandi ya kusamuna ti kulonga?

⁸ Kisalu ya kikesa ya Yezu ya kusamuna mambu yina metala Kimfumu vandaka kikuma ya nene ya yandi kwisilaka na ntoto. Penepene na nsuka ya kisalu na yandi na ntoto, Yezu zabisaka Pilate nde: “Kisalu ya mono butukilaka ti ya mono kwisilaka awa na nsi-ntoto, yo kele sambu na kutuba kitemwe na mambu yina kele ya kieleka. Konso muntu yina kele [na lweka] ya kieleka, yandi ke waka ndinga na mono.” (Yoane 18:37) Na masolo ya ntete yonso zole, beto monaka nde Yezu vandaka muntu mosi ya mawa, ya keyindulaka bankaka, ya bantu vandaka kufinama kukonda mpasi, ya vandaka kupesa bantu yankaka kilo, ya vandaka kutudila bantu ntima, mpi kima ya kuluta nene kele nde yandi vandaka kuzola bantu. Beto fwete bakisa mbote mitindu yina yonso ya kimuntu na yandi kana beto kezola kubakisa mabanza ya Kristu. Yo kele mpi mfunu kiteso mosi na kubakisa nde sambu na kuvanda na mabanza ya Kristu yo kelombaka dyaka kutula kisalu ya kusamuna ti ya kulonga na kisika ya ntete.

Yandi lombaka bantu yankaka na kuta kimbangi

 9. Kisalu ya kusamuna ti ya kulonga zolaka kubaka kisika ya ntete sambu na banani?

⁹ Yezu mpamba ve muntu kutulaka kisalu ya kusamuna ti ya kulonga na kisika ya ntete sambu na kusonga zola ti mawa. Yandi lombaka balongoki na yandi na kulanda mpi bikuma yina vandaka kupusa yandi, ti mambu yina vandaka mfunu mingi sambu na yandi, ti yina yandi vandaka kusala. Mu mbandu, na nima ya kupona bantumwa 12, nki kisalu bo zolaka kusala? Marko 3:14, 15 kezabisa beto nde: “Yandi solaka bantu kumi na zole. Yandi pesaka bo zina nde bantumwa. Yandi nde: ‘Mono me sola beno sambu beno ta vandaka ti mono, mpi sambu mono ta tindaka beno na kwenda kulonga; beno ta vandaka mpi na kiyeka ya kubasisa bampeve ya mbi.’” (Beto bantu metengimisa bisono.) Keti nge memona mambu yina zolaka kubaka kisika ya ntete sambu na bantumwa?

10, 11. (a) Ntangu yandi tindaka balongoki na yandi, nki Yezu songaka bo na kusala? (b) Ntangu yandi tindaka balongoki na yandi, na nki kima yandi tulaka dikebi mingi?

¹⁰ Na nima, Yezu pesaka bantumwa 12 yango kiyeka ya kubelula bankaka mpi ya kubasisa bampeve ya mbi. (Matayo 10:1; Luka 9:1) Na nima, yandi tindaka bo na kukwenda kusosa “bantu ya Israele yina kele bonso mameme yina me vilaka.” Sambu bo salaka nki? Yezu pesaka bo ntuma yai: “Beno kwenda kulonga bantu nde: ‘Kimfumu ya Nzambi me kuma penepene!’ Beno belula bantu ya maladi, beno tedimisa bantu na lufwa, beno belula bantu yina ke na maladi ya lepre, beno basisa bampeve ya mbi.” (Matayo 10:5-8; Luka 9:2) Inki kibeni bo salaka? “Ebuna balonguki kwendaka [1] kulonga bantu nde: ‘Beno balula ntima.’ [2] Bo vandaka kubasisa bampeve mingi ya mbi, bo vandaka kutula mpi bantu mingi ya maladi mafuta na ntu sambu na kubelula bo.”​—Marko 6:12, 13.

¹¹ Beto memona nde na bisika yonso ve kisalu ya kulonga kebaka kisika ya ntete, mutindu beto metanga mambu yina kele awa na zulu, keti yo kele ve kulutisa ndilu na yina metala mambu yina fwete baka kisika ya ntete to yina fwete pusa beto? (Luka 10:1-8) Beto fwete mona ve mpamba kiteso ya bo ketubila kulonga na ntwala ya kubelula. Tala mutindu mambu salamaka kilumbu yango yina. Na ntwala ya kutinda bantumwa na yandi 12, Yezu wilaka bibuka ya bantu yina mawa. Beto ketanga mutindu yai: “Yesu vandaka kwenda kutambula na babwala yonso ya nene ti ya fioti. Yandi vandaka kwenda kulonga bantu na banzo na bo ya bisambu, yandi vandaka kwenda kuzabisa bo Nsangu ya Mbote sambu na Kimfumu ya Nzambi, yandi vandaka kwenda kubelula bantu yina vandaka na maladi to na mpasi ya mutindu na mutindu. Ntangu yandi monaka bantu mingi-mingi, yandi wilaka bo mawa, sambu bo vandaka me lemba, kikesa ve, bonso mameme me konda ngungudi ya kutala bo. Ebuna Yesu tubilaka balonguki na yandi nde: ‘Bambuma mingi kele na bilanga, kansi bantu ya kisalu kele mingi ve sambu na kukatula yo. Beno bondila munkwa-bilanga na kutinda bantu ya nkaka ya kisalu sambu na kukatula bambuma na yandi.’”​—Matayo 9:35-38.

12. Bisalu ya kuyitukisa ya Yezu ti balongoki na yandi salaka vandaka ti nki lukanu dyaka?

¹² Sambu bo vandaka kuzinga ti yandi, bantumwa zolaka kukuma mpi na mwa mabanza ya Kristu. Bo zolaka kubakisa nde kuvanda mpenza na zola ti mawa sambu na bantu kezola kutuba mpi kusamuna ti kulonga bo mambu yina metala Kimfumu, dyambu yai vandaka kima ya ntete na kati ya bisalu na bo ya mbote. Na kuwakana ti mambu yai, bisalu ya mbote yina ya kinsuni, bonso kubelula bantu ya maladi, vandaka ti ntendula mingi kuluta, yo vandaka ve kaka sambu na kusadisa bantu yina vandaka na mpasi. Bonso nge lenda yindula yo, kima kubendaka bantu yankaka vandaka kubelula ti madya ya bo bakaka na mpila mosi ya kuyitukisa. (Matayo 4:24, 25; 8:16; 9:32, 33; 14:35, 36; Yoane 6:26) Kansi, katula lusadisu yina ya kinsuni, bisalu yina sadisaka bantu yina vandaka kutala mambu yina vandaka kusalama na kundima nde Yezu vandaka Mwana ya Nzambi mpi “profete” yina Moize kuzabisaka dezia nde yandi takwisa.​—Yoane 6:14; Kulonga 18:15.

13. Mbikudulu yina kele na Kulonga 18:18 ketubila mingi nki kisalu “profete” yina fwete kwisa tasalaka?

¹³ Sambu na nki yo vandaka mfunu nde Yezu kuvanda “profete”? Inki kisalu ya mfunu yandi zolaka kusala? Keti “profete” yango zolaka kuvanda ngolo na kubelula na kimpa to kupesa madya na bantu yina tavanda na nzala na mawa yonso? Kulonga 18:18 kuzabisaka nde: “[Mono tabasisila bo profete mosi na kati ya bampangi na bo, NW] bonso nge [Moize]; mono ta songaka bo mambu ya bo fweti tuba, ebuna [yandi] ta songaka yo na bantu.” Ata nkutu mutindu bantumwa longukaka na kuvanda mpi na kusonga mawa, bo zolaka kutuba nde bo mpi fwete monisa mabanza ya Kristu na kisalu na bo ya kusamuna ti ya kulonga. Yina zolaka kuvanda dyambu ya kuluta mbote ya bo zolaka kusala sambu na bantu. Na nsadisa ya kisalu yina, bantu ya maladi ti bansukami zolaka kubaka mambote yina tazinga kimakulu, mambote yina zolaka kuvanda ve kaka sambu na luzingu ya nkufi to madya ya mbala mosi to zole mpamba.​—Yoane 6:26-30.

Yedisa mabanza ya Kristu bubu yai

14. Inki mutindu kuvanda ti mabanza ya Kristu kemonanaka na kisalu na beto ya kusamuna?

¹⁴ Muntu mosi ve na kati na beto lenda tuba nde mabanza ya Kristu vandaka kaka sambu na mvu-nkama ya ntete, disongidila, sambu na Yezu ti balongoki na yandi yina ntumwa Polo sonikilaka nde: “Beto, beto ke na mabanza ya Kristo.” (1 Korinto 2:16) Beto kendimaka kukonda mpasi nde beto fwete samuna nsangu ya mbote mpi kukumisa bantu balongoki. (Matayo 24:14; 28:19, 20) Kansi, yo kele mbote nde beto yindula nki mambu kepusaka konso muntu na kati na beto na kusala kisalu yango. Beto fwete salaka yo ve kaka sambu bo kelomba beto na kusala yo. Zola ya Nzambi kele kikuma ya ntete ya kepusaka beto na kusala kisalu yai, mpi sambu na kuvanda kibeni bonso Yezu, mawa fwete pusa beto na kusamuna mpi kulonga.​—Matayo 22:37-39.

15. Sambu na nki mawa kele kitini ya mfunu ya kisalu ya beto kesalaka na meso ya bantu yonso?

¹⁵ Ya kyeleka, yo kevandaka ve ntangu yonso pete na kuwila bantu yina kendimaka ve balukwikilu na beto mawa, mingimingi kana bo kezola beto ve, bo kebuya na kuwa, to bo kebuyisa beto na kulonga. Kansi, kana beto kezola dyaka ve bantu to kewila bo dyaka ve mawa, beto lenda vidisa kikuma ya nene kibeni ya kepusaka beto na kusala kisalu ya Bukristu. Ebuna, nki mutindu mawa yango lenda kuma mingi? Beto lenda meka kumona bantu mutindu Yezu vandaka kumona bo, nde bo “me lemba, kikesa ve, bonso mameme me konda ngungudi ya kutala bo.” (Matayo 9:36) Keti bantu mingi ve kemona mambu yai bubu? Bangungudi ya mabundu ya luvunu kesungiminaka bo ve mpi mefwaka meso na bo ya kimpeve. Yo yina, bo kezabaka ve lutwadisu ya kyeleka yina kele na Biblia, ata nkutu mutindu luzingu tavanda na Paladisu yina Kimfumu ya Nzambi tatula ntama mingi ve na ntoto. Bo kenwanaka ti bampasi ya luzingu ya konso kilumbu, beto lenda tanga na kati na yo bunsukami, kukonda kuwakana na mabuta, maladi, ti kufwa kukonda kivuvu na Kimfumu. Beto kele ti kima yina bo kele na yo mfunu: nsangu ya mbote ya kegulusa luzingu yina ketubila Kimfumu ya Nzambi ya ke na kuyala ntangu yai na zulu!

16. Sambu na nki beto fwete zola kuzabisa nsangu ya mbote na bantu yankaka?

¹⁶ Kana nge keyindula bampusa ya kimpeve ya bantu yina kezingaka penepene na nge, keti ntima na nge kepusaka nge ve na kusala yonso sambu na kuzabisa bo mambu yina metala lukanu ya zola yina Nzambi kele na yo? Ee, kisalu na beto kele kisalu mosi ya mawa. Kana beto kewila bantu mawa mutindu Yezu kusalaka, yo tawakanaka na ndinga na beto, yo tamonanaka na luse na beto, mpi na mutindu na beto ya kulonga. Mambu yai yonso tasala nde nsangu na beto kusimba mpenza ntima ya bantu yina “Nzambi solaka sambu na kuvanda na moyo ya mvula na mvula.”​—Bisalu 13:48.

17. (a) Na nki mitindu beto lenda monisa zola ti mawa na beto na bantu yankaka? (b) Sambu na nki yo kele ve kima ya kupona na kusala bisalu ya mbote to kusala kisalu ya kulonga na meso ya bantu?

¹⁷ Ya kyeleka, zola ti mawa na beto fwete monana na luzingu na beto ya mvimba. Yo kezola kutuba nde beto fwete monisa bumbote na bantu yina kele na kifu na nitu, na bantu ya maladi, ti na bansukami, na kusalaka mambu ya mbote na kiteso yina mefwana sambu na kufyotuna mpasi na bo. Yo kelombaka mpi nde beto monisa bikesa na beto na bangogo ti na bisalu sambu na kulembika mpasi yina kevandaka na ntima ya bantu yina mevidisa bantu yina bo vandaka kuzola. (Luka 7:11-15; Yoane 11:33-35) Kansi, kusonga zola, bumbote, ti mawa mutindu yina fwete baka ve kisika ya ntete na kati ya bisalu na beto ya mbote, mutindu bantu yina kesalaka bisalu ya ntima ya mbote na inza ya mvimba kesalaka. Kima ya kuluta mfunu yina tazinga kimakulu kele bikesa yina kekatukaka na bikalulu ya bunzambi ya mutindu mosi kansi ya kemonanaka na kisalu ya Bukristu ya kusamuna ti kulonga. Yibuka mambu yina Yezu tubaka sambu na bamfumu ya mabundu ya Bayuda: “Matiti yina ke pesaka ntomo na madia (bonso mente, fenuwi ti kumini), beno ke kabisaka yo na ndambu kumi ebuna ndambu mosi beno ke pesaka Nzambi makabu, kansi beno ke landaka ve Bansiku ya kuluta mfunu: Beno ke zolaka kusala bantu mambu ya mbote ve, beno ke wilaka bantu ya nkaka mawa ve, beno kele bantu ya kieleka ve. Mambu ya beno zolaka kusala ntete yo yina, na nima mambu yina ya nkaka mpi.” (Matayo 23:23) Sambu na Yezu yo vandaka ve dikambu ya kupona kusala kisalu yai to yina, yo vandaka kusadisa bantu na bampusa na bo ya kinsuni to kulonga bo mambu ya kimpeve yina kepesaka luzingu. Yezu salaka bisalu yina yonso zole. Kansi, yo kele pwelele nde kisalu na yandi ya kulonga vandaka na mfunu mingi kuluta, sambu mambu ya mbote yina yandi salaka zolaka kuvanda lusadisu ya mvula na mvula.​—Yoane 20:16.

18. Kana beto tadila mabanza ya Kristu, yo fwete pusa beto na kusala nki?

¹⁸ Beto fwete monisa ntonda mpenza na Yehowa sambu yandi mesongaka beto mabanza ya Kristu! Na nsadisa ya ba Evanzile, beto lenda bakisa mbote bangindu, mawi, bikalulu, bisalu mpi mambu yina vandaka na kisika ya ntete na luzingu ya muntu ya kuluta nene ya ntangu yonso. Beto bantu kele ti mukumba ya kutanga, kuyindula mambu yango, mpi kusadila mambu yina Biblia kesonga sambu na yina metala Yezu. Beno vila ve nde, kana beto kezola kusala bonso Yezu, beto fwete longuka ntete na kuyindula, kuwa, mpi kumona mambu bonso yandi. Na kiteso yina beto lenda sambu beto kele bantu ya kukonda kukuka. Yo yina, bika beto baka lukanu ya kuyedisa mpi kumonisa mabanza ya Kristu. Mutindu yankaka ya mbote ya kuzinga kele ve, mutindu ya mbote ya kuzinga ti bantu kele ve, mpi beto kele ve na mutindu yankaka ya mbote ya kufinama na muntu yina kumonisaka bikalulu ya Nzambi na beto yina kezolaka beto mingi, Yehowa. ​—2 Korinto 1:3; Baebreo 1:3.

Inki Mutindu Nge Tavutula?

• Inki mayele Biblia kepesa na mutindu ya Yezu vandaka kulungisa mbala mingi bampusa ya bantu yina vandaka na mfunu na yo?

• Inki kima Yezu tudilaka dikebi mingi ntangu yandi vandaka kutinda balongoki na yandi?

• Inki mutindu beto lenda monisa mabanza ya Kristu na bisalu na beto?

[Kifwanisu ya kele na lutiti 16]

Inki kima ya kuluta mbote Bakristu lenda sala sambu na bankaka?