Jehovap oqaasianik nuannarisaqarneq
„Pilluarpoq . . . [Jehovap] inatsisaanik nuannarisaqartoq.“ — TUSSIAAT 1:1, 2.
1. Kikkut Jehovap ’saqqummersitai’ inunnut allanut ajoqersuutigissallugit toqqagaappat?
’SAQQUMMERSITAT’ annannissatsinnut pingaaruteqaqimmata, Jehovap kiffami ilaat akisussaaffeqartut toqqartarpai sallusuissummik saqqummersitaasumik allanik ajoqersueqqullugit. (5 Môrsase 29:29) Israelikkunni palasit Levikkullu tamanna isumagisarpaat. (3 Môrsase 10:8-11; 2 nalunaerssûtigdlit 35:3) Aamma Israelikkunni angajoqqaasut qitornatik ajoqersortarpaat. (5 Môrsase 11:19; ússatit 6:20) Ukiunik naatsorsuisarnitta aallartinnerata kingornagut (u.n.a.k.) ukiuni hundredilinni siullerni kristumiut tanitaasut ilagiissaanni utoqqaanertanngortitat ajoqersuisuupput, angajoqqaallu kristumiuusut kaammattorneqarput qitornatik ajoqersoqqullugit. (Evfisumiut 6:4; 1 Timûtiuse 3:2; 2 Timûtiuse 2:2) Aamma kristumiut tamarmik immikkut akisussaassusermik tunineqarput Jehovap saqqummersitaasa inunnit suli ilagiit kristumiut avataanniittunit ilisimaneqalernissaannut. — apustilit suliait 1:8.
2. Inunnit allanit Guutip oqaasianik ajoqersorneqarnissarput naammagissavarput?
2 Inunnilli allanit Guutip oqaasianik ajoqersorneqarnissarput naammagissavarput? Naagga. Jehovap ’saqqummersitai’ atuaqqissaartassallugit tamatta immikkut akisussaaffeqarpugut. Taamaammat tussiaasiortup Israelikkoqatini allaffigai: „Pilluarpoq . . . [Jehovap] inatsisaanik nuannarisaqartoq inatsisaalu eqqarsaatigalugit ullukkullu unnuakkullu.“ (Tussiaat 1:1, 2) Aamma apustili Peterip pallorfiginneqatini kaammattorpai allakkami: ’Inoorlaannguatut immuk piviusoq oqaasiusoq kajungerisiuk, tamatumuuna annannissamut alliartoqqullusi.’ — 1 Pîtruse 2:2.
3. Inuit ilarpassuisa atuaqqissaarneq eqiagigamikku, suna pisariaqartippaat?
3 Illit Bibelimik atuaqqissaarneq qanoq isumaqarfigaajuk? Kristumiut ataatsimiititsineri najuuffigisarukkit Bibeli tunngavigalugu oqalugiaatit soqutiginaqisut amerlasuut tusarnaartarunarpatit. Aamma ’sallusuissummi perorsagaaguit’, soorlu ilaat taama oqartartut, qularnanngitsumik angajoqqaavit Jehovap ’saqqummersitaasa’ ilarpassuinik ajoqersorsimassavaatsit. Tamakkuali saniatigut nammineerlutit Bibeli atuaqqissaartarpiuk? Tussiaasiortup nammineerluni atuaqqissaarneq nuannarinnguatsiarpaa, immaqali illit artorsaatigaat. Nammineerlutit atuaqqissaarniarneq artorsaatigigukku, illit kisivit taamaanngilatit. Peterip isumassarsisinneqarluni uppeqatini kaammattormagit ’oqaaseq kajungereqqullugu’ ilimanarpoq inuit ilaasa namminneerlutik atuaqqissaarniarneq imaannaanngitsutut isigissagaat. Atuaqqissaarnermilli kajungerinninneq sungiunneqarsinnaavoq. Qanoq ililluni?
4. Suna assersuutigigutsigu takutinneqassava nammineerluni atuaqqissaarneq kajungernarsisinneqarsinnaasoq?
4 Oqarta peqquneqartutit assaallutit itisuumik itersalioqqullutit. Timikkut assoroorneq nuannarivallaanngikkukku, itersaliornissaq kajungerinavianngilat. Oqartali oqarfigineqartutit illerfik erlinnartuusivik issumi toqqugaasoq. Tamanna nalunnginnakku assaanerit erloqinartutut isumaqarfiginavianngilat! Immaqaluunniit pissanganartutut isumaqarfigissavat, erlinnartuusivimmik nassaarnissat pissangagigakku! Aamma atuaqqissaarneq taamaappoq: Naak atuaqqissaarneq kajumigivallaanngikkaluarit, eqqortumik isumaqarfigigukku soqutiginartutut, allaallu pissanganartutut, issinnaavoq. Eqqortumiilu isumaqarfiginninneq ineriartortinneqarsinnaavoq.
Eqqortumik isumaqarfiginninneq ineriartortinniarlugu
5, 6. Jehovap oqaasiisigut saqqummersitaasutigut pilluaqqussutinik asseqanngitsunik pisinnaasatsinnik taasaqarit.
5 Siullermik pingaarnerusumillu: Bibelip erlinnartuussusia eqqarsaatigiuaannartariaqarparput. Apustili Paulus nillerpoq: ’Ata, Guutip pisuussusiata ilisimaneratalu ilisarsineratalu itissusiat!’ (Rûmamiut 11:33) Jehovap siunertai, ukiut tuusintillit ingerlanerisigut saqqummersinneqariartortut, mianernangaarput, neriuutissiippullu neriugisamik nuanningaartumik tutsuviginartumillu. Inooriaatsimut unnersuussutit Jehovap Bibelimut allanneqartitai maleruarneqaraangamik iluatsitsinngitsoorneq ajorput. (2 Timûtiuse 3:16) Tupinnanngilaq taava tussiaasiortoq erinarsorluni oqarmat: „Oqaatsisit nassuiarneqarunik qaammaqqutaassapput paasisakitsumillu siuneqalersitsissallutik.“ — Tussiaat 119:130.
6 Aamma, Bibeli Guutip eqqarsaataanik imaqarpoq, eqqarsaatillu tamakku ummammiuliukkutsigit Guutimut qanillattorsinnaavugut. (Jâko 4:8) Peqquneqarpugullu inuit allat Jesusimut ajoqersuganngorteqqullugit. (Matîuse 28:19, 20) Ajoqersuganngortitsiniarnitsinni Bibeli pingaarnerusumik sakkugigatsigu, taanna atorluarsinnaassagutsigu atuaqqissaartariaqarparput. (Evfisumiut 6:17; 2 Timûtiuse 2:15) Kiisalu, eqqarsaatinik Bibelimeersunik isummavut immersimappata tamanna illersuutissaassaaq, pissatsissutigissagatsigu assuarnaalluta saqinitsinni, uppernikillinartunillu qularuteqarnaveerutigissagatsigu kukkusunillu uppernermik aserorterisunik isumaqarnaveerutigissallugu. — ússatit 4:5, 6; 20:7; Filípimiut 4:8.
7, 8. ’Saqqummersinneqartut’ eqqarsaatigalugit suna pillugu uagut ullumikkut inuusugut Guutip kiffaanit qanga inuusimasunit pilluaqqusaaneruvugut?
7 Eqqarsaatigeriaruttaaq ullumikkut uagut ’iluartut tamaasa ilagalugit siunersisinnaanngoratsigit sallusuissutip silissusia takissusialu itissusialu kingissusialu’, ima annertutigisumik Guutip kiffaasa siornatigut sapersimasaannik. (Evfisumiut 3:14-18) Eqqaamaniarulli Abrahamip illoqarfik inunngorfigisani qimakkaa inuuninilu naallugu tupermiuulluni, uffa Guutip neriorsuutaasa eqquunnissaat angumerinngikkaluarlugu. (Eprîarit 11:8-10) Aamma Danielip takorluukkersaarutiminik paasitinneqarnissani ilungersorluni qinnutigigaluarpaa, oqarfigineqarporli: ’Oqaatsit mattussaallutik naqissusersimapput naggatissaq [naggatissap nalaa, NW] nalliutserlugu.’ (Dâniale 12:8, 9) Kinguaassaq Abrahamip qilanaarutigisimasaa matuma siunerujussuatigut takkutereersimavoq. Uagut „naggatissap nalaa“ni inuuvugut, Danielip takorluukkersaarutaasa ilarpassui nassuiarneqareersimapput, uagullu ’saqqummersitanik’ paasisatta taakku ilagilersimavaat.
8 Apustili Peter ima allassimavoq: ’Anannissaq tamanna pruffiitit saammaanneqarnissassinnik siulittuutiginnittut siunersiutigalugulu killisiutigaat, nalunaarfigineqarpummi imminnik pinnatik ilissili kiffartorfigalusi ilissinnut maannakkut . . . oqaatigisaasut pillugit, tamakku inngilit itsuarumagaluaraat.’ (1 Pîtruse 1:10, 12) Pruffiitit itsarsuaq inuusimasut kipillutik paaserusukkaluagaasa ilarpassui Jehovap maanna paasinarsisissimammagit, sallusuissummik nassuiaatit tamakku erligisigit pingaanngitsutullu isumaqarfiginaveerlugit.
9, 10. Pisimasut suut eqqarsaatigalugit nammineerluta Bibelimik atuaqqissaarsinnaatitaanerput annerusumik pingaartikkumassavarput?
9 Eqqortumik isumaqarfiginninneq ineriartortinniarlugu eqqarsaatigisinnaavarput inuit allat Bibelimik atuaqqissaarniarnerminni qanoq ilungersortigisimassusiat. William Tyndalep nalaani Tuluit Nunaanni kristumiut allagaataannik grækerisut allagaasunik tuluttuunngortillugit nutsigaasunik tuniniaaneq, pisineq atuarnerlu pinerluttuliornertut isigineqarpoq. Naaggaartunngorlaap anngiorluni bibelinik Spaniamut eqqussisimasup qanoq pisimanera John Foxep, Puritanikkormiuni palasiusup ukiut 1600-ssaanni inuusimasup nalunaarutigaa. Bibelinik eqqussisoq killuutigineqarpoq ikikkaaffimmilu ikuallanneqarluni, bibelinillu pisisimasut ilaat 800-t parnaarussaapput. Taakkua ilaat 20-t siatsimmik kapineqarput sianneqarlutillu. Ilaallu inuunertik naallugu parnaarussassanngortinneqarput, inuit takkuanni iperartorneqarput, imaluunniit sorsuummut anguartinngorput. Ilamininngui kisimik pinngitsuutinneqarput.
10 Aamma ukiuni nutaanerusuni Jehovap Nalunaajaasuisa ilaatigut navianartorsiungaarlutik Bibeli atuaqqissaartarpaat. Pillaavittut najugarititaniittut parnaarussivinniittullu bibelimik pissarsiniartarput naak pillarneqarsinnaagaluarlutik imaluunniit inuunermik naleqarsinnaagaluartoq. Ajoqersuiartortitap, uppernini pissutigalugu kisimiivilluni ineeqqamiititaasup, Bibelimi allassimaffiit eqqaamasani tamaasa allattorpai, taavalu aviisini upperisarsiornermut tunngasunik allaaserisat ujaasiffigai Bibelimit issuakkat ataasiakkaat ujarlugit. Ukiorpassuarni allamik bibeliuteqanngilaq. Aap, Bibeli inerteqqutaagaangat kristumiut tamaviaartarput pissarsiariniarlugu atuarniarlugulu. Bibeli atuarumallerlugulu talerput isatsiinnarutsigu atuagaasivimmit tigusinnaallugu, atuarniarnitsinni taakkunannga ilungersunnginnerussanerpugut?
11. Bibelimi qaammarsaatissat ilaat atuagassiaatitsinni uteqqinneqartarmata Bibelimik atuaqqissaartuarneq soqutiginnginnerussavarput?
11 Oqartoqartarpoq Napasuliaq Alapernaarsuiffik-mi apeqqutit ingerlaannaq akisarsinnaallugit, atuagassiami allaaserineqartut ilaat uteqqinneqartarmata. Taammaammat nammineerlutik atuaqqissaartarneq pisariaqartinngilaat. Taamatut isumaqartut uteqqiinerup iluaqutaassusia mikivallaartumik nalilerpaat. Jehovap eqqaasitsissutai tussiaasiortup nuannarai, uaguttaaq nuannarisariaqarpavut. (Tussiaat 119:119, NW) Eqqaamaniaruk, silarsuup inuisa tungaanninngaanniit kanngunartuliornissamut nunallu piinik pingaartitsiniarnissamut ussassaarutinik taakkuusunik ulikkaarsimajuaannartugut. Taamaattumik tamakku akiorsinnaassagutsigit isumarput nakussatsittariaqarparput Bibelimi eqqaasitsissutit uteqattaartut iluaqutigalugit.
Ajornartorsiutit anigorniarlugit ilungersorit
12. Bibelimik atuaqqissaartarnermut piffissarsiniarnissamut siunnersuutinik taasaqarit.
12 Bibelimik atuaqqissaarneq eqqortumik isumaqarfigigaanni periarfissarsisoqarsinnaasarpoq, ilaatigulli periarfissarsiuminaattarpoq. Immaqa akornuteqarpoq anigorneqartussanik. Ulluinnarni ulapaarfiusuni nammineerluta atuaqqissaartarnermut qanoq ililluta piffissarsiniarsinnaavugut? Ajornartorsiut tamanna anigorniaraanni paaseqqaartariaqarparput Bibelimik atuaqqissaarneq, oqaluusseqataanertut ataatsimiinnernullu najuuttarnertut, pisariaqarluinnartigisoq. (1 Timûtiuse 4:15) Taava ullut tamaasa sammisartakkavut misissoriartigit, atuaqqissaarnermut piffissarsiniarluta. Inuit ilaat angallatini tamanit atorneqartartuni angalatillutik atuarsinnaapput. Allat biilertillutik imaluunniit illumi sulitillutik Bibelimik atuffassinerit immiussaasut tusarnaartarpaat. Ilaat suliffimminni ulloqeqqasiorfimmi atuaqqissaartarput. Ilaallu makiaartarput ullormut suliassat aallartitsinnagit imaluunniit unnukkut meeqqat innareeraangata atuaqqissaartarlutik. Amerlanertigut sammisassat allat — immaqaluunniit qasuersaarfiusaraluit — tunulliuttariaqartarpavut atuaqqissaarnermut piffissarsiniarluta. (Kulorsamiut 4:5) Inuppassuilli erniinnaq paasilersarpaat aliikkusersuutit allat atorfissaqartippallaarunnaaritik, atuaqqissaarneq qasukkarutigisaramikku.
13. Atuaqqissaagassaannarnik eqqarsaatiginninniarnitsinni suut iluaqutigissavavut?
13 Inuit ilaasa ataasiinnaasumik eqqarsaatiginninniarneq ajornakusoortittarpaat. Ulluinnarni inuunermi ajornartorsiutit isumakkeersinnaanngilaat Bibelimillu atuaqqissaarneq aallussinnaanagu. Ataasiinnarmik eqqarsaatiginninniarnikkut qinuneq iluaqutaasinnaavoq. Atuaqqissaanngitsiarninni Jehova saqqummersissimasaanik tamanik qutsavigisaruk, qinnuigalugulu ikioqqullutit aallusseqqullutit atuagassallu naleqassusiannik paasinneqqullutit. (Filípimiut 4:6; 2 Timûtiuse 2:7) Tamatuminnga qinnuteqarnissaq Jehovap uatsinnik piumasaanut naleqqulluarpoq. (1 Juánase 5:14) Imminut naalakkersorsinnaaneq pisariaqarluinnarpoq, pingaartumik atuaqqissaaleqqaanut. (1 Korintumiut 9:25) Juutit Berøamiut Guutip oqaasia ullut tamaasa misissortarpaat. (apustilit suliait 17:10, 11) Maligassiuilluarput. Akulikitsumik atuaqqissaartarneq erniinnaq soqutiginarnerulissaaq, qularnanngitsumillu uerissaatit qilanaassallutillu, imminullu pinngitsaalineq pisariaarutissaaq.
14. Suna pillugu nipeqanngitsut avatangiisigalugit atuaqqissaarnermut pitsaanerussava?
14 Naleqquttumillu avatangiiseqaraanni atuagassaannarnik eqqarsaatiginninniarneq ajornaannerussaaq. Eqqissisimalluni eqqarsaqqissaarumagaangami Isak narsamukartarpoq — toqqit silataanni perpaluk qimallugu. (1 Môrsase 24:63) Imaapporli: Ilarpassuavut narsatut akornusiisoqanngitsigisumik atuaqqissaarfissaqanngillat, akornusiisartulli avatangiisivut immaqa sakkukillisissinnaavavut. Fjernsynip ikumasup sioraani imaluunniit radio nipitooq tunuleralugu atuaqqissaarniarneq inimi nipaaffiusumi atuaqqissaarnertut pissarsiffigilluarnartiginavianngilaq — soqutiginartiginavianngilarlu. Akornusiisut tamatigut anigorniarneq ajornaraluarput, amerlanertigulli tamangajatta nipeqarpallaanngitsumik atuaqqissaarfissarsisinnaavugut.
15. Bibelimik ilisarsiniarluni ilungersornarpallaanngitsumik periaatsinik taasaqarit.
15 Allamik ajornartorsiuteqarsinnaavoq: Inuit ilaasa qanoq atuaqqissaassallutik immaqa naluaat. Meeqqat atuarfimmi atuaqqissaarluni ilinniarnermik ilikkarnissaat naatsorsuutigineqarsinnaanngilaq, siornatigullu atuartuujunnaarsimasut immaqa atuaqqissaarneq ileqqoriunnaarsimavaat. Atuaqqissaarnerli sungiukkuminaappallaanngilaq. Allat puiorlugit Bibeli atuarluartorujussuusinnaavat, imaluunniit atuakkat Bibelimik ilinniutaasut itisilersinnaavatit. Aamma apeqqutit aalajangersimasut misissorsinnaavatit Guutip oqaasia atorlugu nassuiarniarlugit. Misilissimaviuk Napasuliaq Alapernaarsuiffik ukiuni pereersuni saqqummersimasut atuaganngortitat qupperarlugit ilanngutassiallu soqutigisatit atuarlugit? Tamanna aallussilluarluni atuaqqissaarnerunngikkaluarpoq, tassuunali Jehovap oqaasianik nuannarisaqarnerit alliartussaaq.
16. Napasuliaq Alapernaarsuiffik atorlugu atuaqqissaaqatigiinnissamut piareersarluta suna siunertarissavarput?
16 Atuaqqissaarnermi aalajangersimasumik siunertalik, soorlu Napasuliaq Alapernaarsuiffik atorlugu atuaqqissaaqatigiissutissamik? Atuaqqissaarnerup siunertaa atuartup isumaliutigisariaqarpaa. Suna siunertaraa? Napasuliaq Alapernaarsuiffik atorlugu atuaqqissaaqatigiinnissamut piareersarnermigut ’piffissap eqqortup nalliunnerani inuussutissat’ „inussiaq ilumoorlunilu silatooq“ aqqutigalugu pissarsiarineqartut sapinngisamik pissarsiffigiumassavai, aammattaaq ataatsimiinnermi akissuteqartarnermigut inuit allat ikiorumassavai. (Matîuse 24:45, NW) Tamanna anguniarlugu suna periaaserisinnaavaa? Soorunami aalajangersimasunik malittarisassaqanngilaq, unali siunnersuutigineqarsinnaavoq:
17, 18. (a) Napasuliaq Alapernaarsuiffik atorlugu atuaqqissaaqatigiinnissamut piareersarnerup qanoq ingerlanneqarsinnaaneranut siunnersuuteqarit. (b) Nammineerlutit atuaqqissaarninni iluaqutigisimasannik taasaqarit.
17 Siullermik ilanngutassiaq tamaat naallugu atuaruk, immaqa Napasuliaq Alapernaarsuiffik-up tigunerata kinguninnguatigut. Atuaqqaarneq tamanna immaqa minuttit 20-innarnik sivisussuseqassaaq, tassuunali ilanngutassiap pingaartortai siunertaalu isumassarsiffigissavatit. Ataatsimiinnissamut piareersarlutit atuaqqissaaleruit, Bibeli aqerluusarlu tigoriarlugit inginniarit. Taava immikkoortoq siulleq peqqissaartumik atuaruk, patsisigisat pingaartortaasalu nassuiarneqarneri malugalugit. Immikkoortumi allassimaffiit atuaqquneqartut issuarneqanngitsut Bibelimi atuakkit, suna pillugu atuaqquneqarnerat paasiniarlugu. Taava immikkoortup apeqqutitaa atuaruk, akissutissarlu eqqarsaatigalugu. Akissutissaa aalajangereerukku, immikkoortumi oqaaserpaaluit Napasuliaq Alapernaarsuiffik atorlugu atuaqqissaaqatigiinnermi akissutissamik eqqaanartut ataasigut titakkit. Naqinneqannginnersami allassimaffiit atuariikkatit, eqqarsaatit aammalu misissorusutatit, ilaallu ilanngullugit, pillugit immaqa allattuiumassaatit.
18 Taamaalillutit ilanngutassiaq naagukku, apeqqutit uteqitassat ilanngutassiap naggataani ungalusamiittut atuakkit ilanngutassiap pingaartortai paasilluarsimanerlugit. Apeqqutit arlaat akisinnaanngikkukku, nammineq akissutissamik ilanngutassiaq ujaasiffigiuk. Napasuliaq Alapernaarsuiffik-mik atuaqqissaaqatigiinneq ullunik arlalinnik sioqqullugu piareersarsimaguit, ullormi atuaqqissaaqatigiiffiusumi ilanngutassiaq pingaarnersiorlugu atuatsiarukku iluaqutaassaaq, pingaartortai eqqaaniarlugit.
Eqqissisimalluni eqqarsaqqissaarnerup pisariaqassusia
19. Jehovap oqaasianik nuannarisaqarneruniarnermut eqqissisimalluni eqqarsaqqissaarneq qanoq iluaqutaasinnaava?
19 Atuaqqissaarnerup eqqissisimalluni eqqarsaqqissaarneq ilagaa. Eqqissisimalluni eqqarsaqqissaarnani atuaqqissaarnerup assigaa nerisat aqajaqqumi uunneqanngitsoornerat. Taamaattumik atuaqqissaakkatit eqqarsaatigeqqissaakkit. Ilinniareersimasannut tunngatinniakkit. Ilikkakkavit inuuninnut qanoq sunniuteqarnissaat eqqarsaatigikkit. Ilikkakkatit inuit allat ikiorniarlugit qanoq atorniarsinnaavigit? (ússatit 15:28) Qaammarsaatissat annikitsut maluginiartakkit. Ilikkakkatit inunnut allanut oqaluutigisakkit. Paasisannik nutaanik inuit allat aveqatigisakkit. (ússatit 27:17) Taamaalillutit Bibelimik nuannarisaqarnerit alliartuinnassaaq.
20. Jehovap oqaasianik saqqummersitaasumik kunngi Davidip nuannarisaqangaarnera nassuiaruk.
20 Kunngi David Jehovap oqaasianik nuannarisaqangaarpoq. Taanna ima allassimavoq: „[Jehovap] inatsisai innerluitsuupput, tarnimik tumannguersaasarput. [Jehovap] nalunaajaatai sallusuitsuupput, paasisakitsumik ilisimatuunngortitsisarput. [Jehovap] maleruagassiai naapertuilluartuupput, uummammik nuannaartitsisarput. [Jehovap] peqqussutai sukuluipput, isinik qaamaneqalersitsisarput. [Jehovap] oqaasii minguitsuupput, atattuinnartussaapput. [Jehovap] inassutai aalajaapput, tamarmik naapertuilluarnerupput, kuultimit erlinnarnerupput, kuultimit akuilluartumit, tungusunninnerupput tungusunnitsuummit, tungusunnitsuummit pinngoqqaarfimminiittumit.“ — Tussiaat 19:8-11.
21. Qanoq pilluaqquneqarumaarpugut Jehovap ’saqqumersitaanik’ nuannarisaqangaarneq ineriartortikkutsigu?
21 Tussiaatit siullianni unnersuussutigineqartut malikkukkit, Bibeli atuaqqissaartarlugu, illittaaq Jehovap ’saqqummersitai’ taama ititigisumik pingaartilerumaarpatit. Taamaalioruit pilluaqqussutissaq Jehovap oqaasianik nuannarisaqartunut tussiaammi tassani neriorsuutigineqartoq piumaarpat: „Taassuma assigaa orpik kuunnguup killingani ikkunneqarsimasoq; taanna inerititaqarfissamigut inerititaqartarpoq toqujuitsunillu pilutaqarluni. Qanoq iliornermini tamani iluatsitsisaraaq. . . . [Jehovap] iluartut aqqutaat isumagaa.“ — Tussiaat 1:3, 6. (wD 15/5 86)
Uku qanoq nassuiassavigit?
□ Inunnit allanit Guutip oqaasianik ajoqersorneqarnissarput suna pillugu naammagissanngilarput?
□ Bibeli atuaqqissaartarutsigu pilluaqqussutissat suut pissavavut?
□ Bibeli atuaqqissaartarniarlugu qanoq ililluta piffissarsiniarsinnaavugut?
□ Atuaqqissaagassaannarnik eqqarsaatiginninniarnitsinni suut iluaqutaasinnaappat?
□ Napasuliaq Alapernaarssuiffik atorlugu atuaqqissaaqatigiinnissamut piareersarluta suna siunertarissavarput?
[Qupp. 9-mi assiliartaq]
Bibeli atuaramikku inuit ilaat toqusimapput
[Qupp. 11-mi assiliartaq]
Ulluinnarni ulapaarfiusuni Guutip oqaasianik eqqarsaatiginninnermut piffissarsisariaqarpugut