Pisimasoq immikkut ittoq aggissavit?

UKIUT 3500-nit amerlanerusut matuma siorna Jehova Guutip Egyptenimi inussiaasut inoqutigiit Israelikkut tamaasa immikkut piumasaqarfigai. Ullormi aalajangersimasumi savaaraq savaasaararluunniit toqussavaat aavalu illumik matserfiinut tarnullugu. Unnuaq taanna Guutip inngiliata illut taamaaliorfigineqarsimasut qaangiinnarpai, Egyptenimiulli angajulliliaat tamaasa toqullugit. Tamatuma kingunerisaanik Israelikkut aallarsinnaalerput, ukiullu qaangiunneri tamaasa ulloq aniguisitaaffitsik juutit nalliuttorsiutigisarpaat poorskisiorlutik nutserluaannarlugu isumaqartoq qaangiunneq.

Jesusip naggammik apustilini poorskisioqatigereeramigit pilliutitut toqunissaminik eqqaaniaanermik nalliuttorsiorneq pilersippaa. Apustilini timiusamik seernarsaateqanngitsumik tunivai oqarluni: ’Tigusillusi nerigitsi, tassa timiga.’ Taava ermutsimik viinnimik tunivai oqarlunilu: ’Tamassi tassannga imeritsi, tassaammat aaga, angerutsip pia, amerlasuut pillugit kuisoq ajortit isumakkeerneqaatissaannik.’ Aamma oqarpoq: ’Taamaaliortaritsi eqqaallunga.’ (Matîuse 26:26-28; Lúkarse 22:19, 20) Taamaalilluni Jesusip ajoqersukkani toqunerminik eqqaaniaanermik nalliuttorsiutiginnittaqquai.

Jesusip toquneranik eqqaaniaaneq ukioq manna pingasunngornermi apriilip 19-iani seqernup tarrereernerani pissaaq. Nunarsuaq tamakkerlugu Jehovap Nalunaajaasui unnummi tamatumani immikkut ittumik katersuutissapput Jesusip peqqusineratut toqunera eqqaaniarniarlugu. Isiginnaartutut najuunnissannut qamannga pisumik tikilluaqqusaavutit. Najukkanni Jehovap Nalunaajaasui aperikkit qaqugu sumilu eqqaaniaasoqassanersoq. (wE 1/4 2000)