Korintimiunut allakkat aappaat
5 Nalunngilarpummi nunarsuarmi illorput, tupeq una, ingutserneqassappat* Guutip illumik, assannik sanaajunngitsumik, atajuartussamik qilammi tunissagaatigut. 2 Illorput* qilammeersoq assut aterusukkatsigu nunarsuarmi najukkatsinni maani anersaaruluttarpugut. 3 Atinissaanummi piffissanngorpat tamaqannginnerput qaangiutissaaq. 4 Aap, tupermi matumaniitilluta tupeq peerusunnginnatsigu nikallungalluta anersaaruluttarpugut, aappaatigulli timi toqusussaasoq inuunermit nungutinneqarniassammat aappaa aterusupparput. 5 Tamatumunngarpiaq Guutip, anersaamik pisussanut qularnaveeqqutitut* tunniussisup, piareersarpaatigut.
6 Taamaattumik timimi angerlarsimaffeqarnitsinni Naalakkamit ungasinnerput nalunngikkaluarlugu isumalluartuarpugut. 7 Takusagummi malinnagit upperisarput malillugu inuuvugut. 8 Isumalluarlutalu timerput qimallugu Naalakkami angerlarsimaffeqalernissarput orniginartinneruarput. 9 Taamaattumik taassumani angerlarsimaffeqarnerput taassumanngaluunniit ungasinnerput apeqqutaatinnagu taassumannga iluarisaanissarput anguniagaraarput. 10 Tamattami Kristusip eqqartuussivianut sassartinneqartussaavugut inuttullu timeqarnitsinni iliuuserisimasagut, ajunngitsut ajortulluunniit, naapertorlugit akissarsisinneqassalluta.
11 Taamaattumik Naalakkamik mianerinninneq qanoq isumaqartoq nalunnginnatsigu inuit qularunnaarsinniartuarpagut, Guutimilli ilisimaneqarluarpugut. Neriuppungali nalunngeqatiginnissutersi iluaqutigalugu inuttut qanoq ittuunersugut paasisimagissi. 12 Immitsinnut ilisariteqqinngilagut, uummammiittulli pinnagit qallikkut ittunik tulluusimaarutiginnittut akisinnaaniassagassigit uagutsinnik tulluusimaarutiginneqqullusi taama allalluta kajumissaarpassi. 13 Silanngajaarlutami iliuuseqarsimagutta taava Guuti pillugu taamaaliorpugut, isumakkut peqqissuulluta iliuuseqarsimagutta taava ilissi pillusi taamaaliorpugut. 14 Kristusimmi asanninnera kajumississutigaarput, unami paasigatsigu: Inuk ataaseq kikkut tamaasa pillugit toquvoq, kikkummi tamarmik toqoreersimammata. 15 Kikkut tamaasa pillugit toquvoq inuusut imminnik pillutik inuujunnaaqqullugit imminnilli toqqutiginnittoq toqusunillu makititaasoq pillugu inooqqullugit.
16 Maannamiit takusagut naapertorlugit inuit isummerfigineq ajorpagut. Allaat takusagut naapertorlugit Kristusi isummerfigisimagutsigu maanna taama isummerfigiunnaarparput. 17 Taamaattumik Kristusimik ataasioqateqartoq pinngortitaavoq nutaaq. Nutaanngitsut peerupput nutaallu pinngorlutik. 18 Suulli tamarmik Guutimit, Kristusi aqqutigalugu uagutsinnik saammaassisumit saammaassinerlu pillugu oqaluussinermik uagutsinnik suliassiisumit, pipput. 19 Aap, Guutip Kristusi aqqutigalugu inuit saammaappai unioqqutitsinerinillu pisuutinnagit, aamma saammaanneqarnermik tusarliussaq pillugu oqaluussinermik suliassippaatigut.
20 Taamaattumik Kristusi sinnerlugu aallartitaavugut, Guuti aqqutigaluta kajumissaarisutut ippoq. Kristusip sinniisuatut ima kimigiiserpugut: “Guutimut saammaannartigitsi.” 21 Guutip ajortuliunngisaannarsimasoq ajortuliagut pillugit pilliutitut tunniuppaa taanna aqqutigalugu Guutimit naapertuilluartuutitaasinnaalerniassagatta.