Kikkut tamarmik nersualaarneqarnissartik pisariaqartippaat

ULLOQ niviarsiarannguamut nuannersuuvoq. Ulluni allani naveersittariaqartaraluarluni ulloq taannarpiaq pissuserissaarnerusimavoq. Arnaatali niviarsiarannguaq unnukkut innartereerlugu tusaalerpaa qiarpaluttoq. Anaanami aperimmani sooq qianersoq manittorluni akivoq: „Ullumi naalassorinngivippinga?“

Taamatut aperinerata anaanaa uummataatigut annersippaa. Panini naveerniapallattuaannartarsimavaa. Maannakkulli niviarsiaraatinnguani pissuserissaarniarluni iliuuseqangaarsimasoq malugigaluarlugu nersualaanngilluinnarsimavaa.

Niviarsiaraannaanngillat nersualaarneqarnissamik akuerineqarnissamillu pisariaqartitsisut. Tamattamiuna taakku siunnersorneqarnissatsitulli unnersuunneqarnissatsitullu pisariaqartitsigigivut.

Nersualaarneqaraangatta qanoq ittarpugut? Uummatitsigut nuannaajallallutalu qiimmaallattarpugut, ilaa? Allanit malugineqartutut soqutigineqartutullu misigilersissagunarpaatigut. Nersualaarneqarnerup qularunnaarsippaatigut ilungersuanivut tamarmik asuliinnaanngitsut, tamatumalu killissavaatigut ulloq alla eqiasueqqinnissatsinnut. Tupinnanngilaq ilumoorluni nersualaarinerup nersualaarisumut kajungilersikkajummatigut. — Ussatit 15:23.

Jiisusi Kristusip nersualaarinerup pisariaqarnera paasisimavaa. Talentinik assersuusiami naalakkap (Jiisusimut namminermut assersuutaasup) nersualaarpai kiffat marluk aalajaatsut oqarluni: „Ajunngilaq, kiffaasutit pitsaasoq ilumoortorlu!“ Qiimmaallannangaarsimassaaq! Assigiinngilluinnartunik piginnaaneqaraluarlutik assigiinngitsunillu angusaqaraluarlutik, tamarmik assigiimmik nersualaartipput. — Matthæusi 25:19-23.

Niviarsiarannguup taassuma anaanaa eqqaamajuk. Allat nersualaarniarlugit nikallorluinnarnissaat utaqqisariaqanngilarput. Taamaattumik taarsiullugu nersualaarinissamut periarfissarsiorta. Pissutissaqarluarpugummi periarfissani tamani ilumoorluta nersualaarinissatsinnut. (wE 11/01 02)