Bibelimit atuagassani pingaarnersaasut Tussiaatit 73-imiit 106 ilanngullugu

„Nersoruk Jehova“ — sooq?

Jehovap iliuuserisimasai, iliuuserisartagai iliuuseriumaagassaalu eqqarsaatigigaanni, kina taava qujamasussanngila? Uummatitsigut killinneqarluta Guuterput nersorumassavarput. Tussiaatit immikkoortortaasa pingajuanni sisamaannilu Jehovamik nersuinissatsinnut pissutissaqarluarnerput erseqqissarneqarluarpoq. Tussiaatit 73-imiit 106 ilanngullugu atuartillugit imminut aperisarit: ’Jehova nersussallugu uanga nammineq sumik pissutissaqarpunga?’

Guutiitsunik sinngaginninnak

Tussiaatit 73-imiit 77 ilanngullugu atuakkit. Asaf, qularnanngitsumik erneri ilanngullugit, tamakkuninnga allattuutinneqarput. Asafip guutiitsut sinngagigini miserratiginngilaa — kiisali silattorpoq. (Tussiaat 73) Taava Jerusalemip piuneerussaanera upputigineqarpoq. (Tussiaat 74) Taava Guuti ’mianernangaartoq’ qutsavigineqarpoq, kiisalu ’Guuti angingaartoq’ qinnuigineqarpoq innuttani annikilliortut eqqaaqqullugit. — Tussiaatit 75-77.

◆ 73:24 — „Naalannarsutsimi“ sumi Jehovap tussiaasiortoq ilasiaraa?

Tussiaasiortoq isumaqarsimagaluarpoq guutiitsut iluartunit pitsaanerusunik atugaqartut, kiisali paasilerpaa „Guuti qanillugu inuuneq tassa pilluarnar“toq. (Tussiaat 73:2-12, 28) Guutip ’pilersaarutaanit’ ingerlatsikkami ’naalannarsuseq’ pivaa, tassa: Jehovamut iluaritippoq, taassumunnga pilluarnartumik pissuseqalerluni.

◆ 76:6 (NW) — „Hiisti inuttaalu itisuumik siniler“sut qanoq paasisariaqarpa?

Israelikkut ajoqersorneqarput Jehova isumalluutigeqqullugu, hiistit qamussuillu isumalluutigeqqunagit. (Tussiaat 20:8; ússatit 21:31) Akeraasa hiistii qamussuilu savissualersugaasut ersigisariaqanngilaat, Jehovammi akeqqat pissaaneerussinnaammagit, ’sinilersillugit’. Tassani ’sinik isuanut ittussaq’ — tassa toqu — pineqarpoq. (Jerimia 51:39) Tamanna mianersoqqussutaassaaq silarsuarmi pisortanut sakkussiaatiminnik tatiginnittunut. — Tussiaat 76:12,.

Tamanna sumik ilinniarfigisinnaavarput: Tussiaat 75 pingaarniarnaveeqqussuteqarpoq, allassimammat: „Nassusi qilaap tungaanut massitseqinasigit.“ (Versi 6) Nassuk nakuussusermut, pissaanermut, assersuutaavoq. (5 Môrsase 33:17) Nassumminik massitsitsilluni tassa makitasuumik iliuuseqarpoq. Uani tussiaasiortup guutiitsut mianersoqquai pissaaniliussusertik isumannaatsutut ikkaluartoq pingaakujuutigeqqunagu, Jehovammi „guutiitsut nassui tamaasa killorumaar“pai. (Tussiaat 75:10) Tamanna ilisimallugu Guutip kiffaasa Guutimut ilumoorniarnerminni qiimmassaatigissavaat naak guutiitsut siumukarluartutut ikkaluartut. — Naleqqiuguk Tussiaat 144:11-15a.

’Qutsinnerussaartoq’ naalassiuk

Tussiaatit 78-imiit 83 ilanngullugu atuakkit. Asafip tussiaasiai nangipput. Israelikkut oqaluttuarisaaneranni pisimasut ilinniutissaasut oqaluttuarineqarput. (Tussiaat 78) Taava naalaffiup piuneerussaanera upputigineqarpoq, tullinngorporlu Israelikkut utertinneqarnissaannik qinnut. (Tussiaatit 79, 80) Guutip aniguisitsinerata innuttaanullu taanna naalaqqullugu kajumissaarinerup erinarsuutigineqarnerata kingornagut Jehova qinnuigineqartarpoq eqqartuussisunut peqquserluttunut Israelikkullu akeraannut eqqartuussutit naammasseqqullugit. — Tussiaatit 81-83.

◆ 82:1 — Guuti ’eqqartuussilersoq guutit akornanni’ qanoq paasisariaqarpa?

„Guutit“ tassaasimapput Israelimi eqqartuussisut. Guutinik taaneqarput eqqartuussinermut pissaanilissuugamik. Eqqartuussisuunerugami Jehova Guutisut eqqartuussisut taakkua akornannut pisussaavoq Guutip inatsisai naapertorlugit eqqartuussinngitsoorneratigut naviissallugit. — Isaia 33:22; Tussiaat 82:2-4.

◆ 83:10-16 — Tussiaasiortup akiniaaneq kissaatigaa?

Naaggarluinnaq. Guutili qinnuigaa Jehovap ’akerartortaanut’ eqqartuussut naammasseqqullugu. (Versi 3) Tassuuna inuiaqatigiit allat paasiumaarpaat Guuti Jehovamik atilik ilumut „qutsinnerussaar[tuusoq] nunarsuarmi tamarmi“. (Versi 19) Pissaanermik ersersitsinissap tamatuma Guutip aqqa, Jehova, nunarsuarmi tamarmi akitsisikkumaarpaa.

Tamanna sumik ilinniarfigisinnaavarput: ’Qajuusiassat pitsaanerpaat’ eqqartorneqarmata takutinneqarpoq Jehovap naalatsini angingaartumik akilertarai. (Tussiaat 81:16; naleqqiuguk Tussiaat 63:6.) Israelikkut Jehova tusarsimagaluarunikku ’qajuusiassat pitsaanerpaartaannik’ pilluaqquneqarsimassagaluarput. (Tussiaat 81:12; 5 Môrsase 32:13, 14) Uaguttaaq ’Jehova tusarutsigu’ pilluaqqungaarumaarpaatigut. — ússatit 10:22.

Guutimut palligunneq

Tussiaatit 84-imiit 89 ilanngullugu atuakkit. Tussiaasiortut Guutip illuanut kipisanertik ersersippaat. (Tussiaat 84) Aallarussaasut nunavimminnut utersimasut Guuti qinnuigaat kamannini qaangiutiteqqullugu. (Tussiaat 85) David siulersoqqulluni illersoqqullunilu qinnuteqarpoq, Jehovap tusassagaani tatigigamiuk. (Tussiaat 86) ’Zionimi inunngortut’ erinarsuutigineqarput, taavalu annikilliortup qinnutaa tulliuppoq. (Tussiaat 87, 88) Tullinngorlugu Jehovap ilumoorsusia Davidimut angerutsimi ersersoq tussiaasiarineqarpoq. — Tussiaat 89.

◆ 84:4 — Suna pillugu timmissat eqqartorneqarpat?

Tussiaasiortoq, Levikkuusoq Korap kinguaavisa ilaat, Jehovap ’ineqarfiani nuanningaartumiikkusuppoq’. (Versit 2, 3) Levikkulli qulilinnik tuusintilippassuupput. Ukiup affaata ingerlanerani Levikkut sinnerseraattut assigiinngitsut immikkut tamarmik sapaatip akunnera ataaseq taamaallaat ineqarfimmi kiffartortitaasarput. Kisiannili timmiaaqqat illernartuummi ulluliortaramik tassani ineqavipput. Tussiaasiortup pilluarsusissaralua Jehova unnersiutigisinnaagaluaruniuk timmiaaqqatut Jehovap illuani ineqavilluni!

◆ 89:50 — ’Ilumoorsuseqarnera’ suna pineqarpa?

Guutip ’ilumoorsuseqarnera’ tassaavoq Naalagaaffik pillugu angerusia tassungalu tunngasut tamarmik. Israelikkut ajornartorsioraangamik naleqqulluarpoq Jehova neriorsuutaanik tamakkuninnga eqqaasittassappassuk. Imaanngilaq angeruseq qularigaat, angeruserli tunngavigalugu Guuti qinnuigigaat.

Tamanna sumik ilinniarfigisinnaavarput: Guutip pissutsinik aaqqissuussinissaani nutaassami qilanaarutigisariaqakkavut Tussiaat 85-imi erseqqissarneqarput. Timip piisigut pilluaqqussutissat naatsuinnarmik eqqartorneqarput. (Versi 13) Anersaakkulli pilluaqqussutissat — unneqqarissuseq, sallusuissut, iluarneq eqqissinerlu — ingammik erseqqissarneqarput. (Versit 11-14) Timip piinik pilerigisaqarneq Jehovap salliutinngilaa, paasitippaatigulli aaqqissuussinissami nutaassami anersaakkut pilluaqqussutissat allanit annermik kajumissutigissagivut.

„Jehova kunnginngorpoq!“

Tussiaatit 90-imiit 100 ilanngullugu atuakkit. Guutip naassaanngissusia inuit inuuffikinnerannut Mosesip sanilliuppaa, taavalu Jehova ersiuuteqannginnerup puilaffiatut eqqartorlugu. (Tussiaatit 90, 91) Jehovap pissusii nersornarluinnartut unnersiutigineqarput, tussiaatillu kinguliini Guutip pissaanera, ilumoorsusia, naapertuilluassusialu aamma Naalagaaffimmut tunngasut erseqqissarneqarput. — Tussiaatit 92-100.

◆ 90:10 — Moses ukiunit 80-init amerlanerusunik inuusimannginnami?

Moses, ukiuni 120-ni inuusimasoq, inuttut nalinginnaanngilaq. Kinguaariit uppernikitsut Ægyptenimit aniguisut ilaat, naatsorsorneqartut 20-nik ukiulinnit qummut, ukiut 40-t qaangiutinnagit toqusussaapput, ukiut inuit inuuffigisartagaat Mosesip eqqartugai inorlugit. (4 Môrsase 14:29-34) Moses toqugami ’isai taartissimanngitsut, uummarissusiatalu qimanngikkaa’ allassimammat nalunanngilaq Guutip pissaaneranik atatitsisumik pigisaqartoq. — 5 Môrsase 34:7.

◆ 95:3 — Jehova „guutit tamaasa qulangersimallugit“ kunngiusoq qanoq paasisariaqarpa?

Qilammi nunamilu kisimi oqartussaagami, Jehova qutsinnerussaartuuvoq, guutipilunnillu tamanit qutsinnerugami tamaasa qulangersimallugit kunngiuvoq. Jehovap Guutip inngilinut imaluunniit allanut pallorfigineqartartunut, soorlu guutipilunnut piunngitsunut, assersuunneqarnissaanut tunngavissaqanngivippoq.

Tamanna sumik ilinniarfigisinnaavarput: Tussiaat 91-imi Jehovamik nersuinissatsinnut pissutissaq alla erseqqissarneqarpoq, tassa „qutsinnerussaartoq isertugaaffigalugu“ inuusinnaagatta. (Versi 1) Anersaakkut toqqissisimaffiuvoq, naammasseqqusanik tussiaammi uani eqqartorneqartunik eqqortitsisunut anersaakkut ajoquserneqatsaaliorumasunut qimaaffissaalluni. ’Isertorfiuvoq’ silamiut anersaakkut isigisaqanngitsut nalusaat. „Qutsinnerussaartoq“ isertugaaffissaammat nalunanngilaq qilammi nunamilu kisimi oqartussaaneq pillugu akerleriissummi Jehova iligigutsigu aatsaat taanna toqqissisimaffigissagipput.

„Jah unnersiutigisiuk!“

Tussiaatit 101-imiit 106 ilanngullugu atuakkit. Naalagaaffimmut attuumassuteqartunik aqutseriaatsini Davidip allaserai. (Tussiaat 101) Annikilliortup Jehova qinnuigaa ’Zion qarmaqqullugu’. (Tussiaat 102) Tussiaatini tamatuma kinguliini kajumissaarut „Jehova nersoruk“ tutsiuttarpoq, Guutip naakkinnissusia, angissusia pinngortitaalu uparuartorneqartarmata. Oqaaseq „Halleluja“, tassa „Jah unnersiutigisiuk!“ (NW), Tussiaatini 20-riarlugu saqqummersartoq, uani atorneqaqqaarpoq. (Tussiaatit 103, 104) Kiisalu tussiaatini marlunni Jehova nersorneqarpoq innuttani illersorlugit suliarisimasai pillugit. — Tussiaatit 105, 106.

◆ 102:26 — Kia „nuna tunngaviler“paa?

Tussiaasiortup Guuti pivaa, apustililli Paulusip oqaatsit taakku Jesus Kristusimut tunngatippai. (Eprîarit 1:10, 11) Ilumummi, oqaatsit taakku aamma Jesusimut tunngatinneqarsinnaapput, qilammik nunamillu pinngortitsinikkut Jehovap taanna suleqatigigamiuk. (Kulorsamiut 1:15, 16) Taamaattumik eqqortumik oqartoqarsinnaavoq Jesusip „nuna tunngaviler“aa.

◆ 103:14 — Oqaatsit „qanoq pinngortitaasugut“ qanoq paasisariaqarpat?

Oqaatsip „pinngortitaasugut“-ip naggueqatigai oqaluut „sanavaa“ Môrsasip agdlagaine sujugdlerne 2:7-imi atorneqartoq, taggillu „marriortoq“. (Isaia 29:16; Jerimia 18:2-6) Tussiaasiortup eqqaasippaatigut Jehovap, Marriortup Angisuup, qajassuukkaatigut, nalunnginnamiuk puuguttatut marraasutut aserujatigisugut. — 2 Korintumiut 4:7.

◆ 104:4 — Jehovap qanoq ilillugu „anorit nalunaariartortarti“gai?

Imatut nutserneqarsinnaavoq: „Inngilit anersaanngortippatit.“ (NW) Oqaaseq „anersaaq“ isumaqarsinnaavoq anori imaluunniit „pissaaneq sulissutiginnittoq“. Guutip inngilini atorsinnaavai sakkutuumisut peqqusani naammassiartoqqullugu. Aammattaaq eqqartuussummik naammassinnittutut — ’innerit ikualanerisut’ — atorneqarsinnaapput. Kristumiut isumalluutigisinnaavaat nalunnginnamikku oqaluussinertik inngilinit pissaaneqaqisunit tapersersorneqartoq. — Naleqqiuguk sarĸúmersitat 14:6, 7.

Tamanna sumik ilinniarfigisinnaavarput: Tussiaatit 106-ianni paasitinneqarpugut pikitsitsisut Korap, Datanip Abiramillu Moses Guutip innuttaanik siulersuisuuneranik sinngagigaat. (Tussiaat 106:16; 4 Môrsase 16:2-11) Pikitsitsinerat soraarsinneqarpoq „inneq nungutitsi“mmat pikitsitsisuni. (Tussiaat 106:18) Pingaarniarnerup sinnganerullu navianassusii tassuuna ersersinneqarluarput. Jehovap kiffanngortitaanik assortuilluni oqaaseqarneq taassuma iluarinnginneranik kinguneqarsinnaavoq. — Eprîarit 13:17; Jûtarse 4, 8, 11.

Jehovap qujassutissarpassuarnik tunivaatigut. Uatsinnut pilluaqqussutai amerlangaartut eqqarsaatigalugit, tussiaasiortutut oqarumannginnerpugut: „Tarniga, nersoruk Jehova“? — Tussiaat 103:1, NW. (wD 15/12 86)