Pulaaqqiisinnaanissannut nakimaassuseq ineriartortiguk
1 Pulaaqqiineq nuannaraajuk? Oqaluussisartut amerlasuut nuannaraat. Ilaalli tunuarsimaalaartarput, ingammik inuit pulaaqqaarnermi soqutiginnippallaanngitsut pulaaqqinnissaat nangaassuteqarfigisarpaat. Kisianni Guuti ikiortigalugu pulaaqqiinermi nutaarsiassaq nuannersoq oqaluussissutigiumallugu sapiillisaaraangamik nakimaassuserlu ineriartortikkaangamikku immaqa tupaallaatigissavaat oqaluusseriaaseq tamanna qanoq piuminartigisoq kinguneqarluartigisorlu. (1 Tás. 2:2) Qanoq ililluni?
2 Siullermik eqqaamasariaqarparput pulaaqqiineq pulaaqqaarnerlu assigiinngitsuummata. Pulaaqqiigaangatta takornartamut pulaarnerunngilaq, amerlanertigullu ilisarisimanerulaagaq oqaloqatigiuminarnerusarpoq. Pulaaqqiisarneq ilungersuutigigutsigu Biibilimik siumukariartortumik atuaqqissaaqateqarnissamik kinguneqarsinnaavoq.
3 Illumiit illumut angalaaraangatta inuit siornatigut soqutiginninngitsut naammattoortarpavut. Suna pillugu taakkununnga pulaaqattaartarpugut? Takusinnaagatsigu inuit atugaat allanngortartut, ilaallu siornatigut soqutiginninngikkaluartut, imaluunniit allaat assortuisimagaluartut tullianik soqutiginninnermik ersersitsisartut. Tamanna eqqarsaatigalugu piareersarluartarpugut Jehovalu pilluaqqoqqulluta qinnuigisarparput oqaasissatta inuit sallusuissummut soqutiginnittunngortissinnaaqqullugit.
4 Inuit soqutiginnissimanngitsut illumiit illumut oqaluussiffiginiarlugit ilungersortarutta, pissutissaqarnerunnginnerpugut Naalagaaffimmik tusarliussamut soqutiginnippasittut pulaaqqissallugit? — ap. sul. 10:34, 35.
5 Amerlanersatta sallusuissut ilikkarsimavaat oqaluussisartup naammagittarluni pulaaqqittarsimammatigut. Illit taamaakkuit imminut aperisinnaavutit: ’Aallaqqaammut oqaluussisartup qanoq isigisimavaanga? Ingerlaannaq Naalagaaffimmik tusarliussaq ilassinerpara? Soqutiginnippasissimanerpunga?’ Aap, qujamasuutigisinnaavarput oqaluussisartup pulaaqqikkumasimammatigut ’Guutimigut ersisuerluni’ pulaaqqiilluni sallusuissummik ilinniartikkiartorluta. Taavami inuit siullermik soqutiginnippasittut kingusinnerusukkulli naapeqqikkumanngippatigut? Isumalluarnissaq pingaaruteqarlunnarpoq, soorlu misilittakkap matuma takutikkaa:
6 Oqaluussisartut marluk ullup qeqqata siorna aqqusinermi oqaluussillutik arnaq inuusuttoq meeqqisartoq naapippaat. Arnaq atuagassiamik tunineqarpoq oqaluussisartullu qinnuigai sapaammi pulaaqqulluni. Pulaaqqipput arnalli oqaloqatigissallugit piffissaqarfiginngilaa. Neriorsuivorli sapaatip tullia piffissaqassalluni. Qatanngutit arnat qularigaluarpaat isumaqatigiissut eqqortissaneraa, pulaaqqikkamilli utaqqineqarput. Biibilimik atuaqqissaaqatigisalerpaat arnarlu siumukarasuarpoq. Erniinnaq ataatsimiigiartalerpoq oqaluusseqataasalerlunilu. Maanna kuisereersimavoq.
7 Pulaaqqaarnermi tunngaviliigit: Iluatsitsisumik pulaaqqiineq amerlanertigut pulaaqqaarnermi tunngavilerneqartarpoq. Pulaakkap oqaasii tusarnaaqqissaakkit. Sumik paasitinneqarpit? Upperisarsiornermut soqutigisaqarpa? Innuttaaqatigiinnut tunngasut soqutigai? Ilisimatussuseq, oqaluttuarisaaneq imaluunniit avatangiisit soqutigai? Qimatsinnagu apeqqummik eqqarsarnartumik eqqaasaqarsinnaavutit neriorsuillutillu pulaaqqikkukku tamanna Biibili tunngavigalugu akissallugu.
8 Assersuutigalugu pulaakkap nunarsuarmi paratiiseqalernissamik Biibilip neriorsuutai nuannarippagit pitsaassaaq tullianik tamakku oqaloqatigiissutigissallugit. Anitinnak ima aperisinnaavutit: „Qanoq ililluta qularinngissinnaavarput Guutip neriorsuut tamanna ilumut eqquutikkumaaraa?“ Nangillutillu oqarsinnaavutit: „Immaqa arlaanni ilaquttavit angerlarsimaneranni uteqqissinnaavunga Biibilillu apeqqummut tamatumunnga akissutaa takutillugu.“
9 Pulaagaq aalajangersimasumik soqutiginninngippat apeqqutit Naalagaaffimmut Kiffartuuteqarneq-up tunuani eqqaaneqartut ilaat eqqartorsinnaavat tamannalu pulaaqqiinermi oqaloqatigiissutigisinnaallugu.
10 Eqqorluartumik allattuigit: Allattukkatit eqqorluartuusariaqarput. Pulaareeruit ingerlaannaq pulaakkap atia najugaqarfialu allattukkit. Illup normua imaluunniit aqqusernup atia eqqoriaannarnagit misissukkit qulakkeerniarlugu eqqornersoq. Oqaloqatigisat pillugu allataqalaarit. Suna oqaloqatigiissutigineqartoq, allassimaffiit suut atuarneqartut, atuagassiat suut tunniunneqarnersut aammalu apeqqutit suut pulaaqqiileruit akissanerlugit allattukkit. Aamma pulaaqqaarneq ulloq suna qassinullu pisimanersoq qaqugulu pulaaqqissanerlutit allattukkit. Maanna eqqorluartumik allattugaqareeravit paarilluassavatit! Atoqqissagukkit nanisinnaasannut toqqukkit. Pulaagaq aammalu pulaaqqiinermi qanoq iliorniarnerlutit eqqarsaatigikkit.
11 Anguniagassatit eqqumaffigikkit: Siullermik inussiarnerlutit pulaagaq ilorrisimaartissavat. Takutissavat taanna inuttut soqutigalugu taamaattorli qaninniarpallaarnak. Pulaaqqaarnermi apeqqutigisat uteqqiffigiuk. Pulaakkap isumaa tusarnaaqqissaaruk oqaasiilu ilumoorlutit pingaartikkit. Taava takutissinnaavat Biibilip tamatumunnga oqaasii sooq silatusaarnerusut. Periarfissaqaruit eqqarsaat alla tamatumunnga tunngasoq atuakkamit Ilisarsineq inuunermut naassaanngitsumut sammisoq-mit takutiguk. Eqqaamajuk pulaaqqiinerup siunertaa tassaasoq Biibilimik atuaqqissaaqateqalernissaq.
12 ’Ilisarsineq’ paasiuminartumik allanneqarsimammat oqaluussisartut amerlasuut sapiiserlutik Biibilimik atuaqqissaaqatitik kajumissaarsimavaat ataatsimiigiartalernissaannut Jehovallu nalunaajaasuinik ilagisartagaqarnissaannik. Siornatigut sivisuumik atuaqqissaaqatigereeraangatsigik aatsaat ataatsimiinnernut qaaqqusarpavut. Maannakkut atuaqqissaaqqaartalernerminniilli amerlasuut ataatsimiigiartarput taamaattumillu siumukarnerusarlutik.
13 Aappariit suleqatimik ilaat oqaluussiffigilerpaat. Sallusuissummut soqutiginninnermik ersersitsimmat ’Ilisarsineq’ tunngavigalugu Biibilimik atuaqqissaarnissamik neqeroorfigaat. Aamma oqarfigaat ataatsimiinnerit najuuffigisariaqarai tassani apeqqutaasa ilarpassui akineqassammata. Atuaqqissaaqatigineqarnissani akueraa, allaat sapaatip akunneranut marloriarluni atuaqqissaartalerluni aamma naalagaaffilersaartarfimmi ataatsimiigiartalerluni.
14 Atuagassiaaraq Guutip sumik piumaffigaatigut? atortaruk: Ataatsimeersuarnermi „Eqqissinermik Guutip pianik tusarliisut“-mik qulequtalimmi atuagassiaaraq Guutip sumik piumaffigaatigut? saqqummersimavoq. Atuagassiaaraq taanna atorlugu inuit Guutimik mianerinnittut Biibilimik atuaqqissaaqatigisalersinnaavavut qanoq annertutigisumik ilinniartitaasimanerat apeqqutaatinnagu. Tamatumuuna Biibilimi ajoqersuutigineqartut tunngaviunerusut atuaqqissaaqatigiissutigineqarsinnaapput. Allat Guuti pillugu ilisarsitinnissaannut atussallugu pitsaalluinnassaaq. Tassani sallusuissut ima paasiuminartigisumik ersaritsigisumillu nassuiarneqarmat tamatta inuit allat Guutip piumasaqaataanik ilinniartillugit atorsinnaavarput. Qularnanngitsumik oqaluussisartut amerlasuut periarfissaqassapput atuagassiaaraq atorlugu Biibilimik atuaqqissaaqateqalernissaminnut.
15 Ilaat immaqa isumaqassapput ’Ilisarsineq’ atuaqqissaassallugu piffissaqarfiginagu, atuagassiaaqqamili ilinniagassat naatsut atuaqqissaaqatigiissutigiumanerullugit. Ilinniarsimasatik nuannaarutigissavaat. Inuit ukiuni hundredelippassuarni apeqqutigisartagaat makku quppernerni siullerni akineqarput: Guuti kinaava? Diaavulu kinaava? Guutip nunarsuaq sumik siunertaqarfigaa? Guutip naalagaaffia suua? Upperisaq ilumoortoq qanoq ililluni nanineqarsinnaava? Atuagassiaaqqami sallusuissut paasiuminartumik nassuiarneqarpoq, kisianni tusarliussaa sunniuteqartorujussuuvoq. Utoqqaanertat kuisittussallu sammisassaat tamarmik tassani nassuiarneqarput, atuagassiaararlu ’Ilisarsineq’ tunngavigalugu atuaqqissaarluarnissamut alloriarfissatut atorneqarsinnaalluni.
16 Pulaaqqiinermi atuaqqissaarnissaq neqeroorutigiumagukku ima oqaannarsinnaavutit: „Nalunngiliuk minuttialuit atorlugit Biibili tunngavigalugu apeqqut pingaaruteqaqisoq akineqarsinnaasoq?“ Taava atuagassiaaqqami ilinniagassat ilaata aallarniutaani apeqqutigineqartut ilaat eqqaajuk. Utoqqasaamut pulaaruit ima oqarsinnaavutit: „Nalunngilarput Jesusip nunamiikkallarami inuit ajorunnaarsittarai. Siunissamili napparsimasut, utoqqaat toqusimasullu qanoq iliuuseqarfigissavai?“ Ilinniagassaq 5-imi akissutai nanineqarsinnaapput. Upperisarsiornermut soqutigisallip immaqa apeqqutip matuma akissutaa paaserusussavaa: „Qinnutit tamaasa Guutip tusartarpai?“ Ilinniagassaq 7-mi sammineqarpoq. Ilaqutariiusut immaqa paasiumassavaat: „Angajoqqaat meeqqallu tamaasa immikkut Guutip qanoq piumasaqarfigai?“ Ilinniagassaq 8-mi akineqarpoq. Apeqqutit allat imaapput: „Toqungasut inuusunik ajoqusiisinnaappat?“ (Ilinniagassaq 11-mi akineqartoq); „Sooq upperisarsioqatigiit kristumiuunerartut taama amerlatigippat?“ (Ilinniagassaq 13-imi akineqartoq); kiisalu „Guutimut ikinngutaalissaguit qanoq iliortariaqarpit?“ (Ilinniagassaq 16-imi akineqartoq).
17 Allanik oqaasillit ikiorneqarnissaat: Allanik oqaasillit naammattooraangatsigik qanoq iliortassaagut? Ajunnginnerussaaq oqaatsit inunnguutsimit pigisaat atorlugit ajoqersorneqarsinnaappata. (1 Kor. 14:9) Eqqaani allanik oqaasilinnik ilageeqarpat oqaluussisartoqarpalluunniit pulaagaq taakkunannga pulaarneqartariaqarpoq. Taamaappat oqaluussiffigisanik allanik oqaasilinnik nakkutilliisup pulaarneqarnissaat isumagissavaa.
18 Oqaluussisartup tuluttut oqaluttup angut vietnamimiusut oqaluttoq nuliaalu thaisut oqaluttoq atuaqqissaaqatigisalerpai. Atuaqqissaaqatigiitillutik atuakkat Biibilillu tuluttut, vietnamimiusut thaisullu atortarpaat. Assigiinngitsumik oqaasiliummata aallaqqaataani unamminiarnartuuvoq, oqaluussisartorli ima allassimavoq: „Aappariit anersaakkut sukkasuumik siumukarsimapput. Paasivaat meeqqatik marluk ilagalugit ataatsimiigiartarnissaq qanoq pingaartigisoq, unnuillu tamaasa Biibilimi atuaqatigiittarput. Paniat arfinilinnik ukiulik nammineq Biibilimik atuaqqissaaqateqarpoq.“
19 Allanik oqaasillit atuaqqissaaqatigigaanni arriitsumik ersarissumillu oqaluttariaqarpoq oqaatsit paasiuminartut atorlugit. Aammalu eqqaamasariaqarparput allat ataqqinnittumik oqaluffigisarnissaat.
20 Atuagassiaaqqami Guutip sumik piumaffigaatigut-mi assiliarpassuit kusanartut atorluartakkit. ’Assiliaq ataaseq oqaatsinit tuusintinit imaqarnerusinnaappat’ atuagassiaaraq assiliarpassualik pulaakkamut atuagarsuartut issaaq. Nammineq Biibiliutimini allassimaffinnik atuarnissaanut kajumissaaruk. Ilaqutaasa ilaat taassumunnga nutserisuusinnaappat qularnanngitsumik iluaqutaassaaq. — Takuuk Rigets Tjeneste oktobari 1990-imoortoq, qupperneq 3 4-lu; aamma marsi 1984-imoortoq, qupperneq 4.
21 Pulaaqqiaarit: Qanoq sivisutigisumik utaqqisariaqarpugut pulaaqqiitinnata? Oqaluussisartut ilaat ulloq ataaseq marlulluunniit qaangiukkaangata pulaaqqiisarput. Allat ullormi pulaaqqaarfiusumi kingusinnerusukkut aggeqqittarput. Piaarpallaarpa? Amerlanersaasa ajorinngilaat. Uagut oqaluussisartutut isumalluarnerusariaqarlutalu nakimaannerusariaqarpugut. Misilittakkat tulliuttut eqqarsaatigikkit:
22 Oqaluussisartoq 13-inik ukiulik illumiit illumut angalaarluni arnat marluk aqqusinermi takuai. Kajumissaarneqarsimagatta inuit sumiluunniit oqaluussiffigisariaqarlugit taakku saaffigai. Naalagaaffimmik tusarliussaq soqutigaat, tamarmillu ’Ilisarsineq’-mik tunineqarput. Oqaluussisartup inuusuttup adressii pivai, ullullu marluk qaangiummata pulaaqqiivoq tamaasalu atuaqqissaaqatigisalerlugit.
23 Qatanngutip arnap sapaatip-akunnera ataaseq qaangiukkaangat pulaaqqiiniartarpoq. Kisianni ulloq ataaseq marlulluunniit pulaaqqaarnerup kingorna pulaagaq saaffigilaartarpaa oqaloqatigiissutigisimasartik pillugu atuagassiamik nassarluni. Pulaagaq ima oqarfigisarpaa: „Ilanngutassiaq una takugakku eqqarsarpunga atuassallugu nuannarissagit. Maannakkorpiaq periarfissaqanngikkallarpunga oqaloqatigissallutit, pingasunngorpalli isumaqatigiissutigisatsitut aggeqqissaanga. Ajunngila?“
24 Inuk sallusuissummik soqutiginnileraangat qularnanngivissumik arlaatigut assortorneqalissaaq. Pulaaqqiipallattarutta eqqarliinit, ikinngutaanit allanillu assortorneqarnissaanik ajugaaffiginninnissaanut pissatsissinnaavarput.
25 Aqqusinermi allamiluuniit naapitatit soqutiginnilersittakkit: Oqaluussisartut amerlasuut aqqusinermi, biilit unittarfianni, bussini, umiarsualivimmi allaniluunniit oqaluussineq nuannarisarpaat. Atuagassiat agguaatiinnarnagit naapittavut soqutiginnilersinniarsarisariaqarpavut. Taamaattumik oqaloqatigisatta atii, adressiat ajornanngippallu oqarasuaatip normua paaserusuppavut. Taamaaliorneq ajornakusoortariaqanngilaq. Oqaloqatigiinneq naatinnagu allattukkatit tigusinnaavatit aperisinnaallutillu: „Arlaanni sumi oqaloqatigiinnerput nangissinnaavarput?“ Imaluunniit oqarsinnaavutit: „Ilanngutassiaq qularnanngitsumik soqutigisinnaasat atuartikkusukkaluarpara. Angerlarsimaffinnut suliffinnulluunniit aggiussinnaavara?“ Qatanngut angut ima aperiinnartarpoq: „Normumut qassimut sianerfigisinnaavakkit?“ Oqaluttuarpoq qaammatit pingasut ingerlaneranni pingasut kisimik pinnatik oqaloqatigisaasa tamarmik oqarasuaatimik normuat ingerlaannaq oqaatigisimagaat.
26 Oqarasuaat atorlugu soqutiginnilersitsigit: Qatanngutip arnap inuit illuni isumannaallisakkani najugaqarnerat pissutigalugu ornissinnaanngisani oqarasuaat atorlugu oqaluussiffigisarpai. Aamma oqarasuaatikkut pulaaqqiisarpoq. Sianeqqaaraangami oqartarpoq: „Nalugaluarparma, kisianni inuit maaniittut attaveqarfigisarpakka eqqarsaatit Biibiliminngaaneersut oqaloqatigiissutiginiarlugit. Piffissaqalaaruit neriorsuut manna . . .-mi allassimasoq atuffassissutigerusuppara.“ Allassimaffik atuareeraangamiuk oqartarpoq: „Tamanna misigissallugu nuannissaqaaq, ilaa. Oqaloqatigiinnerput nuannaarutigaara. Illittaaq qiimmaallaatigisimagukku arlaanni sianerfeqqissavakkit allassimaffik alla oqaloqatigiissutiginiarlugu.“
27 Sianeqqikkaangami sianerfigisaq oqaloqatigiissimanerminnik eqqaasittarpaa oqarlunilu pissutsit ajortut peerneqarsimalereerpata pissutsit pillugit Biibilimi qanoq allassimasoqartoq atuarusullugu. Taava ingerlaqqilluni Biibili tunngavigalugu oqaloqatigiilaartarput. Oqaluusseriaatsip tamatuma kingunerisaanik inuit 35-t assigiinngitsut angerlarsimaffimminnut qaaqqusimavaat Biibilimillu atuaqqissaaqatigiinnerit arfineq-marluk aallartinneqarput. Ukiukkut sila imaluunniit napparsimaneq pissutigalugu soqutiginnittunut pulaaqqiineq ajornakusoornerusarmat soormi oqarasuaatikkut attaveqatigissanngilavut?
28 Pisiniarfinni oqaluussisarnikkut pulaaqqiineq: Pisiniarfinni oqaluussineq tassaannaanngilaq atuagassianik agguaasarneq. Pisiniarfimmik piginnittut ilarpassui sallusuissut soqutigaat, soqutiginninnerallu ineriartortinneqartariaqarpoq. Ilaannikkut pisiniarfimmi Biibili tunngavigalugu oqaloqateqarsinnaavoq immaqaluunniit allaat Biibilimik atuaqqissaaqateqarsinnaalluni. Arlaanni immaqa ualikkut unitsialaartillugit piffissaniluunniit allani naleqqulluartuni saaffigisinnaavavut.
29 Nakkutilliisup angalasartup pisiniarfinnguamut pulaarluni piginnittoq aperaa takutissinnaanerlugu Biibilimik atuaqqissaaqatigiinneq qanoq ingerlanneqartartoq. Piginnittoq aperivoq qanoq sivisuutigissanersoq, paasigamiullu 15 minuttiinnaasoq igalaami allagartaq nivinngarpaa ima allassimasoq: „20 minuttit qaangiuppata uteqqissaanga.“ Issiaviit marluk aavai ’Ilisarsineq’-milu immikkoortut siulliit tallimat atuaqqissaaqatigiissutigaat. Angutip eqqortuliorusuttup taassuma ilinniakkani ima nuannaarutigitigai sapaatikkut oqalugiaammut Napasuliaq Alapernaarsuiffik-mik atuaqqissaaqatigiinnermut najuulluni, sapaatillu akunnerata tullia atuaqqissaaqatigineqaqqinnissani akueralugu.
30 Pisiniarfimmi Biibilimik atuaqqissaaqatigiinnissamik neqerooruteqassaguit ima oqarsinnaavutit: „15 minuttiinnaat atorlugit Biibilimik atuaqqissaaqatigiinnermut periaaserput takutissinnaavarput. Piffissaqaruit ilinnut takutikkusuppara.“ Taava minuttit taakkuinnaat atukkit. Pisinniarfimmi sivisuumik oqaloqateqarsinnaanngikkuit immaqa ajunnginnerussaaq piginnittoq najugaqarfianut pulaarukku.
31 Atuagassianik pisimanngitsuttaaq pulaaqqikkit: Soqutigisaqalaartut tamarmik pulaaqqittariaqarpavut atuagassianik tunineqanngikkaluartulluunniit. Kingorna paasigutsigu pulaakkap Naalagaaffik pillugu tusarliussaq soqutiginngikkaa piffissatta nukittalu inunnut allanut atornissaat pitsaanerussaaq.
32 Illumiit illumut oqaluussilluni qatanngutip arnap arnaq inussiarnersoq atuagassianilli tigusiumanngivissoq naammattorpaa. Oqaluussisartoq ima allassimavoq: „Ulluni arlalinni eqqarsaatigaara aalajangerlungalu pulaaqqissallugu.“ Qatanngut arnaq qinuvoq sapiissuseqarneruleramilu matua kasuttorfigalugu. Nuannaarutigeqisaminik iseqquneqarpoq. Biibilimik atuaqqissaaqatigisalerpaa, aamma ullup tullia atuaqqissaaqatigeeqqipput. Piffissap ingerlanerani pulaakkap sallusuissut ilassivaa.
33 Pilersaarusiorluarit angusaqarumallutit: Kajumissaarneqarpugut sapaatit-akunneri tamaasa pulaaqqiinermut piffissaqarnissatsinnut. Pilersaarusiorluarutta angusaqarsinnaaqaagut. Illumiit illumut angalaarfigisassavit eqqaaniittut pulaaqqitassat ujakkit. Biilerlusi suleqatigiikkaangassi pitsaanerussaaq ikittuinnaagussi, tamassi pulaaqqitassaqaqqullusi. Asuliinnaq biilertarneq pinngitsoorniarlugu pilersaarusioritsi.
34 Pulaaqqiinermik Biibilimillu atuaqqissaaqatigiinnermik angusaqarluartartut oqartarput ilumoorluni inuit inuttut soqutiginerat ersersissallugu pulaareernerullu kingorna eqqarsaatigiuarnissaat pingaaruteqartorujussuusut. Aamma Biibili tunngavigalugu eqqarsaat soqutiginartoq oqaloqatigiissutigisinnaasaq piareersarneqartariaqarpoq pulaaqqaarnermilu pulaaqqiinissamut tunngaviliisariaqarluni. Aammattaaq pulaaqqiiaartariaqarpoq. Eqqaamajuartariaqarparput anguniagassaq tassaasoq Biibilimik atuaqqissaaqatigiinneq.
35 Nakimaassuseqarneq pulaaqqiinermi angusaqarluarnissamut aalajangiisuuvoq. Qanoq ililluta nakimaassuseqalersinnaavugut? Apustili Paulus akilluni allappoq ’Guutitsigut ersisuerluta’ nutaarsiassaq nuannersoq allanut oqaluussissutigisariaqaripput. Tamatumani siumukarneq pisariaqartikkukku Jehova qinnuigisariaqarpat. Taavalu qinnutitit naapertorlugit iliuuseqartariaqarputit soqutigisallit naapitatit tamaasa pulaaqqillugit. Jehovap qularnanngivissumik ilungersornitit pilluaqqussavai.
[Qupp. 3-mi ungalusaq]
Qanoq ililluni pulaaqqiinermi angusaqarluartoqarsinnaasoq
◼ Inuit inuttut ilumoorlutit soqutigikkit.
◼ Biibili tunngavigalugu kajumissinartumik oqaloqatigiissutissaqarit.
◼ Pulaaqqiinissannut tunngaviliisarit.
◼ Pulaarnerup kingorna pulaakkat eqqarsaatigisaruk.
◼ Ulloq ataaseq marlulluunniit qaangiukkaangata aggeqqittarit soqutiginninneq ineriartortinniarlugu.
◼ Eqqaamajuk Biibilimik atuaqqissaaqateqarnissaq anguniagaralugu.
◼ Pulaaqqiinermut nakimaassuseq ineriartortissinnaajumallugu qinnuteqartarit.