nipilerssoriautsit anersãkut aserorsaissut mianerssûtigíkit!
„avĸutigerĸussangnik ajoĸersúnga, Jehova, ingerdlatíngalo avĸutíkut iluartúkut.“ — tugsiaut 27:11, NW.
1. Jehovap tuníssutâ nipilerssorsínauneĸ sutigut naleĸángila?
NIPILERSSORSÍNAUNEK’ tuníssutit Jehova Gûtip avâgingnigtumik inungnut túniússaisa ilagât. tamána ajúngíssusianut inuit pissagssaríngisaraluánut erssiutauvoĸ naleĸángitsoĸ, nipilerssornerme nauk inûniarnerme píngitsôrneĸarsínáungitsũngíkaluardlune, inuit misigíssutsimingnik — aliasungnermingnik, tipaitsungnermingnik — erssersitsisínaulersípai. (1 Môrsase 4:21) aliasûteĸartitdlugo tugpatdlersaisínauvoĸ tipaitsûteĸartitdlugulo pivdluarnermik agdlisaisínauvdlune. nalerĸutdluarpoĸ Jakobip kristumioĸatine agdlagfigingmagit imának: „isumavdluartoĸarpat únersiutigingníssúmik tugsiardle.“ — Jâko 5:13.
2. nipilerssorneĸ erinarssornerdlo Jehovamik patdlorfigingningnermut ĸanga sutigut atássuteĸarpat?
2 Jehovamik patdlorfigingningnerup erinarssorneĸ nipilerssornerdlo imungarssuaĸ ilagai. itsarssuaĸ aniguisíneĸarângamik ínugtaisa Gûte tipaitsugtumik erinarssordlutik únersiutigissarpât. (2 Môrsase 15:1-21; erĸartũssissunik agdlagkat 5:1-31) nâlagfingme gûtisiornermut atatitdlugo nipilerssortartut ârĸigssũssivfigineĸarnigssâta pilersíneĸarnera Gûtip perĸússutigâ. (Tussiaat 68:25-27) Nâlagkap únúkorsiortitsinerata kingornagut Jesus Kristusip apustilîsalo ĸujaniutit tugsiutigait. (Mákorse 14:26) apustile Paulusip kristumioĸatine kajumigsârpai misigíssutsitik ersserserĸuvdlugit ’eríniugkat anersâp pê atordlugit, ũmataisigutdlo Jehovamut erinalerssorĸuvdlugit’. (Evfisumiut 5:19) uvdlordlo mána tikitdlugo Jehovap nalunaiaissuisa akornáne patdlorfigingningnerup erinarssorneĸ aulajangersumik ilagâ.
3. nipilerssornerup súnîsínáussuseĸarnera sutigut ersserpa?
3 miserratigissagssáungitsumik nipilerssorneĸ súnîsínáussuseĸangârpoĸ. ũmatit angusínauvai misigíssutsitdlo kivdligsínauvdlugit. nunat amerdlanerssáine inuiaĸatigîgtut erinarssûtit erínatdlo marsiutaussut nipilerssûtigineĸartarput inuit nunamingnik asangnigdluarnerat ĸĩmatsautigitíniardlugit. atuarfingne atuartûssut timerssoĸatigîtdlo erinarssûtigissangnâtik atortarpait timerssortartutik ûmássuseĸardlualersíniardlugit. ugsagsârutigssiortutdlo erínat tusajuanartut atortarpait niorĸutigssanik piumaneĸarnerulersitsiniardlutik. nipilerssornerup súnîsínáussuseĸangârneranut malungnautit tamáko erĸarsautigalugit, kristumiut pâsísavât mianerssortariaĸardlutik.
suna pivdlugo mianerssortariaĸarpa?
4. nipilerssorneĸ erĸarsautigalugo, Jehovamik patdlorfigingnigtut suna mianerssûtigerĸigsârtariaĸarpât?
4 nipilerssornerup sákortûmik súnîsínáussuseĸarnera Satan Djævelivtaoĸ nalúngilâ, ilâtigutdlo sákugissardlugo inuit ũmataisigut súnerniardlugit Jehovamigdlo minguitsumik patdlorfigingningnermit tunuarterĸuvdlugit. taimáitumik tamána erĸarsautigalugo kristumiut ilumôrtut ’ũmatertik pârissariaĸarpât, inûneĸ tássánga pissarmat’. (ússatit 4:23) mianerssorĸigsârtariaĸarpugut nipilerssugkat tusarnârtagkavta ’avĸúmit iluartumit’ sangutísángíkâtigut ilerĸoĸalersísángíkâtigutdlo uvavtínik aserorsaissunik Gûtimutdlo atarĸinautaiaissunik. — tugsiaut 27:11, NW.
5. nipilerssoriautsit sût tusarnârumavdlugit aulajangerniarnivtíne suna pivdlugo ingmíkôrtitserĸigsârtariaĸarpugut?
5 Jehovap tunissiumatússutse erssersípâ inuit nipilerssorsínáussuseĸartíkamigit. nipilerssorsínáussuserdlo ila atornerdlungneĸangârtarame! taimáitumik nipilerssoriautsit sût tusarnârumavdlugit aulajangerniarnivtíne ingmíkôrtitsivdluartariaĸardlutalo sianissariaĸarpugut. oĸausertait tusartínagitdlũnît erinarssûtit aulajangersimassut ĸanoĸ ítumik ilúkut misigilersitsinigssamingnik sujunertaĸarnerat malugisínaussarparput. ungasigsumîtdlune Mosesip sianigâ nipilerssorneĸ Israelíkut tangmârsimârfiánit pissoĸ tássáungitsoĸ „ajugaussutdlũnît suaortaĸátáutut artorssartutdlũnît suaortaĸátáutut“. kîsame tangmârsimârfingmut apũkame inuitdlo ĸanoĸ ilioriausê takulerdlugit, nalúngilâ nipilerssoriauseĸ atugât sorĸusaitsumik gûtipilugsiornartumik iliûseĸalersitsissûssoĸ. (2 Môrsase 32:15-19, 25) uvdlumíkut uvagútaoĸ nipilerssoriautsip tusarnârtagkavta ilúkut misigilersitâta ĸanoĸ ítûnera misigssortariaĸartarparput. ĸĩmagtitsissûva, imalũnît nipilerssoriausiuva anersãkut aserorsaissoĸ?
6. nipilerssoriautsit ilait Djævelip sumut sákugissarpai, taimáitumigdlo apustile Paulusip oĸausê sût ingmíkut erĸaimassariaĸarpat?
6 apustile Paulusip pâsivâ Jehovap ínugtai Satanip aserorsarniarai imalũnît ajortúngorsarumagai. taimáitumik Paulusip ugpeĸatine ilungersortumik kajumigsârpai iluaitsut avigsârĸuvdlugit, aperivdlunilo: „iluarneruvme iluáineĸ súkut peĸatiginerpâ? ĸaumassordlo târtordlo súkut ilagĩssuteĸarpat? Bîliale Kristusip súkut isumaĸatiginerpâ?“ (2 Korintumiut 6:14-17) uvdlumíkut Djævelip nakutitseriainíkut nipilerssornermut atatitdlugo iluáinerit ássigĩngitsut sákugissarpai inuit kángunartumik ilerĸoĸalernigssãnut támartíniardlugit tássûnalo Gûtimit tunuartíniardlugit. Jehovamut nalunaiaissut ingmingnik túniutdluínarsimassut navianautit tamáko mianerssûtigissariaĸarpait.
íngilipiluit peĸatiginavêrsigik!
7. nipilerssoriautsit aulajangersimassut íngilipilungnit súnigaunersut kristumiup ĸanoĸ sianigisínauvâ?
7 nipilerssornermut túngassutigut anersãkut navianartorsiornartoĸarpoĸ. ássersûtigalugo nipilerssortartut nuánarineĸangârtut ilarpagssuisa angákuarningnerit soĸutigait. ilaisa sarĸumissumik miserratigíngilât Satanisiortûvdlutik, Satanivdlo súnînera eríniaisigut taigdliaisigutdlo malungniútarpoĸ. nipilerssoriautsitdle aulajangersimassut íngilipilungnit súniuteĸarnersut kristumiup ĸanoĸ sianigisínaunerpâ? ilâtigut oĸalugtartup nûtaisa pûat ĸiviáinardlugo nãmagtarpoĸ. pûáne ilisîtsutut, íngilipilugtut diâvulututdlũnît issíkugdlit ássiliarineĸartut ímaĸa takuvatit. ássiliartaĸarsínauvdlunilũnît erĸumîngârtunut angákuarningnernutdlũnît túngassunik. nipilerssoĸatigît arĸata imalũnît oĸalugtartup nûtaisa taigûtâta erinarssûtitdlo taigûtaisa oĸausertaisalo ímaĸa íngilipilungnut atássuteĸarneĸ takutitsiarpât. erinarssûtit taigûtigdlit „Djævelimik misigeĸatigingningneĸ“-mik imalũnît „ilerrup ĸitornai“-mik ĸanoĸ isumaĸarfigísavigit? erinarssût taimatut ítoĸ pivdlugo avîsime New York Post-ime agdlagsimavoĸ „sarĸumissumik nalunaerutigigâ“ nipilerssoĸatigît táukua „Satan suleĸatigivdluínarât“.
8. uteriartortitsiníkut ilisarnarungnaersitsiniarneĸ atordlugo tusardliússat ĸanoĸ ítut nipilerssornermik ímiússaunerit iláinut ilángúneĸarpat?
8 tusardliússat bîbilimut akerdliussut agdlâtdlo íngilipilungnut atassut ímiúneĸartaraut ímiússissauseĸ ingmíkut ítoĸ, uteriartortitsiníkut ilisarnarungnaersitsinermik taigorneĸartoĸ, nipilerssoĸatigît ardlagdlit atortagât, atordlugo. erinarssûtit tamanit nuánarineĸangârtut ilâta ímiússaunera utimut nipilerssûtigineĸarpat, oĸausertai nangeĸátârtut imáitut tusagssáuput: „aulajangerit marihuanatortásavdlutit.“ erinarssût nuánarineĸangârtoĸ avdla utimut nipilerssûtigineĸarnermigut imáipoĸ: „erinarssúsaunga Satan najoravko. . . . avdlatut ajornaĸaoĸ, asassánguara Satan.“
9. nipilerssoriautsit aulajangersimassut tusarnârtitdlugit erĸarsautit ĸanoĸ ítut isúmamut pigiliúneĸarsínáupat, tamánalo suna pivdlugo navianarsínauva?
9 sôruname erinarssûtit ímiússaunerat utimut nipilerssûtigineĸartaríngitdlat. súnînipilungnitdle isúmamíkut súnertiassûgunik, nipilerssoriautsit aulajangersimassut tusarnârtaruníkik erĸarsautit bîbilimut akerdliussut imalũnît íngilipilungnit pissut pigiliúsínaussarpait. atuagagssiame High Fidelity Magazine-ime oĸalugtartup nûtainik niorĸutigssiorfît ilãne ingmíkôrtoĸarfingme pissortat ilaisa oĸausê íssuarneĸarput, táuna oĸarame: „nipilerssoriautsit nutât, rock-itut ítup ãmátaoĸ nipilerssugagsiarssuartut ítup, kivdligtiássuseĸ atauseĸ pissariaĸartípât. . . . nipilerssoriautsinut táukunúnga tusarnârtoĸ túniutĩnartariaĸarpoĸ isúmanilo angmáinardlugo nipilerssornermut tamákerĸuvdlugo.“ tamánale silatusârneruva? isuma anersãkut sernigssugáungitsoĸ íngilipilungnit pulaneĸáinarsínaugame! — nalerĸiuguk Matîuse 12:43-45.
10. íngilipilungnut túngassut sûtdlũnît kristumiut ilumôrtut ĸanoĸ issigísavait?
10 ugpeĸatiminut asangâgkaminut apustile Paulus agdlagpoĸ ima: „Gûtimik nalussut pigdliutitik anersâpilungnut pigdliutigissarpait Gûtimut pínatik; ilivsile anersâpilungnut ilagĩssuteĸarĸúngilavse. [Jehovap] ermusianit anersâpiluitdlo ermusiánit imersínáungilase; [Jehovap] nerdlîvia anersâpiluitdlo nerdlîviat ilangîvfigisínáungilase.“ (1 Korintumiut 10:20, 21) kángunartuliorneĸ anersârsiornerdlo, angákuarningneĸ íngilipilungnutdlo ĸanoĸ ítunutdlũnît túngassoĸ kristumiup ilumôrtup inûnerane inigssaĸángivigput. — 5 Môrsase 18:10-12; Galâsiamiut 5:19-21.
11. nipilerssornermik íngilipilungnut túngassunik ímiússanik pigingningnine pâsileruniuk, kristumio ĸanoĸ iliúsava?
11 únersũssutit Gûtimit isumagssarsiarineĸarníkut pissut erĸarsautigalugit, kristumio ĸanoĸ iliúsava pâsileruniuk nipilerssûtit ímiússaunerinik íngilipilungnit súnigaunermik malungnauteĸartûssunik pigingnigdlune? aserortariaĸarpai, Jehovavme nalunaiaissue „anersâpilungnut ilagĩssuteĸá“sángitdlat. tamatumúnga ássingussumik pissoĸartitdlugo, itsarssuaĸ kristumiut Efesusime najugagdlit nangânatik iliûseĸarput, agdlagsimangmat: „ikíngitsutdlo angákuarningniartaraluartut magpersagkat atautsimut píssúpait tamarmigdlo tákuáne ikivkardlugit; akîlo nautsorssoramíkik malugait aningaussat sîlviussut tatdlimanik ĸulilingnik tûsintigdlit [50.000-it] naligigait.“ (apustilit suliait 19:19) Jehovamik asangnigtut táukua ajortoĸ ûmigât aningaussatigutdlo ánaissaĸarsínauneĸ nangãssutiginago. kisiánile pigissatik íngilipilungnut atássuteĸarnartut aserorpait, anersãkut angnertûmik iluaĸutigssamingnut. — Tussiaat 97:10.
silap matuma anersâva ingalangniaruk
12, 13. (a) silap matuma anersâva suna nipilerssoriautsit nipilerssortartutdlo uvdlumíkornitsat ilisarnaĸutigissarpât, tamánalo sutigut malungniútarpa? (b) Jehovap nalunaiaissuisa Galâsiamiunut agdlagkane 6:7-ime agdlagsimassoĸ ĸanoĸ atortûtísavât?
12 arajutsinavêrtigulo nipilerssoriautsit nipilerssortartutdlo uvdlumíkornitsat silap matuma anersâva piumassârssorpatdlârtumik sorĸusáissusiatigut malungniútoĸ ilisarnaĸutigissarât. (nalerĸiuguk Evfisumiunut agdlagkat 2:1-7.) ássersûtigalugo avîsime Canadame sarĸúmersartume The Toronto Star-ime agdlauserineĸarpoĸ „fans“, tássa nipilerssortartunik nuánarissaĸarnermit ingassáussissut, tûsintilíkûtât ĸanoĸ ilioriauseĸartut nipilerssordlune tusarnârtitsineĸ taimaitíneĸarmat: „minútine 30-ne perdlugsiortitsinermingne politît 268-it puiaussanik, kalungnernik atautsimut nuioragaussunik igeriútagkanigdlo avdlanik mitdlôrtaĸátârpait . . . igsiavît 200-t súkanut sisaussunut aumârtitdlugit nipititaussut simintimutdlo ĸajangnaerĸutit atordlugit átáneĸaraluartut nutsuínardlugit pîarpait. igsiavît saviminiussut ardlaligpagssuit issigingnârtitsissarfingmut miloriúpait. . . . isertarfît kâvigtut sisaussut túngavînit pêrpait, bilítêrniarfît issigingnârtoĸarfingmilo sutorniartarfiup igalâve aserorpait, unangmissarfigssûvdlo silatâne bîlit ardlagdlit ínardlerdlugit.“ kristumiup taimailiortut ilagiumásanerpai?
13 taimatut tusarnârtitsineĸartitdlugo kigdleĸángitsumik imigagssamik kimigtôrtortarput ikiarôrnartortortardlutigdlo. ãmátaoĸ tusarnârtitsissut nipilerssoriausiat ússersuatârnerilo sorĸusaitsumik ĸîmarujugpatdlâlersitsissarput. ersserĸigsumik, taimailinerine nipilerssoriautsit atortagait, ãmátaoĸ íngilipilungnit súnigauneĸ, ikiarôrnartut nakûsernerdlo ilángutdlugit aserorsáingitsôrsínáungitdlat. tauva kristumiup nangmineĸ angerdlarsimavfingmine nipilerssoriautsit taimáitut tusarnârsínaunerpai ajortumik súnerneĸarane? taimáinaviángilaĸ! Jehovamutdlo nalunaiaissup ilumôrtup kialũnît bîbilime ilerĸorerĸussaĸ una sumigínásángilâ: „Gûte mitautigerĸúngilaĸ, inuk siaruartigkane nâpertordlugit katerssuiumârmat.“ — Galâsiamiut 6:7.
14. suna pivdlugo kristumiússutsimut tugdluángila erinarssût kángunartuliorĸusârtoĸ tusarnãsavdlugo áiparalugulo ĸitísavdlune?
14 ilaitdle isumaĸartarput: ’erínat tusarnârtarângavkit oĸausertait soĸutigíngiláka; rytmĩnâ nuánarâra. ĸitigiauvdluartũpúme.’ tamánátaordle navianartortaĸarsínauvoĸ. avîsime The Times-Herald-ime Newport Newsime Virginiame sarĸúmersartume oĸalugtuarineĸarpoĸ „disco-mik ĸitigkumatôĸ erinaĸ nuánarineĸangârtoĸ áiparalugo únuaĸ nâvdlugo ĸitigsínauvoĸ nipilerssorneĸ sianiginago kisiáne tigdlernera sákortôĸ oĸausertaisalo ilait tusarneĸissut ilíkaruminaĸissutdlo uteĸátârtagkat sianigalugit“. ímaĸa erinaĸ tusarneĸissumik tigdlerneĸarpoĸ ĸitigiauvdluartûssumik, oĸausertaile ĸanoĸ iliornigssamut kajumigsâruteĸarnerpat? sût tusarnârtup isumânut pulariarpat? ássersûtigalugo, Jehovamut nalunaiaissoĸ ilumôrtoĸ erinaĸ áiparalugo ĸitigtarumásava oĸausertaisa kajumigsârtaĸátârmáne kángunartulioriarĸuvdlune? — 1 Korintumiut 6:9, 10.
15. nipilerssoriautsit uvdlumíkornitsat aserorsaisínaussunik sunik píssuseĸalerniartarpat?
15 sôruname rock-ĩnáungitsut disco-ínáungitsutdlo nipilerssoriautsit ilerĸugssatigut aserorsaissunik oĸausertaĸartũput. nunane amerdlasûne nipilerssoriauseĸarpoĸ inuínait nuánarissãnik, kristumiutdle ilumôrtut erínat tigdlernerat oĸausertaitdlo ilâtigut mamianartísavait. amerikamiut nipilerssoriausiat country-mik taigûtilik pivdlugo avîsime The News & Observer-ime Raleighme North Caroliname sarĸúmersume agdlagsimavoĸ: „erínat country-mik taigûtigdlit arnat inugsiarneĸissut neriniartarfingne akikitsunĩtut angutitdlo ilumũngitsut ĸangalũnît imarissarpait, nipilerssorneruvdle oĸalugtuarissaunerane aitsât mãnákut ilerĸupilue taima ersserĸigtigissumik eríniautigineĸartarput.“ nipilerssugkat nuánarineĸaraluartut kángunartuliornermigdle pingârtitsissut píssuseĸalerniartarnerat avdla pivdlugo avîsime The Spokesman-Review-ime agdlagsimavoĸ: „arnat erinarssûtigât únuákut atoĸatigîngneĸ ĸitigtarfingmilo atoĸatigîngneĸ avĸusinermilo atoĸatigîngneĸ.“ erinarssûtit taimáitut aserornángitsôrsínáupat?
16. inûp ũmatâta kivdligpane nipilerssorneĸ ilerĸugssanik aserorsaissoĸ ĸángunartuliorĸusârtordlo tusarnârĸuvdlugo áiparalugulo ĸiterĸuvdlugo, sût ikiûtigisínauvai?
16 inûp ajortigdlup ũmatâ perĸuserdlugtûssoĸ sagdloĸítaissûvdlunilo puiornavêruk. (Jerimia 17:9) ũmaterpit kivdlingnerpâtit Jehovap issaine ajortûssoĸ nalúngisat tusarnârĸuvdlugo áiparalugulo ĸitigtarĸuvdlutit? taimaigpat, tauva mianerssorit! ĸinuvdlutit Gûtimut ikiorĸussarit ’Nâlagkap iluarissagssâ sunaussoĸ misiligtarsínaorĸuvdlugo târtuvdlo pînik inerititaĸángitsunik suliaĸartut peĸatiginavêrĸuvdlugit’. (Evfisumiut 5:10-12; Tussiaat 5:2, 3) nipilerssugkat kángunartuliortitsisínaussut tusarnârumanagit áiparalugitdlo ĸitigkumanatit aulajáikuvit, ímaĸa avdlat ũmatimingnit támarsagaussut ivdlit aulajáissutsingnit ilitsersorneĸásáput.
17. nipilerssorneĸ erĸarsautigalugo, agdlagsimavfingne ukunane únersũssutigineĸartut ĸanoĸ atortûtísínaugivut isumaĸarpit: (a) Evfisumiunut agdlagkat 5:3? (b) Títusimut agdlagkat 2:11-14?
17 píssutsit ârĸigssũssaunerata ajortup matuma anersâvanik ilumioĸangârtut nipilerssugkat kángunartuliortitsisínaussut nuánarissaĸait. kristumiutdle ilumôrtut? nuánaríngivigpait. táuko imáitumik únersũneĸarput: „[kángunartuliornerdle] mingungnartutdlo nalingínait piumatûnerdlo taineĸásángitdlatdlũnît ilivsíne, iluartut taima ilerĸugssaĸarmata.“ (Evfisumiut 5:3) uvagut pissariaĸartumik ’Gûtimut nâlángitsûjungnaerpugut silamiutdlo kajungerissait atorungnaerdlugit’? tauva oĸautsivut oĸauserissavutdlo pĩnarnagit ãmátaordle tusarnâgkavut mianerssûtigitigik, erinarssûtit kángunartuliornermik imarissaĸartut tusarnâgkavtínut ilaorĸunagit. silame matumane inûniarta „pîtaiuitdluta iluartumigdlo ilerĸoĸardluta Gûtilo mianeralugo“. — Títuse 2:11-14.
18. nipilerssortartut iláinik isumaĸarfigingningnerput pivdlugo aperĸutit sût ingmivtínut aperĸutigisínauvavut?
18 nipilerssortartutdle silamiorpalugtut ivdlit nangmineĸ ĸanoĸ isumaĸarfigaigit? ingminut aperigit: atissaisigut, ĸanoĸ issíkoĸarneratigut oĸalungneratigutdlo ilait íssuarpáka? oĸalungnerma ilâta ĸanoĸ agtigissup táuko táukualo nipilerssornerat pissarpai? ingassagtumik nuánarinerpáka ingmíkut atissat táukunínga nersoringníssutaussut atordlugit, imalũnît ássinge ivertitatdlo ássinginik ássiliartagdlit inivnĩtítardlugit? taimailiorneĸ Jehovamit, tamavta nâlagarsiorfigissariaĸagkavtínit, iluarissáusava? bîbilime únersũssut ersserĸarigsoĸ ’gûtipilugsiorneĸ ĸimarratigerĸuvdlugo’ malingnerpara?’ — 1 Korintumiut 10:14; Rûmamiut 1:24, 25.
erĸortoĸ erĸúngitsordlo ingmíkôrssusîsigut ilisarisigik
19. nipilerssûtit pivdlugit pâsingnigsínáussuserput erĸortumik sungiusagaussoĸ ĸanoĸ atortariaĸarparput?
19 apustile Paulus agdlagpoĸ ima: „inersimassutdle nerissagssamik mavtusûmik pissariaĸarput, tássa misigissaĸartarnermit sungiusagaussunik sianíssutigdlit ajúngitsordlo ajortordlo ingmíkôrssusîsigut ilisarisínauvdlugit.“ (Eprîarit 5:14) angajorĸât inûsugtutdlo kristumiûssut pâsingnigsínáussusertik erĸortumik sungiusartariaĸarpât erĸortumik erĸúngitsumigdlo ingmíkôrtitsivdluarsínaorĸuvdlutik. nipilerssoriautsit anersãkut aserorsaisínaussut ússernartortait sagdloĸítaissut sianigisínaussariaĸarpait itigartitdluínardlugitdlo. ilerĸugssatigut najorĸutaĸ „sût tamarmik akuerineĸarsínaussut“ silarssuarme Djævelimit ĸunutitaussume matumane nipilerssornertainilo itinerussumik pigiliúneĸariartortitdlugo, Jehovamut nalunaiaissut, inûsugtut utorĸaunerussutdlo, aulajáinerujartortariaĸarput atâtamik ĸilangmiussup ilerĸorerĸussai sákortunerussut najorĸutaralugit inûniardlutik. — Tussiaat 119:9 — 16; 1 Juánase 5:19.
20. erinarssûtit ilerĸupilungnik imaĸarsínaussut anersâvanit inûsugtoĸ kivdligtísimagpat, suna inássutigineĸarsínauva?
20 puioĸinago nipilerssorneĸ súnîsínáussuseĸartoĸ. ũmat súnersínauvâ. erinarssûtit ilerĸupilungnik imaĸarsínaussut silamiut nuánarissaisa anersâvánit kivdligtítarpit? tauva pilertortumik iliûseĸarit ũmat pâriniardlugo. inûsugtûguvit, angajorĸâtit kristumiûssut aperĸutaussumik tamatumínga oĸaloĸatiginiákit. ãmátaoĸ ilungersortumik Jehova ĸínuvigiuk anersâminik ivdlernartumik ikiorĸuvdlutit. — ússatit 4:23; Lúkarse 11:13; Galâsiamiut 5:22-24.
21. angajorĸât kristumiûssut ĸanoĸ iliorsínáupat ĸitornatik ikiorniardlugit nipilerssoriautsit anersãkut aserorsaisínaussut ingalarĸuvdlugit?
21 angajorĸât ukorsê, ĸanoĸ iliortarpise ĸitornase ikiorniardlugit nipilerssoriautsit akuerissaussut anersãkutdlo aserorsaissut ingmíkôrssusîsigut ilisarisínaorĸuvdlugit? kristumiûgavse, tugdluásava akueriguvsiuk erinarssûtinik íngilipilugsiornermik, kinguâgssiûtitigut kángunartuliornermik, ikiarôrnartunik atuinerdlungnermik nakûsernermigdlo imaĸartûssunik tusarnârtarnigssât? tauva, oĸalugtartup nûtainik pisíngitsuse ĸitornavsilo nipilerssoriautsinut aulajangersimassunut tusarnârnigssãnut akuerssíngitsuse, pivfigssaĸ nãmagtoĸ atortarsiuk oĸalugtartup nûtaisa pûat misigssorĸârdlugo aserornartumik súnînermik imaĸarneranut malungnauteĸarnersoĸ pâsiniardlugo. erinarssûtit taigûtait oĸausertaitdlo misigssorsigik. erinarssûtit anersãkut aserorsaissûgpata, tamána ĸitornavsínut sagdlaitsumik oĸautiginiarsiuk. ersserĸigsáusínauvase kristumiut tamarmik ’ajorssutsimíkut merdlertûssariaĸartut, silaĸarssutsimíkutdle inersimassúngortariaĸardlutik’, maujungnartut ilisarssíssutiginiásángíkait erĸarsautitdlo aserorsaissut isúmamingne pigísángíkait. (1 Korintumiut 14:20) tamáko oĸaloĸatigĩssutigerêrdlugit, ĸularnángitsumik ilivse ĸitornasilo ímiússanik bîbilime ilerĸugssat nâpertordlugit ajorineĸarsínaussunik peĸaruvse erĸarumásavase, tamavse aulajangerdluse nipilerssoriautsit anersãkut aserorsaisínaussut tusarnârĸigkumanagit.
22. (a) nipilerssoriautsit anersãkut aserorsaisínaussut taimaitíkuvtigik, suna pivdlugo iluaĸutaussumik ánaissaĸásángilagut? (b) nipilerssoriautsit sût tusarnârumassavut aulajangerniarnivtíne ĸanoĸ isumaĸartariaĸarpugut?
22 nipilerssûterparujugssuaĸarpoĸ erinarssûterparujugssuaĸardlunilo bîbilime ilerĸugssat nâpertordlugit iluarineĸarsínaussunik kajumilersitsissartunigdlo, sôrdlo nâlagauvfiup erinarssûtai tusarneĸissut Jehovap nalunaiaissuisa silarssuarme tamarme nuánârutigissartagait. nipilerssoriautsit anersãkut aserorsaisínaussut taimaitíkuvtigik, iluaĸutaussumik ánaissaĸásángilagut. bîbile atuarĸigsârtardlugo kristumiutdlo atuagkiait bîbililerssârutaussut atuartardlugit sujuneĸarssuserput sungiusarsínauvarput erĸortoĸ erĸúngitsordlo ingmíkôrssusîsigut ilisariniardlugit. tauvalo erĸortoĸ átavigitigo. nipilerssorneĸarpat Gûtip ilerĸorerĸussainut iluartunut akerdliussumik, itigartísiuk. Gûtimit ajoĸersorneĸartigitse aulajaigitsilo ’avĸutíkut iluartúkut’ ingerdlajuardluse. (tugsiaut 27:11, NW) nipilerssoriautsit anersãkut aserorsaisínaussut mianerssûtigerĸigsârsigik! nipilerssûtigiumassasilo Gûtip, „nuánârutigissagssavtínik tamanik tunissingârtup“, atarĸinautigssânut pilit. — 1 Timûtiuse 6:17, NW. (wD 15/1 84)
[Qupp. 8-mi assiliartaq]
nipilerssoriautsit anersãkut aserorsaisínaussut Jehovap kivfaisa atorfigssaƙartíngilait