Aatsaat taama anersaakkut atugarissaartigaagut!
1 Amerlanerit ima oqarusuttarput: „Aatsaat taama atugarissaartigaanga.“ Amerlanerit isumaqarput taama oqarsinnaallutik aatsaat pigisatigut ajunngitsuuterpassuarnik peqaraangamik ’qasuersaarsinnaagaangamillu, nerisinnaallutillu imersinnaallutillu nuannaarsinnaagaangamik.’ (Lúk. 12:19) Tamatuma akerlianik uagut anersaakkut ajorsaateqanngilagut. (Tuss. 34:11) Qanoq tamaassinnaava?
2 Ussatit 10:22-imi allassimavoq: „Jehovap pilluaqqusinera pisuunngortitsisarpoq.“ Guutip iluarinninnera misigaarput qularutiginagulu oqarsinnaalluta Guutip ’atugassatsinnik sunik tamanik tuningaartaraatigut.’ (1 Tim. 6:17) Tamatuma inunnit nunarsuarmiittunit tamanit pisuunerpaanngortippaatigut. Tussiaasiortup tamanna paasisimavaa qujamasullunilu ima allappoq: „Pilluarput inuiaat taama ittunik atugaqartut, pilluarput inuiaat Jehovamik Guuteqartut!“ — Tuss. 144:15.
3 Pilluaqqussutisiatit kisikkit: Akornatsinni ikittut pigisat tungaasigut pisuujupput. Pilluaqqussutaavorli ulluinnarni pisariaqartitanik ernumassuteqarpallaartariaqannginnissaq. Jehovap nalunngilaa sunik pisariaqartitaqartugut neriorsorsimavaatigullu tamakkuninnga isumagissalluta. (Mat. 6:31-33) Taamaattumik isummatsigut naleqanngitsumik eqqissisimavugut.
4 Kisiannili anersaakkut pilluaqqussutit annerujussuupput. Anersaakkut inuussutissat Jehovameersut inuunissatsinnut aalajangiisuupput. (Mat. 4:4) Silamiunit anersaakkut inuussutissarsiortut kaapput, uagut naammattorsuarnik nerisassaqarlutalu imigassaqarpugut. (Jes. 65:13) ’Inussiap aalajaatsup’ imaaruttussaanngitsumik ilisarsinermik inuunermut naassaanngitsumut sammisumut tuniuarpaatigut. — Mat. 24:45, NV; Juá. 17:3.
5 Nunarsuaq tamakkerlugu qatanngutigiissutut peqatigiinni qatanngutinik asannittunik nuannersumik erlinnartumillu peqateqarpugut. (Juá. 13:35) Ilagiit tassaapput umiarsualivik oqquiffiusoq tuppallersarneqarfigisinnaasarput inuummarissarfigisinnaasarpullu. Utoqqaanertat tarnitsinnik piggassisuupput ikiortarlutalu ajornartorsiutinik assigiinngitsunik aniguiniarnitsinni. (Epr. 13:17) Qatanngutivut qanittuaannarutsigik immitsinnut qiimmassarlutalu nakussassaqatigiissaagut aalajaattuaannarsinnaanissatsinnut. — Rûm. 1:11, 12.
6 Allaat suliarput pilluaqqussutaavoq. Amerlanerit suliffeqarput pikkunaagisaminnik naammagisimaarnarinngisaminnillu. Allanulli nutaarsiassap nuannersup oqaluussissutiginera pilluarnartuuvoq, uatsinnut oqaluussiffigisatsinnullu. (ap. sul. 20:35) Eqiasuilluta suliavut iluarusuutigeqaavut. — Nal. oq. 2:24.
7 Pingaarnerusumik siunissamik nuanningaartumik neriuutissaqarpugut. (Rûm. 12:12) Silarsuaq nutaaq naammalluinnartoq naapertuilluartorlu qilanaaraarput, asasavut ilagalugit naassaanngitsumik eqqissilluta pilluarlutalu inuuffigisinnaasarput. Silarsuaq neriuummut erlinnartumut tamatumunnga assersuunneqarsinnaasumik neqeroorutissaqanngilaq. — 1 Tim. 6:19.
8 Pingaartitsinerput qanoq takutissinnaavarput? Jehovap tunniussai taarserlugit akilersinnaanngilagut. Taamaallaalli pingaartitsinerput ersersissinnaavarput (1) ullut tamaasa ajunngissusia pisassarinngisaraluarput qujassutigineratigut (Evf. 5:20), (2) naalannikkut asanninnitta ersersinneratigut (1 Juá. 5:3), (3) nutaarsiassamik nuannersumik oqaluussinikkut aqqa illernartinneratigut (Tuss. 83:19) aammalu (4) ilagiit suleqatigalugit uummammik tamarmiusumik tapersersuinitsigut. — 1 Tim. 3:15.
9 Nunarsuarmi tamarmi inunnit tamanit pilluarnerpaanissatsinnut pissutissarpassuaqarpugut. (Tuss. 144:15b) Qanortoq isumarput, ileqquvut kiffartuussinerpullu anersaakkut paratiisimiinnitsinnik nuannaarutiginninnitsinnik ersersitsisuugili; aatsaat taama atugarissaartigaagut! (kmD 5/96 Vi har aldrig . . .)