Kiffaajunnaarsitaanissaq – ila kissaatiginassusia!
„KIFFAANNGISSUSERMIK tuninnga, toqumilluunniit tuninnga!“ Amerikamioq nunaminik asannilluartoq pingaartitsisorlu Patrick Henry ukiut 200-t matuma siornagut nillerpoq. Taassuma kiffaanngissuseq inuunermit allaat pingaarnerutippaa. Ukiut hundredillit ingerlanerisigut inuit millionikkuutaat taamatut isumaqarput.
Ukiulli 50-it kingulliit ingerlaneranni kiffaajunnaarsitaanissamik kissaat annertusiartuinnarsimavoq. Inuit millionikkuutaat naalagaaffinnut nunasialinnut attaviitsuussuseq anguniarsarivaat kiisalu naalakkersuinikkut namminersortunngorlutik. Innuttaaqatigiissutsikkut, aningaasarsiornikkut allaallu upperisarsiornikkut kattuffiliortoqartarpoq piviusumik isumaannarsornikkulluunniit naqisimaneqarnermit kinaassusersiugaanermilluunniit kiffaanngissuseq anguniarlugu. Aatsaat ullumikkut angutit taama amerlatigisut sulisitsisut naalakkersuisullu oqartussaatitaanerannit, arnat taama amerlatigisut uiisa ataataasalu oqartussaatitaanerannit, meeqqallu taama amerlatigisut angajoqqaavisa ilinniartitsisaasalu oqartussaatitaanerannit kiffaajunnaarsitaanissamik kissaateqarput. Kisiannili kiffaajunnaarniarluni kattuffiliornerit nutaajunngillat. Ilumut inuit ingerlaasiattut pisoqaatigingajapput. Môrsasip agdlagaine sujugdlerne 3:1-7-imi kiffaajunnaarniarluni iliorneq ilumut pisimasoq siulleq imannak oqaluttuarineqarpoq:
Angutip arnallu pinngortinneqarnerata kinguninnguatigut, pinngortitat inngiliusut ilaata arnaq saaffigaa. Taassuma qanoq iliornerisigut paasinarsivoq Pinngortitsisimi oqartussaaneranit kiffaajunnaarusuttoq. Taamaattumik tupaallannanngilaq taanna oqarmat arnaq uialu kiffaajunnaarsitaanermik pisariaqartitsisut. Tunngaveqarniarluni oqarpoq imaannginnersoq Guutip killiliiffigisimagai? Sunaligooq patsisigalugu ’orpiup naatsiiviup qeqqaniittup paarmai’ neriffigisinnaanngilaat? Imaakkami: ’Orpik taanna isigiuminarpoq,’ ilaa? Ilaana!
Kiffaajunnaarniaritsi, kimigiiserfigalugit oqarpoq, taavalu ’isisi uisitaajumaarput, Guutisullu ilerumaarpusi, ajunngitsorlu ajortorlu sianigalugit’. Kissaatiginassusissaa! Aap, Guutip „naqisimannilluni“ naalakkersuineranit kiffaajunnaarsitaanissaq inuunertut namminertut erlinnartigisutut ilersinneqarpoq.
„Kiffaanngissusermik tuninnga, toqumilluunniit tuninnga!“ Adamip Evallu tamaasa pivaat — aliasuutissaminnik, uaguttaaq aliasuutissatsinnik! Qanorli taamaappa? (wD 1/7 86)