Jehovap naalannassusianik ersersitsisarpit?
‘Uagut Jehovap naalannassusianik ersersitsivugut.’ — 2 KORINTHIMIUT 3:18, NV.
QANOQ AKISSAVIT?
Sooq ajortiliugaluarluta Jehovap naalannassusianik ersersitsisinnaavugut?
Qinnutivut ataatsimiinnerillu Guutip naalannassusianik ersersitsinissamut qanoq iluaqutigisarpavut?
Qanoq ililluta Jehovamik naalannarsisitsiuarsinnaavugut?
1, 2. Sooq inuit Jehovap pissusiinik ilaarsisinnaappat?
TAMATTA arlaatigut angusisarlutaluunniit arnisartarpugut. Taamaattumik tupinnanngilaq tamatuma allanit maluginiarneqartarnera. Aamma meeqqat angajoqqaamik iliuusiinik ilaarsiniartarput. Uagummi? Uagut Ataatarput qilammiusoq Jehova ilaarsinnaavarput? Takunikuunngikkaluarlutigu taassuma pissusii nuannersut pillugit paasisaqarsinnaavugut pinngortitaasa qimerloornerisigut, Biibilimik atuaqqissaarnitsigut tamatumanilu allassimasunik, pingaartumik taassuma ernerata Jiisusip oqaasiinik iliuusiinillu, eqqarsaatiginneqqissaarnitsigut. (Johannesi 1:18; Romamiut 1:20) Taamaattumik Jehovap pissusiinik ilaarsisinnaavugut taamaalillutalu taassuma naalannassusianik, imaluunniit ataqqinassusianik, ersersitsisinnaalluta.
2 Guutip inuit pinngortinngikkallaramigilli nalunngilaa taakku piumasaminik iliorsinnaassuseqarumaarlutillu pissusiminik ilaarsisinnaassuseqarumaartut aammalu imminik naalannarsisitsisinnaajumaartut. (Atuakkit 1 Mosesi 1:26, 27). Kristumiuugatta Pinngortitsisitta pissusii ilaarusuppavut. Ilaarutsigu taassuma naalannassusianik ersersitsineq immikkut pisinnaatitaaffigissavarput, qanorluunniit kultureqarlutalu ilinniagaqaraluarutta naggueqatigiinnullu kikkunnulluunniit ilaagaluarutta. Sooq? ‘Guuti kinaassusersiortuunani tassaammat inuiaqatigiinni kikkuusuniluunniit imminik mianerinnittumik iluartuliortumillu ilassinnittartoq.’ — Apustilit Suliaat 10:34, 35.
3. Kristumiut Jehovamut kiffartoraangamik qanoq misigisarpat?
3 Kristumiut tanitat Jehovap naalannassusianik ersersitsisarput. Apustili Paulusi tanitanut ilaasoq ima allappoq: “[Uagut] tamatta kiinnatsigut uleqarnata Jehovap naalannassusianik ersersitsisugut allanngortitaavugut ersersitarput assigilerlugu naalannassuseqarnerujartuinnarluta.” (2 Korinthimiut 3:18, NV) Pruffiitip Mosesip Inatsisit Qulit nassarlugit qaqqamit Sinajimit ammukarami kiinaa qinngorneqarpoq Jehovap oqaloqatigisimammani. (2 Mosesi 34:29, 30) Uagut Mosesip misigisimasaatut misigisaqarnikuunngikkaluarluta kiinnavullu qinngorneqanngikkaluartut, uagut Jehova, taassuma pissusii inuiannullu siunertaa nuannersoq eqqartoraangatsigit nuannaarnerput malunnartarpoq. Taamaammat tanitaagaluarutta savanulluunniit allanut ilaagaluarutta, uagut tarrarsuutitullusooq ippugut, ima paasillugu inuunitsinni oqaluussinitsinnilu Jehovap naalannassusianik ersersitsisartugut. (2 Korinthimiut 4:1) Illit Jehovap iluarisaanik inooriaaseqarnikkut oqaluusseqataajuarnikkullu taassuma naalannassusianik, imaluunniit ataqqinassusianik, ersersitsisarpit?
JEHOVAP NAALANNASSUSIANIK ERSERSITSERUSUPPUGUT
4, 5. (a) Paulusip pisimaneratut sumik akiugaqarpugut? (b) Ajorti inunnut qanoq sunniuteqartarpa?
4 Jehovamut kiffaagatta sutigut tamatigut taassuma naalannassusianik ersersitserusuppugut. Ajunngitsumilli iliorusukkaluarluta amerlasuutigut ajortumik iliortarpugut. Paulusip aamma tamanna ajornartorsiutigaa. (Atuakkit Romamiut 7:21-25). Kissaatigisapiluvut sooq akiortariaqarivut paasiuminartumik ima nassuiarpaa: ‘Tamarmik ajortuliorput Guutimit naalannassuseq pigiunnaarlugu.’ (Romamiut 3:23) Adami ajortuliormat inuit tamarmik ajortimut, kunngimullusooq ajortumut taakkununnga naalagaasumut, inussiaataallutik inunngorput. — Romamiut 5:12; 6:12.
5 Ajorti suua? Tassaavoq sunaluunniit Jehovap pissusiinut, nuannarisaanut piumasaqaataanullu akerliulluinnartoq. Ajorti inummik Guutimut attaveqarluarunnaarsitsisarpoq. Ajorti Guutip naalannassusianik ersersitsiniarnitsinni ajoqutigisarparput, soorluttaaq piseriartartoq eqqorniakkaminik eqquiniarnermini akornuteqarsinnaasoq. Piaaraluta kukkullutaluunniit ajortuliorsinnaavugut. (4 Mosesi 15:27-31) Ajorti uagutsinnut sunniuteqartorujussuusarpoq, aamma Pinngortitsisitsinnit avissaarsimassutigaarput. (Tussiaat 51:7; Esaja 59:2; Kolossemiut 1:21) Inuit amerlanerpaartaat Guutimit avissaarsimalluinnassutigisaminnik inooriaaseqarput taamaalillutillu Guutip naalannassusianik ersersitsinissamut periarfissaminnik nuanningaartumik maangaannartitsillutik. Ajortip inunnut ajoqutaanerpaanera qularutissaanngilaq.
6. Sooq ajortiliugaluarluta Jehovap naalannassusianik ersersitsisinnaavugut?
6 Ajortiliugaluartugut Jehovap neriuutissippaatigut. (Romamiut 15:13) Jehovap Jiisusi utertitsissutitut pilliutigigamiuk ajortimut kiffaajunnaarsinnaanngortippaatigut. Pilliut tamanna upperigatsigu ‘ajortimut inussiaajunnaarluta’ Jehovap naalannassusianik ersersitsisinnaavugut taassumunngalu ikinngutaasinnaalerluta. (Romamiut 5:19; 6:6; Johannesi 3:16) Guutimut ikinngutaajuarutta qularutiginngilluinnarsinnaavarput taassuma maannangaaq pilluaqqujumaaraatigut siunissamilu naammalluinnartunngortikkumaarlutalu naassaanngitsumik inuulersikkumaaraatigut. Suli ajortiliugaluartugut Guutip naalannassutsiminik ersersitsisinnaasutut uagutsinnik isiginninnera ataqqinaataangaarpoq.
GUUTIP NAALANNASSUSIANIK ERSERSITSINEQ
7. Guutip naalannassusianik ersersitsiumagutta suna miserratigissanngilarput?
7 Ajortiliugatta tamatta sanngiiffeqarpugut. Guutip naalannassusianik ersersitsiumagutta tamatta immikkut nammineq sanngiiffigisavut ilisimaarisariaqarpavut. (2 Nalunaarsuutit 6:36) Sanngiiffeqarnerput miserratiginagu sanngiiffivut akiortariaqarpavut. Assersuutigalugu pornografiimik isiginnaartarnikkut ajortuliortarutta ikiorneqartariaqarnerput miserratiginagu utoqqaanertanut ikioqqusariaqarpugut. (Jaaku 5:14, 15) Tamanna iliuuserisariaqakkatta siullerpaartaraat Guutimut ataqqinaataasumik inooriaaseqarusukkutta. Jehovap piumasaatut inooriaaseqarnerluta qulakkeertuartariaqarparput. (Ussatit 28:18; 1 Korinthimiut 10:12) Sanngiiffigisavut suugaluarpataluunniit akiortuartariaqarpavut Guutip ataqqinassusianik, imaluunniit naalannassusianik, ersersitsisinnaaniassagatta.
8. Naammalluinnanngitsuugaluarluta susariaqarpugut?
8 Jiisusi tassaasimavoq inuk Guutip iluarisaatut iliortuaannarsinnaasutuaq Guutillu naalannassusianik tamakkiisumik ersersitsiuaannarsinnaasutuaq. Uagut Jiisusitut naammalluinnartuunngikkaluarluta taassuma maligassiaa malinniarlugu ilungersortariaqarpugut. (1 Petrusi 2:21) Jehovap siumukarnerput maluginiaannarnagu aammali taassuminnga naalannarsisitsiniarluta iliuuseqarnerput maluginiartarpaa iliuuseqarnerpullu pillugu pilluaqqusarluta.
9. Biibili Guutip naalannassusianik ersersitsilluarnerunissamut qanoq iluaqutigaarput?
9 Biibili iluaqutigalugu paasisinnaavarput Guutip naalannassusianik qanoq ersersitsilluarnerusinnaanersugut. Biibili iternga tikillugu misissortariaqarparput tamatumanilu allassimasut eqqarsaatigeqqissaartariaqarlutigit. (Tussiaat 1:1-3) Biibili ullut tamaasa atuartarutsigu paasissavarput kristumiuulluarnerujumalluta sutigut allannguisariaqarnerluta. (Atuakkit Jaaku 1:22-25). Biibilimi atuakkavut uppernitsinnut nakussatsissutigisarpavut aammalu ajortuliorujussuannginnissamik Jehovamillu iluarisaanissamik aalajangiusimanninnerulissutigisarlutigit. — Tussiaat 119:11, 47, 48.
10. Jehovap akuerisaanik kiffartorsinnaaqqulluta suut qinnutigisinnaavavut?
10 Guutip naalannassusianik ersersitsiumalluta aamma ‘qinunitsinni qasusuittariaqarpugut’. (Romamiut 12:12) Jehova qinnuigisariaqarparput taassuma akuerisaanik kiffartorsinnaaqqulluta ikioqqulluta. Qinnuigisinnaavarput anersaaminik illernartumik tuneqqulluta, uppissuseqarnerulerseqqulluta ussernartunillu akiuinissamut nakussatseqqulluta ‘oqaatsimillu sallusuissutaasumik eqqortumik atuinissamut’ ikioqqulluta. (2 Timotheusi 2:15, NV; Matthæusi 6:13; Lukasi 11:13; 17:5) Meeqqap ataataminik tatiginnittarneratut Ataatarput, Jehova, tatigisariaqarparput. Jehova ikioqqulluta qinnuigigutsigu qularutiginngilluinnarsinnaavarput taassuma ikiorumaaraatigut. Isumaqanngisaannartariaqarpugut Jehovap tusaakatattaraatigut. Taamaattumik qinugaangatta taanna unnersiutigisartigu, qutsavigisartigu siulersoqqullutalu qinnuigisartigu, ingammik misilinneqaraangatta. Aamma Jehova qinnuigisinnaavarput kiffartornitsinni taassuminnga naalannarsisitsisinnaaniassagatta, imaluunniit ataqqinartitsisinnaaniassagatta, ikioqqulluta. — Tussiaat 86:12; Jaaku 1:5-7.
11. Ataatsimiinnerit Guutip naalannassusianik ersersitsinissamut qanoq iluaqutigisarpavut?
11 Guutip inussiaq aalajaallunilu silatooq savaatiminik erligisaminik paarsinissamik akisussaaffilersimavaa. (Matthæusi 24:45-47; Tussiaat 100:3) Inussiaqatigiit aalajaatsut Jehovap naalannassusianik ersersitsisinnaaqqulluta tamatsinnik ikiuerusupput. Ilaatigut ataatsimiinnerit aqqutigalugit inussiap inuunitsinnik pissutsitsinnillu Jehovap najoqqutassiaanut naleqqussaanissamut ikiortarpaatigut, soorlu mersortartup atisavut iluarsaassinnaagai isikkorinnerulersilluta. (Hebræerit 10:24, 25) Taamaattumik piffissaq eqqorlugu ataatsimiigiartariaqarpugut, inortuisarnermi ileqquliussimagutsigu ataatsimiinnerit tamakkiisumik iluaqutigisarnavianngilavut.
GUUTI ILAARTIGU
12. Qanoq ililluta Guuti ilaarsinnaavarput?
12 Jehovap naalannassusianik ersersitsisinnaavugut aatsaat ‘Guuti maligassarigutsigu’. (Efesosimiut 5:1) Jehova ilaarsinnaavarput ilaatigut taassuma pissutsinut isiginnittaasiatut isiginnittaaseqalerniarnitsigut. Guutip eqqarsartaasianut naapertuuttumik iliornata nammineerniarsarigutta taanna kanngunarsassavarput imminullu ajornartorsiortilluta. Saatanip silarsuaani inuugatta Jehovap uumigisaanik uumiginninniarluta nuannarisaanillu nuannarinninniarluta ilungersortariaqarpugut. (Tussiaat 97:10; 1 Johannesi 5:19) Upperilluinnartariaqarparput Guutimut kiffartoriaaseq eqqortutuaq tassaasoq qanorluunniit ilioraangatta taassuma ataqqinaatissaanik taamaaliortarutta. — Atuaruk 1 Korinthimiut 10:31.
13. Sooq ajorti uumigisariaqarparput, tamatuminngalu uumiginninnerput sunissamut kajumississutigissavarput?
13 Jehovap ajorti uumigimmagu uaguttaaq uumigisariaqarparput. Ajorti uumigigutsigu sapinngisarput tamaat atorlugu ajortuliussutigisinnaasavut ungasinniartariaqarpavut. Assersuutigalugu tunussisut mianersorfigisariaqarpavut, taakkunatut Guutimik naalannarsisitsiunnaaqqunata. (5 Mosesi 13:7-10) Taamaattumik tunussisut qatanngutaaneraraluarlutillu Guutimik kanngunarsaasut kikkulluunniit ingalassimalluinnartariaqarpavut, aamma ilaqutarigaluarutsigilluunniit. (1 Korinthimiut 5:11) Tunussisut Jehovallu peqatigiissortaanik isornartorsiuisut allat oqaasiinik naqqissuiniarsarineq sumulluunniit iluaqutaanavianngilaq. Taakkua atuakkiaminni nittartakkaminniluunniit qanoq isummersimanerannik misissuineq navianarpoq tamanna Jehovamut attaveqarluarunnaassutigisinnaagatsigu. — Atuakkit Esaja 5:20; Matthæusi 7:6.
14. Jehovamik ilaarseriaatsit pingaarnerpaartaat suua, aamma sooq?
14 Jehovamik ilaarseriaatsit pingaarnerpaartaat tassaavoq asannittuliortarneq. (1 Johannesi 4:16-19) Uagut asaqatigiinnerput Jiisusimut ajoqersugaanitsinnut Jehovamullu kiffaanitsinnut uppernarsaataavoq. (Johannesi 13:34, 35) Naammalluinnanngitsuunerput pissutigalugu ilaannikkut immaqa sapernartittarsinnaagaluarlutigu tamatigut asannittuuniartariaqarpugut. Asannittuliorniarluta kristumiutullu pissuserineqartussanik ersersitsiniarluta ilungersornerput ajortuliornaveersaarnissamut inussiarniitsuunaveersaarnissamullu iluaqutigissavarput. — 2 Petrusi 1:5-7.
15. Inoqatitsinnik asannikkutta taakku qanoq pisassavavut?
15 Asanninneq allanut ajunngitsuliornissamut kajumississutigisarparput. (Romamiut 13:8-10) Assersuutigalugu aappariit asaqatigiikkunik ilumoorfigeqatigiittuassapput. Utoqqaanertanik asanninnerput suliaannillu ataqqinninnerput taakkununnga naalattuunissamut iluaqutigissavarput. Meeqqat angajoqqaaminnik asannittut angajoqqaatik naalallugillu ataqqisarpaat ajortumillu eqqartortarnagit. Inoqativut asagutsigit nikaginavianngilavut ataqqinninngippaluttumillu oqaluunnaviarnagit. (Jaaku 3:9) Utoqqaanertallu Guutip savaataanik asannittut savaatit qajassuartumik pisarpaat. — Apustilit Suliaat 20:28, 29.
16. Asanninneq oqaluussinermi qanoq iluaqutigissavarput?
16 Asanninnerput aamma oqaluussinitsinni malunnartariaqarpoq. Jehovamik asanningaarnerput pissutigalugu inuit tusarnaarumasannginnerat soqutiginninnginnerallu nikallussutigisarnavianngilavut. Nutaarsiassaq nuannersoq oqaluussissutigiuassavarput. Asanninneq kajumississutigalugu oqaluussinissamut piareersarluartassaagut sunniuteqarluartumillu oqaluussiumalluta iliuuseqartarluta. Guuti inoqativullu ilumoorluta asagutsigit oqaluussisassaagut oqaluussisariaqarnerput pissutigiinnarnagu. Oqaluussineq ataqqinaataangaartutut isigissavarput piumaqalutalu oqaluussisassalluta. — Matthæusi 10:7.
JEHOVAMIK NAALANNARSISITSIUARIT
17. Ajorti Guutip naalannassusianik ersersitsiniarnitsinni akornutigisaratsigu susariaqarpugut?
17 Inuit silarsuarmiittut amerlanerpaartaasa ajortuliortarnerup qanoq ajortiginera naluaat; uagulli nalunngilarput. Taamaammat ajortulioqqajaasarnitsinnik akiuisariaqarnerput eqqummaariffigaarput. Nalunngeqatiginnissuterput sungiusartariaqarparput isumatsigut uummatitsigullu kissaatigisapiloqaleraangatta taakku ingerlaannaq akiortarsinnaaniassagatsigit. (Romamiut 7:22, 23) Inuinnaagatta sanngiitsuuvugut, Guutilli pissutsini qanorluunniit ikkaluartuni eqqortuliornissamut nakussatsissinnaavaatigut. — 2 Korinthimiut 12:10.
18, 19. (a) Saatanimut anersaapiluinullu akiuunnitsinni ajugaanissamut suna iluaqutigissavarput? (b) Sunissarput aalajangiusimasariaqarparput?
18 Aamma Jehovamik naalannarsisitsissagutta Saatanimut anersaapiluinullu akiuuttariaqarpugut. Taakkununnga akiuunnitsinni ajugaasinnaavugut “Guutip sakkutuussutai” atorutsigit. (Efesosimiut 6:11-13) Jehova kisimi naalannarsisinneqartussaavoq, Saatanilli sapinngisani tamaat atorlugu tamanna pinngitsoortinniarsaraa. Aamma Saatani Guutimut ikinngutaajunnaarsinniarluta ilungersorpoq. Uagulli angutillu arnallu meeqqallu naammalluinnanngitsut millionillit allat aalajaalluta Guutimik ataqqinartitsigaangatta Saatani ajorsarujussuartarpoq. Taamaattumik pinngortitat anersaajusut pisimanerattut Jehova ima nersortuartigu: “Illit, Naalagarput Guuterpullu, qinngaqqunnanngillat pigissallugit naalannaat ataqqinaallu pissaanerlu; illimmi suut tamaasa pinngortippatit, illit piumasakkut piulerput pinngortitaallutillu.” — Saqqummersitat 4:11.
19 Qanorluunniit pisoqassagaluarpat Jehovamik naalannarsisitsiuartarnissarput aalajangiusimatigu. Taassuma kiffami amerlaqisut imminik ilaarsiniarlutik naalannassutsiminillu ersersitsiniarlutik sapinngisartik tamaat iliuuseqarnerat nuannaarutigingaartarpaa. (Ussatit 27:11) Qanortoq Daavitut misigigisa, taannami ima erinarsorpoq: “Qutsavigaakkit [Jehova] Guutiga uummatikkut iluunngarlunga. Ataqqissavara aqqit naassaanngitsumik.” (Tussiaat 86:12) Inuit naalattut taamanikkussamut Jehovap naalannassusianik tamakkiisumik ersersitsisinnaajumaarput naassaanngitsumillu taassuminnga unnersiutiginnissinnaajumaarlutik. Qanoq nuannertigissava! Illit maannangaaq Jehovap Guutip naalannassusianik ersersitsisarpit naassaanngitsumut taamaaliortarnissat siunertaralugu?
[Qupp. 32-mi assiliartat]
Jehovap naalannassusia ukua iliuuserisarnerisigut ersersittarpiuk?