Eqqortumik upperisarsiornermut ilisarnaat
UKIUT 2000-issaanni maanna atuuttuni kristumiussutsimik upperisarsiornerartut allamik upperisarsiornerartunit amerlanerupput. Ilimagisanulli akerliusutut ukiut hundredillit maanna atuuttut aatsaat taama eqqissinanngitsigaat. Tamatumunnga suna pissutaasinnaava?
Inuppassuit upperisaminnik pingaanngitsutut isiginninnerat pissutaaqataavoq. Kristumiussuseq ilorrisimaarutitut isigaat, inuunerminnut sakkortuumik sunniutaasutut isiginagu. Tamatuma saniatigut, inuit upperisaminnik pingaartutut isiginnittut ajoqersuutinik imminnut akerleriittunik upperisaqarput, ileqqussanillu najoqqutassiat assigiinngitsut — allaallu Bibelimut akerliusut — maleruarnerarlugit. Aammattaaq inuiaqatigiiussutsikkut, ammip qalipaataatigut aningaasatigullu isumaqatigiinnginnertik avissaartorsimassutigaat. Aammattaaq peqquserluffigeqatigiittarput, imminnut malersuuttarlutik, sorsuullutillu imminnut toqoraattarlutik. Tassami, silamiut oqaluttuarisaaneranni sorsunnerit annerit marluk annertunerusutigut inuiaqatigiinni „kristumiuunerartuni“ ingerlanneqarput.
Tamatumannga paasineqarsinnaavoq kristumiussuseq eqqortumik upperisarsiornerunngippat, taava kristumiuuneraannarneq ilumut kristumiuunermit allaalluinnartoq. Jesus Kristus, kristumiussutsimik aallarniisoq, naapertorlugu, eqqarsaatigisap inernera kingulleq eqqortuuvoq. Ilaanni oqarsimavoq inuit ilaasa ’Naalakkamik’ taasassagaanni. Allatut oqaatigalugu, kristumiuunerarput, Jesus Naalakkamittut ilassillugu. Ulapaarutigissavaallu taassuma aqqa tunaartaralugu killinnarpaluttumik suliaqarlutik. Jesusilli oqarfigissavai: ’Ilisarinngisaannarpassi; qimassinga, iluaatsuliorumatuususi-aa.’ — Matîuse 7:22, 23.
Uagut taamatut nalunaarfigineqarumanavianngilagut! Taava qanoq ilillugu paasiniarsinnaavarput ilumut kristumiuunerluta, imaluunniit kristumiuuneraannarnerluta? Eqqortumik upperisarsiornermut ilisarnaateqarpa?
Ilisarnaat
Aap, ilisarnaateqarpoq. Soorunami kristumiussuseq arlalippassuarnik ilaqarpoq. Assersuutigalugu: Kristumiuulluartoq Guutimut aalajaatsumik uppissuseqartariaqarpoq, ’uppissuseqarnani Guutimut iluaritinneq ajornaqimmat’. (Eprîarit 11:6) Aammattaaq eqqortumik suliaqartariaqarpoq. Ajoqersukkap Jakobip mianersoqqussutigaa ’upperneq sulianik ilaqanngitsoq toqungasoq’. (Jâko 2:26) Aammattaaq apustili Paulusip erseqqissarpaa qanoq pisariaqartigisoq kristumiut ’Guutip peqqusaanik eqqorluartumik ilisarsissallutik tamanik ilisimalersillutik anersaallu piinik sianilersillutik’. (Kulorsamiut 1:9) Tamakkuali arlaannaalluunniit kristumiussutsimut ilisarnaataanngilaq.
Imaakkami: Bibelimik ilisarsilluarsinnaavugut upperluarsinnaallutalu ajunngitsumillu suliaqarluta ulapaarsinnaalluta, taamaattorli kristumiuulluarnata. Tamanna sooq taamaassinnaava? Apustili Paulusip immannak nassuiarpaa: ’Inuit inngilillu oqaasiinik oqaluttaraluaruma asannissuseqarnangali, kannussak sianaartoq avilortunnguarluunniit sianaalasoq taava assigeqqajaqaakka. Pruffiitisullu oqalussinnaagaluarumaluunniit, anngigisallu tamaasa ilisarsissutillu tamaasa ilisimagaluarukkit, uppernerlu tamaat pigigaluarukku qaqqarsuit nutsersinnaagaluarlugit allaat, asannissuseqarnangali, taava suunngeqqajaqaanga. Pikkalu tamaasa tunniukkaluarukkit, timigalu ikikkartikkaluarukku, asannissuseqarnangali, taava iluaqutiginngeqqajaqaara.’ — 1 Korintumiut 13:1-3.
Aap, eqqortumik upperisarsiorneq ilisarisinnaassagutsigu paaseqqaartariaqarparput asanninneq ilumoortoq tunngavigigaa. Uppissuserput, ajunngitsunik suliavut eqqortumillu ilisarsinerput pisariaqarluinnarput pinngitsoorneqarsinnaanatillu. Uagulli tamakku iluaqutiginavianngilavut asanninnermut tunngaveqartinngikkutsigit. Soormi? Suna pillugu asanninneq allanit tamanit pisariaqarnerua? (wD 1/6 86)