Efesossimiunut
6 Meeraasusi, angajoqqaasi naalassigit, taamaaliorussi Naalakkap piumasaatut iliorlusilu eqqortuliussaasi. 2 “Ataatat anaanallu ataqqikkit” inassutaavoq siulleq neriorsuutitalik: 3 “Taamaalioruit nunarsuarmi sivisuumik pitsaasumillu inuuneqassaatit.” 4 Ataataasusi, meeqqasi kamatsissanngilasi, Jehovalli iluarisaatut perorsarlugillu siunnersorsigit.*
5 Inussiaataasusi, inuit naalakkasi mianeralugit ataqqingaarlugillu* qamannga pisumik naalassigit, soorlu Kristusi taama pisarissi. 6 Inunnit iluarineqarniaannartutut aatsaat takuneqarsinnaagaangassi naalannasi Kristusip inussiaatigimmasi tarneq* tamakkerlugu Guutip piumasaatut iliortutut naalassaasi. 7 Ajunngitsumik isiginnittaaseqarlusi Jehovamut kiffartortarnissitut inuit inussiatut kiffartuuttassavasi. 8 Nalunngilarsimi inussiaanersi inussiaannginnersiluunniit apeqqutaatinnagu ajunngitsuliasi suulluunniit pillugit Jehovamit akissarsisinneqassallusi. 9 Aamma ilissi naalagaasusi, inussiaatisi sioorasaarnagit aamma taamatut isiginnittaaseqarlusi pisassavasi, nalunnginnassiummi taakkua ilissilu Naalagarsi qilammiittoq kinaassusersiortuunngitsoq.
10 Kingullertut, Naalagaq pissaaneqaqisoq nukissamik aallerfigiuarsiuk. 11 Diaavulup peqqusersusaarluni nakkartitsiniaasarnera* aalajaallusi akiorsinnaaniassagassiuk sakkutuup atisai sakkuilu Guutimeersut tamaasa atisigit. 12 Inuimmi akiornagit* naalagaaffiit, oqartussaasut, taarsiortut naalakkersuisui anersaapiluillu pissaanillit qilammiittut akiorpagut.* 13 Taamaattumik sakkutuup atisai sakkuilu Guutimeersut tamaasa atisigit suut tamaasa piareersareerlugit ullormi ajortumi aalajaallusi akiuussinnaaqqullusi.
14 Taamaattumik aalajaallusi akiuussinnaajumallusi ilumoortoq qiterutitut sukalluassavarsi, naapertuilluarneq sakissakkut saattuaasarissavarsi 15 eqqissinerlu pillugu nutaarsiassat nuannersut oqaluussissutiginissaannut piareersimajumallusi aloquteqassallusi. 16 Tamatuma saniatigut Diaavulup* qarsui* ikumasut tamaasa qamissinnaajumallugit upperneq eqqortinnaveeqqutitut angisuutut ittoq tigumiassavarsi. 17 Aamma aniguisitaaneq niaqorortinnaveeqqutitut atissallugulu panaq, tassa Guutip oqaasia, anersaamit pisoq tigumiassavarsi. 18 Taamatuttaaq qanorluunniit ilisukkut qinoriaatsit assigiinngitsut atorlugit anersaamut naapertuuttumik qamannga pisumik qinusassaasi. Taamaaliorumallusi eqqumajuartariaqarlusilu illernartut tamaasa qamannga pisumik qinnuttariaqarpasi. 19 Oqalunnialeraangama eqqortumik oqaaseqarnissamut ikiorneqarniassagama sapiillungalu Guutip isertugaataa pillugu nutaarsiassat nuannersut oqaluussissutiginiassagakkit aamma uanga qinnuttassavassinga. 20 Nutaarsiassat nuannersut pillugit aallartitaanera pissutigalugu kalunnernik qilersorneqarama pisussaanittut sapiillunga oqaluussisarnissara qinnutigisarsiuk.
21 Qanoq atugaqarninnik qanorlu inninnik Tykikorsip, qatanngutip asasap aalajaallunilu Naalakkamut kiffartortup, oqaluttuutissavaasi. 22 Qanoq innerput paasiniassagassiuk tuppallersarneqarniassagassilu ilissinnut aallartippara.
23 Qatanngutit eqqissinermik, asanninnermik uppernermillu Guutimit Ataatamit Naalakkamillu Jiisusimit Kristusimit pisumik kissaappakka. 24 Qanortoq Naalakkatsinnik Jiisusimik Kristusimik ilumoorlutik asannittut tamarmik Guutip ajunngisaangaarneranit najorneqarilik.