Inngilit inuuninnut sunniuteqarpat?

ILUMUT inngileqarpa? Imaluunniit tassaaginnarpat inuit eqqarsaatersuutaannit pisut? Inngileqarsimappat, taava illit inuuninnut sunniuteqarsinnaappat?

Apeqqutinut taama ittunut ataasiinnarmik tutsuiginartumik akissutissarsiffissaqarpoq, taannalu tassaavoq oqaluttuaq isumassarsiarititaasoq Guutip inunnut tunniussimasaa — taassuma oqaasia, Bibeli. Oqaluttuaq taanna pillugu apustili Paulus ima allappoq: ’Allakkat tamarmik Guutip anersaarneranik ilallit atortussaapputtaaq ajoqersuutaallutik.’ — 2 Timûtiuse 3:16.

Taamaattumik tatigisinnaavarput inngilit pillugit taakkualu inuunitsinnut sunniuteqarsinnaaneri pillugit apeqqutivut unneqqarissumik Bibelimi akineqassasut. Nunarsuup avataarsuatalu Pinngortitsisuata soorunami oqaluttuussinnaavaatigut inngilit ilumut pinngortissimanerlugit.

Inngileqarpa?

Bibelimi ersarilluinnartumik ima allassimasoqarpoq: „[Guutip] inngilini anersaanngortippai.“ (Eprîarit 1:7, NV) Tassa inngileqarpoq — taakkulu tassaapput anersaat qilammi Pinngortitsisup ilagisai. Uagutsinnit inunnit takuneqarsinnaanngillat aammalu annertoorujussuarmik pissaaneqarput. — Tussiaat 104:4; 2 Pîtruse 2:11.

Guutip siunertarinerpaa inngilit pinngortitaassasut kinaassusiliunngitsut aammalu iluamik oqaatigineq ajornartut? Naamik, taamaassimagaluarpammi inngilit pinngortitatut misigissusilittut Bibelimi eqqartorneqarnavianngillat. Assersuutigalugu paasitinneqarpugut nunarsuaq tunngavilerneqarmat inngilit ’qiimmattaqatigiittut, Guutillu erneri [inngilit] tamarmik tipaatsungaartut’. — Jûpe 38:4-7.

Anersaatut pinngortitatut silaqarsusilittut inngilit qularnanngitsumik tamarmik immikkut kinaassusiliupput, soorlu Guutip nunami pinngortitai silaqarsusillit taama ittut. Naak Bibelimi inngilit marluinnaat aqqi taaneqaraluartut (Mikael aamma Gabriel), taamaattoq tamatuma ersersippaa assigiinngitsuusut tamarmillu immikkut ateqartut. (Lúkarse 1:11, 19, 26; Jûtarse 9) Inngilinut pallorfiginninneq sunaluunniit sakkortuumik Bibelimi avoqqaarineqarpoq. Inngilinut qinunermut taarsiullugu, apustili Paulus ima siunnersuivoq: ’Suulluunniit pillugit isumakulunnaveeritsi, nungullugilli kissaatigisasi Guutimut nalunaarsigik torlulallusi qinullusilu qujallusilu.’ — Filípimiut 4:6; sarĸúmersitat 19:10; 22:8, 9.

Ileqqussaq eqqarsaatigalugu inngilit eqqortumik eqqunngitsumillu namminneq aalajangiisinnaatinnagit inuusaliatut aquttakkatut siumut qanoq iliuusissaat aalajangereerlugit sanaatut, pinngortinneqarsimappat? Naamik, ileqqussaq eqqarsaatigalugu inngilit inuttulli kiffaanngissuseqarlutik pinngortitaapput. Assersuutigalugu Noap nalaani inngilit ilaat Guutip inatsisaanik unioqqutitsipput, taamaaliormatalu Guutimit ajattorneqarput. Guutip qilammi oqartussaaffianit anisinneqarput. Naalanngitsumik iliornerisigut ersarissumik paasinarsivoq inngilit qanoq iliornissaminnut kiffaanngissuseqartuusut. — 1 Môrsase 6:1, 2; 2 Pîtruse 2:4; Matîuse 25:41.

Taamaalilluni Bibelimi inngilit pillugit iluaqutaasunik paasissutissinneqarpugut, pilerfiat pissusiallu pillugit. Guutip oqaasiani paasissutissat qulaallugit paasiniaagutta, apeqqutinut Bibelimi akissutissartaqanngitsunut eqqarsaatersuutinut iluaqutaanngitsunullu sangoqqajaassaagut. Taamaalillutalu allaat tammartinneqarsinnaalluta inngilinut eqqunngitsumik ataqqinnilerluta imaluunniit pallorfiginnilerluta. (Kulorsamiut 2:18) Bibelimi kajumissaarneqarpugut ’sorliit iluarnersut misilittaqqullugit’ aammalu tusagassatut nuannersutut nalunaajaassutigineqareersut qulaateqqunagit. — Filípimiut 1:10; Galâsiamiut 1:8.

Inngilit aamma Guutip siunertaa

Naak inngilit pilerfiat immikkullu malunnaataat pillugit qularnanngitsumik amerlasuut isumaqatigiissagaluartut, taamaattoq ikittuinnaat ilisimavaat sooq inngileqarnersoq aammalu taakku ullumikkut qanoq ilillutik inuunitsinnut sunniuteqarnersut.

Bibelimi oqaatsimut „inngili“mut oqaatsit marluk atorneqarput, tassa oqaaseq hebræerisooq mal’akhʹ aammalu oqaaseq grækerisooq agʹgelos [taaneqassaaq: anʹgelos]. Oqaatsit taakku marluk tamarmik isumaqarput „aallartitaq“. Oqaatsit taakkua oqaluttuuppaatigut inngilit suliarisartagaasa ilaannik, tassa Guutip inuillu akornanni aallartitaasartut imaluunniit nalunaariartortartuusut.

Assersuutigalugu inngili aallartinneqarpoq Abraham nalunaarfigiartorlugu ernera Isak pillugu taannalu aqqutigalugu pilluaqqussutissaq, uaguttaaq peqataaffigisinnaasarput, takkukkumaartoq pillugu. (1 Môrsase 22:11-17) Inngili alla Mosesimik oqaloqatiginnitsikkiartorlugu aallartinneqarpoq. (apustilit suliait 7:37, 38) Aammattaaq Guutip inngili aallartippaa pruffiiti Elias nalunaarfigiartoqqullugu. (2 kúngit 1:3) Aammalu Josefimut, Jesusip ataatassaanut, inngili saqqummerpoq meeraq pillugu unnersuussutinik immikkut ittunik nalunaarfigiartorlugu. — Matîuse 2:13.

Aammattaaq inngilit suliassaraat Guutip innuttaanik sernissuineq: „Jehovap inngiliisa taassuminnga mianerinnittut ungullugit tammaarfigissavaat annaakkumallugit.“ (Tussiaat 34:8) Assersuutigalugu inngili akuliuppoq apustili Peterilu parnaarussivimmit aniguisillugu. (apustilit suliait 12:6-11) Illoqarfiit Sodomap Gomorrallu aserugaaneranni Lot paniilu inngilinit marlunnit ikiorneqarput ulorianartumit peersinneqarlutik, taamaalillutillu annaanneqarlutik. Lotilli nuliata inngilit unnersuussutaat maleruarpallaanngilaa, tamatumalu kinguneraa illoqarfinnut taakkununnga nungutitaaqataanera. — 1 Môrsase 19:1-26.

Bibelimi oqaluttuarpassuaqarpoq inngilit ikiuiartortarsimanerannik ersersitsisunik, tamatumalu Eprîarit, kapitali 1, versini 7-imi 14-imilu allassimasut ilumoortuunerat uppernarsarpaa, ima allassimagami: „Inngilillu pillugit ima oqaaseqarpoq: ’Inngilinilu anersaanngortippai, tamanullu kiffani inninngortippai ikualasut.’ Taakku tamarmik tassaannginnerpat anersaat tamanut kiffartortut, annassummik kingornussisussat pillugit kiffartoqqullugit aallartitaasut?“ — NV.

Jesusip toqunissaa ullormik ataatsimik sioqqullugu unnukkut inngili taassumunnga saqqummerpoq nakussatsillugulu. Jesusip nalunngilluinnarpaa suneqarumaarluni — killuunneqarumaarluni, unatarneqarumaarluni naakkittaatsumillu toqunneqarumaarluni. Assuarnaassutsiminik misilinneqarnini tamanna anigorniassaguniuk nukissaqartariaqarpoq. Piffissaalluartukkullu inngili taassumunnga saqqummerpoq ’nakussatsillugulu’. Inngilip tuppallersaanera tamanna ila qanoruna Jesusimut sakkortusimatigaa! Naak sioorangaaraluarluni allaat ’kiagunneri kusernertut aajusutut nunamut nakkaallutik’, taamaattoq toqumut allaat aalajaattuarnissaanut ikiorpaa. — Lúkarse 22:43, 44.

Innuttami akeraanik nungutitsinermini aammattaaq Guutip inngilini atortarsimavai. Makku pisimapput Guutimut pallorfiginnittut Assyriamiut naalagaaffissuannit navianartorsiortinneqarmata: ’Pivorlu unnuaq taanna, taava Jehovap inngilia anivoq Assyriamiut tammaarfianni toqorarlugit hundredelinnik arfineq-pingasunillu qulilinnik tallimanillu tuusintillit [185.000-it]; ullaakkullu makiaarmata tassa-uku tamarmik timit toqungasut.’ (2 kúngit 19:35) Tamatuma pitsaasumik takutitsiarpaa qanoq inngilit pissaaneqarluinnartiginerat — Guutimut innuttaanullu akerartortut 185.000-iusut pillarlugit toqunneqarnissaannut inngili ataasiinnavik pisariaqarsimavoq!

Aammattaaq Herodesip nammineq timimigut misigisimavaa inngilip ataasiinnaap qanoq pissaaneqartiginera. Guutimik mitaatiginnilluni isumaqalermat guutisut illuni ’taavaannaq Jehovap inngiliata patippaa, Guuti naalannartinngimmagu; qumallu nerimmanni anerningerpoq’. — apustilit suliait 12:21-23.

Paasivarput erniinnaq Guutip aaqqissuussaaneq manna ajortoq suujunnaarsileruniuk aamma inngilini eqqartuussutiminik naammassinninnermini atorumaarai: ’Inuup ernerata inngilini aallartikkumaarpai, taakkualu aserorsaarutit tamaasa iluaatsuliortullu naalagaaffianit katersorumaarpaat, aatsitsivimmullu ikualasumut igissavaat.’ — Matîuse 13:41, 42.

Tassa maanna paasivarput inngilit silarsuarmut piviusumut attuumassutillit aammalu inngilit inuit eqqarsaatersuutaannit piliaasut assigiinngissuteqartorujussuusut. Atuakkamut Was wirklich in der Bibel steht-imut (Bibeli qanorpiaq imaqartoq) atuakkiortoq tyskiusoq, dr. Manfred Barthel, ima allappoq: „Inngilit Tastamantitoqqamik allattut takusimasaat takorloorniassagutsigik, taava siullerpaamik assiliaaqqani pilluaqqussutini assiliartaasartut . . . inngilit qungujulaartut puiortariaqarpavut.“

Inngilit inuuninni sumik pingaaruteqarpat?

Maanna makku apeqqutaalerput: Nalitsinni inngilit suliaqarpat? Maannakkorpiaq inuunitsinnut sunniuteqarpat? Tamarmik ima akissutissaqarput: Aap, ilaana!

Eqqaamajuk ’pissutsit aaqqissuussaanerata naalerfissaa’ pillugu siulittuutimini Jesus qanoq oqartoq: „Inuup Ernera naalannassutsi atisimallugu tikiukkuni [kunngiussuseq imminut tunniunneqarpat], inngilillu tamaasa ilagalugit, taava issiavissaarsuarminut naalannassutsimi pianut ingissaaq. Inuiaqatigiillu tamarsuarmik saanut katersorneqassapput, inuillu avissaartitissavai soorlu nersutaatinik paarsisup savat savaasanit avissaartitertarai.“ — Matîuse 24:3, NV; 25:31, 32, NV.

Inunnik avissaartiterineq tamanna qanoq ililluni ingerlanneqassava? Tamanna pillugu Jesus aammattaaq ima siulittuivoq: „Naalagaaffimmillu tusagassaq nuannersoq tamanna nunarsuarmi inuit najugarisaanni tamarsuarmi inuiaqatigiit tamarmik nalujunnaarutissaannik oqaluussissutigineqassaaq; taavalu naggatissaq nalliutissaaq.“ (Matîuse 24:14, NV) Guutip nunami innuttani nunarsuaq tamakkerlugu oqaluussinermik tamatuminnga suliaqartitarai.

Inuiaat ajornartorsiutaannik qaqugumut aaqqiisinnaasutuaq tassaavoq Guutip naalagaaffia. Tamatuminnga nalunaarut ullumikkut nunarsuaq tamakkerlugu Jehovap Nalunaajaasuinit millioninit pingasunit sinneqartunit, suliaminnik inngilinit tapersersorneqartunit, oqaluussissutigineqarpoq. ’Taamattaaq silap matuma naggatissaani ikkumaarpoq: inngilit aallarumaarput ajortut iluartut akornannit piiariartorlugit.’ — Matîuse 13:49.

Oqaluussissutiginninneq tamanna, eqqortumik oqaatigalugu inngilinit siulersorneqartoq, nunarsuaq kaajallallugu inunnit assigiinngitsunik qisuariarfigineqartarpoq. Ilaat oqartarput tusarnaarnissaminnut ulapippallaarlutik imaluunniit tusarnaarusunngivillutik. Allat nangaasarput aalajangersinnaasaratillu. Taamaakkaluartorli inuppassuit peqqusersuitsut siunissamik soqutiginnittut ajunngitsumik qisuariarsimapput. Qanoq ilillutik?

Nunani 208-ni Jehovap Nalunaajaasui angerlarsimaffinni inunnik millionilinnik „anersaakkut ittunik pisariaqartitaqarnerminnik miserratiginninngitsu“nik (NV) aammalu ’iluarnermut kaattunik imerusuttunillu’ Bibelimik atuaqqissaaqatiginnittarput. (Matîuse 5:3, 6) Oqaluttuarpassuaqarpoq ersersitsisunik Guutip kiffai inunnut peqqusersuitsunut inngilinit ingerlanneqartartut, taamaalillutik taakku annassummik tusarliussamik tusarlerneqarlutik. sarĸúmersitat 14:6-imi assersuutaasumik eqqartorneqarpoq ’inngili qilaap missaagut timmisoq’ ’tusagassamik nuannersumik ittuinnartumik oqaatigisassaqartoq nunamiusunut tamanut’. Tamannarpiaq maannakkut ingerlanneqarpoq! Tamatuma siunissat qanoq ililluni attuumassuteqarfigaa?

Inngilit siunissamullu neriugisat

Nalerput ersarissumik Bibelimi taaneqarpoq aaqqissuussaanerup matuma ’ullui kingulliit’. (2 Timûtiuse 3:1-5) Bibelimit aammattaaq erseqqissaanneqarpugut inngilit maanna ’nunap teqeqquini sisamani qeqartut nunallu anoraanik sisamanik tigumiartut’. (sarĸúmersitat 7:1) Tamanna qanoq isumaqarpa?

Inngilit nunap ’teqeqquini’ nikorfagamik aseruinerup ’anorai’ sammivinnit tamanit aallartissinnaavaat. Nunap immikkoortuisa arlaannaalluunniit aniguinavianngilaq, tassa imaappoq aaqqissuussaaneq ajortoq maannakkut atuuttoq taassuminngalu tapersersuisut ’aserorneqassapput’, imaluunniit suujunnaarsinneqassapput. Allaaserisaq tamanna naapertorlugu Guutip inngilii siggartaassuaq siggariarpat saassussinissaminnut piareersimapput! — sarĸúmersitat 7:3; 19:11-21.

Kisianni piuneerussinerup imaluunniit ’aseruinerup’ tamatuma taamaallaat eqqussavai inuit, tusarliussamik inngilit siulersuinerisigut maanna nunarsuaq tamakkerlugu ingerlanneqartumik, ilassinnikkumanngitsut. Guutimik ujartuisut Naalagaaffillu pillugu tusarliussamik tusarnaartut eqqorneqarnavianngillat. Sernissorneqarumaarput, Guutimmi oqaasiani ima allassimavoq: ’Jehova ujarsiuk, nunami ilalaartortaasusi tamassi-aa . . . iluarnissaq ilungersuutigisiuk, ilalaarnissaq [qanilaarnissaq] ilungersuutigisiuk. Isertugassaajumaarnersusi Jehovap ninngannerata ulluani.’ — Sivfânia 2:3.

’Qanilaartut’ siunissaat qanoq isikkoqarpa? Tussiaat 37:11-mi ima allassimavoq: „Kisianni qanilaartut nuna kingornutissavaat, pilluangaarlutillu inuussapput.“ Pissutsit taama ittut qanoq sivisutigisumik atuutissappat? „Iluartut nuna kingornutissavaat najugaqassallutillu tassani naassaanngitsussamut.“ (Tussiaat 37:29) Tamanna ima isumaqarpoq nunarsuarmi paratiisinngortitaasimasumi naassaanngitsumik inuunissamut periarfissaqartugut, soorlu Jesus taama oqarsimasoq. — Lúkarse 23:43.

Taamaattumik imminut ima aperisariaqarpugut: ’Siunissara qanoq isikkoqassava?’ Inngilit unnersuussutaannut qanoq qisuariarnerput apeqqutaavoq. Tusarliussaq taakkunannga siulersorneqartoq uagutsinnut saqqummiunneqarpat tusarnaarusunnerparput maleruarlugulu? Taamaaliorutta, Guutip neriorsuutaanut peqqusersuitsumut tatiginnillutik siunissaminnik qilanaarinnittunut ilaassaagut: ’Silarsuarlu pilerinartuilu nungujartorput; Guutilli peqqusaanik naammassinnittoq naassaanngitsumik atassaaq.’ — 1 Juánase 2:17. (wD 15/12 87)

[Qupp. 7-mi assiliartaq]

Inngilit maanna ’nunap anoraanik sisamanik tigumiarput’. Sooq?