“Jehovap piumasaa pili”

1-4. Sooq Paulusi Jerusalem­mimukalerpa, tassanilu qanoq pineqarumaarpa?

PAULUSI Lukkarsilu Miletimiit aallaleramik taakku utoqqaanertallu Efesossimiut aliasupput. Utoqqaanertat asangaalersimasamik qimannissaat artornar­tingaarpaat. Umiarsuup qaavani nikorfapput. Angalanis­saminnut pisariaqar­titaminnik nassataqarput. Aamma Judiiami kristumiunut piitsunut aningaasat tunissutigineqartut nassarpaat, qilanaarivaallu qatanngutiminnut tunniun­nissaat.

² Anorsaarmat tingerlaatit siaarput. Umiarsuarlu umiarsualivimmiit nipiliorfiusumiit avalappoq. Angutit taakku marluk angalaqatitillu arfineq-marluk avalakkamik uppeqatitik nunamiittut aliasuttut isigaat. (ApS 20:4, 14, 15) Taakku isigisin­naatillugit aalateriuarput.

³ Paulusip utoqqaanertat Efesossimiut ukiut pingasut missaanni suleqatigisarsimavai. Maannali anersaamit illernartumit siulersor­neqarluni Jerusalem­mimukalerpoq. Qanoq pineqar­nissani pillugu ilisimasaqalaarpoq. Siusinnerusukkut utoqqaanertat ima oqarfigai: “Jerusalemmimi qanoq pineqar­nissara nalugaluarlugu anersaamit pinngitsaalineqarlunga maanna Jerusalem­mimukalerpunga. Nalunngilarali anersaap illernartup parnaarus­saanissannik annikil­liortitaanis­sannillu illoqarfinni tikitanni tamani ilisimatit­taraanga.” (ApS 20:22, 23) Paulusi ulorianar­torsior­tussaagaluarluni misigivoq ‘anersaamit pinngitsaalineqarluni’ – tassa anersaamit siulersor­neqarnermisut Jerusalem­mimukar­nissaminut pisussaasutut misigalunilu kajumis­suseqarpoq. Soorunami naalliuk­kusunngilaq, Guutilli piumasaatut iliornissani pingaar­nerpaatippaa.

⁴ Illit aamma taamatut misigivit? Jehovamut tunniul­luinnaratta neriorsuivugut taassuma piumasaa inuunitsinni pingaar­nerpaatin­niarlugu. Kapitalimi matumani Paulusi pillugu ilinniar­nerussagatta ilaarnerusin­naassavarput.

 5. Paulusi angalaqataalu sukkoorlutik Tyrusimukarpat?

⁵ Paulusi angalaqataalu ‘avalakkamik ingerlaannaq Kossimukarput’. Oqqumukaarlutik ingerlaaramik ulloq taanna Kossimut tikipput. (ApS 21:1) Tassani unnuigunarlutik aqaguani Rhodorsi aqqusaarlugu Pataaramukarput. Pataarami, Aasiaaqqap kujammut sineriaaniittumi, umiarsuarmut assartuummut Fønikiami Tyrusiliar­tussamut ikipput. Aqqutaani ‘Qeqertaq Cyperni saamiatungeralugu avaqquppaat’. (ApS 21:3) Sooq Lukkarsip, Apustilit Suliaannik allattup, tamanna eqqaavaa?

 6. (a) Sooq Paulusip Cyperni takugamiuk qiimmaal­lassimassava? (b) Sooq Jehovap ilinnik pilluaq­qusisarnerata ikiuisar­neratalu eqqarsaatiginerat iluaqutigissaviuk?

⁶ Immaqa Paulusip Cypernimi misigisimasani oqaluttuarai. Ukiut qulingiluat tamatuma siorna oqaluus­sisartutut angalanerminni siullermi Paulusip, Barnabap aamma Johannesi Makkorsip angakkoq Elymasi naapippaat, taassumanngalu akerlilersor­neqarlutik. (ApS 13:4-12) Qeqertaq taanna takullugu tassanilu pisimasut eqqarsaatiginerat qiimmaal­laatigisimassavai Jerusalemmimilu ajornar­torsiuleruni pinertusaar­nissaminut nakussatsis­sutigalugit. Uaguttaaq Guutip pilluaq­qusisar­neranik ajornar­torsior­nitsinnilu ikiuisarsimaneranik eqqarsaatigin­nittarnerput iluaqutigis­savarput. Taamaalior­tarutta Daavi ima oqartoq isumaqatigis­savarput: “Iluartoq ajunaarnernik amerlasuunik eqqorneqartarpoq, Naalakkalli tamakkunannga tamanit annaattarpaa.” – Tuss 34:20.

 7. Paulusikkut Tyrusimut tikikkamik suppat?

⁷ Paulusip uppeqatinik peqateqarnerup pingaaruteqarnera nalunnginnamiuk uppeqatini peqatigerusungaarpai. Lukkarsi allappoq Tyrusimut tikikkamik ‘ilinniartitat ujareerlugit nanigaat’. (ApS 21:4) Tyrusimi kristumioqartoq nalunngin­namikku ujarpaat, nanigamikkillu inissisimaf­figilerunarpaat. Qujamasuutigingaarparput Nalunaajaasuugatta sumukaraluarut­taluunniit uppeqatitta tikilluaq­qussagaatigut nalunngin­natsigu. Guutimik asannittut ilumoor­tumillu guutisiortut nunarsuaq tamakkerlugu ikinnguteqar­tuaannarput.

 8. Apustilit Suliaat 21:4-mi allassimasut qanoq paasisariaqarpat?

⁸ Paulusikkut ulluni arfineq-marlunni Tyrusimiipput. Lukkarsip eqqumiiginarsin­naasumik pisoqarnera ima allaatigaa: ‘Anersaamit siulersor­neqarlutik [qatanngutit Tyrusimiut] Paulusi oqarfigisaqat­taarpaat Jerusalemmimut tummassan­ngitsorluunniit.’ (ApS 21:4) Jehovap isummani allanngor­tissimavaa? Maanna Paulusi Jerusalem­mimukaq­qujunnaarpaa? Naamik. Anersaaq illernartoq aqqutigalugu Paulusip paasisimavaa Jerusalemmimi ajortumik pineqas­salluni, imaanngilarli Jerusalem­milianngivissasoq. Paulusip Jerusalemmimi ajornar­torsiornissaa aamma qatanngutit anersaaq illernartoq aqqutigalugu paasisiman­nguatsiarpaat. Taamaat­tumillu qanoq pineqarnissaa isumakuluutigigamikku Jerusalem­miliaqqun­ngilaat. Ulorianartumut illersor­niaraat paasinarpoq. Paulusilli Jehovap piumasaatut iliornissani, tassa Jerusalem­miliarnissani, aalajangiusimavaa. – ApS 21:12.

9, 10. (a) Uppeqatiminit Tyrusimiunit Jerusalem­mimukar­nissaminik nangartar­neqarami Paulusip assingusumik pisoqarsimanera suna eqqarsaatigisimasinnaavaa? (b) Inuppassuit nalitsinni qanoq isiginnit­taaseqartarpat, tamannalu Jiisusip oqaasiinut qanoq akerliua?

⁹ Uppeqatiminit Jerusalem­mimukar­nissaminik nangartar­neqarami Paulusip immaqa eqqaavaa Jiisusip Jerusalemmimi naalliun­nissani toqutaanissanilu pillugit ilinniartitani ilisimatimmagit taakku assingusumik qisuariarsimasut. Petrusip Jiisusi ima oqarfigisimavaa: “Naalagaq, taamatut oqaloqinak. Taamatut pineqar­navianngilatit.” Jiisusilli ima akivaa: “Tununnut pigit, Saatani! Guutitut eqqarsarnak inuttut eqqarsaravit uannut akornutaavutit.” (Mat 16:21-23) Guutip piumasaatut imminut pilliutiginissani Jiisusip aalajangiusimavaa. Paulusi aamma taama aalajangiusiman­nitsigivoq. Qularnan­ngitsumik qatanngutit Tyrusimiut apustili Petrusi assigalugu ajunngitsumik siunertaqaraluarput, Guutilli suna piumasarineraa paasisiman­ngilaat.

¹⁰ Nalitsinni inuppassuit ajornakusoorpasittumik, qanorluunniit pingaaruteqar­tigigaluartumik, iliuuseqar­naveersaartarput. Assersuutigalugu inuppassuit upperisarsiornermut piumasaqaatitaqan­ngitsumut ilannguk­kusunnerusarput. Jiisusili oqarpoq allaanerul­luinnartumik isiginnit­taaseqas­sasugut. Ilinniartitani ima oqarfigai: “Uannik malinnik­kumasup kissaatini tunulliullugit qisummik naalliutsitsiviliaq nammakkiuteriarlugu malittuas­savaanga.” (Mat 16:24) Jiisusimik malinninneq silatusaar­nerullunilu eqqortulior­neruvoq, oqinnerpaajun­ngilarli.

11. Kristumiut Tyrusimiut Paulusimik asanninnertik tapersersuerusun­nertillu qanoq ersersippaat?

¹¹ Maanna Paulusi, Lukkarsi angalaqataallu ingerlaq­qittussan­ngorput. Aallarnerisa allaatigineqar­neranit paasisin­naavarput kristumiut Tyrusimiut Paulusi asangaaraat kiffartor­neranilu tapersersorusungaarlugu. Angutit, arnat meeqqallu Paulusikkut aallariartortut sissamut qaniorpaat. Tamarmillu seeqqum­merlutik qinupput inuulluaq­qoqatigiil­lutillu. Taava Paulusi, Lukkarsi angalaqataallu umiarsuarmut allamut ilaallutik Ptolemiiusimut aallarput, tassanilu uppeqatitik ilassivaat ullorlu ataaseq najorlugit. – ApS 21:5-7.

12, 13. (a) Fiilippi aallussil­luarluni qanoq Jehovamut kiffartor­tarsimava? (b) Fiilippi nalitsinni ataataasunut qanoq maligas­saalluarpa?

¹² Taava Paulusikkut Cesariialiarput. Apuukkamik ‘Fiilippip iivangkiiliulersaartup illuanut iserput’.a (ApS 21:8) Fiilippi takugamikku nuannaangaarsimassapput. Ukiut 20-t tamatuma siorna Fiilippi Jerusalemmimi kristumiuni ilagiin­ngorlaani nerisassanik agguaas­seqataasussatut apustilinit suliassin­neqarsimavoq. Fiilippi ukiorpassuarni aallussil­luarluni oqaluus­sisartuusimavoq. Eqqaamajuk malersugaaneq pissutigalugu ilinniartitat siammarmata Fiilippi Samaariamukartoq tassanilu oqaluus­silluni. Kingusin­nerusukkut eunukki Etiopiamiu oqaluus­siffigalugulu imermut morsutsippaa. (ApS 6:2-6; 8:4-13, 26-38) Tassa Fiilippi ukiorpassuarni Jehovamut aalajaalluni kiffartorsimavoq!

¹³ Maanna Cesariiami najugaqarluni Fiilippi oqaluus­sinermi suli taama aallussil­luartigaaq. Lukkarsip ‘iivangkiiliulersaartumik’ taagamiuk tamanna ersersippaa. Aamma allappoq siulittuisartunik sisamanik paneqartoq. Siulittuisartutut allaatigineqaramik ilimanarpoq ataatamik maligas­siuineratut iliortut.b (ApS 21:9) Tassa Fiilippip inoqutini anersaakkut isumagil­luarsimassavai. Nalitsinni ataataasut taanna ilaarsin­naavaat oqaluus­sinermi siuttuullutik meeqqatillu oqaluus­sinermik nuannarin­nilernis­saannut ikiorlugit.

14. Paulusip uppeqatini tikeraaraangagit qanoq kinguneqar­tarunarpa, nalitsinnilu assingusumik qanoq periarfis­saqartarpugut?

¹⁴ Sumukaraluaraangamiluunniit Paulusip uppeqatini peqatigisarpai. Ilimanarluinnarpoq qatanngutit Paulusi angalaqataalu inoroorsaarfigisin­naagamikkit nuannaarutigisaraat. Taamatut tikeraar­toqaraangat ‘qiimmas­saqatigiit­tarsimassapput’. (Rom 1:11, 12) Nalitsinni assingusumik periarfis­saqartarpugut. Qanorluunniit pigisakitsigigaluaruit ilagiinnik nakkutilliisoq nulialu qaaqqugukkit qiimmas­saatigingaassavat. – Rom 12:13.

15, 16. Agabussi qanoq siulittuiva, tamannalu tusaasunut qanoq sunniuteqarpa?

¹⁵ Paulusip Fiilippik­kunniinnerani Agabussi iserpoq. Isersimasut Agabussi ataqqillugu pruffiitiusoq nalunngilaat, Claudiusimmi naalakkersuinerani sualuttumik kaannersuaqarnissaa siulittuutigisimavaa. (ApS 11:27, 28) Immaqa ima eqqarsarput: ‘Sooruna Agabussi takkuttoq? Qanormita oqaasis­saqarpa?’ Taava Agabussip Paulusip qiterutaa – tassa annoraamineq takisooq aningaasanik allanillu imaqarsinnaasoq – tiguaa. Isikkani assanilu taassuminnga qilerpai annilaar­nartumillu ima oqarluni: “Anersaaq illernartoq ima oqarpoq: ‘Qiterummik matuminnga piginnittoq Jerusalemmimi juutinit taama qilersor­neqarlunilu allamiunut pisinneqassaaq.’” – ApS 21:11.

¹⁶ Siulittuutip tamatuma uppernarsarpaa Paulusi Jerusalem­miliassasoq. Aamma siulittuutigineqarpoq juutit tassaniittut Paulusi ‘allamiunut pisissagaat’. Siulittuummik tusaasut annilaangalerput. Lukkarsi ima allappoq: “Tamanna tusaratsigu uagut tassaniittullu Jerusalemmimut majuaqqunagu kimigiiserfigilerparput. Taava Paulusi akivoq: ‘Sooq qiallusilu nalornilersin­niarpisinga? Qularis­sanngilarsi Naalakkap Jiisusip aqqa pillugu Jerusalemmimi qilersor­neqarnissamut piareersimaan­narnanga aamma toqunissamut piareersimasunga.’” – ApS 21:12, 13.

17, 18. Paulusip aalajangiusiman­ninnini qanoq takutippaa, uppeqataalu qanoq qisuariarpat?

¹⁷ Pisimasoq takorlooruk. Qatanngutit tamarmik, ilaatigut Lukkarsip, Paulusi Jerusalem­mimukaqqunagu kimigiiserfigaat. Ilaat qiapput. Asannillutik isumassuinerat killitsis­sutigalugu Paulusi oqarpoq ‘nalornilersin­niaraanni’ imaluunniit nutsikkani allani allassimasutut ‘uummataanik aliasutsitsisut’. Aalajangiusiman­nipporli. Jerusalem­miliarnis­saminut uppeqatini Tyrusimiut unissutiginngilai, uppeqatinilu Cesariiamiut unissutiginiarnagit. Nassuiaappaali sooq aallartariaqarluni. Sapiissuseqangaarami! Jiisusi ilaarlugu Paulusip Jerusalem­miliarnissani aalajangiusimavaa. (Hebr 12:2) Imaanngitsoq toqorusuttoq, kristumiuuninili pissutigalugu toqussagaluaruni tamanna ataqqinaatitut isigissavaa.

¹⁸ Paulusi taama oqarmat qatanngutit ataqqin­nittumik qisuariarput. Ima allassimavoq: “Pisassaan­ngimmat nangartarun­naarparput oqarlutalu: ‘Jehovap piumasaa pili.’” (ApS 21:14) Paulusip Jerusalem­mimukar­nissaanik akerliusut piumasartik piumallugu uteriin­ngillat. Paulusi tusarnaarpaat oqaasiilu akueralugit. Aamma paasivaat Jehovap Paulusimut piumasaa akuerisariaqarlugu naak artornar­tikkaluarlugu. Paulusip angalanera toqumik kinguneqarsinnaavoq. Asasaminillu unitsin­niarneqan­ngikkuni tamanna taassumunnga ajornan­nginnerus­sagaluarpoq.

19. Paulusimut pisut pingaarutilimmik sumik ilinniarfigaagut?

¹⁹ Paulusimut pisut pingaarutilimmik ilinniarfigisin­naavagut. Kissaatigin­ngisaan­narparput allat imminut pilliutigeriaan­naallutik Guutimut kiffartorusun­nerannut akornutaanissarput. Aamma toqumik kinguneqar­tussaan­ngikkaluartumik pisoqar­tillugu ilinniutissaq atorsin­naavarput. Assersuutigalugu angajoq­qaarpassuit qitornamik Jehovamut kiffartor­niarlutik nunartik qimallugu ungasissumi najugaqarnerat artornarisaraluarlugu unitsik­kusunngilaat. Phyllisip, Tuluit Nunaanni najugaqartup, panituani Afrikamut oqaluus­sisartutut aallalermat qanoq misigisimanini ima oqaluttuaraa: “Misigis­sutsikkut paatsiveerusimaarpunga. Artornarpoq nalunagu ungasis­sorujus­suarmiissasoq. Qinujuarpunga. Aliasul­lungalu tulluusimaarutigisarpara. Panimmali aalajangigarimmagu unitsin­niarsarinikuun­ngilara. Tassami Guutip kunngeqarfianik salliutitsiuar­nissaanik ilinniar­tissimavara. Maanna ukiuni 30-ni nunani allani kiffartorsimavoq. Aalajaat­tuarneralu pillugu ullut tamaasa Jehovamut qujasarpunga.” Uppeqatigut imminut pilliutigeriaan­naallutik kiffartortut qiimmas­saraangatsigit ajunngitsulior­tarpugut.

20, 21. Qanoq nalunngilarput Paulusip uppeqatini ilagerusukkai, aamma sooq taamaappa?

²⁰ Paulusi piareersareerami aallarpoq kristumiunillu Cesariiamiunit ingerlaqatigineqarluni. Taamaalillutik ilumoorfigin­ninnertik tapersersuinertillu ersersippaat. Paulusi angalaqataalu Jerusalemmip tungaanut ingerlaaleramilli aqqutaani uppeqatiminnik peqateqar­tarnissaminnut periarfis­sarsior­tuarsimapput. Kristumiut Tyrusimiut ulluni arfineq-marlunni najorsimavaat. Ptolemiiusimi qatanngutitik ilassisimavaat ullormilu ataatsimi najorlugit. Cesariiami ullualunni Fiilippip illuaniis­simapput. Maanna kristumiut Cesariiamiut ingerlaqatigalugit Paulusi angalaqataalu Jerusalem­mimukarput, tassanilu Mnasonip – ilinniartitat siulliit ilaata – illuani inisimasuullutik. Lukkarsi allappoq Jerusalemmimut pimmata ‘qatanngutit nuannaarlutik tikilluaqqugaat’. – ApS 21:17.

²¹ Ersarippoq Paulusip uppeqatini ilagerusuttarai. Soorlu nalitsinni taamaat­tartugut, Paulusi uppeqatiminit qiimmas­sarneqartarpoq. Qularnan­ngitsumik qiimmas­sarneqarsimanini inunnit kamattunit malersor­neqaleruni toqunniar­neqalerunilu iluaqutigissavaa.