Etitano, 15 Septemba
“Osho efilonghenda, ngenge pe na ou ta humbata oudjuu omolweliudo laye la dama Kalunga, eshi ta hepekwa ina ninga sha.” — 1 Pet. 2:19.
Atusheni otu shii kutya ovapiya vaJehova ove li oshiwana sha hangana, onghee hano, inatu kala tu udite kutya onhele ile oshilongo shimwe oshi li xwepo shi dule shikwao. Ashike otashi dulika ovapambele voye naavo wa putuka navo ve ku nwefe mo u kale u hole onhele apa wa dja. Onghee hano, otashi dulika natango u kale u tonde ovanhu vomoiwana imwe, veputuko, velaka ile vomuhoko umwe. Oshike tashi dulu oku ku kwafela u ninge omalunduluko? Dilonga kunghee Jehova ha kala e uditile ovanhu ovo have litangele oilongo yavo ile ovo hava diladila kutya ove li xwepo ve dule vakwao. Ninga omapekaapeko a wedwa po e na sha noshikundafanwa osho. Opo nee pula Jehova e ku kwafele u kale u na etaleko la fa laye li na sha novanhu. ( Rom. 12:2) Molwaashi otwa hala okulongela Jehova tu na eliudo liwa, ope na omafimbo amwe twa pumbwa okuulika kutya otwa yooloka ko filufilu kovanailonga pamwe nafye, ovanafikola vomongudu yetu, ovashiinda ile ovapambele. w15 7/15 3:14, 15
Olomakaya, 16 Septemba
“Jona okwa ilikana Omwene Kalunga kaye medimo loshi.” — Jona 2:1.
Jehova oha udu omaindilo etu taa di komutima noku udite ko eenghalo detu e dule keshe umwe. Onghee hano, okupwilikina komailikano etu otaku ulike kutya oku tu hole nohole i na oudiinini. Ohatu dulu okulihonga oilihongomwa ya fimana momailikano oo taa hangwa mOmbibeli. Omafimbo amwe oshiwa okukonakona amwe omomailikano oo pefimbo lelongelokalunga loukwaneumbo. Ngeenge otwa dilonga komailikano a dja komutima ovapiya vaKalunga vomefimbo la pita, otashi ka xwepopaleka ongushu yomailikano etu. Pashihopaenenwa, konakona eilikano laJona lelininipiko olo a li a ilikana eshi a li medimo loshi inene. (Jona 1:17–2:10) Konakona yo eilikano laSalomo la dja komutima olo a li a ilikana kuJehova peyapulo lotembeli. (1 Eeh. 8:22-53) Dilonga yo koshihopaenenwa shaJesus sheilikano. (Mat. 6:9-13) Osho sha fimanenena, ‘oufyoona woye u shiivifila Kalunga’ efimbo keshe. Oshidjemo, ‘ombili yaKalunga ei i dule eendunge adishe, otai ka amena omutima woye nomadiladilo oye. — Fil. 4: 6, 7. w15 8/15 1:11, 12
Osoondaxa, 17 Septemba
“Nye mu dulike kuvo.” — Heb. 13:17.
Mounyuni mupe, ohatu ka shikula nehafo ewiliko okudja kehangano laJehova olo tali ke tu kwafela tu lundululile edu eli moparadisa iwa nokuhonga ovo tava ka nyumunwa. Jehova ota ka kala e tu nine oilonga ihapu. Ndele mbela ongahelipi ngeenge ovo tava kwatele komesho ove tu lombwele tu ninge oshinima shonhumba osho tuhe hole? Mbela ohatu ka dulika ngoo? Mbela ohatu ka ninga ngoo ngaashi hatu dulu opo tu wanife po nehafo oshilonga osho twa pewa? Opo tu lilongekidile oku ka kala nomwenyo waalushe mounyuni mupe, otwa pumbwa okukala hatu dulika paife kewiliko olo hali di kehangano laJehova. Opo tu lilongekidile oku ka kala mounyuni mupe, otwa pumbwa okulihonga okukala twa wanenwa nokukala hatu longele kumwe nehangano laJehova nosho yo navamwe. Pashihopaenenwa, ngeenge otwa pewa oshilonga shipe, natu shi tambule ko nehalo liwa nokuninga ngaashi hatu dulu opo tu kale twa hafa notwa wanenwa. Ngeenge otwe lihongo okukala hatu longele kumwe naavo tava kwatele komesho paife, ohatu ka ninga sha faafana mounyuni mupe. w15 8/15 3:6, 7