Naalagaaffimmik oqaluussissutiginninnermit nutaarsiassat
Australiami Naalakkap ’savaataanik allanik’ katersuineq
’Akimanngitsut tamaasa aalangaartikkumaarpakka, taavalu nalliussapput akimanngitsut tamarmik kajungernarisaat,’ pruffiiti Haggaj allassimavoq ukiut 2500-it sinnerlugit matuma siornagut. (Haggaj 2:7) Ullutsinni inuiaqatigiit erlinnartortaat, tassa inuit peqqusersuitsumik isumallit, Jehovap pallorfigineqarfianut takkussuuttuarput. Naleqarluassusialli isikkumikkut ilaatigut erseqqaartarinngilaq, soorlu Australiami pisimasumit matumannga paasineqarsinnaasoq:
□ Sapaatit ilaanni, qatanngut angut biilerluni ataatsimiigiarami, siornatigut iliorsimanngisaannakkaminik iliorpoq — unippoq akeqanngitsumik biilinut ilaaffissarsiortoq ikeqqullugu. Qatanngutip naluaa suna pillugu taamaaliorluni, angummi inuusuttoq taanna umittuummat, takisuunik nujaliummat, illaarsimanngimmat atisarlullunilu, biilimullu ilaaffissarsiornerminut kullormigut ussersunngilarluunniit. Tassanngaannarli qatanngut isummerpoq unittariaqarluni angullu inuusuttoq taanna ilaatittariaqarlugu. Biilimut ikigami oqarpoq: „Naalagiariartorputit, ilaa?“ Tupaallalluni qatanngut akivoq: „Suu — rigssaliliarpunga.“ „Ilaginiarpakkit,“ angut inuusuttoq oqarpoq.
Qanoq isikkoqarnera pissutigalugu qatanngutip misilikkaluarpaa ilaaqqunagu. Angutilli inuusuttup ilaarusunnini aalajangiuppaa, pisimasanilu oqaluttuarilerlugit: 16-inik ukioqarami ilaquttani qimassimavai, taamanerniilli ikiaroornartunik atornerlueqalunilu inuunerluppoq. Sissami sioqqat ippinnguussimasut tunuanni plasticimineq qaliaralugu angerlarsimaffigaa. Tassani najugaqartilluni inuunerup siunertaa eqqarsaatiginerulerpaa. Inooriaatsini ippigaa, taamaattumik Guuti qinnuigaa ikioqqulluni. Oqarpoq Guuti oqarfigisimallugu aqqusinersuup tungaanukarniarluni, taavalu Guuti qinnuigisimallugu arlaat siuleqqoqqullugu ilageqqulluni ilagiinnullu eqqortunut ingerlateqqulluni. Avinngarusimasumiikkami aqqusineq taanna qaqutigoortumik ingerlavigineqartarpoq. Nalunaaquttap akunnerisa arlallit ingerlanerisigut biilit pingasut taamaallaat aqqusaarsimapput, ilaalluunniillu unissimanngilaq ilaatinniarlugu. Taamaatingajapporlu qatanngutitta naammattoormani ilaatillugulu.
Sapaatip akunnerani tulliani ataatsimiinnerit tamaasa najuuffigai isikkorissartalerlunilu. Sanningasulillu ujammigisarigaluani atorunnaarpaa. Aalajangerpoq Tasmaniamut angerlamut aallassaalluni, tassanilu qaammat ataaseq atorpaa Bibelimi atuarluni qinusarlunilu. Paasileramiuk siumukartuassaguni nammineerluni ikiorneqartariaqarluni, Vagttårnip peqatigiiffiata Australiami immikkoortortaqarfianut saaffiginnippoq. Pionerit ilaasa atuaqqissaaqatigisalerpaat, siumukarasuarporlu. Sallusuissut Bibelimiittoq ilisarileramiuk inuunerup siunertaa paasilerpaa siunissamullu neriuutissarsilluni. (ússatit 10:28) Qaammatit arfineq-marluk qaangiummata kuisippoq pionerinngorlunilu ikiortaasoq. Maanna Sydneymi pioneriuvoq nalinginnaasoq.
□ Qanoq iliuutsitigut Bibelimi najoqqutassiarineqartut aalajangiukkutsigit ’Guutip annaassisitta ajoqersuutaa naalannarsisinniarsinnaavarput’. (Títuse 2:10) Tamanna misigisimasamit matumannga paasineqarsinnaavoq: Suliffissuarmi qatanngutip suliffigisaani sulisut sulisitsisullu isumaqatigiikkunnaarput. Sulisartut peqatigiiffiata tungaaninngaanniit sulisut tamarmik dollarimik ataatsimik akileeqquneqarput isumaqatigiikkunnaarnerup ingerlanneqarnerata taperserneqarnissaanut. Qatanngut taanna akiliiumanngimmat sulisartut sinniisuata sioorasaarpaa soraarsitaanissaanik. Qatanngutip nassuiarpaa tarnimigut ilerasuuteqarnaveersaarami eqqissiviilliornerit aaqqissorneqartut taperserumanagit. Sulisartut sinniisuata nalunaaquttap akunneranik ataatsimik eqqarsarfissaqartippaa.
Taava qatanngutip suleqataasa illaruaatigilerpaat. Nassuiaappai akiliiumannginnami dollari ataaseq apeqqutaanngitsoq, pissutigaali isumaqatigiikkunnaarnermut peqataasut ilaat aallaasilersormata anaatalersormatalu, tapersissagaluarunigilli ikilertittoqassagaluarpat toqutaasoqassagaluarpalluunniit aammik kuiseqataasinnaanini. Suleqataasa ilaat oqarpoq patsisigisaq tamanna aatsaat tusarlugu aammalu ilisarsiumalluni. Kingornatigut qatanngutip angut taanna Bibelimik atuaqqissaaqatigilersimavaa. Naak nuliaminit assortorneqaraluarluni angut taanna ataatsimiinnernut najuuttalerpoq. Maanna tunniulluinnarsimalluni kuisillunilu qatanngutaavoq. Sulisartut sinniisuata qatanngut apersoqqinngilaa.
Guutimik asannittut naapertuilluarnermillu nuannarisaqartut qularnanngitsumik sukkut arlaatigut sallusuissummik ilisaritinneqassapput ilassissallutillu. Jesus oqarsimavoq: ’Allanillu savaateqarpunga . . .; taakkuttaaq aggiussassaraakka, nipigalu tusassavaat.’ (Juánase 10:16) Australiami ’savat allat’ 42.000-init amerlanerusut Paarsisup Ajunngitsup nipaa tusareersimavaat; ullullu tamaasa aamma suli Jesusip talerpiata tungaaniittunut taassumalu iluarisaanut ilanngunneqartarput. — Matîuse 25:31-34. (wD 1/4 86)
[Qupp. 14-mi issuagaq]
Ileqqorissaarluta ’Guutip annaassisitta ajoqersuutaa naalannarsisinniarsinnaavarput’