Tittusi
3 Eqqaasittuassavatit naalakkersuisunut oqartussaasunullu kajumillutik naalannissaannik, sutigut tamatigut ajunngitsuliornissamut piareersimanissaannik, 2 kinaluunniit pillugu oqaatissuaannginnissaannik, oqallikkumatuujunnginnissaannik, uteriitsuunnginnissaannik* kikkunnullu tamanut saamasuunissaannik. 3 Uaguttaarmi isumaatsuusimavugut, naalanngitsuusimavugut, tammartitaasimavugut, kissaatinut nuannaarniutinullu assigiinngitsunut inussiaataasimavugut, ajortuusimavugut, usoruttarsimavugut, maajunnartuusimavugut uumissoqatigiissimallutalu.
4 Aniguisitsisittali, Guutip, ajunngissutsini asannissutsinilu inunnut ersersippaa. 5 Eqqortuliornerput pissutiginagu nallittuininili pissutigalugu aniguisippaatigut. Inuuneqalersitsisumik uffaramisigut anersaarlu illernartoq atorlugu nutaanngortikkamisigut aniguisippaatigut. 6 Jiisusi Kristusi Aniguisitsiserput aqqutigalugu anersaamik tamatuminnga tukkorluni kuerarpaatigut 7 ajunngisaangaarnermigut naapertuilluartuutitaanitta kingorna inuuneq naassaanngitsoq neriuutigisarput kingornunniassagatsigu.
8 Eqqartukkakka ilumoorput, kissaatigaaralu Guutimut uppertunngorsimasut ajunngitsuliornissamik pingaartitsiuarniassammata tamakku nassuiartuassagitit. Tamakku ajunngitsuullutillu inunnut iluaqutaapput.
9 Oqallinnernulli sianiitsorpallattunut, siuaasat pillugit allattorsimaffinnik misissueqqissaarnernut Moorsisillu inatsisai pillugit assortuunnernut kamaannernullu akuliutissanngilatit, tamakkumi iluaqutaanatillu isumaqanngillat. 10 Immikkoorniarnermik tapersersuisoq marloriarlutit oqaaqqissaareeraluarlugu* tusaajumanngippat ilageqqissanngilat. 11 Nalunngilammi inuk taamaattoq aqqummik atuaajunnaarsimasoq, ajortuliortoq imminullu pillagassanngortittoq.
12 Artemaasi Tykikorsiluunniit ilinnut aallartikkukku sapinngisannik Nikuupulisimut, ukiiffiginiakkannut, orninniarsarissavarma. 13 Zeenasi, Moorsisip inatsisaanik ilisimasoq, Apulusilu angalanerminni amigaateqaqqunagit isumagilluassavatit. 14 Qatanngutittali pisariaqartitsileriataartut ikiorsinnaaniassagamikkit ajunngitsuliortuarnissaq inerititaqartuarnissarlu ilinniartariaqarpaat.
15 Ilagisama tamarmik inuulluaqqutippaatsit. Uppeqatigut asasigut inuulluaqqutikkigit.
Guutip ajunngisaangaarnerata tamassi najorilisi.