Tadila kikuma yina kupusaka Yobi na kutuba mambu yai. Yobi, muntu mosi ya lukwikilu ya ngolo, kumonaka bampasi ya mingi​—kuvila ya bima na yandi ya kinsuni, lufwa ya bana na yandi yina yandi vandaka kuzola mingi, mpi maladi ya ngolo mpenza. Ntangu bampasi kulutanaka, yandi tubilaka Nzambi nde: “Nzambi, mbote kana nge bumba mono na nsi ya bafwa.” (Verse 13) Yobi kumonaka nsi ya bafwa bonso nsuka ya bampasi na yandi. Kuna, Nzambi zolaka kubumba yandi bonso kima mosi ya mbalu, yandi zolaka kuvanda ve na mpasi.a

Keti Yobi zolaka kubikala kimakulu na nsi ya bafwa? Yobi kundimaka nde yo zolaka kusalama ve. Yandi landaka na kusamba nde: “Ebuna ntangu yai nge ta yindula mono diaka.” Yobi vandaka na kivuvu nde, kubikala na yandi na nsi ya bafwa zolaka kuvanda sambu na mwa ntangu mpi nde Yehowa zolaka kuvila yandi ve. Yobi kufwanisaka ntangu yina yandi zolaka kulutisa na nsi ya bafwa ti “kisalu ya kingolongolo” (NW)​—nsungi ya mpasi yina yo lombaka nde yandi vingila. Sambu na bantangu ikwa? Yandi ketuba nde: “Tii kuna nge kwisa kukatula mono.” (Verse 14) Kukatula yandi na bampasi zolaka kutendula kubasika na nsi ya bafwa​—na bangogo yankaka, kufutumuka!