Ataqqinaammik pissarsinissannut sunaluunniit akornutaateqinagu

 1, 2. (a) Biibilimi oqaaseq hebræerisooq ataqqinaammik nutserneqartartoq qanoq isumaqarpa? (b) Allaaserisami matumani apeqqutit suut akissutissarsissavavut?

OQAATSIT “ataqqinaat”, “nersornaat” imaluunniit “naalannaat” tusaraangakkit suna eqqarsaatigisarpiuk? Guutip pinngortitarsuisa alutornangaassusiat eqqarsaatigisarpiuk? (Tuss 19:1) Pisuunik, ilisimatuunik iluatsilluartunilluunniit nersuineq ataqqinninnerluunniit eqqarsaatigisarpiuk? Biibilimi oqaaseq hebræerisooq “ataqqinaat”-mik, “naalannassuseq”-mik aamma “ataqqinninneq”-mik nutserneqartartoq nutsiinnavillugu “oqimaatsuuneq”-mik isumaqarpoq. Itsaq aningaasat saffiugassanit, soorlu kuultimit sølvimilluunniit, sananeqartarput. Aningaasaq oqimaanneruguni naleqarnerussaaq. Taamaattuminguna oqaaseq “ataqqinaat”-mik nutserneqartartoq erlinnangaartumut alutornangaartumulluunniit tunngatinneqarsinnaasoq.

² Inuit pissaanillit tusaamasalluunniit ataqqineqakkajuttarput. Inuilli Guutimit ataqqineqarumallutik qanoq ittuusariaqarpat? Ussatit 22:4-mi ima allassimasoqarpoq: “Qanilaarnerup Guutimillu mianerinninnerup akissarsiarititaat tassaapput pisuussutit ataqqinaallu inuunerlu.” Ajoqersugarlu Jaaku ima allappoq: “Naalagaq maniguuffigisiuk, taava akitsisissavaasi.” (Jaak 4:10) Jehovap qanoq ataqqinarsisittarpaatigut? Ataqqinaammik pissarsinissatsinnut suna akornutaasinnaava? Qanorlu allat ataqqinaammik pissarsinissaannut ikiorsinnaavavut?

 3-5. Jehovap qanoq ataqqinarsisittarpaatigut?

³ Tussiaasiortup Jehovamit ataqqinarsisinneqarnissani, imaluunniit naalannarsisinneqarnissani, upperaa. (Atuakkit Tussiaat 73:23, 24). Jehovap inuit naalattut qanoq ataqqinarsisittaramigit? Kiffani maniguuttut assigiinngitsorpassuartigut ataqqinarsisittarpai. Piumasaminik paasinnitsinnerisigut pilluaqqusarpai. (1 Kor 2:7) Oqaatsiminik tusartut maleruaasullu attaveqarluarfiginerisigut ataqqinarsisittarpai. — Jaak 4:8.

⁴ Jehovap aamma nutaarsiassamik nuannersumik oqaluussisinnaatittarnitsigut ataqqinarsisittarpaatigut. (2 Kor 4:1, 7) Oqaluussinermi peqataasarnitsigut Jehova nersoraangatsigu taassumannga ataqqisaalertarpugut, iliuutsivullu allanut iluaqutaasarput. Jehovap ima neriorsorpaatigut: “Ataqqinnitsikka . . . ataqqissavakka.” (1 Sam 2:30) Jehovap oqaluussinermi peqataasut tusaamaneqarlualersinnerisigut, tassa akuerinerisigut, ataqqisarpai. Ilaagiinniittullu ajunngitsumik oqaluuserisarpaat. — Uss 11:16; 22:1.

⁵ Jehovamut naalattut qanoq siunissaqarpat? Biibilimi ima neriorsuuteqarpoq: ‘Qutsissisikkumaarpaatit nuna ilinnut kingornussareqqullugu; iluaatsut piiarneqartillugit isigiumaarpatit.’ (Tuss 37:34, 1900) Guutip kiffai immikkorluinnaq ittumik, naassaanngitsumik inuunissamik, neriugisaqarput. — Tuss 37:29.

 6, 7. Sooq inuppassuit Jiisusip Missiarsiunera upperinngilaat?

⁶ Jehovamit ataqqinaammik pissarsinissatsinnut akornuteqarsinnaavugut? Aap, assersuutigalugu Jehovamut attaveqarluanngitsut isumaat pingaartippallaalersinnaavavut. Maluginiaruk apustili Johannesi Jiisusip nalaani siuttut pillugit qanoq allattoq: “Amerlasuut, allaat Killisiuisoqatigiinni ilaasortat, upperfigilerpaat. Farisiiarilli pillugit nassuerumanngillat synagoginit peersitaajumanatik, naalannarsinissarmi inunnit pisoq Guutimit pisumit iluarinerugamikku.” (Joh 12:42, 43) Siuttut taakkua farisiiarit qanoq isumaqarnerat pingaartippallaartussaanngikkaluarpaat.

⁷ Jiisusip inuppassuit Missiarsiunerminik upperinninnginnerannut pissutaasoq nassuiaqqissaarpaa. (Atuakkit Johannesi 5:39-44). Israelikkut Missiarsip tikiunnissaa ukiuni hundredelippassuarni utaqqisimavaat. Jiisusi oqaluussilluni aallartimmat inuppassuit Danielip siulittuutaanit paasisimassavaat Missiarsi tikiussimasoq. Allaat qaammatialuit tamatuma siorna inuit ilaasa Johannesi Kuisisoq Missiarsiusoraat. (Luk 3:15) Missiarsili tikiummat Allakkanik ajoqersuisut Jiisusi upperinngilaat. Sooq? Jiisusip taamatut isumaqarnerannut pissutaasoq ersersippaa ima aperinerisigut: “Qanoq ilillusi uppersinnaassavisi nersorneqaatissaq ilissi nammineq akornassinnit pissarsiariniartarussiuk Guutituaasumilli pissarsiariniarnagu?”

 8, 9. Inunnit ataqqinarsisinneqarneq Jehovamit ataqqinarsisinneqarnermit qanoq pingaaruteqarnerorpasissinnaava? Assersuuteqarit.

⁸ Ataqqinaat qaamanermut assersuunneratigut inunnit ataqqinarsisinneqarnerup Jehovamit ataqqinarsisinneqarnermit qanoq pingaartinneqarnerulersinnaanera paasisinnaavarput. Avataarsuarmi qaamasorpassuaqarpoq. Kingullermik unnukkut aallaaqqinnerani qilammi ulloriarpassuit takugakkit qanoq misigivit? Ulloriarpassuit alutornartut tupigusuutigisimassavatit. (1 Kor 15:40, 41) Illoqarfiilli ilaanni qullerpassuit qaamanerat pissutigalugu ullorissat takuneqarpiarsinnaaneq ajorput. Sooq? Aqquserngit, arsaattarfissuit inissiarsuillu qullii ullorissanit qaamanerugamik kusanarnerullutillu? Naamik. Illoqarfinni qulliit qaninnerunerat pissutigalugu ullorissat takujuminaatsinnerusarpavut. Taamaattumik ullorissat alutornassusiat takusinnaajumallugu illoqarfik qimattariaqarparput.

⁹ Taamatuttaaq inunnit ataqqinarsisinneqarneq Jehovamit ataqqinarsisinneqarnermit pingaaruteqarnerorpasissinnaavoq. Inuppassuit ikinngutimi ilaquttamilu qanoq isumaqarnerat annilaangagisaramikku nutaarsiassaq nuannersoq malillugu inoorusunneq ajorput. Allaat Jehovamut kiffartortut ilaasa allat qanoq isumaqarnerat isumakuluutigivallaarsinnaavaat. Assersuutigalugu inuusuttoq oqaluussiffigisartakkamini ilisimaneqarluarpoq.Taamaattorli inuit amerlanersaasa Jehovamut Nalunaajaasuusoq ilisimanngilaat. Annilaangalissava tassanilu oqaluussinani? Assersuutigisinnaasarput alla tassaavoq Jehovamut kiffartornermi iliuuseqarnerorusuttoq, anguniakkanili pissutigalugit allanit illaruaatigineqartoq. Jehovamik kiffartorfiginninnerup pingaartittariaqarneratut pingaartitsinngitsut maleruutiinnarfigissavai? Imaluunniit ingasattumik ajortuliorsimasoq assersuutigisinnaavarput. Ilagiinni akisussaaffini annaarusunnginnamigit imaluunniit ilaquttani ikinngutinilu pakatsisikkusunnginnamigit ajortuliorsimanini isertuutissavaa? Jehovamik ikinnguteqarnini pingaarnerpaatikkuniuk utoqqaanertanut ikioqqulluni saaffiginnissaaq. — Atuakkit Jaaku 5:14-16.

10. (a) Allat uagut pilluta qanoq eqqarsarnersut isumakuluutigivallaarutsigu qanoq kinguneqarsinnaava? (b) Anneruniajuikkutta suna qularutiginngilluinnarsinnaavarput?

¹⁰ Imaassinnaavoq kristumiuulluarnerulerniarlutit tamaviaaraluarlutit qatanngutinnit siunnersorneqartutit. Siunnersorneqarnerit malillugu iliorumassavit iluaqutigalugulu? Imaluunniit makitanerit, tusaamaneqarninnik isumakuluutiginninnerit iliuuserisimasannulluunniit utoqqatsissutissarsiornerit pissutigalugu siunnersuut malikkumassanngiliuk? Aamma imaassinnaavoq qatanngutit allat peqatigalugit suliaqartutit. Isumassarsiatsialat suleruloornerillu allat nersualaarneqassutigissaneraat isumakuluutigissaviuk? Eqqaaneqartut ilaannik misigisaqaruit eqqaamassavat ‘anneruniajuitsup ataqqinaat pisassarimmagu’. — Uss 29:23.

11. Allanit nersualaarneqaraangatta qanoq misigisariaqarpugut, aamma sooq?

¹¹ Utoqqaanertat qatanngutillu angutit ilagiinni amerlanerusunik akisussaaffeqalernissaminnik suliniuteqartut eqqaamasariaqarpaat ‘inunnut ataqqeqqusaartannginnissartik’. (1 Tim 3:1; 1 Th 2:6, 7) Qatanngut angut suliaminut nersualaarneqaruni qanoq qisuariartariaqarpa? Soorunami kunngitut Saulitut imminut eqqaassutissiussanngilaq. (1 Sam 15:12) Nassuerutigissavaali Jehovap ikiuineratiguinnaq iliuuseqarsinnaasimalluni siunissamilu Jehovamit pilluaqquneqartuaruni aatsaat suliamini iluatsitsilluarsinnaalluni? (1 Petr 4:11) Qanoq ataqqinarsisinneqarusunnerput ersertarpoq nersualaarneqaraangatta qanoq misigisarnitsinnit. — Uss 27:21, NW.

12. Sooq juutit ilaasa Jiisusip tusarliussaa tusarusunngilaat?

¹² Eqqunngitsunik kissaateqarneq Jehovamit ataqqinarsisinneqarnissatsinnut aamma akornutigisinnaavarput. Eqqunngitsunik kissaateqarnerput pissutigalugu sallusuissut tusarusunngilluinnalersinnaavarput. (Atuakkit Johannesi 8:43-47). Assersuutigalugu Jiisusip juutit ilaat oqarfigai tusarliussani tusarusunngikkaat ataatamik, Diaavulup, pilerigisai naammassiumagamikkit.

13, 14. (a) Misissueqqissaartartut qarasaq inuillu nipaat pillugit qanoq paasisaqarsimappat? (b) Kimut tusarnaarniarnerput qanoq aalajangertarparput?

¹³ Ilaannikkut tusarusutaannavut tusaasarpavut. (2 Petr 3:5, NW) Jehovap qarasarput nipit ilaannik tusaasaqannginnissamut aalajangiisinnaanngortillugu pinngortissimavaa. Unillatsiarit massakkullu suut tusaasinnaanerlugit eqqarsaatigalugu. Aatsaannguummat nipit amerlanersaat tusaasimanavianngilatit. Sooq? Qaratsappit nipit taakkua assigiinngitsut tusaasinnaagaluarlugit ataasiinnarmik aallutaqartikkamitit. Allat oqaluttut tusarnaaraangatsigit qaratsatta taamaaliornissaq sapernartilertarpaa. Misissueqqissaartartut paasisimavaat inunnut marlunnut ataatsikkut tusarnaaqqissaarsinnaanngitsugut. Taamaattumik marlunnit oqaluunneqaraangavit aalajangertariaqartarpat kina tusarnaarniarlugu. Inuk tusarnaarusutat tusarnaassavat. Jiisusip nalaani juutit ataatamik, Diaavulup, pilerigisai naammassiumagamikkit Jiisusimut tusarnaarniarnatik aalajangerput.

¹⁴ Biibilimi allassimavoq “ilisimassuseq” aamma “sianiissuseq” uagutsinnik tusarnaalersitsiniartuartut. (Uss 9:1-5, 13-17) Aalajangertariaqarpugut. Kina tusarnaassavarput? Tamatumani kimit iluarisaarusunnerput aalajangiisuussaaq. Jiisusimut savaataagutta taanna tusarnaarlugulu malissavarput. (Joh 10:16, 27) Jiisusi oqarpoq malinnitsini ‘sallusuissummit pisuusut’. (Joh 18:37) ‘Takornartap nipaa ilisarinngilaat.’ (Joh 10:5, 1936) Maniguullutik Jiisusimik malinnittut Guutimit ataqqinarsisinneqassapput. — Uss 3:13, 16; 8:1, 18.

15. Sooq Paulusi allappa naalliuutigisani Efesosimiunut ataqqinaataasut?

¹⁵ Allat Guutimit ataqqinarsisinneqarnissaannut qanoq ikiorsinnaavavut? Pinertusaarnitsigut maligassiuinikkut. Efesosimi ilagiit Paulusip ima allaffigai: “Qinnuigaassi ilissi pissutigalusi naalliuutigisakka nikalluutigeqqunagit. Tamakku ilissi ataqqinaatissaraasi.” (Ef 3:13) Sooq Paulusi allappa naalliuutigisani Efesosimiunut ataqqinaataasut? Paulusip ajornartorsiuteqaraluarluni qatanngutiminik kiffartuussinermigut ersersippaa Guutimik kiffartorfiginninneq kristumiunut pingaarnerpaasariaqartoq. Paulusi misilinneqarnermini nakkaannarsimagaluaruni qatanngutai eqqarsarsimasinnaapput Jehovamik ikinnguteqarnertik, oqaluussinertik neriuuteqarnertillu pingaaruteqanngitsut. Paulusip pinertusaarnermik maligassiuinermigut qatanngutiminut ersersippaa Kristusimut ajoqersugaaneq sunit tamanit pingaaruteqarnerpaasoq.

16. Paulusi Lystrami qanoq pineqarpa?

¹⁶ Paulusip ilungersornera pinertusaarneralu qatanngutinut qanoq iluaqutaatigisimasut eqqarsaatigiuk. Apustilit Suliaanni Paulusi Lystrami qanoq pineqarnersoq ima allaatigineqarpoq: “Juutinik Antiokiameersunik Ikonionimeersunillu tikiuttoqarpoq, taakkua inuit inallugit Paulusi ujaqqanik milloortippaat; taava uniarlugu illoqarfiup avataanut annippaat toqusimasorigamikku. Ajoqersukkalli ungummanni nikuippoq illoqarfimmullu iserluni. Aqaguanilu Barnaba ilagalugu Derbemut aallarpoq.” (ApS 14:19, 20) Paulusip ujaqqanik milloorneqarnermi kingunerisaanik toqungajareerluni aqaguani 100 kilometerisut ungasitsigisumut pisuinnaq angalasimanera ilungersunarsimassaqaaq!

17, 18. (a) Paulusip Lystrami naalliunnera Timotheusip qanoq nalunngissimasinnaavaa? (b) Paulusip pinertusaarnermigut maligassaalluarnera Timotheusip qanoq iluaqutigisimasinnaavaa?

¹⁷ Paulusi ujaqqanik milloorneqareermat Timotheusi ikiuuttunut ilaava? Imaassinnaavoq. Apustilit Suliaanni ikiuussimanera pillugu allassimasoqanngilaq. Timotheusilli qanoq pisoqarsimanera nalunngilaa. Paulusip Timotheusimut allakkami aappaanni ima allaffigaa: “[Illit] malitsigaakkit ajoqersuutikkut, inuutsikkut . . . Antiokiami [anisitaaffinni], Ikonionimi [ujaqqanik milloorniarneqarfinni] Lystramilu [ujaqqanik milloortiffinni] atukkakkut. Qinugineqarnerit qanoq ittulluunniit atortariaqartaraangakkit Naalakkap tamakkunannga tamanit annaattarpaanga.” — 2 Tim 3:10, 11; ApS 13:50; 14:5, 19.

¹⁸ Timotheusip nalunngilaa Paulusi naalliunnermini tamani pinertusaartoq. Paulusip maligassiuilluarnera Timotheusip ilinniarfigingaarsimassavaa. Paulusip Lystramiitilluni paasivaa Timotheusi ilagiinni maligassaalluartoq aamma Lystrami Ikonionimilu qatanngutini ‘tusaamasaalluartoq’. (ApS 16:1, 2, 1936) Piffissap ingerlanerani Timotheusi akisussaaffeqarnerulernissaminut piareerpoq. — Fil 2:19, 20; 1 Tim 1:3.

19. Ajornartorsiutitsinnik naammaginnilluta atuisarnerput allat qanoq iluaqutigisinnaavaat?

¹⁹ Guutip piumasaatut iliortuarluta maligassiuinerput inuusuttut Guutimut kiffartortutut iluarineqarnerunissaminnut iluaqutigisinnaavaat. Inuusuttut maluginiartarpaatigut oqaluussinermilu inunnik oqaluussiffiginneriaaserput ingammillu pissutsini artornartuni periartarnivut ilinniarfigisarpaat. Paulusi allappoq inuit inuunermik naassaanngitsumik pissarsinissaannut ikiorsinnaajumallugit ajornartorsiuterpassuit naammagalugit atorsimallugit. — 2 Tim 2:10.

20. Sooq Guutimit ataqqinaammik noqqaassutiginnittuartariaqarpugut?

²⁰ ‘Nersorneqaatissap Guutituaasumit pissarsiariniartuartarnissaanut’ pissutissaqarluarpugut. (Joh 5:44; 7:18) Jehovap “[ataqqinaammik] noqqaassutiginnittut inuunermik naassaanngitsumik pisassaqartissavai”. (Atuakkit Romamiut 2:6, 7). Ajornartorsiutitsinnillu naammaginnilluta atuisarnerput allat aalajaannissaminnut naassaanngitsumillu inuuneqalernissaminnut iluaqutigisinnaavaat. Taamaattumik Guutimit ataqqinaammik pissarsinissannut sunaluunniit akornutaateqinagu.