Biibili — atuagaq paasineqartussiaq
INUIT ilaasa upperaat Biibili tassaasoq Guutip ersarissumik oqaasia eqqorluinnartumik maleruarneqartariaqartoq. Allat „Biibilip tusarliussaa iluamik oqaatigineq ajornartutut isigaat“. Canadami naaggaartut ilagissaasa annersaanni upperneq ajoqersuinerlu pillugit pisortat 12-iusut taama oqarsimapput. Palasi Clifford Elliot Ilagiit Kattuttuneersoq isumaqarpoq inuit ilaannut „Biibili piviusuunngitsoq, inummut tunngasuunani pingaaruteqanngitsuusoq“.
Isummat tamakku pissutigalugit apeqquteqalerpoq akineqartariaqakkanik. Pingaartumik makku: suna pillugu Biibili allanneqarsimava? Ilumut paasissaanngilluinnartuua? Inuinnaat paasisinnaanerpaat? Allakkat taakkua siunertaannik paasisaqassagaanni sumit ikiorneqartariaqarpa? Sunalu pillugu ullutsinni nalorninartuni Biibilimik eqqorluartumik ilisimasaqarneq pingaaruteqarpa?
Suna pillugu Biibili allanneqarsimava?
Imaattuarsimavoq Jehova Guutimut qutsinnerpaamut iluarisaajumasut taassuma oqaasia atuaqqissaartariaqaraat. Kunngit, palasit, angajoqqaat, angutit, arnat meeqqallu — pisuut piitsullu — peqquneqartarsimapput ulluinnarni suliassat saniatigut Guutip oqaasianik qinunikkut eqqarsaatiginneqqissaaqqullugit. — 5 Moses 6:6, 7; 17:18-20; 31:9-12; Nehemja 8:8; Tussiaat 1:1, 2; 119:7-11, 72, 98-100, 104, 142; Ussatit 3:13-18.
Assersuutigalugu Josua ima oqarfigineqarsimavoq: „Inatsisit allassimaffiat Israelikkunnut atuffassissutigiuartarniaruk. Ullukkut unnuakkullu eqqarsaatigiuaannaruk tassanilu allassimasut tamaasa maleruaqqissaarlugit; taava iluatsitsilluassaatit.“ (Josva 1:8) Guutip oqaasianik peqqissaartumik atuaqqissaartaraanni maleruartaraannilu iluatsitsinarpoq pilluarnarlunilu. Jehovap oqaatsiminik, Biibilimik, ’inuit tamarmik’ paasisaqalernissaat aammalu naalannissaat siunertaraa inuunermik tunineqarsinnaaqqullugit. — 1 Timûtiuse 2:3, 4; Juánase 17:3.
Biibili paasissaanngippallaarpa?
Qilaliartinnani Jesusip nunarsuaq tamakkerlugu Biibilimik ajoqersuinerup naammassineqariartornissaa peqqussutigisimavaa. (apustilit suliait 1:8) Nalunngilaa Biibili paasineqartussiaasoq. Oqareerami qilammilu nunamilu piginnaanermik tamarmiusumik Jehovap tunigaani toqqaannartumik ima peqqussivoq: ’Taamaattumik aallaritsi inunnillu inuiannit tamaneersunik ajoqersuganngortitsigitsi, Ataatap Ernerullu anersaallu illernartup aqqanut kuillugit, ajoqersorsigillu ilissinnut peqqusakka tamaasa maleruaqqullugit.’ — Matîuse 28:19, 20, NV.
Ajoqersukkat kuisitsinnatik Jehova, taassuma ernera anersaallu illernartup sulinera pillugit ilinniartinneqaqqaartariaqarput. Kristumiullu ilagiissaasa inatsisaat pillugit ajoqersorneqartariaqarput. (1 Korintumiut 9:21; Galâsiamiut 6:2) Tamanna anguniarlugu kuisittussat upperisariaqarpaat Biibili Jehovameersuusoq paasineqartussiaallunilu. — Matîuse 10:11-13.
Biibili paasissagukku qanoq iliortariaqarpit? Guutip ernera immikkut ilungersortarsimavoq Allakkat nassuiarniarlugit. Nalunngilaa Allakkat Illernartut ilumoortuusut Jehovallu piumasaanik imaqartut. (Juánase 17:17) Suliassarititani pillugu Jesus Kristus ima oqarsimavoq: ’Inunnguutigalugulu nunamut pissutigaara sallusuissut nalunaajaatigissallugu. Sallusuissummit pisup nipiga tusararaa.’ (Juánase 18:37; Lúkarse 4:43) Inuit isumakkut uummatikkullu ilassinnittut Jesusip ajoqersunngitsoorneq ajorsimavai. Lúkarse 24:45-mi ima paasitinneqarpugut: ’Taava [Jesusip] isumaat ammarpai allakkat taakkununnga paasinarsisillugit.’
Nunamiikkallarami Jesusip Allakkat issuartarpai, ’Mosesip inatsisaani pruffiitillu allagaanni tussiaatinilu allassimasut’ nassuiartarlugit innersuussutigalugillu. (Lúkarse 24:27, 44) Allakkanik nassuiaaneranik tusarnaartut paasisaqartitsineranit ilinniartitsisinnaassusianillu attortittartorujussuusimapput. (Matîuse 7:28, 29; Mákorse 1:22; Lúkarse 4:32; 24:32) Taassuma Allakkat paasisimasaqarfigeqai.
Biibili Jesusillu malinnittai
Apustili Paulusip, Jesusimik malinnittuusup, paasisimavaa inuit allat Allakkat imarisaannik ajoqersorneqartariaqartut. Taassumattaaq nalunngilaa Allakkat paasineqartussiaallutik allagaasut. Taamaattumik tamanut ammasumik ajoqersuisarsimavoq qularnanngitsumillu paasisaqarusuttut angerlarsimaffiini Allakkanik nassuiaattarlugit. Paulusip iliorsimanini ima allaatigisimavaa: ’[Nalunngilarsi] qanoq sumik iluaqutaasumik nipangiussaqanngitsunga, tamaasali ilissinnut oqaatigigikka ajoqersorlusilu inuit tutsaanni illunilu.’ (apustilit suliait 20:20) Allakkat tunngavigalugit allat eqqarsalersinniarlugit oqaloqatigisarpai innersuussutit atorlugit oqaatsini uppernarsartarlugit. (apustilit suliait 17:2, 3) Inuit allat Allakkat isumaannik paasinneqqullugit ikiorusuttarpai.
Illit Jesusip ajoqersugaasalu ajoqersuutigisimasaat paaserusuppigit? (1 Pîtruse 2:2) Illoqarfittoqqami Berøami najugallit paasisaqarusussimaqaat, apustilillu Paulusip Kristus pillugu ajoqersuutai upperissallugit pitseriarsimapput. Taamaattumik kajumissaarneqarput ullut tamaasa Allakkat misissoqqullugit taamaalillutillu nutaarsiassaq nuannersoq tusagartik ilumoortuusoq qulakkeersinnaaniassagamikku. Ammasumik isumaqaramik ’ilaat ikinngitsut uppertunngorput’. — apustilit suliait 17:11, 12.
Biibili paasiniassagaanni uummatikkut eqqortumik pissuseqartariaqarpoq ilinniarusussuseqartariaqarluni ’anersaakkullu pisariaqartitaqarnermik miserratiginninngitsuusariaqarluni’. (Matîuse 5:3, NV) Jesus aperineqarami: ’Sooq assersuutitigut oqaluffigaagit?’ ima akivoq: ’Ilissi tunineqarpusi anngigisat qilammiup naalagaaffiata pii ilisareqqullusigik, taakkuli taama tunineqanngillat.’ Siulittuutigineqarsimavoq ’qanini ammarumaaraa assersuutitigut oqalulluni isertukkat anissallugit’. (Matîuse 13:10, 11, 35) Jesusip assersuusiat atorsimavai alapernaaginnartut soqutiginnilluinnartunit immikkoortinniarlugit. Jesusip ajoqersugaasa ilaanni soqutiginninnertik takutissimavaat illumut iseqatigalugu aperigamik: ’Naatsiiapiluit narsaammiittut pillugit assersuummik tamatuminnga nassuiaaffigitigut.’ — Matîuse 13:36.
Ersarippoq Biibili paasissagutsigu ikiorneqartariaqartugut. Palasi Hal Llewellyn Ilagiit Kattuttut ajoqersuineq, upperisaq oqaluffeqarfinnullu allanut suleqatiginninneq pillugit allaffianneersoq ima oqarsimavoq: „Biibilip uagutsinnut qanoq isumaqarneranik, qanoq ililluni atuarneqarnissaanik nassuiarneqarnissaanillu erseqqissaanissaq pingaartorujussuuvoq.“ Naalli tamarmik akuerinngikkaluaraat ikiorteqarata Biibili paasisinnaanngilarput. Ikiorneqartariaqarpugut.
Sumik ikiorneqarsinnaavugut?
Oqaatsit eqqumiippaluttut, apeqqutit nalunartut paasiuminaatsullu Biibilimi nassaasaapput. Ilaat nassuiarneqaruminaatsuupput assersuutinik taamanikkut allanneqarfimminni paasissaanngikkallartunik imaqarlutik. Jehovalli siunertaanik imaqarput. Assersuutigalugu sarĸúmersitat 13:18-imi allassimavoq ’nersutip kisitsisaa tassa 666’. Allassimagaluarluni ’siuneqartup naatsorsorliuk’ kisitsitip isumaa nassuiarneqanngilaq. peqatigiissortanili aqqutigalugit Jehovap ullumikkut kiffani ilumoortut qanoq isumaqarnersoq paasitissimavai. Illittaaq tamatuminnga paasisaqalersinnaavutit inuit ’misiligaalluartut oqaatsimik sallusuissutip pianik tunioraalluartut’ ikiortigalugit. — 2 Timûtiuse 2:2, 15, 23-25; 4:2-5; Ussatit 2:1-5.
Naalagaaffik pillugu tusarliussamut qisuariarnerit takutinniarlugit Jesus ilaannikkut assersuusiortarsimavoq. Eqqaavaa ilaat ikinngutiminnit eqqarliminnilluunniit assortorneqarneq pissutigalugu qunulerlutik siumukarunnaarumaartut. Allat ’naalliutsitsisoqaleraangat qinuginnittoqaleraangallu’ Naalagaaffimmik tusarliussamik pingaartitsinertik annaajumaarpaat. Imaluunniit ’silap matuma pii isumakuluutigamikkik pisuussutillu salloqittarmatsik’ nutaarsiassamik nuannersumik asannikkunnaarsimapput. Aammali ilaat nuannaarlutik ilassinnissapput tusarliussarlu erlinnartoq tusarusullugu isumaa paasissallugu. Taakku kristumiuuneraqatigiit akornanni, allaat Jesusip aqqani, ’maajunnartut suliarineqartut pillugit anersaarulullutik kappialapput’. Inuit takkua Jehovap aqqutigeqqusaanik ilinniarusoqaat taamaattumillu Biibilimi atuartakkatik paaserusullugit. — Matîuse 13:3-9, 18-23; Hesekiel 9:4; Jesaja 2:2-4.
Inuk nammineq Jehovap siunertaanik paasisaqarniaraangat Jehovap taassuma ikiorneqarnissaa isumagissavaa. Assersuutigalugu Biibilimi oqaluttuarineqarpoq iivangkiiliumik oqaluussisoq Filip angummut Etiopiamiumut Jerusalemimit angalatilluni Jesajasip allagaanik atuartumut Jehovap anersaavanit siulersorneqarsimasoq. Etiopiamiu angerlartilluni qamutimini issialluni atuarpoq. Jehovap anersaavanit illernartumit siulersorneqarluni Filipip arpalluni ornippaa aperalugulu: ’Atuakkatit paasivigit?’ Angutip maniguulluni ikiorneqartariaqarnini miserratiginngilaa. Filipip kajumilluni angut anersaakkut kaattoq ilinniarusuttorlu taanna ajoqersulerpaa. Taassumalu ajoqersorneqarami Allakkat paasilerpai. Paasilerpaa inuuneq naassaanngitsoq angussaguniuk Jehovamullu iluarisaassaguni qanoq iliortariaqarluni. Nuannaarluni kuisilluni Jehovamut kiffanngorpoq taassumalu iluarisaanik inooriaaseqalerluni. — apustilit suliait 8:26-39.
Immaqa angerlarsimaffinni Biibiliuteqarputit immaqalu arlaleriarlutit atuarsimallugu. Qularnanngitsumik Etiopiamiutut ilungersortutut maniguuttutullu misigivutit. Taassuma atuarsimasani paasisinnaanngilai. Ikiorneqartariaqarpoq ikiorneqarninilu Jehova Guutip isumagisimasaa nangaanani akueralugu. Filipitut Jehovap nalunaajaasuisa Biibilimi Guuti pillugu allassimasunik paasisaqarnissannut nuannaarlutik ikiorusuppaatsit. Nalunngilaat Jehovap Biibili allanneqartissimagaa paasineqarnissaa siunertaralugu. — 1 Korintumiut 2:10; Evfisumiut 3:18; 2 Pîtruse 3:16.
Sooq Biibili pingaaruteqarluinnarpa?
Ullut inuuffigisavut tassaapput inuiaat oqaluttuarisaaneranni ullut nukingerfiunerpaasut. Biibilimi ’pissutsit aaqqissuussaanerata naggatissaa’-tut eqqaaneqarput. (Matîuse 24:3, NV) 1914-imiilli pisimasorpassuit Biibilimi siulittuutinut eqquutitsinerusut takutittarpaat Guutip naalagaaffiata qilammiittup ’naalagaaffiit allat tamaasa aserussagai sequmisillugit’. — Daniel 2:44.
Nammineq Biibilimi Matîuse kapitali 24-mi, Mákorse kapitali 13-imi Lúkarse-lu kapitali 21-mi siulittuutigineqartut atuariakkit. Malugissavat pisussat eqqartorneqartut nunarsuaq tamakkerlugu piumaartut. Ilaatigut silarsuaq tamakkerlugu sorsunneqassaaq — sorsunnernit allanit allaasunik. Sorsunnersuup siulliup kingorna kaannersuit, nunap sajuttarneri pinerlunnerillu immikkut ittut siulittuutigineqartut misigisimavavut. Maannalu inuiaqatigiit erniinnaq nalunaaruteqarumaarput silarsuup matuma aserornissaanik ersarissumik nalunaaqutaasussamik. Tamanna pillugu apustili Paulus ima allassimavoq: ’Jehovap ullussaa nalliukkumaarpoq soorlu tillittoq unnuakkut pisartoq. Oqarpata: „Eqqissinarpoq, siooranartoqanngilaq,“ taava perlussap tassanngaannaq tikikkumaarpai, . . . aniguinavianngillallu. (1 Tásalûníkamiut 5:2, 3) Kikkut aniguinavianngillat? Paulus ima akivoq: ’Guutimik ilisimasaqanngitsut Naalakkattalu Jesusip iivangkiiliuanut naalakkumanngitsut.’ (2 Tásalûníkamiut 1:7-9) Nalunaaqutip katitersimasup ilaa Matîuse 24:14-imi peqqussutigineqartumut matumunnga naalattut eqquutitissavaat: ’Naalagaaffimmik iivangkiiliu oqaluussissutigineqassavoq inuit najugaanni tamarsuarmi.’
Jehovap nalunaajaasuisa millionilikkuutaat peqqussut tamanna nunani qeqertanilu 231-ni suliaraat. Inuit angerlarsimaffiini pulaartarpaat Jehovallu naalagaaffianik ilinniarnissaannik kajumissaartarlugit. Inussiarnersumik nassuiartarpaat inuit tamarmik qanoq iliortariaqartut aaqqissuussaanermit matuminnga aniguiumallutik nunarsuarmilu paratiisiusumi aliasuttoqarunnaarfiusumi, anniartoqarunnaarfiusumi toqusoqarunnaarfiusumilu inuulerumallutik. — sarĸúmersitat 21:3, 4.
Silarsuaq manna ajortoq piffissaarutilerpoq, silarsuullu matuma naggatissaani aniguiumasut tamarmik ’iivangkiiliumut naalannissartik’ ilinniartariaqarpaat taamaalillutik aserornissaq anigussallugu. Jehovap nalunaajaasui tullianik ilinnut kasuttorpata sooq akuttunngitsumik Biibilimik atuaqqissaarnissamik neqeroorutaat akuerissanngiliuk? Aap, Biibilimik paasisaqarusukkavit atuaqqissaaqatigileqqullutit qinnuiviginiakkit. (wD 1/10 94)