Namminneq periaatsiminnik ilisimassuseqarput
„INERSIMASUT ilisimassuseqarput, meeqqalli namminneq periaatsiminnik ilisimassuseqarput,“ Nigeriamiut taamatut ussateqarput. Edwinip utoqqaanertap Nigeriameersup tamanna misigaa.
Ullut ilaanni nakkaatitsivik savimineq manngertornersimasoq ikitsisit puuattut angitigisoq qaamigullu putulik allaffimmi ataaniittoq nassaaraa.
Edwinip meeqqani pingasut aperai „kiaana?“.
„Uangaana,“ Emmanuel arfineq-pingasunik ukiulik akivoq. Emmanuel nassuiaavoq nakkaatitsivik Jehovap Nalunaajaasuisa silarsuaq tamakkerlugu oqaluussinerannut nakkaatitsivissaralugu. „Ullut tamaasa naalagaaffilersaarfimmukarneq ajoratta uagutsinniittussamik aningaasanut nakkaatitsiviliortitsivunga,“ oqaluttuarpoq. „Kaasarfimmiusiakka atunngisakka nakkaatitsivimmut ikisarpakka.“
Emmanuelip ataataa imminni nakkaatitsiviuteqarpoq ukiumoortumik ataatsimersuarnissamut katersuiffigisartakkaminik. Ilaqutariilli ajornartoorfianni aningaasat atortariaqarsimavaat. Emmanuelip qulakkeerluinnarniarpaa tunissutimi siunertanut allanut atorneqannginnissaat, taamaattumilluuna qillertuusaq nassaani svejsertikkaa. Angutip ikiortigisaata, qillertuusaq sumut atorneqassanersoq tusaramiuk, savimineq sinnikoq tigoriarlugu aningaasanut nakkaatitsivivimmik sanaappaa. Emmanuelip nukaa, Michael sisamanik ukiulik, aamma nakkaatitsiviutitaarusuppoq.
Edwinip tupaallaatigaa meeqqat namminersornerat Michaelilu aperaa nakkaatitsivik sumut atorniarneraa. „Aamma uanga tunissuteqarusuppunga!“ akivoq.
Angajoqqaamik nalusaannik Emmanuelip, Michaelip aleqaatalu Ucheip qulingiluanik ukiullip, kaasarfimmiusiatik ileqqaartarsimavaat nakkaatitsivimmullu nakkartittarlugit. Isumassarsiaq tamanna sumit isumassarsiaraat? Meeqqat mikisuuneriniilli angajoqqaavisa aningaasanik tunisarpaat ilinniartillugillu taakkua ilaannik ilagiinni nakkaatitsivimmut nakkartitsisarnissaannik. Paasinarpoq meeqqat ilinniartinneqarnermittut iliortut.
Nakkaatitsiviit ulikkaarmata aserorlugit ammarpaat. Katillugit 25-t koruunit missaanniipput — nunami ukiumut agguaqatigiissillugu tusindialuinnarnik isertitaqarfiusartumi aningaasarpassuupput. Jehovap Nalunaajaasuisa sulinerat tapersersorniarlugu nunani 235-ni taamatut nammineq kajumissutsimik tunissuteqartoqartarpoq. (wE 2/1 02)