Juuni

Kristumiut siulliit pissutsinut naleqqus­saramik Jehovamit pilluaq­quneqarput. Malersugaasarput ilaannikkullu inunnit ilimagin­ngisaminnit malersor­neqartarlutik. Barnabap apustilillu Paulusip Lystrami oqaluus­sinerminni nalaataat sammeriartigit. Inunnit tusarnaarusuttunit tikilluaq­qusaangaarput. Kingusin­nerusukkut inuppassuit akerlilersuisunit “kamassaar­neqaramik” Paulusi toqunniaraluarlugu ujaqqanik milloorpaat. (ApS 14:19) Kinguninngua allamut oqaluus­siartorlutik aallarput. Qanoq kinguneqartumik? ‘Amerlasuunik ilinniar­titanngor­titaqarput’. Barnabap Paulusillu oqaasii maligas­siuinerallu uppeqataasa nakussatsis­sutigaat. (ApS 14:21, 22) Malersugaagaluarlutik oqaluus­sinertik unitsin­ngimmassuk amerlasuut iluaqutigaat. Jehovap suliareqqusaa unitsin­ngikkutsigu pilluaq­qusaassaagut. w23.04 16 § 13-14

Kunngi Daavi akerarpas­suarminit navianar­torsior­tinneqartarami Jehovamut qinunikkut ikioqqusarpoq. Daavip qularinngilaa qinnutini Jehovamit tusarneqarlutillu akineqartartut. Aamma illit tamanna qularin­ngissinnaavat. Biibilimi uppernarsaavigineqarpugut Jehovap ilisimas­susermik tunisin­naallutalu pinertusaar­nissatsinnut nakussatsis­sinnaagaatigut. Aamma uppeqatigut allaallu imminut kiffartor­tuunngitsut aqqutigalugit ikiorsin­naavaatigut. Jehovap qinnutigut ilimagisatsitut tamatigut akineq ajoraluarai nalunngilarput akiumaarai. Pisariaqar­titatsinnik piffissaq eqqorlugu tunissavaatigut. Taamaattumik qinujuarit upperalugu Jehovap maanna isumassoraatit aamma siunissami paratiisissami ‘pinngortitat tamaasa kissaatigisaannik qaarsil­lartikkumaarai’. – Tuss 145:16. w23.05 8 § 4; 13 § 17-18

Pitsaassaaq anguniakkavit angunerata iluaqutissartai eqqarsaatigigukkit. Iluaqutissat suut eqqarsaatigisin­naavigit? Biibilimik atuarnermut qinunermul­luunniit tunngasunik anguniagaqaruit Jehovamut attaveqarninnut qanoq nakussatsis­sutaasinnaasoq eqqarsaatigisaruk. (Tuss 145:18, 19) Kristumiutullu pissuserineqartussat ilaat ineriar­tortinniarlugu anguniagaqaruit allanut attaveqarninnut qanoq pitsanngor­titsisinnaasoq eqqarsaatigisaruk. (Kol 3:14) Anguniakkat sooq angorusun­nerlugu allattuisin­naavutit. Allattuk­katillu atuartakkit. Aamma ilinnik kaammattuisut ilagisakkit. (Uss 13:20) Tamattali ilaannikkut piumassuseqarpal­laarneq ajorpugut. Taamaak­kaluartoq anguniakkatta angunissaa suli sulissutigisin­naavarput. Tamanna ilungersunaraluartoq kinguneri nuannaarutigiumaarpagut. w23.05 27-28 § 5-8

Nalunngin­natsigu aalajangik­katsinnut akisussaasuulluta ajortuliatta nassuerutiginis­saannut, iluarsiniar­nissaannut kukkussutigeq­qinngin­nissaannullu kajumis­sissutigisin­naavarput. Taamaaliorneq inuunivimmut arpaqataajuaan­narnissatsinnut iluaqutigisin­naavarput. Aalajangiinerlus­simaguit qanoq iliorsinnaavit? Imminut illersornikkut imminul­luunniit pisuutinnikkut allalluunniit pisuutin­nerisigut nukitit atulussin­naqinagit. Akerlianilli kukkussutitit nassuerutigikkit, maannamiillu pissutsini atukkanni sapinngisamik iliuuseqarit. Kukkusimanerit pillugu pisuusutut misigiguit maniguullutit qinunikkut Jehova saaffigiuk, kukkusimanerit nassuerutigiuk isumakkeerfigeq­qullutillu. (Tuss 25:11; 51:5, 6) Ajuallatsis­simasatit utoqqatserfigikkit, pisariaqarpallu utoqqaanertanut ikioqqugit. (Jaak 5:14, 15) Kukkussutitit ilinniutigikkit iliuusereq­qinnaveersaarlugillu. Taamaalioruit qularis­sanngilat Jehovap nallittorumaaraatit pisariaqar­titannillu tapersersorumaarlutit. – Tuss 103:8-13. w23.08 28-29 § 8-9

Kunngi Joashi Jojadamit sunnerneqarluarpoq. Suli inersimasun­ngornani Jehovap iluarisaatut iliorusuppoq. Jojadalli toqunerata kingorna Juudap naalagartai tunussisut Joaship tusarnaarpai. (Nal 2. 24:4, 17, 18) Tamanna aliasuutigingaarlugu Jehovap “imminut utertik­kumallugit pruffiitinik aallartitsivigai”. Inuilli tusaajuman­ngillat. Aamma Jojadap ernera Zakkaria Jehovamut pruffiitiullunilu palasiugaluartoq Joashillu illortaarigaluaraa tusaajuman­ngilaat. Allaat kunngip Joaship Zakkaria toqutaatippaa. (Nal 2. 22:11; 24:19-22) Joaship Jehova mianeriun­naarpaa. Jehova ima oqarsimavoq: ‘Narrugin­nitsikka kanngutsissapput.’ (Sam 1. 2:30) Kingusin­nerusukkut Aramip sakkutuuisa ikittuinnaasut Joaship sakkutoorpassui ajugaaffigaat taannalu anniaatigisaanik ikilerlugu. (Nal 2. 24:24, 25) Joashi kiffaminit toqunneqarpoq Zakkaria toqussimagamiuk. w23.06 18-19 § 16-17

Paulusi sivisuumik Efesossimiis­simavoq nutaarsiassat nuannersut pillugit oqaluus­sisarlunilu ilinniar­titsisarluni. (ApS 19:1, 8-10; 20:20, 21) Uppeqatini asangaaramigit Jehovamut aalajaan­nissaannik ikiorusuppai. Efesossimiut Paulusip allaffigisai upperisarsiornermut eqqunngitsumut angakkuar­tarnermullu inussiaataasimapput. Efesossimiut atoqatigiinnikkut ingasattumik eqqunngitsuliorneq kanngut­taatsuliornerlu ilisimaneqaatigaat. Isiginnaar­titsivinni allaallu upperisarsiornikkut nalliut­torsiornerni atoqatigiinneq pillugu quiasaarnerit nalingin­naapput. (Ef 5:3) Efesossimiut ilarpassui eqqunngitsuliorneq sungiusimaan­naramikku ‘ilerasus­sinnaajun­naarsimapput’. (Ef 4:17-19) Aamma kristumiut Efesossimiittut suna eqqortuunersoq sunalu eqqunngitsuunersoq ilikkan­ngikkal­laramikku eqqunngitsuliorsorin­nginnamik ilerasunneq ajorput. Taamaattumik Paulusi allappoq ‘isumakkut taarsiorlutillu inuunermit Guutip pigisaanit avissaarsimasut’. Efesossimiulli ilaat taartumiigin­nanngillat. w24.03 20 § 2, 4; 21 § 5-6

Giidiuup eqqartuus­sisutut suliassin­neqarnera nukersor­nartorujussuuvoq. Midjanikkut unnuakkut qimaammata Giidiuup Jizreelip narsartaaniit kuussuaq Jordani tikivillugu malersorpai. (Eqq 7:22) Giidiuut Jordanimut pigami unippa? Naamik! Qasugaluarlutik angutitamilu 300-t Jordani ikaarpaat akeqqallu malersor­tuarlugit. Naggataatigullu Midjanikkut anguaat ajorsar­tillugillu. (Eqq 8:4-12) Giidiuup Jehovap nakussatsis­sagaani tatigaa, pakatsin­ngilarlu. (Eqq 6:14, 34) Ilaanni angutitamilu Midjanikkut kunngii marluk, immaqa qatigattuuni issiallutik qimaasut, arpallutik malersorpaat. (Eqq 8:12, 21) Guutillu ikiuineratigut anguaat ajugaaf­figalugillu. Aamma utoqqaanertat Jehova ‘nukillaarneq ajortoq’ tatigil­luinnarsin­naavaat. Jehovap pisariaqar­titaannik nakussatsissavai. – Es 40:28, 29. w23.06 6 § 14; 7 § 16

Inuunitsinni qanorluunniit pisoqas­sagaluarpat uummatitsigut aalajaal­luinnarsin­naavugut. Taamaattumik Jehova tatigiuk. Baarakki Jehovap siulersuineranik tatigin­nikkami iluatsitsil­luartoq eqqarsaatigiuk. Taamani Israalikkut sakkussiaateqan­ngillat sorsoriaan­naanatillu. Jehovalli Baarakki peqquaa Kanaanikkut sakkutuuisa naalagaanertaat Sisera sakkutuuilu sakkulisartut sorsugiaq­qullugit. (Eqq 5:8) Pruffiitip Deborap Baarakki oqarfigaa narsaamanertamut ateqqullugu Sisera qamutaataalu sorsuutit 900-t sorsugiaq­qullugit. Narsaamanertami toqqissumi Israalikkut qamutinut sukkalisaaqisunut akiuunnissaat ajornakusoorsinnaasoq nalunngik­kaluarlugu Baarakki naalalluni aterpoq. Sakkutuut qaqqamit Taborimit atertillugit Jehova sialussuar­titsilerpoq. Siserap sakkutuuisalu qamutai marullummut marrikaapput, Jehovallu Baarakki ajugaatippaa. (Eqq 4:1-7, 10, 13-16) Taamatuttaaq, uagut Jehova peqatigiis­sortanilu aqqutigalugit siulersuinera tatigigutsigit ajugaatis­sinnaavaatigut. w23.07 19 § 17-18

Annassagutta naammagit­tartuusariaqarpugut. Qanga upperluartut assigalugit Guutip neriorsuutiminik eqquutsitsinissaa utaqqisin­naasariaqarparput. (Hebr 6:11, 12) Biibilimi naasoris­saasumut assersuun­neqarpugut. (Jaak 5:7, 8) Naasorissaasoq naatitsiniarluni imerteriniarlunilu suleruloortarpoq, nalusarpaali qaqugorpiaq naasoqas­sanersoq. Taamaattumik naasorissaasoq utaqqisin­naasariaqarpoq naatsorsuutigalugu inerititaqarumaarluni. Taamatuttaaq Jiisusi ilaarniarlugu tamaviaar­tarpugut naak Naalagarput “ullormi sorlermi tikiutis­sanersoq” nalugaluarlugu. (Mat 24:42) Jehovap neriorsuutini piffissaq eqqorlugu eqquutitik­kumaarai tatigalugu naammagit­tarluta utaqqivugut. Naammagit­tarunnaarutta utaqqikatalersin­naavugut Jehovamillu qimaguk­kiartuaalerluta. Maannangaaq iluatan­nissarput anguniarlugu allamut saaqqajaasin­naavugut. Naammagit­taruttali naggatissamut pinertusaarsin­naavugut annallutalu. – Mika 7:7. w23.08 22 § 7

Danielimik allakkat Saqqummersitallu naleqqiun­nerisigut isummersin­naavugut isikkat USA aamma Tuluit Nunaat iligiillutik ullumikkut nunarsuarmi pissaaneqar­nerpaanut assersuutaasut. (Dan 2:41-43) Pissaanilis­suarmut tassunga atatillugu Daaniali oqarpoq “ilaatigut qajannaatsuussasoq ilaatigullu qajannar­tuussalluni”. Sooq ilaatigut qajannar­tuussava? Inuinnaat marrarmut assersuutaasut naalagaaffiup saviminertut mannger­tigisutut iliuuseqar­nissaralua unitsit­tarmassuk. Daanialip inuusaliarujus­suarmik nassuiaanera ilumoortunik pingaarutilinnik ilinniarfigaarput. Siullertut, USA aamma Tuluit Nunaat pissaanertik assigiin­ngitsutigut ersersit­tarsimavaat. Assersuutigalugu sorsunnersuarmi siullermi aappaanilu nunanut assigiin­ngitsunut ajugaasuupput. Taamaattorli pissaanerat qajannarsivoq sulilu qajannar­nerulerumaarluni inuiaqatigiit akunnerminni akerleriis­suteqar­tarmata. Aappaattut, Guutip kunngeqarfiata inuit oqartus­saaneranik suujunnaarsitsin­ngitsiarnerani USA Tuluillu Nunaat nunarsuarmi pissaanillit kingullersarissavaat. w23.08 10-11 § 12-13

Daavi ilaannikkut ajornar­torsiuterpas­suarnik annikil­liornar­tunillu nalaataqartarami nikallortarpoq. (Tuss 18:5, 6) Jehovalli asanninnera isumassuineralu nakussatsis­sutigisarpai. Jehovap ikinngutini nikallungasoq uninngatittarpaa “narsani qorsuusuni” aamma imeqarluartuni. Tamatuma kingunerisaanik Daavi nakussatsillunilu nuannaarluni Jehova kiffartorfigiuarpaa. (Tuss 18:29-33; 23:2) Uaguttaaq Jehovap ilumoorfigin­nilluni asanninnera pissutigalugu misilin­neqarnermi atugarlior­nermilu pinertusaarsin­naavugut. (Upp 3:22; Kol 1:11) Daavi navianar­torsiukulasarpoq pissaaneqangaar­tunillu akeraqarluni. Taamaattorli Jehovap asanninnera toqqissis­sutigisarpaa. Daavip nalunngilaa sumiikkaluaruniluunniit Jehovap najoraani, tamannalu tuppallersaatigisarpaa. Taamaattumik ima taalliorpoq: ‘Jehovap aniguisippaanga siooqqatigisannit tamanit.’ (Tuss 34:5) Ilaannikkut Daavi siooragisaqartarpoq, Jehovalli asanninnera toqqissis­sutigisarpaa. w24.01 30 § 15-17

Joaship aalajangiinerlunneri ilinniutigikkit. Palasiuneq Jojada toqummat Joashi ikinngutipalaaqalerpoq. (Nal 2. 24:17, 18) Juudap naalagartai Jehovamik asannin­ngitsut tusarnaarpai. Isumaqataas­sagunarputit Joashi ajortumik sunniiniartut taakku ikinngutigilersimasus­saanngik­kaluarai. Siunnersuutaalli ajortut tusarnaarpai. Allaat illooqqaminit Zakkariamit naqqinneqarami Joaship taanna toqutas­sanngortippaa. (Nal 2. 24:20, 21; Mat 23:35) Ajoraluassusia! Joashi aallaqqaammut ajunngitsumik ingerlagaluarluni tunussisun­ngorpoq toqutsisun­ngorlunilu. Naggataatigut kiffaminit toqunneqarpoq. (Nal 2. 24:22-25) Jehova taassuminngalu asannittut tusarnaarsimasuugunigit inuunera allaanerul­luinnartumik kinguneqarsimas­sagaluarpoq. w23.09 9 § 6

Jiisusip nalunngilaa Petrusi aalajaat­tuarsinnaasoq. Taamaattumik asannittumik ima oqarfigaa: “Annilaangas­sanngilatit.” Jiisusip Petrusimik tatigin­ninnera sunniuteqangaarpoq. Petrusip qatanngutaatalu Andariarsip aalisarneq inuussutis­sarsiutigiun­naarlugu piffissaq tamaat Missiarsi malilerpaat. Aalajangigartillu pilluaq­quneqaatigaat. (Mak 1:16-18) Petrusi Kristusimik malinnit­tuugami nuannersorpas­suarnik misigisaqarpoq. Takuaa Jiisusi napparsimasunik ajorunnaarsitsisoq, anersaapilunnik anisitsisoq allaallu toqusunik makititsisoq. (Mat 8:14-17; Mak 5:37, 41, 42) Petrusip aamma takorruuisin­neqarluni takuaa Jiisusi Guutip kunngeqarfiani kunngitut naalakkersuilersoq, takusanilu puiunngisaannarpaa. (Mak 9:1-8; Pet 2. 1:16-18) Aap, Jiisusimik malinnit­tunngorsiman­ngikkaluaruni takusani takusimanavian­ngikkaluarpai. Qanoq nuannaar­tigisimassava imminut pilluni misigissutsit nuannin­ngitsut aqutsisuutin­nginnamigit. Taamaaliorsiman­ngikkaluaruni nuannersorpassuit tamakku misigisimanavian­ngikkaluarpai. w23.09 21 § 4-5

Qamannga pisumik asaqatigiinneq isumakkeerfigeqatigiin­nissamut iluaqutigis­savarput. Petrusimi allakkamini siullerni allappoq ‘asanninnerup ajortuliarpassuit matoortarai’. (Pet 1. 4:8) Immaqa isumakkeerfiginninneq pillugu Jiisusimit ilikkakkani eqqarsaatigalugu taama allappoq. Siornatigut Petrusi oqarami qatanngutini ‘arfineq-marloriarluni’ isumakkeerfigisin­naallugu isumaqarunarpoq asanningaar­tuulluni. Jiisusilli oqarfigaa ‘77-eriarluni’ – tassa killeqan­ngitsumik – isumakkeerfigissagaa. (Mat 18:21) Tamanna aamma uagutsinnut ilinniagas­saalluarpoq. Jiisusip oqaasii taakku maleruaruminaatsis­simagukkit nikalloqinak. Jehovammi kiffaasa tamarmik ilaannikkut isumakkeerfigin­ninnissartik sapernar­tissinnaasarpaat. Uppeqatilli isumakkeerfigalugulu eqqisseqatigiumallugu sapinngisannik iliuuseqarnerit pingaaruteqarpoq. w23.09 29 § 12

Aalisagarsuup iluani Juunap qularinngilaa maniguulluni peqqissimillunilu qinnutini Jehovap tusassagaa ikiussagaanilu. Juunalu annaanneqarpoq Jehovamillu suliassin­neqaqqilerami naalappoq. (Jon 2:11–3:4) Misilin­neqartillutit misiginikuuit isumakulunnermik allaat qinunikkut qanoq oqassanerlutit nalullugu? Imaluunniit misigivit misissuinissannut qasuallaarlutit? Eqqaamajuk Jehovap atukkatit paasilluinnarai. Naatsun­nguamil­luunniit qinunikkut saaffigigaluarukku qularutigis­sanngilat pisariaqar­titarluinnarnik tuniumaaraatit. (Ef 3:20) Timikkut misigis­sutsikkul­luunniit anniarnerit pissutigalugu atuarnissat ajornakusoor­tikkukku Biibilimik atuffas­sinerit imaluunniit Biibililersaarutitsinnik immiussat tusarnaar­tarsinnaavatit. Aamma erinarsuutitsinnik tusarnaarneq jw.org-imilu videunik isiginnaarneq iluaqutigisin­naavatit. Jehovap nakussatsik­kusuppaatit. Qinunikkullu saaffigigukku aamma Biibilimi Biibililersaarutinilu pilersitaani qinnutinnut akissutis­sarsiortaruit nakussatsis­savaatit. w23.10 13 § 6; 14 § 9

Toqqup guutisiorfiup kingusin­nerusukkullu Jerusalemmimi guutisiorfiit qarmarsuallit ilui imminnut assingupput. Marlunnik ineqarpoq – ‘Illernartoq’ aamma ‘Illernar­nerpaaq’ – taakkulu saagorsuarmik immikkoor­tinneqarput. (Hebr 9:2-5; Mos 2. 26:31-33) Qullilerfik kuultiusoq, tipigis­saatinik ikumatitsivik aamma iffianut-qaqortunut illernartunut nerriviusaq Illernar­tumiipput. ‘Palasit taninneqarsimasut’ kisimik palasitut kiffartor­niaraangamik Illernartumut isersin­naatitaasarput. (Mos 4. 3:3, 7, 10) Isumaqatigiissummut illerfiusaq kuultiusoq Jehovap najuunneranut assersuutaasoq Illernar­nerpaamiippoq. (Mos 2. 25:21, 22) Palasiuneq kisimi ukiumut ataasiaan­narluni, tassa ullormi saammaan­nartitsivimmi, Illernar­nerpaamut saagorsuarmik asserneqartumut isersin­naatitaasarpoq. (Mos 3. 16:2, 17) Nammineq ajortuliani nunaqqatimilu ajortuliaat pillugit pilliutit aavat saammaan­neqaatissatut sassaak­kumallugu isertarpoq. Piffissap ingerlanerani Jehovap paasinarsisippaa taakku sunut assersuutaanersut. – Hebr 9:6, 7. w23.10 27 § 12

Biibilimi ‘asaqatigiin­nissarput’ peqqussutigineqaqat­taarpoq. (Joh 15:12; Rom 13:8; Tes 1. 4:9; Pet 1. 1:22; Joh 1. 4:11) Asanninnerli misigis­susiuvoq, inuillu misigis­sutsigut ilutsin­niittut takusin­naanngilaat. Taamaattumik asaqatigiinnerput qanoq ersersis­sinnaavarput? Oqaatsitsigut iliuutsitsigullu. Uppeqatitsinnut asanninnerput assigiin­ngitsorpas­suartigut ersersis­sinnaavarput. Soorlu ima kajumis­saarneqarpugut: “Immissinnut ilumoortumik oqaluffigisaritsi!” (Zak 8:16) ‘Eqqisseqatigiigitsi.’ (Mak 9:50) “Siulliullusi ataqqin­nittulior­taritsi.” (Rom 12:10) “Immissinnut akuerigitsi.” (Rom 15:7) “Isumakkeerfigeqatigiit­tuaritsi.” (Kol 3:13) “Nammaqatigiit­tuaritsi.” (Gal 6:2) “Tuppallersaqatigiit­tuaritsi.” (Tes 1. 4:18) “Ineriar­torteqatigiit­tuaritsi.” (Tes 1. 5:11) “Immissinnut qinnuttaritsi.” – Jaak 5:16. w23.11 9 § 7-8

Inuunitsinni upperluar­nitsinnik ersersitsisunik aalajangiisariaqar­tarpugut. Assersuutigalugu ilagisar­takkanut, aliikkutanut, ilinniagaqarnermut, aappariinnermut, meeqqanut aamma suliffeqarnermut tunngasunik aalajangiisarpugut. Uku eqqarsaatigisariaqarpagut: ‘Aalajangikkannit erserpa pissutsit maanna atuuttut atuukkun­naarlutik paratiisimik taarser­neqassasut upperil­luinnariga? Imaluunniit aalajangiinikka inunnit upperisaqan­ngitsunit sunnerneqartarpat?’ (Mat 6:19, 20; Luk 12:16-21) Paratiisip takkutingajaliivin­neranik upperin­ninnerput nakussas­sartarutsigu pitsaanerpaamik aalajangiisarsin­naavugut. Misilin­neqarsin­naavugut upperluar­tuunitsinnik ersersitsif­fiusariaqartunik. Immaqa malersugaasin­naavugut, perulun­nartumik nappaateqarsin­naavugut allatul­luunniit ajornar­torsiorsin­naalluta nikallus­sutigisin­naasatsinnik. Immaqa pinertusaarsin­naasutut misigeq­qaarsin­naavugut. Ajornar­torsiutigulli sivitsor­toorutigigutsigit upperluar­tuusariaqarpugut pinertusaarsin­naaqqulluta nuannaarlutalu Jehova kiffartorfigiuarsin­naaqqullugu. – Pet 1. 1:6, 7. w23.04 27 § 4-5

Jehovap kissaatigaa qinnutigut naapertorlugit iliuuseqas­sasugut. Assersuutigalugu qatanngut ataatsimeersuarnermut peqataajumalluni sulinngif­feqarumanialeruni Jehovamut ikioqqusinnaavoq. Qinnutaa Jehovap qanoq akisinnaavaa? Sulisitsisuminut saaffigin­ninnissaanut Jehovap sapiissuseqalersis­sinnaavaa. Qatanngutilli uninngaan­narnani sulisitsisuni aperisariaqarpaa. Immaqalu arlaleriarluni aperisariaqarpaa, ullormi allami suliumasinnaavoq akissarsiaqar­naniluunniit sulinngif­feqarniarsin­naalluni. Jehovap kissaatigaa isumakuluutigut pillugit qinukulasas­sasugut. Jiisusip oqaasiinit paasivarput qinnutigisatta ilaat ingerlaannaq pinavian­ngikkigut. (Luk 11:9) Tamannali nikallus­sutiginagu qamannga pisumik qinukulasarit. (Luk 18:1-7) Taamaaliorutta ersersis­savarput qinnutigisarput pimoorukkipput. Aamma ersersis­savarput upperalugu Jehovap ikiorsin­naagaatigut. w23.11 22 § 10-11

Jehovap ikinngunni Aaperaat neriorsorpaa kinguaassaa aqqutigalugu nunarsuarmi inuiaat tamarmik pilluaq­quneqarumaartut. (Mos 1. 15:5; 22:18) Guutimut upperluar­tuugami Aaperaap upperil­luinnarpaa Guutip neriorsuutaata piviusun­ngorumaarnera. Kisianni Aaperaat 100-nik ukioqarluni Saaralu 90-inik ukioqarluni suli ernertaarsiman­ngillat. (Mos 1. 21:1-7) Biibilimili allassimavoq Aaperaap ‘neriuut tunngavigalugu inuiaqatigiip­passuarnut ataatan­ngornissani upperigaa’. (Rom 4:18) Iisaamillu ernertaarmat kiisami neriuutigisaa piviusun­ngorpoq. Sooq Aaperaat taama upperluartigaa? Aaperaap Jehova ilisarisimal­luaramiuk qularin­ngilluinnarpaa Guutip neriorsuineratut pisoqarumaartoq. (Rom 4:21) Jehovap Aaperaat iluaraa upperneralu pissutigalugu naapertuil­luartutut isigalugu. – Jaak 2:23. w23.12 8 § 1-2

Angutip inuusuttup tatiginartuusup akisussaaffini eqiasuilluni isumagisarpai. Jiisusi maligas­saalluar­nerpaajusoq eqqarsaatigiuk. Jehovap suliareqqusai artornaraluarpataluunniit eqiasuilluni peqqissaarlunilu naammas­sisarpai. Inuit – ingammik ilinniartitani – asavai, taakkulu pillugit inuunini tunniuppaa. (Joh 13:1) Jiisusi ilaarlugu akisussaaffitit naammas­siniarlugit ilungersorit. Qanoq iliussanerlutit nalornis­sutigigukku maniguullutit misilit­tagaqar­nerusunut ikioqqugit. Eqiasuitsuugit. (Rom 12:11) “Inuit pinnagit Jehovali pillugu” akisussaaffitit naammas­siniartakkit. (Kol 3:23) Tamatta kukkusaratta maniguullutit kukkussutitit nassuerutigisakkit. – Uss 11:2. w23.12 26 § 8

Imermut morsutsitaasimagatta Jehovallu ilaqutaariis­sortaanut ilanngus­simagatta nuannaangaarpugut. Jehovamimmi qanimut ikinnguteqarneq ataqqinaatigaarput. Tussiaasiortoq Daavi Jehovamut ima oqartoq isumaqatigaarput: “Pilluarpoq illit najortigiumallugu qinikkat ineqartitallu silarliutinni.” (Tuss 65:5) Imaanngilaq Jehovap kinaluunniit ilaqutariis­sortaminut ilaalersittaraa. Imminut qanimut attaveqarusun­nerminnik ersersitsisut toqqartarpai. (Jaak 4:8) Jehovamut tunniul­luinnaravit imermullu morsutsin­neqaravit qularis­sanngilat ‘pilluaatissanik killeqan­ngitsunik kueraaf­figissagaatit’. (Mal 3:10; Jer 17:8) Imermut morsutsin­neqarneq Jehovamut kiffartornermi aallarniutaaginnarpoq. Ussernar­torsioraluarlutit uppernikkullu misilin­neqaraluarlutit tunniul­luinnarnermik neriorsuutit eqqortit­tuarusussavat. (Oqal 5:3, 4) Kristumiuugavit sapinngisannik Jiisusi ilaartarpat peqqussutaalu maleruarlugit. – Mat 28:19, 20; Pet 1. 2:21. w24.03 8 § 1-3

Taavami aappallu sammisaqaqatigiinneq nuannarin­ngikkussiuk susinnaavisi? Ikumatitaq ikikkaanni ingerlaannaq innerujus­suanngorneq ajorpoq. Innermut qisuginiakkagut annikitsuuteriarlugit annertusiar­tuaartikkukkit inneq ikummaaris­siartussaaq. Taamatulli ullut tamaasa sivikitsuk­kuutaariarlusi sammisaqaqatigiis­sinnaavusi. Nuannersuutis­sagussiuk marluullusi nuannarisassinnik sammisaqaritsi. (Jaak 3:18) Taamatut annikitsumik aallartikkussi asaqatigiin­nerulissaasi. Ataqqeqatigiinneq aappariinnut pingaaruteqarpoq. Iltimut assersuuneqarsinnaavoq. Ikumatitaq ilteqan­ngikkuni qamissaaq. Taamatuttaaq aappariit ataqqeqatigiin­ngikkunik asanninnerat nillertun­ngoriar­tupallassaaq. Aappariilli ataqqeqatigiin­niarlutik sulissutiginnittut asaqatigiinnertik uummaaritsit­tarpaat. Eqqaamasariaqarporli pingaar­nerunngitsoq illit ataqqin­nittuliorlutit misiginersutit, pingaar­neruvorli aappat ataqqineqartutut misiginersoq. w23.05 22 § 9; 23-24 § 14-15

Guutip kiffai aalajaatsut Biibilimi eqqaaneqartut akeqqatik allallu pissutigalugit annilaangasarnertik oqaluttuarivaat. (Tuss 18:5; 55:2, 6) Uaguttaaq atuaqatitsinnit, suleqatitsinnit, ilaquttatsinnit oqartus­saasunil­luunniit akerlilersor­neqarsin­naavugut. Allaallu napparsimaneq pissutigalugu toqunissarput annilaan­ngatigisin­naavarput. Taamatut nalaataqar­tilluta meeqqatut ikioriarfis­saqanngitsutut misigisin­naavugut. Jehovap qanoq ikiortarpaatigut? Tuppallersar­tarpaatigut eqqissisarlutalu. Taamaattumik qinunikkut Biibilimillu atuartarnikkut Jehova piffissaqarfigisaruk. (Tuss 77:2, 13-15) Taava annikil­liuleraangavit iliuuserisassat siulleq tassaassaaq Ataatannut qilammiusumut saaffiginninneq. Annilaangas­sutitit ernumas­sutitillu Jehovamut oqaluttuarisakkit. Taava oqaasianik atuarnikkut tusarnaarsinnaavat misigis­sallugulu taassumannga tuppallersar­neqarlutit. – Tuss 119:28. w24.01 24-25 § 14-16

Anersaakkut ittunik anguniagaqarnermi piumassuseq pingaaruteqarluinnarpoq. Piumassuseqartormi anguniakkani angujumallugu tamaviaartarpoq. Piumassuseqarluarutta anguniakkagut angujuminar­tinnerus­savagut. Illimmi, qanoq piumassuseqar­nerulersinnaavit? Piumassuseq qinnutigisaruk. Jehovap anersaani illernartoq aqqutigalugu anguniakkavit angunissaanut piumassuseqar­tissinnaavaatit. Ilaannikkulli piumassuseqarpal­laanngik­kaluarluta anguniagaqarsin­naavugut nalunngin­natsigu tamanna eqqortulior­nerusoq. Tamannalu ajunngitsuuvoq. Jehovap iliuuserisimasarpassui eqqarsaatigisakkit. (Tuss 143:5) Apustilip Paulusip Jehovamit ajunngisaangaarfigineqarnini eqqarsaatigisaramiuk Jehovamut kiffartornini tamaviaarutigaa. (Kor 1. 15:9, 10; Tim 1. 1:12-14) Taamatuttaaq illit pillutit Jehovap iliuuserisimasarpassui eqqarsaatigisarukkit anguniakkavit angunissaanut piumassuseqar­nerulissaatit. – Tuss 116:12 w23.05 27 § 3-5

Ataatarput qilammiusoq nuannaar­tittarparput atia unnersiutigigaangatsigu. (Tuss 119:108) Inuit naammal­luinnan­ngitsut ilaat imminut tatigin­nginnamik nersorneqar­nissartik pisariaqar­tittarpaat. Guutili Killeqan­ngitsumik Pissaanilik taamaanngilaq. Ataatarput qilammiusoq unnersiutigisarparput Saatanip salluliuutaata allap tamatsinnut tunngasup eqqunngitsuunera uppernarsaraangatsigu. Saatanip eqqarsar­tinniarsarivaatigut inuup kialuunniit ilumoorfigin­nilluni Guutip atia illersor­navianngikkaa. Oqarpoq inuup kialuunniit nammineq iluaqutigis­sasoriguniuk misilin­neqarnermini aalajaak­kunnaarluni Guuti tunussagaa. (Job 1:9-11; 2:4) Juubilli aalajaan­nermigut Saatani sallutuujusoq uppernarsarpaa. Illimmi Guutimut aalajaat­tuassavit? Tamatta immikkut aalajangersin­naavugut Ataatatta atia illersor­niarlugu aalajaallutalu kiffartorfigineratigut nuannaar­tissinnaallugu. (Uss 27:11) Taamaaliorneq uagutsinnut ataqqinaataangaarpoq. w24.02 8-9 § 3-5

Moorsisi Josvalu toqoreersut Jehovap innuttaminik siulersuisussatut eqqartuussisut toqqarpai. Taava Israalikkut kunngeqalermata innuttaminik siulersuisussatut pruffiitit toqqarpai. Kunngit Jehovamut aalajaatsut pruffiitit siunnersuutaat maleruar­tarpaat. Assersuutigalugu kunngip Daavip pruffiitimit Naatamit naqqinneqarnini maniguulluni akueraa. (Sam 2. 12:7, 13; Nal 1. 17:3, 4) Kunngip Josafatsip pruffiitip Jahazielip siulersuinera maleruarpaa, Juudakkullu kajumis­saarpai Guutip pruffiitii uppereq­qullugit. (Nal 2. 20:14, 15) Kunngi Hizkia annikil­liorami pruffiitimut Iisaajamut ikioqquvoq. (Es 37:1-6) Kunngit Jehovap siulersuinera maleruaraangamikku pilluaq­quneqartarput inuiaallu illersor­neqartarlutik. (Nal 2. 20:29, 30; 32:22) Jehovap pruffiitini atorlugit innuttani siulersorai ersarippoq. w24.02 22 § 8

Saatanip kissaatigaa Jehovamut kiffartortut taassuma najoqqutassiaasa maleruar­nissaannik sapernar­titsisunik peqateqar­tassasut. Mianersor­tariaqarpugut, aammami internetikkut attaveqaqatigiit­tarfinni ilagisar­takkatta sunnertarmatigut. Inuppassuit isumaqaraluartut atoqatigiinnikkut eqqunngitsuliorneq ajortuun­ngitsoq uagut nalunngilarput tamanna eqqunngitsuusoq. (Ef 4:19, 20) Pitsaassaaq apeqqutit uku eqqarsaatigigutsigit: ‘Aalajangiusimavara Jehovap najoqqutas­siaanik ataqqin­ninngitsut – soorlu suleqatima, atuaqatima allalluunniit – pisariaqan­ngitsumik peqatigisan­nginnissaat? Sapiillunga Jehovap najoqqutassiai illersorlugillu maleruar­tarpakka, allaat ilaasa tamanna pillugu ajorigaluarpannga?’ Timuutiusimut allakkat aappaat 2:20-22 ersersin­neqarpoq aamma ilagiinni qanimut ikinngutis­sarsior­nitsinni silatusaar­tariaqartugut. Eqqaamas­savarput ilaasa Jehovamut aalajaanis­satsinnut ikiornavian­ngikkaatigut. w24.03 22-23 § 11-12

Takorloor­nikuuiuk Jehova qanoq ittuusoq? Jehova takuneqarsin­naanngik­kaluarluni Biibilimi ‘seqinertut eqqortin­naveeqqutitullu’ aamma ‘innertut nungutitsisutut’ eqqaaneqarpoq. (Tuss 84:12; Hebr 12:29) Ezekieli takorruuisin­neqarmat Jehovap avatangiisigisai ukuupput: Ujarak safiri, uisorilasoq neriusaarlu qinngornilik. (Ez 1:26-28) Jehova takusin­naanngin­natsigu upperiuminaatsis­sinnaavarput asagaatigut. Inuit ilaat atugarinikuusatik ajortut pissutigalugit eqqarsartarput Jehovap asasinnaan­ngikkaatik. Misigissutsit taamaattut qanorlu uagutsinnut sunniuteqarsimasut Jehovap paasisinnaavai. Qanoq ittuunini Biibilimut allatsis­simagamiuk ikiorpaatigut. Oqaaseq alla Jehovamut tulluar­nerpaaq tassaavoq asanninneq. (Joh 1. 4:8) Biibilimi ima allassimavoq: ‘Guuti tassaavoq asanninneq.’ Asanninneq aallaavigalugu iliuuseqar­tuaannarpoq. Guuti ima sakkortutigisumik asannikkami asanninnini allaat imminut asannin­ngitsunut ersersittarpaa. – Mat 5:44, 45. w24.01 26 § 1-3

Jehovap Israalikkut Egyptenimit aniguisin­nissaannik Moorsisi siulersuisussatut toqqarpaa. Moorsisi aqqutigalugu Israalikkut siulersorlugit ersarissumik takussutis­saqartippai. Assersuutigalugu napasoqartippaa ullukkut nuiaasumik unnuakkullu innerusumik. (Mos 2. 13:21) Moorsisip napasoq taanna malippaa Israalikkullu Immamut Aappalaartumut pisillugit. Taakkuli Egyptenimiut sakkutuuinit malersor­neqarlutik qimaariarfis­saaruttutut misigigamik paatsiveerupput. Moorsisili kukkunngilaq. Jehovammiuna Moorsisi aqqutigalugu innuttani tassunngartikkai. (Mos 2. 14:2) Tassanilu Guutip tupinnar­tuliornikkut aniguisippai. (Mos 2. 14:26-28) Ukiuni 40-ni tulliuttuni Guutip innuttaanik inoqajuitsukkut siulersuinermini Moorsisip napasoq taanna najoqqutariuarpaa. (Mos 2. 33:7, 9, 10) Jehovap Moorsisi nuiamit napasumit oqaluffigaa, Moorsisillu Jehovap oqaasii inunnut ingerlateq­qittarpai. Israalikkut takulluarsin­naavaat Jehovap Moorsisi aqqutigalugu siulersoraatsik. w24.02 21 § 4-5