Illit ilisarnaatissaq paasiviuk?

SUNA PILLUGU asanninneq kristumiuni taama pingaaruteqartigaa? Guutip kristumiut pallorfigisaata tamanna ilisarnaatigimmagu. Apustili Johannesip Guuti imannak allaatigaa: ’Guuti asassutaavoq.’ (1 Juánase 4:8) Soorlu angajoqqaat kissaatigigaat qitornamik maleruassagaatik, taamatut Jehovap Guutip kissaatigaa kristumiut ilungersussasut immisut inniarlutik. Taamaattumik apustili Paulus kajumissaarilluni oqarsimavoq: ’Guuti qitornatut asanartutut malinniarsiuk, asannillusilu saqigitsi.’ — Evfisumiut 5:1, 2.

Aammattaaq asanninnerup kristumiut pissusii allat oqimaaqatigiissippai. Jesusip ulluini juutit — ingammik pisortaat — Bibelimik aallussilluarlutik ilinniaqqissaartuupput. Jesusilli taakkununnga oqaasii malugeriakkit: ’Allakkat isumasiortarpasi, naassaanngitsumik inuussuteqaatigisorigassigit, . . . ilisimavassili Guutip asanninneranik ilumiugisaqanngitsusi.’ (Juánase 5:39, 42; Lúkarse 11:42) Juutit ilisimassut piinnarnagu aammattaarli asanninnermik pigisaqarsimagaluarunik, Jesus Messiasitut ilassisimassagaluarpaat. Amerlanersaasali ilassinngitsooramikku, kristumiut ilagiissaannut ilaasortat siulliit ilagissallugit periarfissaaruttoorput.

Aamma eqqaamaniakkit katuullit Romalerisut saassussiartortut Spaniameersut upperisaminnik Amerikamut eqqussiartortut. Aalajaatsumik uppissuseqarsimassapput aallussilluarsimassallutillu naammassiniagartik naammassisinnaagamikku. Asanninnermilli sunnertissimanngillat. Asanninnermit sunnertissimagaluarunik nunaviit Amerikap avannarliup kujalliullu inueqqaavi arsaartornagit, naalliutsingaarnagit, pinngitsaaliinikkut arneriffiginagillu toqussimassanngikkaluarpaat.

Taamaattumik kristumiut pissusiisa asanninneq pingaarnersaraat. Kikkut asasussaavaat? Jesusip oqaluttuuppaatigut: ’Jehova Guutit asassavat uummatikkut iluunngarlutit tarnikkullu iluunngarlutit isumakkullu iluunngarlutit. Tassa inassut siulleq annerusorlu. Aappaatalu taamaaqatigaa: Tullit ilittut asassavat.’ — Matîuse 22:37-39.

Kristumiulli asanninnerata tamanna killiginngilaa. Jesus oqarsimavortaaq: ’Qinngarsortisi asaniarsigit; . . . ilissinnik innarliisut qinuginnittullu qinnussigit qitornareqqullusi ataatassinnut qilammiusumut; taassumami seqerni ajortunut ajunngitsunullu nueqqusarpaa, sialleqqusisarlunilu iluartunut iluaatsunullu.’ (Matîuse 5:44, 45) Allatut oqaatigalugu, kristumiup asanninnerata inuit tamangajaasa pigai oqartariaqarpoq! Tamannali suliatigut qanoq ersersinneqassava?

Guutimut asanninneq piviusoq

Guuti asajumagutsigu ilisarinerusariaqarparput. Guutip nammineq tamanna ajornarunnaarsippaa Bibelimik — tassa uatsinnut allakkaminik — pissaqartikkamisigut. Asasatsinnit allagarsigaangatta tamangajatta, qanoq ulapitsigigaluaruttaluunniit, allakkat taavaannaq atuartarpavut. Bibeli atuarusunnginnerussavarput? Soorunami naagga. Ullumikkulli ulluinnarni inuunermi allamut saasarinerit amerlasaqaat, inuillu amerlanersaasa fjernsynimik isiginnaarneq atuaqqissaarnermit nuannerinerunnguatsiarpaat. Kristumiulli ilumoortut Bibelimik atuartarnerminnut isiginnaarneq akornutaatissanngilaat. Tussiaasiortutut isumaqarput, taanna allammat: „Maleruarpakka inatsisitit [ullumikkut Bibelimi nassaassaasut] nuannaringaarlugillu.“ — Tussiaat 119:167.

Bibelimi Guutip oqaluttuuppaatigut qanoq ilioqqugamisigut. Soorlu angajoqqaat qitornaminnut ileqqussanik najoqqutassiortartut, Jehova najoqqutassiorsimavoq uatsinnut maleruaqqusaminik — najoqqutassiaalu oqaloqatigiissutissaanngillat. Assersuutigalugu, Bibelimi oqaluttuunneqarpugut: „Kinguaassiuutitigut kanngunartuliortulluunniit guutipilussiortulluunniit allasiortulluunniit angutilluunniit pinngortitat pissusiannut akerliusumik atortittut, angutilluunniit anguteqatiminnik atoqatiginnittut, tillittulluunniit piumatuulluunniit imerajuttulluunniit mitaatilliisulluunniit iluanaarniapiluttulluunniit Guutip naalagaaffia kingornussarissanngilaat.“ (1 Korintumiut 6:9, 10, NW) Ila arlalippassuit tassani pineqarput! Guutimilli asannilluartut maleruarumassavaat. Sooq? Imaakkami soorlu apustili Johannesip uparuaraa: ’Guutimimmi asanninneq tassaavoq inassutai maleruarutsigit.’ — 1 Juánase 5:3.

Ajoraluartumik, ileqqut Bibelimi ajorneragaasut ilarpassui ullumikkut ajorpallaanngitsutut isigineqalersimapput, inuit kristumiuunerartut akornanni allaat. Canadami uppeqatigiit naaggaartut ilaasa nalunaarusiaminni angutit anguteqatiminnik atoqatiginnittartut palasinngortinneqarsinnaanissaata akuerineqarnissaa siunnersuutigaat, katissimanngitsut atoqatigiinnissaata pissutsit aalajangersimasut atuunneratigut ajorineqannginnissaa taperserpaat, oqarlutillu aappariit ilumoorfigeqatigiinnerata immaqa allasiornissaq pinngitsoortittariaqassanngikkaa. Qularnanngitsumik tamatuminnga nalunaarusiortut nutaalerisutut akaarinnittutullu isumaqarfigineqarusupput. Asanninnermilli Guutimut imaluunniit inunnut kanngunartuliornissamut kajumissaakkaminnut nittaanerpat? Tassaqa, Paulusimi oqarsimammat taamaaliortut Guutip naalagaaffia kingornussarissanngikkaat. Asanninnermut ersiutaassagaluarpoq sakkortuneroqisoq Guutip najoqqutassiai nakimaatsumik aalajangiutissallugit, sanngiitsullu kaammattussallugit tamakku aalajangiuteqqullugit, imaaliornanilu: Ilaguutialluni ajornaannerusumut kiisa ajunaarnissamik kinguneqarumaartussamut kaammattorlugit!

Aveqatigiinnermut kaammattuut

Bibeli atuartillugu aammattaaq nuanningaartut Guutip inuiannut siunertarisaqarfigisai ilinniassavavut. Ilinniassaagut „silamiut Guutip ima [asatigigai] ernitui tunniullugu kinaluunniit taassumunnga suliaqarluni uppertoq tammaqqunagu, naassaanngitsumilli inuussuteqaqqullugu“. (Juánase 3:16, NW) Aammalu ilinniassavarput Guutip siunertarigaa nunarsuaq ajussusermik piiarumaarlugu Naalagaaffinilu aqqutigalugu, Jesusip taassuma aqutsineratigut, pissutsinik aaqqissuussinissaq eqqissinartoq paratiisimillu atuutilersitsiumaartoq pilersikkumaarlugu. (Matîuse 6:9, 10; sarĸúmersitat 21:3, 4) Soorlu Bibelimi neriorsuutigineqarsimasoq: „Guutiitsoq erniinnaq peeruttussaavoq . . . Kisianni qanilaartut nuna kingornutissavaat, pilluangaarlutillu inuussapput.“ — Tussiaat 37:10, 11.

Bibelimi tusarliussassaq tassarpiaavoq inuiaat atorfissaqartitaat. Taamaattumik alianaraluarpoq atuarlugu kristumiuuneraqatigiit ajoqersuiartortitaat piitsuussusermit naapertuilluanngissusermillu nunani piitsuni takusartakkaminnit allamut saasagaagamik naalakkersuinermik ingerlatsinermut allaallu mumisitsiniaqataanermut akuliuttut. Nunani taakkunani ajornartorsiutit mumisitsiniarnikkut aaqqinneqarnavianngillat. Ajoqersuiartortitat taamaattut Guutimut asanninnermik piviusumik pigisaqarpat? Guuti ilumut asagaluarunikku, taava neriorsuutai upperfigissannginnerpaat savaatitillu Guutip naalagaaffianik uparuartuullugit? Paarsisut savaatiminnik asannilluartut soorunami ajoqersuukkumassavaat Guutip inatsisaanik maleruaanerup maannakkut allaat iluaqutaasinnaassusianik, naalakkersuinermik ingerlatsinermut atatillugu pilersaarusiornernut allatut ajornartumik pakatsisinneqarnissamik kinguneqarumaartunut akuliutinniarnagit.

Imaakkami: Bibelimi tusarliussassaq ima nuannertigimmat inuup asannissuseqartup allanut oqaluutiginngitsoorsinnaanngilaa. Taamaattumik asanninnermit killinneqarlutik kristumiut ilumoortut ilisimasatik allanut aveqatigisarpaat. Ilagiinni nalinginnarni kristumiuunerartuusuni amerlanertigut immikkoortortarpaaluit, akiligaasut, ilinniarsimasaminnik suliaqartut — tassa palasit — kisimik Bibeli pillugu oqaluussineq isumagisussaavaat. Aaqqissuussineq tamanna kinguneqarnerlussimavoq. Soorlu Lutherikkunni palasi tamanna miserratiginagu atuagassiami Christianity Today-mi oqarsimasoq: „Nalitsinni ilagiit sanngiipput anersaakkut pisortat ilagiinnut ilaasortat nalinginnaasut sungiusanngitsoorsimammatigik suliassamik palasit suliarisartagaannik sulinissaannut. Imaluunniit uppertut kiffartuutissaq tamanna akuerisimanagulu ilassisimanngimmassuk.“

Kristumiut ilumoortut ’kiffartuutissaq tamanna akuerisimallugulu ilassisimavaat’. Apustili Paulusip oqaasii uku maleruartariaqartutut isigaat: ’Aalajangiunniartigu neriugisarput qularnaatsumik nassuerutigalugu, ilumoormat unnersuisoq.’ (Eprîarit 10:23) Suna pissutigaat? Pissutigaat ukiuni hundredilinni siullerni kristumiorpaaluit apustili Paulusip nersugaasa pissutigisaat: ’Uku asanninnermit taamaaliorput.’ — Filípimiut 1:16.

Kristumioqatinik asanninneq

Aap, asanninneq kristumiussutsimut piviusumut ilisarnaataavoq kristumiut ilumoortut inuunerinut attuumassuteqartunut tamanut sunniuteqarami. Tassuuna inunnit avatangiisiminnit immikkoortutut pissuseqaleriartorput. Suna pillugu? Silarsuaq manna pillugu apustili Johannes oqarsimavoq: ’Silarsuaq iluunngaat ajortup pissaaneqarfigaa.’ (1 Juánase 5:19, NW) Ajortoq tassaavoq Satan Diaavulu, silarsuullu inuisa taassuma pingaarnerutitai maligassiaalu iliuuserisartakkaminni annertuumik ersersittarpaat. Satanip sunniinera peqquserlunnikkut, inuunerlunnikkut, naapertuilluanngitsuliornikkut, ammip qalipaataatigut assigiinngisitsinikkut inuillu aningaasarsiorsinnaanermikkut naligiinnginneratigut silarsuarmi ullumikkut atugaangaartutigut malunniuppoq. Kristumiu Guutimik asannittumik pallorfiginnittoq asannissusermillu ineriartortitsinermigut taassuminnga malinninniartoq allaasariaqarpoq!

Kisimiikkaannili tamanna ajornaatsuunngilaq. Taamaattumik Bibelimi kaammattorneqarpugut asannissusermik pingaartitsisut allat ilagisaqqullugit. Tassuuna kristumiut ikioqatigiissinnaapput. Tamanna eqqarsaatigalugu apustili Paulusip oqaatsit kajumissinartut uku allappai: ’Misissoqatigiinniarta asanninnermut ajunngitsuliornermullu kajumissaaqatigiilluta, . . . oqaaqqissaaqatigiilluta.’ — Eprîarit 10:23-25.

Kaammattuut tamanna malikkusukkukku, Jehovap Nalunaajaasuisa inuppaaluit asannissusermik Guutip pissusereqqusaanik nittaaniarlutik ilungersortut ilinnut ilisaritikkumassagaluarpaat. Illoqarfimmi illit najukkanni ilaqarsimassapput. Guutip anersaavanik ilumioqarput, asanninnerummi kristumiut pigisaata anersaaq tamanna aallaavigaa. ’Anersaap inerititaasa asanninneq ilagaat.’ (Galâsiamiut 5:22) Taakku naapeqatigisarukkit apustili Peterip kajumissaarutaa una maleruarsinnaassavat: „Qatanngutigiissutut peqatigiit tamaasa asasigit.“ — 1 Pîtruse 2:17, NW.

Alianaraluassusissaa, Guuti kiffartuunniarlugu ilungersoreersimalluta, Jesusip ajorneraalluni oqaaseqarfigisaanut ilaassagutta: ’Ilisarinngisaannarpassi; qimassinga, iluaatsuliorumatuususi-aa.’ (Matîuse 7:23) Asannissuseq, kristumiussutsimut piviusumut ilisarnaataasoq, ineriartortikkutsigu, tamanna atugarinngisaannassavarput. Asannissuseqarutta killinneqassaagut Bibeli atuartassallugu, Bibelimi najoqqutassiat maleruassallugit, kristumiut allat ujassallugit naapeqatigisarniarlugit, inuillu allat nuannersunik Bibelimi oqaluttuarineqartunik oqaluttuutissallugit. Aap, asanninnerup killissavaatigut Guutip uatsinnut iliuusereqqusai iliuusereqqullugit. Imaappoq, soorlu Jesus oqarsimasoq: ’Ataatama qilammiusup peqqusaanik iliortut’ Guutip neriorsuutigisai kingornussarissagaat. Apustili Johannes nangilluni oqarsimavoq: ’Guutip peqqusaanik naammassinnittoq naassaanngitsumik atassaaq.’ — Matîuse 7:21; 1 Juánase 2:17.

Aap, asannissuseq ineriartortiguk. Asanninnermit killitsigit Guutip peqqusaanik naammassinninnissannut. Taava qularnassanngilaq kristumiuusutit ilumoortoq, Jesus oqarsimammat: ’Matumannga tamarmik ilisarissavaasi ajoqersugarigissi: Asaqatigiikkussi.’ (Juánase 13:35) Taava akissarsiassaq naassaanngitsoq Guutip asasiminut neriorsuutigisaa piumaarpat. (wD 1/6 86)

[Qupp. 7-mi assiliartat]

Asannissuseq ineriartortiguk