Gûtip kisime ilumôrtup patdlorfigingnigtai atausiussut
„[Jehova] . . . kisivit Guutiuvutit.“ — Tussiaat 86:9, 10.
1. (a) patdlorfigingningníkut atausiússuseĸ pilersíkumavdlugo Jehova sumik pilersitsiva? (b) ’nákutigissaunerup’ tamatuma suna ernĩnaĸ pilersípâ?
PATDLORFIGINGNINGNÍKUT atausiússuseĸ — ila kajungernássusia! inuitdle amerdlanerssaisa tamána misigisimángisáinarpât. taimáitoĸ, patdlorfigingningníkut atausiússuseĸ singnagtugáináungilaĸ. Gûtip sujunertarâ. ukiut 1900-t matuma sujornagut Jehova ’nákutigdlîssoĸarfe’ĸartitsivoĸ atausiússutsip — inoĸutigît ataĸatigîgdluartut asangnigtutdlo atausiússusiánut ássingussup — atulersíneĸarnigssâ sujunertaralugo. atausiússutsip ’nákutigdlîssoĸarnerup’ tamatuma autdlarĸáumîtdle pilersitâta jûtit kristumiúngorsimassut samariamiutdlo kristumiúngorsimassut ernĩnaĸ asangnigtumik peĸatigîgdlutigdlo patdlorfigingnilersípai. kingusingnerussúkut Gûtimik nalussut, tássa jûtiúngitsut, kipineĸartũngitsut ilagîngnut ilagsineĸardluarput. sule pingârnerussumik, Jehovamut Gûtimut kátutíneĸarput Jesusip tuníssutâta ajortinik matússutáussusianut ugpernertik túngavigalugo. táussumúnga píssuseĸalerput ernerit atâtamut asangnigtumut píssusiánut ássingussumik.
2. (a) ’nákutigdlîssoĸarfik’ sunauva, ĸangalo autdlartípa? (b) „ĸilangmĩtut“ atausíngortíneĸarnigssât ĸanoĸ isumaĸarpa?
2 ’nákutigdlîssoĸarfeĸarneĸ’ tamána Evfisumiunut agdlagkane 1:9, 10-me sigssuerĸússutigineĸarpoĸ, agdlagsimangmat: „iluarissane ingmine sujúnersûtigissane migssiliordlugo; uvdlut nãmagtivfigssãne [ukiume 33-me pînsip uvdluaníngãnîtdle] inoĸutigîgsoĸartitsiumavdlune [nákutigdlîssoĸarfeĸartitsiumavdlune, NW] ĸilangmĩtutdlo [tauvalo kingusingnerussúkut] nunamĩtutdlo tamaisa Kristusime atausíngortíkumavdlugit.“ „ĸilangmĩtut“, tássa inuit Kristusip nâlagauvfingmine ĸilangmĩtume ilagiumâgagssaisa, atausíngortíneĸarnerat jûtit akornánĩtune autdlartípoĸ, tugdliútumik samariamiut akornánĩtune tauvalo Gûtimik nalussut, tássa jûtiúngitsut, akornánĩtune.
3. „nunamĩtut“ atausíngortíneĸarnerata suna kingunerâ?
3 uvagut nalivtíne, ingangmik 1935-míngãnîtdle, „nunamĩtut“, tássa inuit nuname pâratîsiussume inûnermik pivdluarĸussaujumârtut, atausíngortíneĸarnerat pissarpoĸ. mána tikitdlugo inuit milliûnilíngorêrsimassut ’nákutigingningnerup’ Gûtip asangnigtumik pilersitâta ingmíkôrtua áipâ ilagsivdlugo iliûseĸarput. inuiaĸatigîngnit ássigĩngitsunigdlo oĸausilingnit tamanêrsũput. atausíngûtigíngilât inuit ugperissarigaluamingnik ilerĸorigaluamingnigdlo aulajangiússiuartut timíkut katerssũnerat. akerdlianigdle, sôrdlo Isaia 2:3-me sujuligtûtigineĸarsimassoĸ, Jehovap avĸutigerĸussai ilíniarpait ’táussuma avĸusernisigut’ ingerdlasínaorĸuvdlutik.
4. (a) patdlorfigingningníkut atausiússuseĸ kîsa ĸanoĸ angnertutigísava, bîbilimilo tamána ĸanoĸ agdlautigineĸarpa? (b) inârutaussumik misilingneĸarêrnermíkut, inuit nãmagdluínartúngorsagaussut Jehovamut ĸanoĸ píssuseĸásápat?
4 uvdlumíkutdle angumerissarput tássáungilaĸ tamákîssumik atausíngortíneĸarnera. Gûtip sujunertarigâ ĸularutigssáungilaĸ píngortitat silagdlit tamarmik erĸortumik gûtisiornerme atausíngorumârtut. píssutsinik nuáningârtunik Kristusip ukiune tûsintilingne nâlagaunerata nâlernerane atũkumârtugssanik apustile Johannes sujumut takussaĸartíneĸarpoĸ, tauvalo táussuma sarĸúmersitat 5:13-ime agdlautigâ: „píngortitatdlo tamaisa ĸilangmilo nunamilo nunavdlo atâne ítut ímamĩtutdlo táukualo ilulê tamaisa tusarpáka oĸartut: igsiavíssârssuarme igsiassup [tássa: Jehovap] savârĸavdlo pivdluarĸússut atarĸinautdlo nâlangnautdlo píssaunerssuardlo pigait nâgssáungitdluínartumik.“ Johannesip tássane takuvai Jehovamik patdlorfigingningníkut Jesus Kristusime atausíngorsimassut tamaisa. tamatuma kingornagut, inârutaussumik misilingneĸarêrpata, misilingneĸarníkutdlo pikigtitsissut tamarmik piunêrúneĸarêrpata, inuit ilumôrnermingnik takutitsissut nãmagdluínartúngorsagaussutdlo tamaisa Jehovap Kristusime asangnigtumik ernersiariumârpai. Gûtip ĸilangme nunamilo ilaĸutarîgsainut atausíngorsimassunut ilaussortángorumârput, táukulo tamarmik Jehova nâgssáungitsumik kisiat Gûtigísavât, kisiat oĸartugssaussutut Nâlagarísavât asangnigtûssordlo atâtagísavdlugo. ila ĸilanârtûtip tamatuma ũmatíkut kíssâtdlangnássusia! ivdlit kigsautigingârpiuk ilaĸutarîngnut pivdluartunut patdlorfigingnigtûssunut táukunúnga ilaunigssat? — Rûmamiut 8:20, 21.
’ivdlit kisivit Gûtiuvutit’
5, 6. Tussiaatit 86-iáne patdlorfigissarput pivdlugo David ĸanoĸ agdlagpa?
5 Tussiaatit 86-iat nâvdlugo misigssoruvtigo pâsiartúsavarput ĸanoĸ iliûseĸartariaĸarnigssarput pivdluarĸussaoĸataujumaguvta. David, Gûtip súnîneratigut isumagssarsisitauvdlune tugsiáumik tamatumínga tugsiausiortoĸ erĸortumik patdlorfigingningníkut ilumôrnerminik takutitserêrsimavoĸ. pâsivâle nangmineĸ anersãkut sujumukartuartariaĸardlune, erĸarsautdlo tamána agdlagâne ersserpoĸ.
6 versine 8-10-me Davidip patdlorfigissane erĸartorneruvâ, oĸardlune: „Guutini ilittut ittoqanngilaq, [Jehova], suliatillu assissaqanngillat. Inuit pinngortitavit tamarmik ornissavaatsit pallorfigalutillu, [Jehova], aqqillu ataqqissavaat. Illimmi angingaarputit tupinnartuliortarlutillu, kisivit Guutiuvutit.“
7. Jehova kisime Gûtiussoĸ akuerísavdlugo sôĸ taima pingârtigâ?
7 Davidip uvdluine, sôrdlútaoĸ uvagut uvdluvtíne, inuiaĸatigît gûterpagssuaĸarput. ilumôrtumigdle pingârtitsivdlune David Jehovamut oĸarpoĸ: „kisivit Guutiuvutit.“ ajoĸersût ilumôrtoĸ táunaussoĸ Jesus Kristusip ersserĸigsarpâ. toĸunigssane aĸagútoĸ únúkut atâtane ĸínuvigâ, taivdlugo ’kisime ilumut Gûtiussoĸ’. (Juánase 17:3) kristumiûneraĸatigîngnutdle atassut Gûte atausiuvdlunilo pingasûssoĸ patdlorfigât, inuit milliûniligpagssuit inûssaliat sêrĸumiardlutik patdlorfigissarpait; avdlatdlo inuit nuimanerussut, aningaussat, nangmingneĸ atoĸatigingningnerdlo Gûtimut taorsiutdlugo sualugtumik nuánarissarpait. ivdlíme? ivdlit nangmineĸ ĸularnatit isumaĸarpit ’Jehovatut ítoĸángitsoĸ’, táuna ’kisime Gûtiussoĸ’?
8. sôrdlo Tussiaat 86:11-me takutitsiarneĸartoĸ, Jehovamik patdlorfigingnigkumassut tamarmik ĸanoĸ piumavfigineĸarpat?
8 sujunigssamut ĸiviardlune inuit inuiaĸatigîngnit tamanêrsut Jehovamik kivfartũssiartortut Davidip takordlôrpai. Davidip nalúngínguatsiarpâ inuit taimáitut Jehovamik patdlorfigingnigkiartorunik amerdlasûnik ilíniagagssaĸarumârtut. inôriausertik avdlángortitsivfigissariaĸásavât. piviussumigdle pingârtitsissûgame Davidip pâsivâ nangmineĸ ajoĸersorneĸartariaĸardlune nangminerdlo ássigĩngitsut avdlángortitsivfigissariaĸardlugit. Tussiaat 86:11-me oĸarpoĸ: „Ajoqersunnga [Jehova] aqqutigisannik, saqisinnaaqqullunga sallusuissutinni, uummatiga saatsiguk ataasiinnarmut matumunnga: Aterpit mianerineqarnissaanut.“ ivdlítaoĸ tamána kigsautigaiuk?
9. suna píssutigalugo uvagut inuiagtut atausioĸatigîgpugut, tamánalo erĸarsautigalugo sumik akissugssauvfeĸarpugut?
9 Jehovap nalunaiaissuisa akornáne atausiússuseĸ atûtilerêrsoĸ naleĸángilaĸ. tamána anguneĸarsínausimavoĸ atautsimut issigaluta uvagut ilumôrtumik Daviditut isumaĸaravta — Jehovamit sujulerssorneĸartípugut únersũssinerilo nâpertordlugit iliûseĸartardluta. ãmátaoĸ atausiússuseĸ tamána agdlisarumásavarput periautsivtigut iliûtsivtigutdlo. tauvalo atausiússuserput pârisínauvarput inuitdlo avdlat tamatumúnga peĸatauvfigitíniarsínauvdlugit soĸutigingnigtut pilerdlât atausíngûtigissavtínik ássigĩngitsunik pingârtitsilersíniardlugit.
atausíngûtigssat kimigtût
10. atausíngûtivta suna sujugdlersarât?
10 atausíngût sujugdleĸ tássauvoĸ: tamavta Jehova patdlorfigârput sunalo ajúngitsûssoĸ sunalo ajortûssoĸ pivdlugit táussuma najorĸutagssiorsínautitaunera akueralugo. (sarĸúmersitat 14:6, 7; 1 Môrsase 2:16, 17) Jehovap ínugtainut silarssuarme tamarme ítunut tamatuma ila nuáningârtumik súniuteĸarsimássusia! Jehova tássauvoĸ, sôrdlo bîbilime agdlagsimassoĸ, „ĸutsigsoĸ angneruvsârtoĸ, soraiuitsumik ineĸartoĸ ivdlernartumigdlo atilik“. (Isaia 57:15) táuna patdlorfigigavtigo najorĸutagssiailo maleruarĸigsârdlugit pitsaunerulersitaussutut ítúngortaraugut. najorĸutagssatdlo tamáko nunarssuarme tamarme atortûngmata, tamákunínga maleruainiarnerput inuiagtut atausíngûtigârput.
11. ĸanoĸ ilivdluta pilerdlât ikiorsínauvavut atausiússuseĸ tamána atulerĸuvdlugo?
11 ilâtigutdle ilavut ilerĸordlugtúngulersarput. suna píssutausínaussarpa? Gûtimut píssusertik pivdlugo aperssorneĸarângamik, oĸartoĸartarpoĸ: ’Gûte piviussutut isumaĸarfigingínavko.’ taimáitumik piumassailũnît piviussutut isumaĸarfigíngilait. inuit atuarĸigsâĸatigissartagkavut ikiorsínauvavut Gûte piviussutut isumaĸarfigerĸuvdlugo? ersserĸigsáutariaĸarpavut erĸortumik patdlorfigingningneĸ tássáináungitsoĸ ajoĸersûtinik aulajangersimassunik ugperissaĸalerneĸ, atautsimĩtarfingmut rigssalimut atautsimîgiartarneĸ ilâtigutdlo nalunaeĸútap akúnerpâlúngue atordlugit oĸalũssiartorneĸ. Jehovamik kivfartũssiumassut ĸanimut ĸamángavigdlo pissumik Gûtimut píssuseĸartariaĸarput. sungiútariaĸarpât nangmingnêrdlutik akulikitsumigdlo táussumúnga ĸinussarnigssaĸ, ĸanoĸ iliorniarângamik táuna ajoĸersortigalugo. (Filípimiut 4:6; ússatit 3:5, 6) taimailiorunik aitsât atausiússuseĸ nuáningârtoĸ atugarput nangmingneĸ atulerumârpât.
12, 13. (a) atausíngûtit tamatumûna taineĸartut áipât ĸanoĸ atausíngûtigârput? (b) tamána iluaĸutigivdluarniardlugo, inuk ĸanoĸ iliortariaĸásava?
12 áipâ tássa: atausíngûtigârput silarssuarme sumĩkaluaruvtalũnît Gûtip oĸausia, bîbile, únersũssissorigavtigo. bîbilip Gûtip súnîneratigut isumagssarsiarititaunera akuerârput, ilaussortaussugutdlo amerdlaĸissugut Jehovap nalunaiaissuine kajungernartíparput nalunaiaissut bîbile tamatigut átavigingmássuk. — 2 Timûtiuse 3:16, 17.
13 atuarĸigsâĸatigissartagkavta ímaĸa isumaĸatigâtigut oĸaravta bîbile Gûtip oĸauserigâ. bîbilivdle ilâ ĸanoĸ angitigissoĸ atuarêrsimanerpât? iluaĸutáusaoĸ tamaisa ingmíkut kajumigsãsavdlugit bîbile tamât atuarĸuvdlugo, atuartitdlugulo misigssorĸigsârĸuvdlugo bîbilip oĸausîsa uvdluínarne inûnerme aulajangigagssáinut ĸanoĸ súniuteĸartugssaunera. atâtame perĸussâ ima ilisimavdluartigigamiuk imalo ititigissumik isúmaminut ũmatiminutdlo íkúsimagamiuk Jesus oĸarsínausimavoĸ: ’táussuma iluarissânik pissarsínarpunga.’ (Juánase 8:29) tamána tamavtínut anguniagauvoĸ pitsaungârtoĸ!
14. atausíngûtit pingajuat uvane erĸartorneĸartoĸ suna pivdlugo pingângârpa, ĸanordlo iliorsínauvugut pilerdlât tamatumínga pingârtitsinerulersíniardlugit?
14 pingajuánik atausíngûtigârput tamavta anersãkut inũssutigssarsiarititaussoĸ táuna iluaĸutigigavtigo. „kivfaĸ ilumôrdlunilo silatôĸ“ pivfigssaĸ erĸortoĸ nagdliútarângat anersãkut inũssutigssaĸartitsinermut Jehovap sákugigâ akuerârput. (Matîuse 24:45-47, NW) ĸularíngivigparput ’kivfap’ táussuma ilagigai nâlagauvfingmik ĸilangmĩtumik kingornússissugssat anersâmit tanitaussut uvdlumíkut Jehovap nalunaiaissuínainĩtut. ’kivfap’ táussuma sujulerssuissoĸatigîgsortaisalo uvagut anersãkut pissariaĸartitavut matuniardlugit iliûserissartagait tamaisa ĸujássutigalugit pingârtípavut. Gûtilo ĸutsavigârput anersãkut inũssutigssanik pilersugauvdluaravta. (Isaia 65:13, 14) tauvalo pivfigssaĸ nãmagtoĸ atortarnerparput inuit ilagîngnut ilánguterĸámersut ârĸigssugaunermik tamatumínga pingârtitsilersíniardlugit?
15, 16. (a) kina sujulerssortigârput? (b) patdlorfigingningnivtíne Jesusip inigssisimaneranik pingârtitsinerup ingmivtínut ĸanoĸ isumaĸalersísínauvâtigut?
15 atausíngûtit sisamât pingârtordlo tássauvoĸ: inũngitsoĸ kisiáne Jesus Kristus sujulerssortigigigput táunáinardlo avĸutigalugo tamavta patdlorfigingningníkut Jehovamut patdligútartugut. nuname inûnermine sapâtip akúnerane kingugdlerme tamatuma pingâruteĸarnera Jesusip ersserĸigsarpâ. Matîuse 23:8, 10-me oĸarpoĸ: „tasíssersuissunigdlo taerĸúsángilase, atauseĸ tasíssersortigigavsiuk, Kristuse.“ uvdlumíkut, inûp Jehovap nalunaiaissuisa ilât silarssuarme sumilũnît aperísagaluaruniuk: ’kina sujulerssortigaisiuk?’ avdláungitsumik akineĸásaoĸ: ’Nâlagaĸ Jesus Kristus.’
16 Jesusíkuínaĸ patdlorfigingnigdluta akuerineĸarsínaussumik Jehovamut patdligúsínauvugut. suna pivdlugo? tamavtame ajorte inúngûtigârput, toĸussugssángordluta. tamatumûna ardlarputdlũnît inoĸatiminit avdláussuteĸángilaĸ. Jesus Kristusip pigdliutânut ugpernerput tunârĩnardlugo tamavta Gûtip kivfaisut akuerineĸarpugut, táussumûnákuínardlo tamavta ĸinuníkut Jehovamut patdligúsínauvugut. tamatumínga ĸamángavik pingârtitsineĸ erĸortumik patdlorfigingningnermut pingârtorujugssûvoĸ. — Rûmamiut 3:23; Juánase 14:6.
17. Gûtip nâlagauvfianik isumaĸarnerput kristumiûneraĸatigîngnit ĸanoĸ avdláussutigârput Jehovamutdle nalunaiaissutut ingmivtínut ĸanigdlinerússutigalugo?
17 atausíngûtigissavta tatdlimât tássauvoĸ: sume najugaĸaraluaruvtalũnît Gûtip nâlagauvfia inuiait neriûtigssatuãtut ugperfigigigput. (Matîuse 6:9, 10; Dâniale 2:44) kristumiûneraĸatigît palasertait taimailiúngitdlat. taimáitumik silap matuma nâlagkersuiníkut soĸutigissainut akuliúput sorssũnerinutdlo peĸataussardlutik. táukunánga avdlauvdluínardlutik Jehovap nalunaiaissuisa nunane tamanĩtut ũmámiuliúpait Jesus Kristusip oĸausê, oĸarmat ajoĸersugkane ’silarssûp inuisa ilagísángíkait’. (Juánase 17:15, 16) Gûtip oĸausia najorĸutaralugo pánavut sagfiorpavut agssatdlagterutip savigsángordlugit ĸalugiussavutdlo ivigkanut kivdlûtigssángordlugit. inoĸativut sákunik piviussunik silugfigissaríngilavut, sorssungnermigdlo ilíniásángilagut kingorna. (Migga 4:3) ĸularíngivigparput inuiait ajornartorsiutáinut ârĸĩssutigssatuaĸ tássaussoĸ Gûtip nâlagauvfia. tamatuma kingunerissâtut nalunaiaissoĸativut silarssuarme tamarmĩtut inuiaĸatigîngnit tamanêrsut ĸatángutigîgtut peĸatigîngníkut atausioĸatigâvut.
18. Gûtip anersâvata inerititai ĸanoĸ atausíngûtigâvut ássersûtit táikit.
18 atausiússutsivtínut píssutaussut arfinilerât inerititat Gûtip anersâvata ivdlernartup Jehovamik patdlorfigingnigtut inûneráne ineriartortitarissai. inerititatdlo kajungernangâramik! — peĸatigîgkuminartitsivdlutigdlo nâpeĸatigîgkuminartitsigamik! kúkunivut tamavta ingmíkut anigorniardlugit norĸáissutigissariaĸagkavut akornutiginagit, Jesusip oĸausê uko ilumôrput: „matumánga tamarmik ilisarísavâse ajoĸersugarigivse: asaĸatigîgkuvse.“ — Juánase 13:35; Galâsiamiut 5:22, 23.
19. kristumiutut oĸalũsseĸataunivtigut kina atausioĸatigârput?
19 taineĸarêrsunut tamanut arfineĸ áipât ilángúneĸarsínauvoĸ: Jehovamut nalunaiaissûgavta tamavta akissugssauvfigârput Gûtip nâlagauvfianik tusagagssaĸ nuánersoĸ oĸalũssíssutigísavdlugo. tamána akissugssauvfiuvoĸ, ãmátaordle ingmíkut akuerissauneruvdlune. sôrdlo apustile Paulusip navsuiarâ, oĸalũssissarnermut kristumiut kivfartûtigissãnut peĸataunivtigut Gûtip suleĸatigâvtigut. ilavut nautsîagssanik íkússuissaraut, ilavutdlo imerterissaraut, Jehovale naujartortitsissûvoĸ, taimailivdlune ajoĸersugángortitsissardlune. — Matîuse 24:14; 1 Korintumiut 3:6-9.
erĸortumik patdlorfigingningneĸ aulajangiúsiuk
20. (a) rigssalimut atautsimîgiartartut ilaisa suna pivdlugo atausiussumik patdlorfigingningnerup pivdluarnartue iluaĸutigivdluartaríngilait? (b) Jehova iligísavdlugo mãnákorpiaĸ piviussumik iliûseĸalernigssât suna pivdlugo pissariaĸardluínarpa?
20 Jehovap nalunaiaissuinut ilánguterĸámersut nangmingneĸ ajoĸersûtit ilumôrtut atausíngûtigissavut ilagsiartortitdlugit nâpertordlugitdlo iliûseĸariartortitdlutik, táukuátaoĸ nuánârutigilersínáusavât Gûtimik kisime ilumôrtumik ârĸiagîngníkut patdlorfigingneĸatauneĸ. ilaisale sagdlusuíssúmik ĸarssupĩnartumik ilisarssinek nãmagât. Gûtip nâlagauvfiata pivdluarĸússutigssai ilâtiguínaĸ ilíniarpait, sagdlusuíssutdle ũmatimingnut sordlanigtínago. nâpeĸatigiumassarpâtigut, oĸarumángitdlatdle Jehovap iliûsererĸussai tamatigut iliûseriniardlugit. ilâtigut ássigait inuit ilait pruvfîte Eliasip nalâne inûssut, táuko Eliasip sukangnersumik oĸarfigingmagit: „ĸanoĸ sivisutigissumik igdlugtut tusiásavise? [Jehova] Gûtiugpat maligsiuk, Bâlile Gûtiugpat maligsiuk.“ (1 kúngit 18:21) ârĸigssũssauneĸ ajortoĸ mãnákut atũtoĸ aserúsavdlugo pivfigssaĸ aulajangersimassane nagdlerpat, Jehova nangãsángilaĸ. pivfigssaĸ aulajangerîgkane kinguartínaviángilâ, maligagssianilo avdlángortínaviángilai silarssuarmut najúmagterniáinartut, Gûtip perĸussânik iláinaussumik ilíniarniartut nãmagsingningniartutdlo iluaĸutipalâgssãnut. pingârtorujugssûvoĸ tauva sagdlusuíssúmik soĸutigingnigtut tamarmik mãnákorpiaĸ iliûseĸalernigssât Jehovamut piviussumik atauartugssaussumigdlo píssuseĸarniarnigssamingnut!
21. bîbilimik atuarĸigsâĸatigissartagkavut ĸanoĸ sujumukarnigssãnut ikiortariaĸarpavut?
21 kuisínigssamut ilíniartut atuaĸatigalugit kigsautigârput ajoĸersûtit ilumôrtut túngaviussuínait pínagit atuarĸigsâĸatigĩssutigiumavdlugit, ãmátaordle ikiorumavavut kristumiutut inersimavdluarnigssamut ingerdlarĸerĸuvdlugit. tamatuma ilagâ anersãkut inũssutigssanik imerpalassuínáungitsunik nererusungnerulerniarnigssât. sungiútariaĸarpât anersãkut inũssutigssat imerpalassuínáungitsut ĸanoĸ kajungerisínauvdlugit, ĸanoĸ nakússagtíssutigisínauvdlugit, ãmalo ĸanoĸ pâsíssutigisínauvdlugit nangminerissamut túngassutigut silatûmik aulajangîniarnermingne. — Eprîarit 5:12-14.
22. suna pivdlugo oĸalũssissartutut kivfartûteĸarneĸ nuáningâvigsumik ingmíkut akuerssíssutauva?
22 nuáningârtumik ingmíkut akuerssíssutigârput inuit inuiaĸatigîngnit tamanêrsut Jesus Kristus avĸutigalugo ingmingnut atausíngortitaunigssãnut Jehovap ârĸigssũssinera iluaĸutigisínaugavtigo nâpertordlugulo kivfartûteĸarsínaugavta! Gûtip kisime ilumôrtup ingmíkut akuerssíssutigitípâtigut aterminut ivdlernartumut Jehovamut nalunaiaissûnermik. ernera asangâgaĸ, mãna kúngitut nâlagaussoĸ, ĸanga mãnalo maligagssarârput patdlorfigingningnivtíne Jehovamut ĸanimut ĸamángavigdlo pissumik píssuseĸarnartûssume ingmivtínutdlo atausioĸatigîngnivtíne. taimáitumik sapíngisarput tamákerdlugo Jehovap arĸanik nâlangnarsisitseĸatausa inuitdlo avdlat ikioriartigik pâsitíniardlugit pivdluarĸússutigssat Gûtimik kisime ilumôrtumik patdlorfigingningníkut atausioĸatigîgsut kisimik iluaĸutigivdluarsínaussait ĸanoĸ ilivdlutik iluaĸutigivdluarsínáusagait. (wD 1/5 84)
aperĸutit uterĸitagssat
□ patdlorfigingningníkut atausiússuseĸ kîsa ĸanoĸ angnertutigiumãsava, tamánalo uvavtínut ĸanoĸ pingâruteĸásava?
□ erĸarsautit Tussiaat 86:11-me agdlagsimassut uvagútaoĸ erĸarsautigigivut ĸanoĸ erssersísínauvarput?
□ atausíngûtigissavta kimigtût ilait táikit.
□ bîbilime ajoĸersûtit ilumôrtut túngaviussut ajoĸersorneĸautigerêrmatigik, bîbilimik atuarĸigsârtut pilerdlât sutigut sujumukartuarnigssãnut ikiortariaĸarpavut?
[Qupp. 8-mi assiliartaq]
’Jehova, ivdlit kisivit Gûtiuvutit’