BAMVUTU NA BANGIUFULA YA BIBLIA
Keti bawanzio lenda sadisa beto?
Mutindu bawanzio sadisaka Daniele nsadi ya kwikama ya Nzambi na ntangu ya ntama, bo ke sadisaka mpi bantu bubu yai sambu na kuwa nsangu ya mbote
Yehowa Nzambi gangaka bamilio ya bawanzio bamvula mingi na ntwala ya kuganga bantu. (Yobi 38:4, 7) Bawanzio yai kele bigangwa ya ngolo ya kimpeve yina ke sadilaka Nzambi. Bantangu ya nkaka, Nzambi ke tindaka bo sambu na kutwadisa mpi kutanina bansadi na yandi awa na ntoto. (Nkunga 91:10, 11) Bubu yai, bawanzio ke sadisaka bantu na kuwa nsangu ya mbote yina balongoki ya Yezu ke samunaka.—Tanga Kusonga 14:6, 7.
Keti beto fwete sambila bawanzio sambu na kusadisa beto? Ve. Kisambu kele lusambu yina beto ke pesaka Nzambi mpamba. (Kusonga 19:10) Bawanzio kele bansadi ya Nzambi mpi bo ke lemfukilaka bantuma ya Nzambi kansi ya bantu ve. Yo yina, beto fwete samba Nzambi mpamba na nzila ya Yezu.—Tanga Nkunga 103:20, 21; Matayo 26:53.
Keti bawanzio ya mbi kele?
Bonso bantu, Nzambi gangaka bawanzio ti kimpwanza ya kupona mpi bo lenda pona na kusala mambu ya mbote to ya mbi. Diambu ya mawa kele nde bawanzio mingi kolamaka na Nzambi. (2 Piere 2:4) Satana vandaka wanzio ya ntete yina kolamaka, ebuna bawanzio ya nkaka landaka yandi mpi kumaka bademo. Na nima, bo kulaka Satana ti bademo na yandi na zulu mpi bo losaka bo awa na ntoto.—Tanga Kusonga 12:7-9.
Tuka 1914, mambi mpi mubulu me kumaka mingi, mpi yo ke monisaka nde ntama mingi ve Nzambi ta kanga Satana ti bademo na yandi sambu bo vanda diaka ve ti bupusi na zulu ya bantu. Na nima, Nzambi ta vutula diaka ntoto mutindu yo vandaka na luyantiku.—Tanga Kusonga 12:12; 21:3, 4.