Osoondaxa, 8 Septemba
“Hoololeni hano omwenyo, mu shiive okukala nomwenyo, nye noludalo leni.” — Deut. 30:19.
Okukwafela ovana voye va kale ve na ounongo omwa kwatelwa shihapu shihe fi ashike oku va lombwela osho shi li mondjila naasho sha puka. Oto dulu yo oku va kwafela va tomhafane tava longifa omapulo ngaashi: ‘Omolwashike Ombiibeli ya indika oinima oyo tai monika iwa kovanhu? Oshike sha tomha nge kutya omifikamhango dOmbiibeli odi na sha alushe nouwa wange?’ (Jes. 48:17, 18) Okaana oko ka hala okuninginifwa oka pumbwa okukwafelwa opo ka tomhafane kutya oke udite ngahelipi shi na sha noinakuwanifwa oyo hai endele pamwe nokukala Omukriste. Omauwa elipi haa di mokukala Omukriste? Ohashi pula eenghendabala di fike peni? Ongahelipi omauwa e dule filufilu eenghendabala odo hatu ningi? (Mark. 10:29, 30) Omunhu ota dulu okushakeneka oinima oyo konima eshi a ninginifwa. Onghee hano, osha fimana okudiladila kombinga yoinima oyo ofimbo ino katuka onghatu. Ngeenge ounona ova kwafelwa va diladile moule kombinga yoinima oyo, otashi dulika va kale va tomhwa shili. Mbela otava ka kala va tomhwa kushike? Otava ka kala va tomhwa kutya omifikamhango dOmbiibeli odi na sha alushe nouwa wavo. w17.12 21 ¶14-15
Omaandaxa, 9 Septemba
“Oye te i ifana aishe komadina ayo.” — Jes. 40:26.
Ovamwatate novamwameme vahapu otave lididimikile ouyahame wa kwata moiti. Nonande vamwe ove li nawa, otava kwafele ovapambele ovanamido. Natango vamwe otava kendabala va kwafele ovapambele noipumbiwa yakwalukeshe, ndele hanoinima yondilo. Otu shi shii kutya vahapu otava ungaunga nomaupyakadi a tya ngaho e dulife pulimwe poshikando. Ngeenge Jehova oku na ko nasha noishitwa oyo ihe na omwenyo, diladila kunghee e ku uditile ove ou ho mu longele, hamolwaashi wa fininikwa u shi ninge, ndele osheshi u mu hole. (Eps. 19:1, 3, 14) Tate yetu oku ku shii nawanawa. Okwa vala yo ‘eexwiki doye adishe dokomutwe.’ (Mat. 10:30) Omupsalme okwe tu shilipaleka kutya: “Omafiku ovayuki Omwene oku a shii.” (Eps. 37:18) Oku wete omayeleko aeshe oo to shakeneke nota dulu oku ku pa eenghono u lididimikile keshe limwe. w18.01 7 ¶1; 8 ¶4
Etivali, 10 Septemba
“Tabita, penduka po!” — Oil. 9:40.
Eshi Petrus a nyumuna Tabita, osho osha li sha ningifa ovanhu ‘vahapu va itavele mOmwene.’ Ova li tava dulu oku shi ulika moipafi kutya Omwene naunene tuu Jehova ota dulu oku nyumuna ovafi. (Oil. 9:36-42) Vamwe ova li va mona eshi Paulus a li ta nyumuna. Pomhito imwe, omuyapostoli Paulus okwa li e li mokwoongala monduda yopombada muTroas, osho paife shi li kouningininolundume waTurkey. Paulus okwa li a popya fiyo omokati koufiku. Omunyasha wedina Eutikus, okwa li ta pwilikine e li omutumba pekende. Ashike okwa li ta kofa ndele tau ko kondjuwo onhinhatu yokombada. Otashi dulika Ondokotola Lukas oyo ya li ya fika po tete puEutikus ndele tai mu longekidile ouhaku. Eutikus ka li a mona oshiponga ile ehe shii apa e li, ndele okwa li a fya. Paulus okwa li a londolokela poshi ndele ta papatele oshimhu, ndele ta ti: “Omwenyo waye omo u li muye.” Mbela osho kasha li tuu sha kumwifa ovanhu ovo va li po? Ova li “va hekelekwa unene” eshi va mona Paulus a nyumuna nakufya. — Oil. 20:7-12. w17.12 5 ¶10-11