Jehovap Jesusillu asanninnerannik pingaartitsinerit ersersiguk

’Uagut asannippugut taassuma asaqqaarmatigut.’ — 1 JUÁNASE 4:19.

 1. Jesus sumik uagutsinnut maligassiuiva?

QANOQ ililluta asanninnermik angingaartumik, Jehovap Jesusillu ersersissimasaannik, pingaartitsinerput ersersinniarsinnaavarput? Siullermik Jesus ilaartariaqarparput, taassuma qasusuilluni Ataatami aqqa naalagaaffialu oqaluussissutigisimavai. (1 Pîtruse 2:21) Inuit angerlarsimaffiini, naalagiartarfiini, naalaffimmi, qaqqat saavini sineriammilu taamaaliortarsimavoq. Atagu periaatsit qulingiluat uagut oqaluussinitsinni atorsinnaasavut sammilaariartigik.

Illumit illumut

 2. Illumiit illumut angalaartarneq ingerlattuaannassagaanni suna pisariaqarpa?

² Asanninnitsinnik pingaartitsinitsinnillu ersersitsissutigisinnaasarput siulleq, immaqalu naleqqunnerpaaq, tassaavoq Guutip naalagaaffianik illumit illumut oqaluussissutiginninneq. Taamaaliornitsinni nakimaassuseqartariaqartarpugut, tassami inuit toqqaannartumik saaffigisaratsigik, aammalu inupparujussuit akornusersuisutut isigisarmatigut. Naak soqutiginninngitsut, paamisuttut, asissuisut toqqaannartumillu assortuisut naapittaraluarlugit matumiit matumut angalaartarneq ingerlattuaannassagaanni Guutimut tullermullu ilumoortumik asanninneq pisariaqarpoq. — Naleqqiuguk Hisĩkiale 3:7-9.

 3. Illumiit illumut angalaartarnitsinnut Bibelimi sunik tunngavissaqarpugut?

³ Jesusip apustiliminut aqqaneq-marluusunut, kingornagullu iivangkiiliumik oqaluussissutiginnittunut 70-inut, ajoqersuinera iivangkiiliumik oqaluttuaniittoq naapertorlugu illumiit illumut angalaarlutik Guutip naalagaaffianik tusagassaq nuannersoq oqaluussissutigisussaavaat. (Matîuse 10:5-14; Lúkarse 10:1-7) apustilit suliáinik agdlagkat 20:20-mi Paulusip illumiit illumut angalaartarnini eqqaavaa. Inuit ilaasa oqaatiginiartarpaat Paulusip taamatut oqarnermigut pigaa uppeqatiminik takusaasarnini, kisianni versi 21-p qularunnaarsippaatigut Paulusip suliassaq suna eqqarsaatigalugu taama oqartoq, tassami ima nangippoq: ’Juutillu grækerillu’ — tassa kristumiutut qatanngutaanngitsut — ’nalunaajaaffigalugit Guutimut allamik isumataarnissamik uppernissamillu Naalakkatsinnut Jesus Kristusimut.’ Nalunngilarput ilagiinni utoqqaanertaq uppeqatiminik takusaagaangami ’Guutimut allamik isumataarnissamik uppernissamillu Jesusimut’ kajumissaariartorluni pineq ajortoq. Uppeqatinili ataatsimiittarnerminnik kiffartuussinerminnillu pingaartitsinerunissaannik kajumissaarniarlugit, aammalu inuttut ajornartorsiutaannik ikiorniarlugit ornittarpai.

 4. Illumiit illumut angalaaqataanissamut suup kajumissisippaatigut?

⁴ Illumiit illumut angalaarluta oqaluussisarnitsinnut Bibelimi patajaatsumik tunngavissaqaannanngilagut, aammattaarli kiffartuussinitta kingunerisa takutippaatigut Guutip tamanna pilluaqqugaa. Aap, „ilisimassut suliamigut iluartuutitaasarpoq“. (Matîuse 11:19, NV) Illumiit illumut angalaaraangatta malugisarparput inunnut, naapertuilluassusermik kajungersunut inngilinit ingerlanneqartarluta. Akuttunngitsunik inuit naammattoortarpavut oqaluttuartut qinnutiminnut akissutitut takkuttugut.

 5. Oqaluussinitsinnut ikiuutaalluarsinnaasoq suna pisimavarput, sutigullu ikiorsinnaavaatigut?

⁵ Atuakkami Lad os ræsonnere ud fra Skrifterne-mi (Allakkat Illernartut najoqqutaralugit tunngaveqartumik eqqarsarta, kalaallisuunngortitaanngitsoq) oqaluussinitsinnut pitsavimmik ikiuutissarsisimavugut! Taassuma imarai qanoq assigiinngitsunik Bibelimut tunngasunik oqaloqatiginninnermik aallartitsisinnaasugut, aammattaaq imarai Bibeli upperisarsiornerlu pillugit paasissutissarpassuit iluaqutigisinnaasavut. Taamaattumik nassatariinnarnagu aammattaaq atortarnissaa eqqaamasariaqarparput. Pingaartumik pionerit (tassa piffissaq annertooq atorlugu oqaluussisartut) atuakkamik oqaluussinermut ikiuutaalluartumik tamatuminnga pingaartitsinertik ersersissimavaat. Atuakkap tamatuma pitsaanerusumik akulikinnerusumillu atortalerneratigut Guutip asanninneranik pingaartitsinerit ersersissinnaaviuk?

 6. Naalagaaffimmik tusarliussamik illumiit illumut oqaluussissutiginninnerput qanoq ililluni uagutsinnut iluaqutaava?

⁶ Arajutsisimasariaqanngilarput illumiit illumut angalaarluta oqaluussisarnerput iluaqutigisaqigatsigu. Kristumiuusugut uppernerput suliatsigut ersersikkaangatsigu nakimanatalu oqalukkaangatta, taava nammineq uppernerput nakussatsittarparput. Neriugisarput allanut oqaluttuarigaangatsigu uagutsinnut nalunaallinerunngitsoorneq ajorpoq. Suliassap allap Galâsiamiut 5:22, 23-mi eqqartorneqartutut ittunik anersaakkut inerititaqalersissinnaanngilaatigut, taamaallaat aalajangersimasumik illumiit illumut angalaarluni oqaluussisarnerup. Taamaattariaqarpoq, tassami Bibelimi ima neriorsoqqissaarneqarpugut: „Angut tunisiumatooq siuariaateqassaaq; allanik qiimmassaasoq qiimmassarneqarumaarpoq.“ — ússatit 11:25, New International Version.

Pulaaqqiineq

 7, 8. Suut silatorpasissut pitsaasullu tunngavigalugit pulaaqqiisariaqarpugut?

⁷ Guutip Kristusillu asanninnerannut pingaartitsinitsinnut ersersitsissutigisinnaasarput alla tassaavoq Naalagaaffimmik tusarliussamik soqutiginninnermik ersersitsisimasunik pulaaqqiineq. Paulusip Barnabasillu oqaluussiffigisimasatik eqqarsaatigisarpaat. (apustilit suliait 15:36) Pulaaqqiineq ajoraanni tamanna oqaatsimi akerlianik iliorneruvoq. Matumiit matumut, nalaatsornikkut imaluunniit aqqusinermi oqaluussigaangatta, „anersaakkut ittunik pisariaqartitaqarnerminnik miserratiginninngitsut“ ujartarpavut. (Matîuse 5:3, NV) Kisianni naammanngilaq anersaakkut ittunik immiartorfimmut imermik iffiaminermilluunniit tunigutsigik. Inuunerup aqqutaatigut ingerlaneq ilinniassappassuk ikiornerusariaqarpavut.

⁸ Inuk alla siullermeerlugu oqaluussiffigigaangatsigu sallusuissutip naatsiiassartaanik nakkalatseriffigisarparput. Kisianni apustili Paulusip Korintumiunut agdlagkat sujugdlît 3:6, 7-imi oqarneratut qanoq iliuuseqarnerusariaqarpugut. Naammanngilaq nakkalatserillunilu naasussanik ikkussuigami. Aammattaaq naatsiiassaq imerterneqartariaqarpoq, tamannalu Apollosip isumagaa. Kingornagullu ilimagisariaqarpoq Guutip naalersikkumaaraa. Ilavut pulaaqqiinngitsoortarput, naak amerlasuut isumaqaraluartut taamaaliorneq kristumiutut oqaluussinikkut kiffartornermi oqinnerit ilagigaat. Sooq? Tassa pulaaqqitavut soqutiginninnermik ersersitsilaareersimasuummata.

Bibelimik atuaqqissaaqateqarneq

 9. Bibelimik atuaqqissaaqateqalernissarput sooq anguniagarisariaqarparput?

⁹ Naalagaaffik pillugu tusagassamik soqutiginninnermik ersersitsisimasut akuttoqatigiissumik pulaartaraangatsigik kingunerigajuttarpaa Bibelimik atuaqqissaaqatigisalerneri — tamannalu pingaartitsinermik ersersitsissutigisinnaasatta ilaasa pingajoraat. Bibelimik atuaqqissaaqateqarneq kiffartuussineruvoq nuannaarnermik annerpaamik naammagisimaarinninnermillu nassataqarsinnaasoq. Sooq? Inuit allat Bibelimik ilisimassusiat pingaartitsinerallu alliartortoq isigalugu, aammalu inuunerminnik allannguiartuaartut isigalugit nuanningaartuummat, nuanningaartuullunilu Guutimut tunniulluinnarnissaasa kuisinnissaasalu tungaannut ikiornerat. Anersaakkut meerarilersarpavut, uagullu taakkununnga anersaakkut angajoqqaajulersarluta. — Naleqqiuguk Korintumiunut agdlagkat sujugdlît 4:14, 15; Pîtrusip agdlagai sujugdlît 5:13.

10. Bibelimik atuaqqissaaqateqarnerup pingaaruteqassusia suup ersersippaa?

¹⁰ Pisimasoq aatsaat pilinngitsoq manna eqqarsaatigeriaruk. Qeqertami Caraibeap imartaaniittumi ajoqersuiartortitaq illumiit illumut angalaartilluni aappariit hippieusut angerlarsimaffiannut alianaannanilu torinngeqisumut iserpoq. Tusarliussamut soqutiginninnermik ersersitsipput atuakkamillu Bibelimik atuaqqissaarutaasumik pillutik, angerlarsimaffimminnilu Bibelimik atuaqqissaaqatigineqartalerput. Naak arlalinnik meeraqaraluarlutik katissimanngillat. Atuaqqissaartarnerat sivitsoriartortillugu angerlarsimaffiat takujuminarneruleriartorpoq, aammalumi namminneq meeqqatillu. Sivitsunngitsoq ajoqersuiartortitaq qinnuigaat katiteqqullutik, katereeramillu kuisissinnaanngorput. Taava ullut arlaanni qatanngutitaarput angut nuannaarpaloqaluni aggerpoq biilernermullu allagartartaani takutillugu, biilernermut allagartartaava siulleq, naak biilertuaannarsimagaluarluni. Jehovamut Nalunaajaasunngunngikkallarami isumaqarsimagaluarpoq katinnermut biilernermullu allagartat pisariaqanngitsut, kisianni massakkut Guutip kaasarillu inatsisaannut malinnittunngorpoq.

Aqqusinermi nalunaajaaneq

11, 12. (a) Allassimaffiup suup aqqusinermi nalunaajaanermut peqataanissamut kajumissaarpaatigut? (b) Suut pissutigalugit aqqusinermi nalunaajaasariaqarpugut?

¹¹ Guutip Kristusillu uagut pilluta iliuuserisimasaannut pingaartitsinitsinnik ersersitsissutigisinnaasatta sisamaat tassaavoq aqqusinermi nalunaajaanermut peqataaneq. Taamaaliorutta ússatit 1:20, 21 eqqortumik oqaatigalugu timitalissavarput: ’Ilisimassut torlulavoq illut akornanni, nipini anippaa illut akorlunnerini; perpaluffiusut isuini torlulavoq.’

¹² Pissutissaqarluarpugut Naalagaaffimmik oqaluussissutiginninnerup ilaanut tassunga akuttoqatigiissunik peqataanissatsinnut. Amerlasuutigut inuit angerlarsimaffiini naapinnissaat ajornarsiartuinnarpoq. Tassami sulipput, niuerniarsimallutik, timersorlutik imaluunniit arlaannik soqutigisaminnik suliaqarlutik, taamaattumillu angerlarsimaneq ajungajallutik. Amerlasuullu inissiarsuarni nalinginnaanngitsuni najugaqarput, allallu kollegiani imaluunniit arlariikkuutaarlutik najugaqarlutik, taamaattumillu attaveqarfiginiarnerat ajornakusoorpoq. Taakkua ilarpassuisa aqqusinermi oqaluussinitsinni naapinnissaannut periarfissaqarpugut.

13. Aqqusinermi nalunaajaanerput sunik kinguneqarsinnaava? Assersuummik taasaqarit.

¹³ USA-mi ilagiit ilaanni utoqqaanertat ilaat aqqusinermi nalunaajaatilluni naapissimasami ilaat sisamat massakkut Bibelimik atuaqqissaaqatigisarpai. Soorunami tamanna angunngilaa qeqqiinnarluni atuagassiat tigullugit oqassananilu. (Nunalli ilaanni inatsisitigut tamanna kisimi akuerisaavoq.) Aap, inussiarnerpaluttumik qungujulluni nuannaarpaluttumillu nipeqarluni inunnut bussimik utaqqisunut imaluunniit eqqissillutik pisorujoortunut saaffiginnittarpoq. ’Tusarnersumik, tarajorsimasumik’ oqaluttarpoq, siuneqassutsinilu atorlugu inunnut ataasiakkaanut qanoq ililluni saaffiginnissalluni aalajangertarlugu. (Kulorsamiut 4:5, 6; 1 Pîtruse 3:15) Aqqusinermi nalunaajaanermigut Bibelimik atuaqqissaaqateqartaliinnarani aammattaaq atuagassiat Bibelimut tunngasut amerlasuut tunisimavai. Torersunik atisaqarluta, inussiarnersumik qungujulalluta nakimanatalu aqqusinermi atuagassianik siaruarterigutta, tamatta ajunngitsumik angusaqarsinnaavugut. Ungasinngitsukkut oqaluussisartut tallimat atuakkat Livet — hvordan er det kommet her? Ved en udvikling eller en skabelse?-mik (Inuuneq — qanoq ililluni takkuppa? Pinngoriartornikkut imaluunniit pinngortitaanikkut? kalaallisuunngortitaanngitsoq) taaguutillit allaat 30-t tunisimavaat. Niuertarfiit akornini oqaluussisimapput, atuakkallu ilarpassui inunnut biiliminni utaqqisunut tunisimallugit.a

Nalaatsornikkut oqaluussineq

14. Suup takutippaa nalaatsornikkut oqaluussinerup pisariaqassusia?

¹⁴ Asanningaarnermut Guutip Kristusillu uagutsinnut ersersissimasaannut pingaartitsinitsinnik ersersitsissutigisinnaasatta tallimaat tassaavoq nalaatsornikkut oqaluussineq. Inunnik iluarnermut kaattunik imerusuttunillu nanisinissaq, aammalu atuakkanik tunisinissaq eqqarsaatigalugit tamanna periaaseq kinguneqarluarajuttarpoq. Nalaatsornikkut oqaluussisarutta Evfisumiut 5:15, 16-imi allassimasoq: ’Ullullu piginnaaffiusut asiutinnaveersigik,’ maleruassavarput. Ajoqersuiartortitap taxami ilaasoqanni oqaloqatigilerpaa, angullu soqutiginnippasilerpoq. Ajoqersuiartortitallu kingorna angut taanna arlaleriarluni pulaartarpaa, Bibelimillu atuaqqissaaqatigisalerlugu. Ullumikkut angut taanna ilagiit kristumiuusut ilaanni utoqqaanertatut kiffartorpoq. Allami utoqqaanertat ilaata arnaq, sunaaffa juutimut katissinnaajumalluni upperisaminik allannguilersaartoq, oqaloqatigilerpaa. Taassuma Moses, Noa, David allallu qangarpiaq inuusimanersut paaserusuppaa. Oqaluussisartup oqaluttuuppaa tamakku paaserusukkunigit atuagaq bîbilimik oĸalugtuautíka, Bibelimi pisimasunik ukiui tulleriiaarlugit oqaluttuartoq, atorfissaqartikkaa. Naak siornatigut imminnut takusimanngisaannaraluarlutik arnap nangaanani atini najukkanilu tunniuppai, aningaasallu atuakkamut akissani tunniullugit imminut nassiunniassammagu.

15. Nalaatsornikkut oqaluussinissamut periarfissanik arajutsinaveersaarnissatsinnik suup ikiussavaatigut?

¹⁵ Immaqa ilaannikkut inunnut oqaluussinermik aallartitsinissatsinnut nangaasoortarpugut, tassa ilasseraannginnissaat annilaanngatigisaratsigu. Sapiillisariarlutali nalaatsornikkut oqaluussigaangatta pilluaqquneqangaartarpugut. Ajunngissusermut Guutip uagutsinnut ersersissimasaanut qujamasukkutta inuillu pisariaqartitaannik tuninissaat kissaatigigutsigu, taava pisariaqartumik sapiissuseqarniarsinnaassaagut. Eqqaamajuk, ’Guutip anersaamik nangaassutaasumik tuninngilaatigut, kisianni sapiissutaasumik asannissutaasumillu silatusaarutaasumillu’. — 2 Timûtiuse 1:7.

Nutaat tikilluaqqusakkit

16. Sooq rigssalimut takkuterngaat inussiarnisaarfigisariaqarpavut?

¹⁶ Guutimut Kristusimullu qujamasunnitsinnut ersersitsissutigisinnaasatta arfernat tassaavoq rigssalimut takkuterngaanik ilassinninneq tikilluaqqusinerlu. Tullitsinnut asanninnitta killittariaqarpaatigut takkuterngaanut inussiarnisaarnissatsinnut. Toqqissisimanissaat sapinngisatsinnik isumagisartigu, malugitillugu ikinngutaasugut anersaakkullu ajunngitsumik ingerlanissaat soqutigigipput. Alapernaanniaannarlutik aggersimanavianngillat. Immaqa iluarnermut kaallutillu imerusupput. Taakkuninnga ilumoortumik soqutiginninnitta kingunerisinnaavaa Bibelimik atuaqqissaaqatigisalernerat, taamaalillutalu inuunerup aqqutaagut ingerlanissaannik ikiorlugit. (Matîuse 5:3, 6; 7:13, 14) Qassiinik taamatut pisoqartareerpoq. Ajoqersuiartortitaq Gileadimi klassemi siullermi atuarsimasoq oqaluttuarpoq atuaqqissaaqatigisartagarisimasami neriunaateqarnerpaartaat marluk tassaasimasut rigssalimi takoqqaakkami ilaat.

Allakkatigut oqaluussineq

17. Allakkatigut oqaluussinerup suut kingunerisinnaavai?

¹⁷ Guutip Kristusillu asanninnerannik pingaartitsinitsigut oqaluussinermi atorsinnaasatta arfineq-aappaat tassaavoq allakkatigut oqaluussineq. Taamatut oqaluussisartut qassiitigut qujamasuppaluttunik akissutisisarput. Allamik atorfeqaratik oqaluussisartut ilaat napparsimanertik pissutigalugu illumiit illumut angalaarsinnaajunnaarallarsimasut oqaluusseriaaseq tamanna atorsimavaat, pitsaasumillu kinguneqarsinnaasarpoq. Assersuutitut una taasinnaavarput: ataataq ullut ilaanni meeqqaminut aqqaneq-marluusunut angerlarluni apuuppoq paasillugulu meeqqami ilaat tallimat panimmi ikinngutaasa ilaata naakkittaatsumik aallaarsarisimagai toqullugit. Kristumiuunerartut palasiinut tuppallersaatissarsioraluarpoq, iluatsitsinanili. Taava ullut ilaanni ilisarisimanngisaminit allagarsivoq, tassa Jehovamut Nalunaajaasumit, pisimasoq alianartoq tamanna pillugu atuarsimasumit, tuppallersaarusuttumillu. Nalunaajaasullu ilanngullugu nassiuppaa atuagaq „sagdlussuíssut“-mik atilik. Atuagarlu taanna angutip ujagartugarpiaanik imaqarpoq. Ullumikkut taannattaaq ilungersuussilluni oqaluussisartuuvoq.b

Oqarasuartaatikkut oqaluussineq

18, 19. Oqaluusseriaaseq alla suna kinguneqarluarsinnaava, aammalu sooq?

¹⁸ Naalagaaffik pillugu tusagassamik nuannersumik oqaluussinermi atorneqarsinnaasut arfineq-pingajuat tassaavoq oqarasuartaatikkut oqaluussineq. Malunnarsiartuinnarpoq tamanna oqaluusseriaasiusoq nuannaarutaallunilu kinguneqarluartartoq. Taamatut oqaluussineq, iluaquterpassuaqartoq, taanna atorlugu oqaluussinermik sungiusartut amerliartuinnarput. Illumiit illumut angalaarnikkut naapissinnaasimanngisavut oqarasuartaatikkut attaveqarfigisinnaavavut. Isumatussuseq, inussiarnissuseq, pissuserissuseq pikkorissuserlu oqarasuartaatikkut oqaluussinermi atoraanni, angerlarsimaffiinut pulaarneranninngarnit taamaaliorneq allaat pitsaanerusumik kinguneqarsinnaasarpoq.

¹⁹ Nunat ilaanni tuluttut oqaluffiusumi ilagiinnit Japanimiuusunit oqarasuartaatit allattorsimaffiat oqaluussiffigisassat immikkoortortaasa ilaattut isigineqarpoq. Japanimiunut oqarasuartaatit allattorsimaffianniittunut oqaluussisartut sianertarput, soqutiginnippaluttullu isumaqatigiissuteqarfigisarlugit aggernissaminnik. Taamaalillutillu ikinngeqisunik atuaqqissaaqatitaartortarput.

Pissuserissaarneq

20, 21. Pissuserissaarnerput qanoq kinguneqarsinnaava? Assersuummik taasaqarit.

²⁰ Guutimik unnersiutiginnissutigisinnaasatta qulingiluaat tassaavoq pissuserissaarneq. Tusagassiortoq russeq ilaanni oqarsimavoq pissuserissaarnerput oqaluussissutigigipput pitsaanerpaaq, aammalu tusagassiuutitigut arlalinnik Jehovamut Nalunaajaasut ileqqussatigut siuarsimanerat pillugu nersualaarneqartarput. Tyskit aviisiisa ilaanni ilaatigut ima allassimasoqarpoq: „Nalunanngitsumik Jehovamut Nalunaajaasut Tysklandimi unneqqarinnersaapput.“ Niviarsiannguup, Jehovamut Nalunaajaasut ilaata, ukiup atuarfiusup aallartinnerani ilinniartitsisuni atuagaaqqamik „Atuarfeqarfik aamma Jehovap Nalunaajaasui“-mik (kalaallisuunngortitaanngitsoq) taaguutilimmik nassaappaa. Taassumali tigujumanngilluinnarpaa, oqarlunilu Jehovap Nalunaajaasuinut tunngasunik sunilluunniit sammisaqarumanngilluinnarluni. Niviarsiannguulli pissuserissaarnera paasiartuleramiuk nersualaartartorujussuanngorpaa, Jehovap Nalunaajaasuinillu isiginninnera allanngorluinnarpoq. Aappariit kristumiut meeqqamik ilinniartitsisuannit allagarsisimapput, ilaatigut ima allattumit: „Meeqqasi assortugassaanngitsumik ersiutaapput qanoq upperisassi sunniuteqarsimaneranik.“

²¹ Jehovap Nalunaajaasui silamiunit ajunngitsumik eqqartorneqaraangata pinngitsoorani Guutimut Kristusimullu ataqqinaatsissaasarpoq. Taamaattariaqarpormi. Jesusimi oqannginnerpa qaamasorput inunnut qaamassasoq ajunngitsuliavut taakkununnga takoqqullugit ataatarpullu qilammiusoq unnersiutigeqqullugu? (Matîuse 5:16) Ilumut, pissuserissaarnitsigut sallusuissummut ataqqinaataasinnaavugut. (Títuse 2:10) Pissuserissaarnitta Guutimut Kristusimullu ataqqinaataanera aammalu allat inuunerup aqquserngatigut ingerlalernissaannut ikiuutaanera eqqarsaatigalugu, qanoq pissusilersornerput sianigeqqissaartariaqarparput, isornartumik pissusilersunngisaannarsinnaaqqulluta.

22. Pingaartitsinermik ersersitsissutigisinnaasatta assigiinngitsut ilaat sorleq illit immikkut sulissutigerusuppiuk, aamma sooq?

²² Soorlu takoreeripput, assigiinngitsorpassuartigut Jehovap Jesus Kristusillu uagutsinnut iliuuserisimasarpassuinut tamanut, ingammik asanninnerannut angingaartumut, pingaartitsinerput ersersissinnaavarput. Taamaaliorutta tamanna ilutigalugu tullitsinnut asanninnerput ersersissavarput. — Mákorse 12:30, 31.

23. Guuti Jesusilu pingaartitsinitsinnik aammattaaq qanoq ersersitsivigisinnaavavut?

²³ Naggataatigut taasigu asanninnermik ersersitsinernut annernut marlunnut taakkununnga pingaartitsinitsinnik ersersitsissutigisinnaasarputtaaq tassaammat Naalakkap unnukkorsiortitsineranik eqqaaniaaneq. Unnummi kingullermi Jesusip inuttut nunamiiffimmini eqqaaniaaffissamik ukiumoortumik timiusaq viinnilu, timiminut aamminullu assersuutaasut, atorlugit aallarniivoq. Peqqusivoq nalliuttorsuaq taanna nammineq eqqaaniarluni nalliussineqartassasoq. (1 Korintumiut 11:23-26) Aappaagu Naalakkap unnukkorsiortitsineranik eqqaaniaaneq pissaaq pingasunngornermi martsip ulluisa 22-anni seqernup tarrinnerata kingorna. Nunarsuaq tamakkerlugu Jehovap Nalunaajaasui Jesusip peqqusineranut tamatumunnga naalallutik katersuuterratissapput. Nalliuttorsuaq tamanna ilaaffiginngitsorniaqinagu! (wD 15/2 87)

[Quppernerup ataani ilanngussat]

Apeqqutit uteqqitassat

□ Sumi qanorlu Jesus oqaluussisarpa?

□ Assigiinngitsutigut sutigut Jesus ilaarniarsinnaavarput, sutigullu Guutip asanningaarneranik pingaartitsinitsinnik ersersitsiniarsinnaavugut?