Efesossimiunut
4 Taamaattumik uanga, Naalagaq pissutigalugu parnaarussaaqqasunga, qaaqqusaanissinnut naapertuuttumik inooriaaseqaqqullusi kajumissaarpassi. 2 Maniguuttuaritsi, saamajuaritsi, naammagittartuaritsi, asannillusi kamageqatigiittuaritsi 3 anersaamillu ataqatigiilersinneqarassi eqqisseqatigiinnikkut sapinngisassinnik ataasioqatigiinniartuarlusi. 4 Qaaqquneqarassi ataatsimik neriuuteqalernissitut timi ataasiullunilu anersaaq ataasiuvoq. 5 Naalagaq ataasiuvoq, upperisaq ataasiuvoq, imermut morsutsitaaneq ataasiuvoq. 6 Guuti kikkut tamarmik Ataataat ataasiuvoq. Taanna tamanit anneruvoq, tamatta aqqutigaluta iliuuseqartarpoq pissaaneralu sutigut tamatigut sunniuteqartarluni.
7 Kristusip tunissummik akeqanngitsumik agguaanera naapertorlugu tamatta ajunngisaangaarfigineqarpugut. 8 Allassimavormi: “Tigusat nassarlugit qutsissumut qullarpoq. Inuit tunissutitut tunniuppai.” 9 Allassimammat ‘qutsissumut qullartoq’ taava aamma atsissumut, tassa nunarsuarmut, aqqarsimassannginnerpa? 10 Aqqartoq taanna aamma tassaavoq suut tamaasa naammassiumallugit qilammiit qutsinnerusumut qullartoq.
11 Ilaallu tunniuppai apustilisut, ilaat pruffiitisut, ilaat iivangkiiliulersaartutut,* ilaat savanik paarsisutut ilinniartitsisutullu 12 illernartunik ilinniartitseqqullugit,* kiffartoqqullugit Kristusillu timaanik ineriartortitseqqullugit. 13 Taamaaliussappullu tamatta uppernikkut ataasioqatigiilernissatta Guutillu ernera pillugu eqqoqqissaartumik paasisimasaqalernissatta tungaanut. Taava inuttut inersimasunngussallutalu Kristusitut inersimalluartunngussaagut. 14 Tassa meeqqatut ikkunnaartariaqarpugut, inuit peqqusersusaarlutik salloqittaallutillu ilinniartitsissutaannit tammartinneqarnikkut malinnit anorimillu tamanut tamaanga nassataritikkunnaartariaqarpugut. 15 Niaquusumulli, Kristusimut, naapertuuttumik ineriartorniassagatta ilumoortumik oqalullutalu asannittuliorta. 16 Taassuma naggussat tamarmik pisariaqartumik iliuuseqarnikkut suleqatigiinniassammata timi tamaat ataqatigiissunngortillugu katiterpaa. Avatit tamarmik pisinnaasamittut iliuuseqaraangata timi alliartortarlunilu asanninnermi ineriartortarpoq.
17 Taamaattumik Naalakkap aqqani oqarfigalusilu kimigiiserfigaassi uppinngitsutut, isumaatsumik* inuusutut, inuujunnaaqqullusi. 18 Taakku ilisimasakinnertik uummatimikkullu misigittaatsuunertik pissutigalugit isumakkut taarsiorlutillu inuunermit Guutip pigisaanit avissaarsimapput. 19 Ilerasussinnaajunnaaramik mingunnartunik sunilluunniit iliuuseqarumallutik naammatsissanatik kannguttaatsuliulerput.*
20 Kristusili taamaanngitsoq ilinniarparsi. 21 Jiisusi ilumoortumik ilinniartitsisarpoq, taannalu tusarnaarsimagussiuk taassumanngalu ilinniartinneqarsimagussi tamakku nalussanngilasi. 22 Ilinniartinneqarpusi kinaassusitoqarsi, pissuserisimasassinnut naapertuuttoq pilerissusipiluminillu mingutsinneqartoq, piissagissi. 23 Eqqarsartaasersilu* nutaanngorsartuarlugulu 24 kinaassuseq nutaaq, Guutip piumasaanut naapertuuttumik pinngortinneqartoq aamma naapertuilluarnermik ilumoortumik aalajaannermillu ilumoortumik tunngaveqartoq, atissavarsi.
25 Taamaattumik maanna peqquserlunneq peersimagassiuk tamassi inoqatersi ilumoortumik oqaluuttassavarsi, tamattami timimut ataatsimut ilaavugut. 26 Kamalerussi ajortuliussanngilasi, ulloq naatinnagu* kamassimajunnaassaasi. 27 Diaavulu periarfisseqinasiuk.* 28 Tillittartoq tillissaarluni tamaviaarluni sulissaaq, pisariaqartitsisoq tunisinnaaniassagamiuk assani atorlugit sulilluassaaq. 29 Oqaatsinik mikiarsimasunik qanissinnit aniatitaqassanngilasi, tusarnaartulli iluaqutissaannik tuniumallugit oqaatsit ajunngitsut* pisumilu pisariaqartinneqartut kisiisa aniatittassavasi. 30 Aamma Guutip anersaava illernartoq aliasutsissanngilarsi, ullormimi aniguisitaaffissami akiliut utertitsissut tunngavigalugu iperagaasussatut tassannga naqissuserneqarsimagassi.
31 Piissavasi narrutsassimanerit, kamannerit, kamarujussuarnerit, nillianerit, ajuallannartumik oqalunnerit ajoqutaasullu suulluunniit. 32 Immissinnulli inussiarnersumik pisassaasi, qamannga pisumik misiginneqatiginnittuussaasi, Guutillu Kristusikkut ilissinnik ilumoorluni isumakkeerfiginninneratut ilumoorlusi isumakkeerfigeqatigiittassaasi.